Mark añgw’a téndé 14
14
ÈLUKW’A GYÔÑ NA BÉNAY (14)
Ba tèmè èyumbu i bômaka Yésu.
1Ôkaté, a yisa mia maba fèt a Pâk wa ba gya mémpèmbè ndèka lèvè a kôka.
Ya baprèt banènè na batèndi ba méndèni ba haka pékw’a nluñgu y’i bandaka Yésu na yañgô, i nonokw’i bômak’añgô. 2Ndé ba ñgo té: Mina kô bandaky’añgô sônda fèt, batu ba kô soho iyoko.
Mwétô wa Bétani a hôa Yésu mpénda magyi ô mwôlô.
3Yésu a gya Bétani ô’lôñkw’a Simon, mutu a bégyima. Sônd’añgw’a gya ô’tabulu, mwétô a kwéya, a banda mpénda ya puñ ya lôza na magyi ma gya ihômpô gyinènè; y’añgw’a pôta mpénda, a hôa magyi ô mwôlô mwa Yésu. 4Ibaté batu ba yôk’ibuku, ba lwa ba soho mapopogyi bamènè a bamènè té: A héma magyi ma mpè maté na bôsina bwé ndé? 5Ba mu nyè ni hômpaka mañgô n’i yékaka béfula méñkama méhatô, ba wè byañgô ménténdé. Yumènè ba lwa soho bôsina bwa mwétô mènè.
6Ndé Yésu a ñgo té: Ñkwègyèkyany añgô; bya lès’añgô né ndé? A mu péka mè gyambô gya mpalè. 7Bya bé gyaka na ménténdé sônda hagyè, bya bé hèlèkyè myañgô boñ sônda bya bé nonoko; ndé bya gyi gya na mè mbèy‐mbèy. 8A mu péka ètè y’añgw’a gya na piñzô i pékaka; a mu hôa mè magyi ô nyô bôsina bw’ikôné gyamè, mè ndèka pi wa. 9Mômpô, ma ñgo na bihi té, masi mahagyè ma ba bé tandaka Ntandô mwa Mpalè muté, héhé yahagyè, ba bé tandaka gyambô gy’añgw’a mu péka gyité i yébwak’añgô.
Yuda a luñga Yésu.
10Ôkaté Yuda Iskariot, mutu moko pia bayôkwè gyôñ na baba, a lwa pia baprèt banènè ba gyi, i siñgyèkyè bañgô Yésu. 11Ba kyéba ni yôka mambô mègyi, ba yañga té ba bé wèky’añgô balolo. Ôkaté a tas’i hak’èlomo ya mpalè y’i bandak’añgô na yañgô.
Bayôkwè ba yèbè magya ma fèt a Pâk.
12Bwia bwa fèt bwa bôhô bwa ba gya mémpèmbè ndèka lèvè, bwia mènè ba bôma mw’èntombu ya Pâk, bayôkwè ba Yésu ba ñgo n’ègyi té: Ô nono té bèha yèbèky’obè magya ma Pâk ôsa wé? 13Y’añgw’a lèkyè batu baba ba nloñgyè mwañgô, a ñgo na bañgô té: Lwakany ô mpôka: bya bé takaka na mutu a banda mpôñgw’a ñsô. Hiñkyèkyany añgô; 14èlôñkwè y’añgw’é kwéyaka, ñgokany na kw’èlôñkwè mènè té: Ñhèlé mwa ñgo té: Ikwèy gya wé bèhè na bayôkwè bamè bèha bé gyak’èntombu ya Pâk? 15A bé hèlèkyè bihi ikwèy gyinènè gya b’ikô, gya bé na mambô mahagyè; ôkaté bya bé yèbèkyè mini magya. 16Ya bayôkwè ba lwa ô mpôka, ba kobè mambô mahagyè nta Yésu a soho na bañgô; ba yèbè magya ma Pâk.
Magya m’èkia. Yésu a tanda té mutu a bé luñgak’añgô.
17N’iko, Yésu bañgw’a bayôkwè gyôñ na baba ba lwa pimènè. 18Sônda ba gy’ô’tabulu, ba gya, Yésu a ñgo té: Mômpô, ma ñgo na bihi té: Mutu moko wa nloñgyè mwabihi a bé luñgaka mè, mutu wa bèhè n’ègyi bèha gya èsi èko. 19Ya ba ñkwènè kyèy bukyé, ba tas’i humw’añgô mokoko té: Mè wé? 20Y’añgw’a ñgo na bañgô té: A bé mômpô mutu moko wa nloñgyè mwabihi gyôñ na baba, mutu wa bèhè n’ègyi bèha hugyè mabo ô ñkyèñgè. 21Mwana mutu a ñgob’i lwaka mômpô, nta ba tèndè bôsina bwègyi; ndé nyuku pia mutu a luñga Mwana mutu! A gya bé boñ té mutu mènè ndèka gyibwè.
