Kisah Para Rasul Uram 12
12
Er Yakobus bisi obmai ura, er Petrus bisi ninyi wenen ai dongobmai uram
12:1-19
1A kuramnyi talak aryi Yudea nang sienyi si Herodes biryi sun Yerusalem atei kuboka dib tenen nang asi duboka malyi kubdeibmou. 2Ara, erci arukmou ba, Yohanes er du si Yakobus bisi ninyi on yale ya aryi obmai. 3Obmai ati, sun Yahudi yala nang kanya teleb kubmou ura, er Herodes biryi, “Er Petrus bibabyi obkwan,” tenen, “Er Petrus bisi diboka talebdarur,” eboka arukmou. Arukmou tum ara kwalina si Bungbung Ena Kum Roti yin tum kubmou. 4Er Petrus bisi sirya talebmai ura, malyi kun nang wenen ai asi dongobmai. Dongobmai ura, yin doun nang enam belas baryi asi ol dumbaryi kiboka er Petrus bisi tonkwa kalikmai. Kalikmai ba, er Herodes biryi, “Kwalina si Paskah sirya bisibci ura, er Petrus bisi sun Yahudi yala nang urasintam tikeibne ba, sunci, ‘Ato-ato kubkwandim,’ ebkwaning,” tenebmou.
5Tenebmou bok, er Petrus bisi ninyi wenen ai umbura kalikmai ura, sun Er Yesus bisi dib tenen nang aryi Er Imtamnyi bisi er Petrus biti mikib asa kuboka molormiliramnyi.
6Ura, er Herodes biryi, “Ambutum ara niryi er Petrus bisi sun Yahudi yala nang urasintam tikeibkwan,” tenebmou. Tenebmou bok, a tum lukunda ara ninyi wenen ai umbura aryi er Petrus bira wi mabmou. Ara, besi tabwe bitinyi debdongoboka yin doun nang bitinyi bin dinatam-bin dinatam mabmarei ura, Petrus bira noutam asi mabmou ba, yuk yin doun nang ara wenen ai bublan dam tikoka kalikmai. 7Kalikmai asi, lukdandoka imtam aryi kuboka Er Imtamnyi Uram eryuryangananyi yuryanmou ba, akai milil weik arabmou. Ura, Er Imtamnyi Uram eryuryangananyi biryi wengyandoka er Petrus bisi, “Minola bukokdum,” eboka kamubmou. Bukokmou ura, er taruk deamnyi besi tabwe bitinyi ara er yuk loboka sakdobmou.
8Lobsakdobmou ura, Er Imtamnyi Uram eryuryangananyi biryi er Petrus bisi, “Kanci kan sabya deibdongobdobminyi ura, kan yan karuk asi kitibdobdum.” Ebmou ba, er Petrus biryi erci ebmou to kunubmou ura, Er Imtamnyi Uram eryuryangananyi biryi ersi, “Kan alib aling ongobdobminyi ura, nisi milibnurum,” ebmou. 9Ebmou ba, er Petrus milibmou ura, “Lengdera mabman do? Tek deib dinyi asing eibman do?” tenen er kanya kankana kubmou. 10Banmarei cok, sun bisik ai kalingna nang yuma kalingna ol bisiboka kalingna ol bitinyi bisiboka weik bublan ara atei bana bublan dam yangarei ura, a bublan ara er yuk sunti kuklobmou ba, binmarei. A bisik mouse dam barei ba, Er Imtamnyi Uram eryuryangananyi lukdandoka kum dandobmou ura, er Petrus yuk binmou.
11Yuk binmou cok, er Petrus biryi, “Lengdera kum eibman, erda tek deib kubmanir,” teneboka bikalibmou. Bikalibmou cok, erci, “Er Imtamnyi biryi Er uram eryuryangananyi bisi arukmar ba, lordeiriryanmanir. Ara, er sienyi Herodes ab sun Yahudi yala nang ab aryi nisi malyito kubkwamanungwe asi lebdobmanir,” tenebmou.
12Ato teneboka banmou cok, er Petrus bira ner tentok si Maria kuramwe ai yanmou. Ara, Yohanes uruma si Markus er kwin ai yanmou. Yanmou ba, akai asi ninyi ilinto buluboka wekmaici, Er Imtamnyi bisi molonmai. 13Molonmai bok, er Petrus yandoka bublan congom-congom ebmou ba, akai wa in ner si Rode biryi bublan kungyanmou. 14A ner ara er Petrus uram anmalakoka bikmou ura, er kanya kilkil kubmou ba, bublan ola kum kukmou. Eda, “Sun a wekmang nang asi er Petrus yandoka bublan dam tikmar asi ebting,” tenen bublan anmalakoka kum kukmou.
