लुका 4
4
शैतानगीइ येशुला लाःयोला फसाइतीजे छोल्क्योक
(मत्ती ४:१-११; मर्कुस १:१२-१३)
1येशु चाङ्मा लाइ काःङ्दी यर्दन लुःङ्बालाःम्ले लोःदी ओःङ्सी। चाङ्मा लाइ खुङला उजाड ठाउँला खेर्ती काःल्सी। 2ओःला शैतानगीइ येशुला ङीःमा खाल ङीथुप परीक्षाला पर्तीदी लाःयोला फसाइतीजे छोल्सी। ओः ङीःमा खाल ङीथुप येशुइ च्याङ साःदीम्याःके। ओः सोङ्गारा, खुङला माःङ्बुरा तोःपा तोदी एःके। 3ओःले शैतानगीइ येशुला लाःसी, “ख्या कोन्ज्योइ पुः इःङे लाःना दीखो तोःला खुरा काःल्ज्युक लाःती लोःप ओःले खुरा ओःङेन एः।” 4येशुइ एःन्डुले लेःन लोदी लाःसी, “छ्येइ पेज्याला एःन्डुबा प्रुःदी एः, ‘मीः साःगेन स्याःइ चीग्रा मेसेन एः।’”#व्यवस्था ८:३
5ओः तीङ्ला शैतानगीइ येशुला थोम्बो काःङला खेर्ती इःक्पु चीगलारा जाम्बुलीङगीइ थाम्जेर क्याःल्खापक्या तेङ्देरा खुङला लाःसी, 6“ङाः ख्याला दी थाम्जेर क्याःल्खापकीइदी ओःले दी थाम्जेर नोःर क्युःक्याइदी क्याःल्बु जोखुँ चीलेलाःना दी थाम्जेर ङाःइ लाःक्पाला एः ओःले ङाःला सेम थेक्योक सुलाङ ङाः तेर्खुँ। 7ख्याइ ङाःला पीमु चुदी फ्या छाल्सी लाःना ङाः दी थाम्जेर ख्याला तेर्के।” 8येशुइ खुङला लेःन लोदी लाःसी, “छ्येइ पेज्याला एःन्डुबा प्रुःदी एः, ‘ख्याइ प्रभु, राःङगीइ कोन्ज्योला चीग्रा पीमु चुदी फ्या छाल्दो ओःले खुङ्गीइदी चीग्रा मेःबा पेःदो।’”#व्यवस्था ६:१३
9ओःले शैतानगीइ येशुला यरुशलेमला खेर्सी ओःले कोन्ज्योइ मन्दीरकीइ च्योदोकला क्याल्दी लाःसी, “तेःन्दामरा ख्या कोन्ज्योइ पुः इःङेलाना ताः ख्या दीखाले माःर्ला फीर्तो, 10चीलेलाःना छ्येइ पेज्याला एःन्डुले प्रुःदी एः,
‘ख्याला रुःङ्जेला कोन्ज्योइ स्वर्गदुतक्याला ताङ्तेर्केन एः
11ओःले ख्याइ काङ्बा तोःला माःफोज्युक लाःती
खुङक्याइ ख्याला लाःक्पा लाःक्पालारा सेःकेन्दी एः।’”#भजन ९१:११-१२
12येशुइ लेःन लोदी लाःसी, “छ्येइ ठीमला एःन्डुबाङ लाःती एः, ‘ख्याइ परमप्रभु राःङगीइ कोन्ज्योला परीक्षा माःलेङ।’”#व्यवस्था ६:१६ 13शैतानगीइ येशुला थाम्जेर परीक्षा लेःङ्मीःजीक फीर्च्या राःङ्सा मौका माःज्योरथुपकीइ लागी पोःर्ती काःल्सी।
येशुइ गालीलला कोन्ज्योइ लेःगा पेःगाला स्युःक्योक
(मत्ती ४:१२-१७; मर्कुस १:१४-१५)
14चाङ्मा लाइ ल्हे ज्योर्ती येशु गालीलला लोःसी ओःले येशुइ लेःङ्गो छुर फारकी ठाउँक्याला टाःम्सी। 15खुङगीइ ओःलाइ यहुदीक्याइ जोम्साखीमक्याला लोप्काला स्युःसी ओःले थाम्जेरकीइ खुङला प्रशंसा पेःसी।
नासरतकीइ मीःक्याइ येशुला सेमल्हुक मालुक्योक
(मत्ती १३:५३-५८; मर्कुस ६:१-६)
16येशु राःङ छाक्र्योक क्याःसा नासरतला ओःङ्सी। तेन्दुराःरा खुङ यहुदीक्याइ ङाःल सोगेन ङीःमाला यहुदीक्याइ जोम्साखीमला काःल्सी ओःले छ्येइ पेज्या टोःजेला लाःङ्सी। 17खुङला कोन्ज्योइ लेःङ्गो तेर्केन्दी यशैयाइ प्रुःक्योक छ्येइ पेज्या टोःजेला तेर्सी ओःले ओःखो पेज्या फ्यादी खुङगीइ एःन्डुबा प्रुःक्योक ठाउँ ज्योर्ती टोःसी,