22Sônda ba gya, Yésu a kwa mpèmbè, a wè Nzambé boñ, a buna mwañgô, a wè bañgô, a ñgo té: Kwakany, nyô amè, yañgô bé yè. 23Y’añgw’a kwa kopè, a wè Nzambé boñ, a wè bañgô; ya bahagyè ba ñwa. 24A ñgo na bañgô té: Ñkyiny’amè, yañgô bé yè, ñkyinya ya pañga yé hôya bôsina bwa batu bukyé. 25Mômpô, ma ñgo na bihi té: Ma gyi mwaka ñwa bébuma by’èvé, n’i pwaka bwia bwa mé ñwaka yañgô ñhèmu aminè ô’kaka gya Nzambé.
Yésu a tanda té Pièr a bé ñgoko té mwa ñgyéb’añgô.
26Sônda ba higy’i yémpaka bébôka, ya ba lwa ô’bété gy’Ôliv. 27Ya Yésu a ñgo na bañgô té: Bihi bahagyè, bya ya kun’i tué bôsina bwamè, bôsina gya b’ônkwèli té: Ma bé bômaka ñkoli, ôkaté igyañga gya béntombu gya bé hañgaka. 28Ndé sônda ma ñgô yômwa, ma bé lwaka ô bôhô bwabihi ô moñgo mwa Galilé. 29Ya Pièr a ñgo n’ègyi té: Gyakana batu bahagyè ba tua, mè ma gyi tua. 30Yésu a ñgo n’ègyi té: Mômpô, ma ñgo n’obè té: Bwia boko buté, hôhô ndèka pi loñgo békusi béba, obé ñgoko békusi béhatô té ô ñgyébé mè. 31Ndé Pièr a péka ñhu, añgô té: Gyakana ba bôma mini baba, ma gyi soho té ma ñgyéb’obè. Ya bahagyè ba soho yumènè èko.
Yésu a lwa ô kuba Gétsémané.
32Ya ba hulañga ôsa gya gyino té Gétsémané; ôkaté Yésu a ñgo na bayôkwè bègyi té: Gyakany ôsaté n’i pwaka sônda mè higy’i bondoñgo. 33Y’añgw’a lwa na Pièr, Yakobu na Yôan, a tas’i loñgo boñgo n’èbèbè bukyé. 34A ñgo na bañgô té: Nléma mwamè mwa lôza na kyèy n’i pwak’ilèlè. Gyakany ôsaté, bya boñgyè.
35Y’añgw’a lwa ô bôhô kuna‐kuna, a kutam’ô héhé, a bondoñgo na Nzambé ni humw’añgô té, ndé gya ba piñzô i pékaka, èlomo mènè ya yékakyè pi’añgw’a gyi. 36A ñgo té: Tata, obè na piñzô i pékaka mambô mahagyè. Gyèlèkyè mè kop’ôté; gyaka yumènè, habé inono gyamè, ndé igyobè gya pékakyè. 37Y’añgw’a huñwana pia bayôkwè bègyi, a kobè bangô bôyo. A ñgo na Pièr té: Simon, ô nañga wé? Obè ndèka piñzô i boñgyè èlom’a ntula? 38Boñgyèkyany, bya bondoñgo na Nzambé, i loñgoko té bya kô luñgubwè; nléma mwa himè kwakwa, ndé ñhoy mwa bé lampilampi.
39Y’añgw’a lwa èkus’a mba, a soho aminè na Nzambé mambô mènè moko m’añgw’a tas’i soho. 40Sônd’añgw’a huñwana, a kobè bayôkwè bègyi bé nañga aminè, bôsina miho mañgô ma gya bôgyilô; bañgô ndèka ñkwènè piñzô i hugyèky’añgô gyambô. 41Y’añgw’a lw’aminè èkus’a ñhatô; y’añgw’a ñgo na bañgô té: Bya nèkyè a nañga n’i yokoko! A hiya, èlomo ya kôka, Mwana mutu a ñgob’i siñgyibwèkyè ô mabo ma batu babébé. 42Tèmèkyany, mina lwakyè! Mutu a y’i luñgaka mè a ya kun’ôsaté.
Ibandubwé gya Yésu.
43Yésu a nèkyè bô sohoko, èsi mènè, Yuda, mutu moko wa nloñgyè mwa bayôkwè gyôñ na baba, a hulañga na nloñgyè mwa batu munènè, ba banda ménla na békoko; baprèt banènè, batèndi ba méndèni na bébôtô, bañgô ba lèkyè bañgô. 44Nluñgi mwa tas’i wè bañgô ndémbô té: Mutu wa mé nanèkyè ñhôkô ô’mama, añgô bé wè; bandakany añgô, bya lwa n’ègyi bono. 45Sônd’añgw’a hulañga, a hinyana kwakwa pi’añgw’a gyi, a ñgo n’ègyi té: Ñhèlé! A nan’añgô ñhôkô ô’mama. 46Ôkaté ibaté batu ba hugyè Yésu mabo ô nyô, ba band’añgô. 47Ndé mutu moko wa nloñgyè mwa Yésu a pwègyè ñkwèsi, a luma mwañgô ñgyazi mwa nèni mwa baprèt, a lén’añgô ilo.
