Kisah Para Rasul Uram 11
11
Er Petrus biryi sun Yerusalem atei kuramnyi dib tenen nang asi lak kibmou uram
11:1-18
1Ura, sun Teleb Uram deyok kouboka eteren nang ab, sun Yudea mutuk kuboka Er Yesus bisi dib tenen nang ab aryi a deyok kekebmai. Ara, sunci, “Sun yuk yala nang ababyi Er Imtamnyi Uram dib tenebkalibmang,” en uram kekebmai. 2Kekebmai ura, er Petrus Yerusalem atei tamurbinmou ura, sun Yahudi yala nang yoka dib tenen nang ab er Petrus ab lulubdanmai. 3Ara, sunci er Petrus bisi, “Kanci yuk yalanyi ai wengbinmarim er ab tonkwa yibmarurumwe ara malyito kubumwe,” ebmai.
4Ebmai bok, er Petrus biryi sunsi nukareboka ato ebmou. 5“Nira Yope atei kunmasiryi, Er Imtamnyi bisi molonmase bok, kunumna ton eibmase. Ara, dinmase uca, kut kala aling tentok asi imtam aryi kuboka yuryanmou. Akaling kubkub dumbaryi ni dam diriryanmou. 6Ura, niryi dinmase uca, akaling umbura asi yan deib yibarande dinyi ab, ninyi winin kum dinyi ab, mundu deib yibarande dinyi ab, maka ab asing eibmase. 7Ura, uram ton kekebmase ara, ‘Petrus, kanci a dinyi asi oyibdum,’ ebmanou. 8Ebmanou bok, niryi Ersi, ‘Nai Imtamnyi, a dinyi ara nunda mema enub ati, ni kum yinun.’ 9Ebmase bok, imtam aryi kuboka tubto ato ebmanou. ‘Er Imtamnyi biryi, “Ur yibdarur,” eanci dinyi asi, sun ninyi aryi, “Mema,” ena mem,’ ebmou. 10Ura, liki winiryi dinyi ababyi neiktoto kubmou ura, akaling imtam aryi talelibdobmou.
11A kunumna sirya eibmase ura, ninyi winiryi ara Kaisarea atei aryi kuboka ni kunmase ai dam yanmai. 12Yanganmai ba, Er Imtamnyi Kanya Roh Kudus aryi nisi, ‘Kanci kanya kankana kukina kum uca a nang asi ur milibdum,’ ebmou. Ura, ni kwit yabwe dib tenen nang nabaryi ni ab tonkwa miliboka Kaisarea atei bindoka er Kornelius ai wekmoubwe. 13Sirya wengbinmoubwe ura, erci nunsi ato ebmou ara, ‘Er Imtamnyi Uram eryuryangananyi biryi ni dam yandoka tikmou cok, erci nisi, “Kornelius, kanci ninyi arukminyi ba, Yope atei bindoka ninyi si Simon uruma si Petrus bisi nambinung. 14Anyi bira kan ab kan mabwe silib ab asi Teleb Uram eterebsir ba, sunci kekebmunyi ura, Er Imtamnyi biryi sunsi lebkwansir,’ ” ebmou.
15Ebmou ura, niryi Teleb Uram sunsi eterenmase ba, Er Imtamnyi Kanya Roh Kudus aryi sun dam yanmou. Ara, nunda Yahudi yala nang dam yuma karebmasou to, ukuryok sun yuk yala nang dam ababyi karebmar ati ebman. 16A asing eibmase ura, niryi nun Du Yesus biryi minob ebmou uram asi teneibmase. Ara, Erci, ‘Yohanes biryi me dem aryi ninyi dongoramwe asi, Niryi Er Imtamnyi Kanya Roh Kudus asi ninyi kanya dam dongobkwan,’ eamwe to kunubmou asi kanya teneibmase. 17Ati, Er Imtamnyi biryi Er Kanya Roh Kudus asi nun Yahudi yala nang ab ton sun yuk yala nang ababyi karebmasou ati, niryi mem ebman to kum kubtinyi,” ebmou.
18Er Petrus biryi ato ebmou ba, sun Teleb Uram eteren deyok nang ab sun yuk dib tenen nang ab nirya aryi tatana kum kubmaici, Er Imtamnyi si weik ebmai. Ara, sunci, “Er Imtamnyi biryi karebmar ara sun yuk yala nang ababyi sun malyi dinyi takloboka Er Imtamnyi bisi miliboka iya kam kubkwaming,” ebmai.
