मत्ती 17
17
यीसू रा रूप बधलणा
(मरकु. 9:2-13; लूक. 9:28-36)
1छेह ध्याड़े ले बाद यीसू पतरस होर याकूब होर तेसरे भाई यहून्ना जो आपणे साउगी प्हाड़ा पर लई गया, होर जेबे स्यों प्हाड़ा पर कल्हे थे, 2तेबे तिन्हारे साम्हणें यीसू रा रूप बधली गया, होर तेसरा मुंह सूरजा साहीं चमक्या होर तेसरे कपड़े प्रयासे साहीं चीटे हुई गये। 3तेबे तिन्हें मूसा होर एलिय्याह नबी यीसू साउगी गल्ला करदे हुये तिन्हा जो सुझ्हे।
4एता पर पतरसे यीसू किन्हें बोल्या, “हे प्रभु, आस्सा रा एथी रैहणां ठीक आ। अगर तेरी इच्छा हो ता मां तीन तरपाला वाले डेरे बनाणे, एक तेरे कठे, एक मूसा नबी रे कठे, होर एक एलिय्याह नबी रे कठे।” 5से बोल्या ई करहा था कि, देखा, एक उजले बादले स्यों ढखी दिते, होर तेस बादला मन्झा ले परमेसरे बोल्या कि, “ये मेरा लाडला मह्ठा आ, जेस ले हांऊँ बौह्त खुस आ, एसरी सुणां।” 6चेले ये सुणी किन्हें मुंहा रे भारे पई गये होर बौह्त डरी गये। 7यीसूए तिन्हा वाले आई किन्हें स्यों छुही लये, होर बोल्या, “उठा, डरा मत।” 8होर जेबे तिन्हें देख्या ता तिन्हा जो यीसू जो छाडी किन्हें आपणे साउगी होर कोई नी सुझ्या।
9होर जेबे चेले प्हाड़ा ले उतरेया करहा ऐं थे तेबे यीसूए तिन्हा जो ये हुक्म दितेया कि, “जेबे तक हांऊँ माह्णुं रा मह्ठा मरिरे मन्झा ले जिउंदा नी हूँगा तेबे तक जो कुछ तुस्से देख्या केसी किन्हें देख्या बोल्दे।” 10होर चेले यीसू ले पूछेया, “फेरी व्यवस्था स्खाणे वाल़े किधियो बोल्हा ऐं कि, मसीहा रा एलिय्याह नबी ले पैहले आऊंणा जरूरी आ?” 11तिन्हें जवाब दितेया कि, “एलिय्याह नबिया पैहले आई किन्हें सब कुछ सुधारणा। 12पर हांऊँ तुस्सा किन्हें बोल्हा कि, एलिय्याह नबी साहीं एक माह्णुं ता आई चुकिरा, होर तिन्हें से नी पछ्याणेया। पर जो चाहेया तेह्ड़ा ईं लोके तेस साउगी बुरा बर्ताव कितेया। इंहां करी किन्हें मां माह्णुं रे मह्ठे भी तिन्हारे हाथा ले दुःख उठाणा।” 13तेबे चेले समझी गये कि तिन्हें आस्सा किन्हें यहून्ना बपतिस्मा देणे वाल़े रे बारे मन्झ बोल्या।
दुस्टात्मा ले दुखी मह्ठे रा ठीक हूंणां
(मरकु. 9:14-29; लूक. 9:37-43)
14यीसू होर तेसरे तीन चेले पहाड़ा रे हेठ पूजी गये। एक बौह्त बड़ी भीड़ा रे लोक तेस वाले पुज्हे, होर एक माह्णुं यीसू वाले आया, होर तेसरे साम्हणें घुटणे टेकी किन्हें बोल्दा लग्या। 15“हे प्रभु, मेरे मह्ठे पर दया कर, क्यूंकि तेस जो मिर्गी आहूँआं ई: होर से बौह्त दुःख सैहन करेया करहा; होर से कधी आगी मन्झ होर कधी पाणी मन्झ पई जाहाँ। 16होर मैं से तुस्सा रे चेले वाले ल्यान्दरा था, पर स्यों तेस जो ठीक नी करी सके।” 17यीसू ये जवाब दितेया कि, “हे विस्वास नी करणे वाले होर जिद्दी लोको मां केभे तक तुस्सा साउगी रैंह्णां? होर कधी तक तुस्सा री सैहणी? तेस मह्ठे जो एथी मेरे वाले ल्याऊआ।” 18तेबे यीसूए से दुस्टात्मा प्रुआची, होर दुस्टात्मा तेस मन्झा ले निकली गई, होर मह्ठा तेस ई टैम ठीक हुई गया।
19तेबे चेले कल्हे जे यीसू वाले आई किन्हें बोल्या, “आस्से एस्सा दुस्टात्मा जो की नी काढी सके?” 20यीसूए तिन्हा किन्हें बोल्या, “आपणे विस्वासा री कमी री वजहा ले। क्यूंकि हांऊँ तुस्सा किन्हें सच्च बोल्हा, अगर तुस्सा रा विस्वास राई रे एक दाणे रे बराबर भी हो, ता तुस्सा एस प्हाड़ा किन्हें बोलणा कि, एथी ले खिसकी किन्हें तेथी चली जा, ता तेस चली जाणा, होर कोई गल तुस्सा रे कठे नामुमकिन नी हूणीं।” 21(पर ये जाति बगैर प्रार्थना होर उपवासा ले नी निकल्दी)
आपणी मौता रे बारे मन्झ यीसू री दबारा भविस्यवाणी
(मरकु. 9:30-32; लूक. 9:43-45)
22जेबे चेले गलील जिल्ले मन्झ कठे हुईरे थे, ता यीसूए तिन्हा किन्हें बोल्या, “हांऊँ माह्णुं रा मह्ठा, मेरे दुसमणा हांऊँ पकड़णा। 23होर तिन्हा हांऊँ मारी देणा, होर मां त्रीजे ध्याड़े जिउंदे हुई जाणा।” पर ये सुणी किन्हें स्यों बौह्त दुःखी हुए।
मन्दरा रे कठे चुंगी
24जेबे यीसू होर तेसरे चेले कफरनहूम सैहरा मन्झ पूजी गये, ता मन्दरा रे कठे चुंगी लैणे वाल़े, पतरसा वाले आई किन्हें पूछेया कि, “क्या तुस्सा रा गुरु मन्दरा रे कठे चुंगी नी देंदा? तिन्हें बोल्या, हां देहां।” 25जेबे से घरा पुज्हेया, ता यीसूए तेसरे पूछणे ले पैहले तेस किन्हें बोल्या, “हे समौन तू क्या समझ्हा?” धरती रे राजा कर या चुंगी केस ले लैहां ऐं? आपणे मह्ठे ले या बगाने ले? पतरसे तिन्हा किन्हें बोल्या, बगाने ले। 26यीसूए तेस किन्हें बोल्या, “ता मह्ठे बची गये। 27फेरी भी इधी कठे कि आस्से तिन्हा जो परेसानिया मन्झ नी पाये, तू समुद्रा रे बाढे जाई किन्हें मछि पकड़ने रा कांडा पाई दे, होर जो मछि पैहले निकले, तेता जो पकड़; तेस्सा मछिया रा मुंह खोल्ही किन्हें तुजो एक चांदी रा सिक्का मिलणा जेसरी कीमत चार ध्याड़े री कमाई रे बराबर ई, तेता जो लई किन्हें मेरे होर आपणे बदले तिन्हा जो देई देआ।”
S'ha seleccionat:
मत्ती 17: MJLNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.