48Ya Yésu a soho na batu ba band’añgô té: Bya mu ya na ménla na békoko i bandaka mè nta n‐yibi. 49Mia mahagyè, ma gya na bihi, ma hèlè batu ô’lôñkw’a Nzamb’inènè, bihi ndèka banda mè. Ndé mambô ma méndèni mya Nzambé ma nyè ni pékôbwè. 50Ya bayôkwè bahagyè ba gyik’añgô, ba lwa méñhula. 51Mwawaza a hiñky’añgô, a hala ñkanda ôkay. Ya ba band’añgô; 52ndé a gyika ñkanda, a lwa na ñhula ntaba.
Yésu a tèmè ô môhô ma bébôtô bya ba Yudè. Pièr a ñgo té mwa ñgyéb’añgô.
53Ba lwa na Yésu pia nèni mwa baprèt mwa gyi; ôkaté baprèt banènè, bébôtô na batèndi ba méndèni ba sono. 54Ya Pièr a lwa hiñky’añgô mpia ôpama, n’i pwaka hèñgyè mwa nèni mwa baprèt. Y’añgw’a hula ñsi na bagyazi, a yolo wéya.
55Ya baprèt banènè na bébôtô byahagyè ba haka gyambô gyinènè i yélaka Yésu té a wakyè, ndé bi ñkwènè gyañgô. 56Batu bukyé ba yél’añgô mambô, ndé mañgô ndèka gyôñga ètè èko. 57Ôkaté ibaté batu ba kuky’i tèmè, ba yél’añgô té: 58Bèha yôk’a ñgo té: Ma bé kulwaka èlôñkw’a Nzamb’inènè ya batu ba lôñga èté, ma bé lôñgaka ipinè mia mahatô, ya gyi lôñgubwè na mabo ma batu. 59Gyakana gyambô mènè, bi soho gyañgô ètè èko. 60Ya nèni mwa baprèt mwa tèmè ô’bébé a batu, mwa humwa Yésu té: Ô ndèka banda nsoho na mambô ma ba hèlṽ’obè maté né ndé? 61Ndé Yésu a kañga mwé, ndèka hugyè gyambô a gyambô. Ya nèni mwa baprèt mwa humw’añgô aminè té: Obè bé Krist Mwana Nzambé wé? 62Yésu a hugy’añgô té: Mè mômpô añgô; gyakana bya bé ñkwènèkyè Mwana mutu a ka ñsi ôbw’a hañgwè Nzambé, Mutu a bé na piñzô yahagyè, a ya ôkatwa ñkutu. 63Ya nèni mwa baprèt mwa nyañwa méñhalô myègyi, mwa ñgo té: Mina nèkyè n’isṽè i hakaka batu aminè b’i hèlṽèky’añgô wé? 64Bya yôké nt’añgw’a mu lôa Nzambé? Bya yébwa bé té na? Ya bahagyè ba léna té: A wakyè!
65Ôkaté ibaté batu ba tutw’añgô matèy ô nyô, ba hogy’añgô bôhô, ba haz’añgô mababa, bañgô té: Sokoko, b’ô yéba a mu haz’obè. Gyakana bagyazi, na bañgô ba haz’añgô békoko.
66Sônd’imènè, Pièr a gya ô héhé pia hèñgyè; ya mwétô moko wa nloñgyè mwa bagyazi ba nèni mwa baprèt, a hulañga. 67A ñkwènè Pièr a yolo wéya, a ta añgô bono, a ñgo n’ègyi té: N’obè ô gya na Yésu wa Nazarèt wé? 68Ndé a ñgo té: Hamama, ma ñgyébé, ma yôké gyambô gy’ô soho gyè ôbwégyi. Y’añgw’a many’ôkaté, a lwa ô ha èpésa. 69Ya mwétô mènè a ñkwèn’añgô aminè, a ñgo na batu ba gy’ôkaté té: Mut’ôté a bé mutu wa nloñgyè mènè mômpô. 70Pièr a banda nsoho aminè. Mw’èlomo a yékana aminè, ya batu ba gy’ôkaté ba ñgo na Pièr té: Mômpô, obè mutu wa nloñgyè mènè, bôsina obè mutu wa moñgo mwa Galilé. 71Y’añgw’a tas’i sèmè, a kana méñkyési té: Ma ñgyébé mutu wa bya soho n’ègyi wè. 72Èsi mènè èko, hôhô ya loñgo èkus’a mba. Ya Pièr a yébwa gyambô gya Yésu a soho n’ègyi té: Hôhô ndèka pi loñgo békusi béba, obé ñgoko békusi béhatô té ô ñgyébé mè. Sônd’añgw’a yébwa yumènè, a tas’i ñkwéya.
S'ha seleccionat:
Mark añgw’a téndé 14: KOQ1938
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
historical text maintained by the British and Foreign Bible Society