Sun Antiokhia atei kuboka Er Yesus bisi dib tenen nang uram
11:19-30
19Sun Yahudi yala nang aryi er Stefanus bisi obmai ura, sun Er Yesus bisi dib tenen nang ati, “Obtibyi,” tenen domkiringnamnyi ba, eikatei-okatei binsekdobmai. Barsengdoramnyi mutuk ara Fenisia mutuk ab, Siprus mutuk ab, Antiokhia atei ab barsengdoramnyi. Barsengdoramiryok, sunci sun Yahudi yala nang akwe Teleb Uram eterebde baramnyi. 20A barsengdamnyi nang kankan ara Siprus atei nang ab, tonda Kirene nang ababyi barsengdamnyi. A nang ara Antiokhia atei bindoka sun Yunani uram eramnyi nang asi, “Er Yesus bira Erebdobnyi,” eboka Teleb Uram etereramnyi. 21Etereramnyi ba, Er Imtamnyi biryi sunsi miliramwe uca, ninyi ilinto Er Yesus bisi dib tenebkalibmaici, sun malyi dinyi takloboka Ersi miliramnyi.
22Ura, sun Yerusalem atei kuramnyi dib tenen nang aryi a uram kekebmai ura, sunci er Barnabas bisi, “Kanci Antiokhia atei bindoka dirbirum,” ebmai. 23Ebmai ura, er Barnabas Antiokhia atei bindoka dinmou uca, Er Imtamnyi biryi kisal dangmou asi asing eibmou ura, er kanya kilkil kubmou. Kubmou ba, er Barnabas biryi sunsi, “Er Imtamnyi bisi tanglona kum uca tuba-tuba milibdarur,” eboka yan memeboka uram ebkarebmou. 24Er Barnabas bira teleb kanya boramunyi kuramuryok, Er Imtamnyi Kanya Roh Kudus langkiamunyi ton, Er Yesus bisi dib teneramunyi kuramwe. Kuramwe ati, erci Er Imtamnyi Uram eterereamwe asi yuk nang ilinto Er Imtamnyi bisi dib tenebkalibmai.
25Ura, er Barnabas Antiokhia atei aryi kuboka Tarsus atei binmou. Ara, er Saulus biti ingkiringbinmou. 26Ani, Saulus eibmou ura, er Barnabas biryi er Saulus bisi, “Ni ab tonkwa binkwinim,” eboka ersi Antiokhia atei boyanmou. Boyanmou ura, er Barnabas ab er Saulus ab sun Antiokhia atei kuramnyi dib tenen nang ab tonkwa kuboka kwalina tentok kuramnyi. Kuramiryok, sunci ninyi ilinto asi Teleb Uram etereramnyi. Antiokhia atei kuboka sun Er Yesus bisi dib tenen nang asi si dobmai si ara, “Kristus milin nang,” ebkalibmai.
27A kuramnyi talak aryi, sun Er Imtamnyi Uram ebdeibmaci to lak etereramnyi nang ton Yerusalem atei aryi kuboka Antiokhia atei yanmai. 28A yanganmai nang kankan aryi ninyi tentok si Agabus bibabyi yanmou. Anyi bisi Er Imtamnyi Kanya Roh Kudus aryi eterebmou ba, erci ato ebmou, “Aminda aryi sun im dangna tukwe dangna nang nirya kwaning atabkwansir,” ebmou. Sun Roma nang weik sienyi si Klaudius kalingnamwe ba, a minob ebmou dinyi ara dib kunubmou. 29Ara, kwaning ataramwe ba, sun Antiokhia atei kuboka Er Yesus bisi dib tenen nang aryi uram sisikoka ato ebmai, “Nun kwit yabwe ara Yudea mutuk kuraming nang asi dengna bulubdeibkwayeb. Ara, yuk-yuk nun kubmasici to bulubdeiboka sunti karebkwayeb,” ebmai. 30Ebmai ura, bulubdeibmai cok, sunci er Barnabas ab er Paulus ab asi, “Borbirurum,” eboka Yerusalem atei bokdonokmai.
S'ha seleccionat:
Kisah Para Rasul Uram 11: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)