Mark añgw’a téndé 13
13
ÈLUKW’A GYÔÑ NA BÉHATÔ (13)
Ihañgé gy’èlôñkw’a Nzamb’inènè n’iyé gya Mwana mutu é yak’aminè.
1Sônda Yésu a many’ô’lôñkw’a Nzamb’inènè, n‐yôkwè mwègyi moko mwa ñgo n’ègyi té: Ñhèlé, taka mamanya maté na malôñga maté. 2Yésu a hugy’añgô té: Ô ta malôñga manènè maté wé? Imany’imanya gya gyi yisa igyaté ô’kô, ndèka tua.
3Sônd’añgw’a gya ñsi ôkw’ibété gy’Ôliv, hôngôlôlô n’èlônkw’a Nzamb’inènè, ôkaté Pièr, Yakobu, Yôan n’André ba ya pi’añgw’a gyi bamènè, ba humw’añgô té: 4Tandaka bèhè sônda mambô maté ma bé pékôbwèkyè, yañgô ndémbô bèha bé yébaka na yañgô té mahagyè ma ya kun’i kôké.
5Ya Yésu a huñg’i ñgo na bañgô té: Lôñgakany, mutu a kô luñga bihi; 6bôsina batu bukyé ba bé yaka, ba bé yôkyibwèkyè gyino gyamè, bañgô té: Mè bé Krist, ôkaté ba bé luñgaka batu bukyé. 7Sônda byé yôkaka méntandô mya malumana na mapopogyi ma mabagyi, bya kô sikitakyè, bôsina mambô mènè ma nyè ni péka; ndé bôhukyè habé bwè. 8Ikaka gya bé lumaka n’igyat’ikaka, moñgo mwa bé lumaka n’imwaté moñgo; héhé ya bé niñkaka imaté masi, imyaté myoñgo mya bé gyaka na za. Mambô mènè, mañgô bé itasé gya ményuku. 9Ndé bihi, lôñgakany. Ba bé siñgyèkyè bihi ô bélôñkwè bya bakani na bélôñkwè bya Nzambé, ba pazè bihi ôkaté; bya bé tèmèkyè ô môhô ma bakomanda na ménèni bôsina bwamè: gyambô mènè gya bé hèlṽèkyè bañgô. 10Ndé Ntandô mwa Mpalè mwa nyè ni tandôbwè pia makaka mahagyè. 11Sônda ba bé tègyèkyè bihi yumènè, bya kô ñkwènèkyè èbèbè na mambô ma byé sohoko, ndé sohokwany gyambô gya bé wèbwèkyè bihi èsi mènè: habé bihi bé sohoko, ndé Èkôkôy ya Mpalè yañgô bé sohoko. 12Bana b’ilupu, moko a bé siñgyèkyè iwaté té a wakyè, na hañgwè ètè èko na mwana; bana ba bé ñkanyaka na hañgwè na nyañgwè, ba bôma bañgô; 13batu bahagyè ba bé ñkyinyèkyè bihi bôsina bwa gyino gyamè. Ndé mutu é mpéndébaka n’i pwaka pia bôhukyè, angô bé yôñgaka.
14Sônda byé ñkwènèkyè bôbé bwa wè batu ibuku ô ménléma, bwa pékôbwè ôsa ndèka nyè ni péka (obè nlañgi, koloko gyañgô ôbwégyi), sônd’imènè, batu ba bé gyak’ô moñgo mwa Yudé, ba lwakyè méñhula ôkwa mabété; 15mutu é gyaka ôkwa mwaza, a kô mikyè hula ôkatw’èlôñkwè, i nonokw’i tumbèkyè èmpa; 16mutu é gyaka makuba, a kô mikyè huñwana i tumbèkyè iñgoy gyègyi. 17Nyuku pia bétô bé gyaka na myoy sônd’imènè, na ba bé nyañgyèkyè bana! 18Bondoñgokwany na Nzambé té mambô mènè ma kô pékôbwèkyè ô’pwé gya ñkôla; 19bôsina mia mènè, ményuku mya bé yékaka; batu ba ta ñkwènè ményuku ètè mènè yiñkaka itasé gya héhé gya Nzambé a yèbè n’i pwaka mwéhé; ba gyi ñkwènè myañgô aminè n’i pwaka mbèy‐mbèy. 20Ndé Nzambé mwa gyi namwa mia mènè, ôkaté mutu a mutu mwa gyi yônga; ndé a namwa mañgô bôsina bwa batu ba hôñgôlôlô b’añgw’a bono.
21Sônd’imènè, ndé mutu a ñgo na bihi té: Taka, Krist, a b’ôsaté! Taka, a bé pi’ènè! bya kô bukwèky’añgô. 22Bôsina bakrist b’ôbônda na bañkañga b’ôbônda ba bé hulañgaka, ba péka mayé na mandémbô manènè, i nonokw’i luñgaka gyakana batu ba hôñgôlôlô, ndé ba ba piñzô i pékaka gyañgô. 23Ndé bihi, lôñgakany, mé tanda bihi mambô mahagyè.
24Ndé mia mabébé mènè ma yékana, ôkaté bwia bwa bé hintaka, ñkondè ndèka bany’aminè, 25myési mya bé tuaka ô héhé, mambô manènè ma gy’ô’kô ma niñkana. 26Èsi mènè, batu ba bé ñkwènèkyè Mwana mutu a ya ôkatwa ñkutu na piñzô na kum’inènè; 27ôkaté a bé lèkyèkyè bañgèlè bègyi i lwak’i sogyèkyè batu ba hôñgôlôlô bahagyè, yiñkaka tanda n’i lwaka pia ñkyè, yiñkaka ôbw’a mwagyi n’i lwaka ôbw’a hañgwè, mahukyè ma héhé mahagyè.
28Yôkakany èsika ya mwélé mwa figé: sônda bétaka byègyi bya gya lampilampi, bya tasé pwa bôkay, ôkaté ba yéba té ilumpé gya ya; 29ètè mènè èko, sônda byé ñkwènèkyè mambô maté mahagyè, yébakany té Mwana mutu a ya kuna, a tèmè ô ha itulu. 30Mômpô, ma ñgo na bihi té: Mwañga mwa batu muté mwa gyi hiya, mambô mènè mahagyè ndèka pi hulañga. 31Ikô na héhé ba bé yékaka, ndé mambô mamè ma gyi yékana.
32Bwia nd’èlomo, mutu a mutu mwa ñgyébé bañgô, gyakana bañgèlè ba gy’ô’kô, na Mwana ètè èko, ndé Hañgwè ôkay. 33Gyañgô lôñgakany, bya boñgyè, bôsina bya ñgyébé sônd’èlomo yé kôkaka. 34Takany sônda mutu a lwa pèy; èlomo y’añgw’a many’ô’lôñkwè, ôkaté a gyika yañgô na bagyazi bègyi, a wè mutu ahagyè èhagy’ègyi, a hè ñkol’itulu té a boñgyèkyè ôbwégyi. 35Na bihi, boñgyèkyany, i loñgoko té sônda kw’èlôñkwè é yaka, a kô kobè bihi bya nañga bôyo; 36bôsina bya ñgyébé sônd’añgw’é hulañgaka, ndé n’iko, ndé ô’bébé a bulu, ndé hôhô a bôhô, ndé na kwagyi. 37Gyambô gya ma soho na bihi gyité, ma soho gyañgô na batu bahagyè, gya bé té: Boñgyèkyany!
S'ha seleccionat:
Mark añgw’a téndé 13: KOQ1938
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
historical text maintained by the British and Foreign Bible Society