15Ebmou bok, sunci ersi, “A ner se, kanda luba talebmakir do?” ebmai bok, er Rode biryi, “Diba, er Petrus yandoka bublan dam tikmar,” ebmou. Ebmou bok, sunci, “Kan eibmarim ara er Petrus kanya kurur tenebmab,” ebmai. 16Ebmai bok, er Petrus bublan tuba congom-congom enmou ura, sunci bublan kukeiboka, diramnyi uca, diba Petrus eibmai. Eibmai ura, a wekmai nang aryi, “Nai e,” tenebmai. 17“Nai e,” tenebmai bok, er Petrus biryi, “Uram ena mem,” tenen er taruk mobmob ebdongobmou ba, kilikmai ura, erci, “Er Imtamnyi biryi nisi ato-ato kuboka ninyi wenen ai aryi lobdeibmanir,” eboka nirya nukmou. Nungmou cok, erci sunsi, “A ukubmanir to sunci er nun Du Er weit Yakobus ab nun kwit yabwe yuk nang ab asi lak ebdarur,” ebmou. A sirya ebmou ura, er Petrus anaboka yuk atei bindobmou.
18Ura, mabmai ani, berekwe ura, sun yin doun nang aryi, “Er Petrus una kuboka bindobmar do?” tenen sun kanya kankana kubmou ba, lulubdanmai. 19Lulubdanmai bok, er sienyi Herodes biryi, “Er Petrus bisi ingkirikdarur,” eboka arukmou. Ingkiringmai bok, asing kum eibmai ura, er Herodes biryi yu weik kuboka, “Sun er Petrus bisi kalikmai yin doun nang asi obdarur,” ebmou. Ato eboka arukmou ura, er sienyi Herodes bira Yudea mutuk aryi anaboka Kaisarea atei uki mikbaryi bina kuramwe.
Sun Galilea mutuk nang kalingnamwe weik sienyi si Herodes dibmou uram
12:20-23
20Kuramnyi ani, sun Galilea mutuk nang sienyi Herodes biryi sun Tirus nang ab Sidon nang ab asi yu weik kubmou. Yu weik kunmou bok, sun Tirus nang ab Sidon nang ab aryi, “Yudea mutuk aryi kwaning dekdobtibyi tenen, er Herodes ab antanibkwayeb,” tenen yanmai. Yanmai ura, sunci er Herodes ai kalingnanyi si Blastus dam minob bindoka “Antanibdobtibyi,” ebmai ba, er Blastus biryi, “Teleb,” tenebmou ura, er Herodes ab antanibmai.
21Antanibmai ura, uki tentok tum aryi er Herodes biryi sien nang aling ongoboka sien nang bun sokon deici bukoka sun antaniryanmai nang asi uram enmou. 22Erci sirya ebmou ura, sun bulubmai nang nirya aryi, “Ara, ninyi aryok en uram kum ebmar, erda Er Imtamnyi biryi en uram a kunum ebmar,” enmai. 23Enmai ba, Er Imtamnyi Uram eryuryangananyi biryi yandoka er Herodes bisi u kibdeibmou ba, mundu kola tonmou uca, dibmou. Ara, er Herodes biryi Er Imtamnyi bisi ilil kum kuramwe deyok aryi, Er Imtamnyi Uram eryuryangananyi biryi ersi weneboka obmou.
Er Barnabas ab Saulus ab asi wiboka bokdonokmai uram
12:24–13:3
24Ba, Er Imtamnyi Uram asi dib tenebmai nang ara tuba tabangdongoramnyi. 25Tabangdongoramnyi ba, er Barnabas ab er Saulus ab ara sun Antiokhia nang aryi bulubdeibmai dinyi asi sun Yudea nang ati bobinmarei ani, Yerusalem atei aryi kuboka tamuryanmarei. Ura, Yohanes uruma si Markus eraminyi bibabyi sunsi milibmou ba, tonkwa Antiokhia atei yanmai.
S'ha seleccionat:
Kisah Para Rasul Uram 12: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)