18“कोन्ज्योइ राःङगीइ ला ङाःखाला ज्यादी एः,
चीलेलाःना प्राङ्नाक्याला याःबु लेःङ्गो कोःच्युजेला खुङगीइ ङाःला अभीसेक पेःदी ताङ्क्योक इःङे।
काक्योकक्याला ताःम्साङगीइ लेःङ्गो तेर्चेला, स्याःर्नाकक्याला थोङेन्दी जोजेला,
नेम्क्योकक्याला ताःम्साङ जोजेला
19ओःले मीःक्याला थार्च्युगेन ङीःमा ओःङ्दी एः लाःचेला
कोन्ज्योइ ङाःलारा दाम्क्योक इःङे।”#यशैया ६१:१-२
20ओः तीङ्ला येशुइ छ्येइ पेज्या लोतेर्सी ओःले तेःसी। यहुदीक्याइ जोम्साखीमला एःक्योक थाम्जेर मीःक्याइ खुङला तातेःती एःके 21ओःले येशुइ खुङक्याला लाःसी, “छ्येइ पेज्याइ लाःक्योक दी ताम तीःरीङ ख्याक्याइ कोःसुना कोःसुनारा काःल्सीःङ्दी एः।”
22थाम्जेर मीःक्याइ खुङगीइदी प्रशंसा पेःसी। खुङगीइ लाःक्योक याःबु तामक्या कोःदी खुङक्या याःमाछाक काःल्दी एःन्डुबा लाःसी, “दीखो योसेफकीइ पुः मीःङे रा?” 23ओःले खुङक्याला येशुइ लाःसी, “तेःन्दामरा ताः ख्याक्याइ ङाःला दीखो उखान लाःकुएः, ‘ए मेन्ज्यु पेःगेन्दी! ख्या राःङलारा टाःच्युदो।’ ख्याक्याइ ङाःला ‘कफर्नहुमला पेःक्योक च्योःङ्रारा राःङगीइ युःललाङ याःमाछाककीइ लेःगा पेःदो।’ लाःकेन एः।”
24खुङगीइ लाःसी, “तेःन्दामरा ङाः ख्याक्याला लाःके, काःखोङ कोन्ज्योइ लेःङ्गो तेर्केन्दी मीःला राःङगीइ युःल क्याःसाइ मीःक्याइ तोःङ्ज्याङ मेःबेए। 25राःङ्सा ताम चीगकाङ ङाः ख्याकाला लाःके, कोन्ज्योइ लेःङ्गो तेर्केन्दी एलीयाइ तीःनामला लोः सुम रा फे नाम माःक्याप्पाइ छ्योम्बो मुःगी क्याःप्ती एःके। ओः तेःकासु इस्राएलला माःङ्बुरा मोःराङ्मुक्या एःके। 26कोन्ज्योइ एलीयाला ओः काःखोङ मोःराङ्मुसाःला माताङ इःनाङ सीदोनगीइ सुःरला एःक्योक सारपात#४:२६ सारपात दीखो क्याःसालादी यहुदीक्या भन्दा राःङ्सा क्युःपाइ मीःक्या तेःकुके। क्याःसाला मेःन्दा चीग मोःराङ्मुसाःला चीग्रा ताङ्सी।#१ क्याःल्बु १७:७-१६ 27ओःन्डुलेरा एलीसा कोन्ज्योइ लेःङ्गो तेर्केन्दी एःकासुना इस्राएलला माःङ्बुरा जे नाःजा थेङ्क्योक मीःक्या एःके। इःनाङ खुङक्या नाःङ्लाङ सीरीया देसकीइ नामान लाःकेन मीःबाहेक राःङ्सा सुङ माःटा।”#२ क्याःल्बु ५:१-१४
28दी ताम कोःदी यहुदीक्याइ जोम्साखीमगीइ थाम्जेर मीःक्या माःङ्बुरा सीःताङगीइ मार्थुम खील्सी। 29खुङक्या लाःङ्सी ओःले येशुला टीःतेरा क्याःसालाःम्ले फीला तेङ्सी। खुङक्याइ दीखो क्याःसा काःङला जोदी एःके ओःले खुङक्याइ येशुला प्य्राःइ च्योदोकलाःम्ले माःर्ला क्युर्केन सेम पेःसी। 30इःनाङ येशु मीःक्याइ पोर्चोमगीइ कील्ले काःल्दी राःङगीइ लाःम स्युःसी।
हेन्डी क्याःप्क्योक मीः टाःक्योक
(मर्कुस १:२१-२८)
31ओः तीङ्ला येशु गालील क्षेत्रइ कफर्नहुम लाःकेन युःलला ओःङ्सी। ओःला खुङगीइ यहुदीक्याइ ङाःल सोगेन ङीःमाला मीःक्याला लोप्सी। 32येशुइ लोप्क्योक कोःदी ओःला एःक्योक मीःक्या याःमाछाक काःल्सी चीलेलाःना खुङगीइ आङ्ज्या पेःदी लोप्कुके।
33जोम्साखीमला मेःराङ चीग हेन्डी क्याःप्क्योक मीः एःके। ओः मीःइ छ्योम्बो केइ चीरे तेङ्दी लाःसी, 34“ए नासरतकीइ येशु, ख्याइ ङीःला ची पेःजे चाल्क्योक? ची ख्या ङीःक्याला सीःङ्च्युजेला ओःङ्क्योक इःङे? ख्या सु इःङे लाःती ङाः ङोःसेउए। ख्या कोन्ज्योइ ताङ्क्योक चाङ्मा मीः इःङे।” 35दीखो कोःदी येशुइ ओः हेन्डीला हाप्स्याल तेङ्दी लाःसी, “खाजुम तेः ओःले दीखो मीःलाःम्ले थेङ्दी सुङ!” ओः हेन्डीइ ओः मीःला थाम्जेरकीइ तोःङ्ला रील्दी थेङ्दी काःल्सी, इःनाङ ओः मीःला च्याङ माःगा माःकाल।
36थाम्जेर मीःक्या याःमाछाक काःल्दी ताम लाःकाला स्युःसी, “दीखो मीःइ तामला काःन्डुबा आङ्ज्या एःकेन दुबा। खुङगीइ हाप्स्याल तेङ्मीःजीक हेन्डीक्याङ थेङ्दी छ्योङेन दुबा!” 37ओःले कफर्नहुम युःलगीइ छ्योसीःछ्योलेरा येशुइ लेःङ्गो टाःम्सी।
येशुइ माःङ्बुरा मीःक्याला टाःच्युक्योक
(मत्ती ८:१४-१७; मर्कुस १:२९-३४)
38यहुदीक्याइ जोम्साखीमले थेङ्दी येशु सीमोनगीइ खीमला काःल्सी। ओः तेःकासु सीमोनगीइ क्युःमु छावा केदी नेःपा काःल्दी एःके। खीमगीइ मीःक्याइ “खुङला टाःच्युतेर” लाःती येशुला वासी पेःसी। 39येशुइ खुङगीइ सुःरलारा काःल्दी छावाला हाप्स्याल तेङ्सी ओःले छावाइ खुङला पोःर्सी। ओःले खुङ लाःङ्दी येशु ओःले खुङगीइ योबाक्याला साःप्च्या जोगाला स्युःसी।
40ङीःमा डुप्मीःजीक मीःक्याइ माःङ्बुरा खाले नेःपाक्या येशुसाःला ख्योङ्सी।#४:४० यहुदीक्याइ ङाःल सोगेन ङीःमालादी सुइयाङ चीङ लेःगा पेःजे मेःयोःङ्के। इःनाङ ङीःमा डुप्मीःजीकदी खुङक्याइ ची लेःगा पेःनाङ ओःङ्गुके। ओः सोङ्गारा, मीःक्याइ नेःपाक्याला ङीःमा डुप्मीःजीक चीग्रा येशुसाःला ख्योङ्सी। येशुइ खुङक्याखाला लाःक्पा ज्यादी थाम्जेरला टाःच्युसी। 41माःङ्बुरा मीःलाःम्ले हेन्डीक्या थेङ्देरा चीरे तेङ्दी लाःसी, “ख्या कोन्ज्योइ पुः इःङे।” इःनाङ येशुइ ओः हेन्डीक्याला तीबी चीगकाङ तामरा लाःमाच्यु चीलेलाःना खुङ थार्च्युगेन ख्रीष्ट इःङे लाःती खुङक्याइ ङोःसेउके।
येशुइ याःबु लेःङ्गो टाःम्देरा काःल्सी
(मर्कुस १:३५-३९)
42नाःम लाःङ्मीःजीक येशु सुङ मीःक्या म्याःक्योक ठाउँला काःल्सी। मीःक्याइ खुङला छोल्गाला स्युःसी। येशुला फ्रेमीःजीक खुङक्याइ “ङीःला पोःर्ती माःकाल” लाःती काजे छोल्सी। 43इःनाङ येशुइ खुङक्याला लाःसी, “ङाःइ कोन्ज्योइ क्याःल्खापकीइ याःबु लेःङ्गो राःङ्सा ठाउँक्यालाङ कोच्युकोःउए, चीलेलाःना कोन्ज्योइ ङाःला दीखो लेःगा पेःजेला ताङ्क्योक इःङे।” 44एःन्डुले खुङगीइ यहुदीया क्षेत्रइ यहुदीक्याइ जोम्साखीमक्याला काःल्दी याःबु लेःङ्गो टाःम्सी।
S'ha seleccionat:
लुका 4: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.