Luku 8
8
Ja Ereme Jizọsị Ḅụụ Sọ Tẹ Ori Na Mẹnjịm
1Anịtẹso ala ḅaka-a ogbo, Jizọsị na ò Ḍukamẹnjị Oyi Maa apụ Finji ma na nwẹnị ama ama la tẹ Tamụnọ Ama-da mẹ ḅẹ Iḅi Oku mẹ ḍuko. 2#Mat 27.55,56; Mak 15.40,41; Luk 23.49In muarị sakị ja ereme, tẹ ọ̀ ḅụụ ḅio si-atẹmẹ dee sin apụ sọ ini na mum. Magidala ḅẹ Meri, ḅụụ ḅio ọ̀ sọnọma oru dee sin ḅọ ma na; 3Johana, Ẹrọdị warị ḅẹ opu fịrịmẹnjịḅọ, Suza nwẹn-sịn ḅọ ḅe ta ma na, Suzana na, pịkị ja ereme na ịn nyana aị kẹ ḅarasụa Jizọsị na ò ḍukamẹnjịapụ ma na pịrị pịrịm.
Jizọsị Ye-ḍiḅiḅọ Egberi Gbaam
(Mat 13.1-9; Mak 4.1-9)
4Ama-ama ḅụ, tomina-ogbo-ogbo gbii-gbiima Jizọsị dama-ḅom; tẹ in ḅo kobiri ḅin tẹso, ọ̀ nwẹnị mị egberi mẹ gbaa ịn pịrị:
5“Sakị ḅe gbọrụ sakị ḅụ gbọrụ fịye ḍiḅiḅọ mbịaka ḍiḅi ḅẹ mum. Ọ̀ sara gala-galama sakị jaị mẹnjị ḅọrọ etela-ogbo sara tẹ tomi arị nanga ḅọrọm, tẹ feni nwẹnị arị gbọn-fị. 6Arịḅẹ jaị pịkị ḍụḅarị kiri ḅụ korom, tẹ arị ḅịḅị toluma sakị, kiri mẹ minji nyana-a ẹrẹsị arị kpatụ tẹ fịịm. 7Mgbọlị ma ḅẹ jaị nangị apiri ogboku saram, tẹ ḍiḅi aị ma arị na gbọrụ ḅụ so-paka tẹ nangị ma arị temi ḅaam. 8Anịsakị mgbọlị ma ḅẹ jaị iḅi kiri korom; ḍiḅi aị ma nwẹnị so-paka tẹ mbịaka sụa, gberie sọnọa si sọnọa si.”
Tẹ Jizọsị nwẹnị ẹkwẹn gbaịn ḅụ ḅẹẹ, “Ọkọẹrẹsị, ọ́ naa ḅiiarị ḅẹḅẹ ó pokii!”
Egberi Ma Gotẹ Gbaa Ye
(Mat 13.10-17; Mak 4.10-12)
9Jizọsị ḍukamẹnjịapụ ma nwẹnị mị egberi mẹ fiearị ye kẹ ò gbela, 10#Ayị 6.9tẹ ọ̀ nwẹnị pakịrị, “Tamụnọ Ama-da mẹ ḅẹ ḅọị-aị ma nimi mẹ sime ọ́ pịrịm, kụma egberima-aị mie in fie kirikọn-apụ pịrị ḅarịye; mịẹtẹ in ḍiki sọ ini ẹrị ḅịa ḅara, tẹ in poki sọ ịn naa ḅịa ḅara.
Jizọsị Ye-ḍiḅiḅọ Egberi Mẹ Puu-finjim
(Mat 13.18-23; Mak 4.13-20)
11“Miemẹ anie egberi mẹ fiearị ye. Tamụnọ ẹkwẹn mẹ anie ḍiḅi ḅẹ sịn mgbọlị mẹ. 12Etela ḅụ sara mgbọlị ma anie ẹkwẹn mẹ naa tẹ Ekwesu ḅe ḅo ịna aḅioḅẹngbọ ḅụ anị sin so apụụ, ịn ḅofa minini tẹ ḅọrọma ḅẹ nakara. 13Ḍụḅarị kiri koro ḍiḅi aị ma anie oku mẹ naa tẹ ḅioḅẹlẹ ḅara kẹ anị daa-ọkị apụ. Kụma anị iḅiọkụ ịna aḅioḅẹngbọ sọ-mu-a; boowa kala-sakị kịngẹ mie ịn kẹ minini ye, tẹ daaḍiki ḅo gbọrụ sakị ịn ḅịkị so tẹ. 14Nangị asịn ogboku koro mgbọlị ma anie naa tẹ tomikiri ḅẹ ḅalaḅala na, ngọ na mị tomikiri ḅẹ tọrụ-ḅẹlẹ na ḅo ịna ḅioḅẹngbọ ḅụ anị ponoma ḅaa apụ, tẹ ịn ḅụụkụrọma sụa mgbọlụ sọ gbala-gbala ḅịya-a gbamasom. 15Iḅi kiri koro aị ma anie oku mẹ naa tẹ iḅi tẹ, ḅịḅị pokiarị ḅioḅẹngbọ ḅụ anị koko nwenii anị ḅo mgbọlụ sụa apụụ.
Opu Ẹfẹrẹ Kẹ Jụụ Tọnjọ
(Mak 4.21-25)
16 #
Mat 5.15; Luk 11.33 “Tụḅọ ḅọ tọnjọ tọnjị kụma anị kẹ kuku ḅio, anịanịa monoye suku-ḅio ḅọị ḅẹ? Ye ọgọnọ mie mḅọ anị kẹ gbana tẹ anị ḅẹ bele warị mẹ sọ ḅọ, sọ ḅọ sarama ḅarịye.
17 #
Mat 10.26; Luk 12.2 “Ḅọị ye goyegoye paka-ḅo ḅa, gbaịn wararị ye goyegoye ini anị ḍọkị pakama-ḅo ogbo lama ḅa.
18 #
Mat 25.29; Luk 19.26 “Ọkọẹrẹsị ọmịnị iḅi ḅeri kẹ pokii; ye ḅara ḅụ sime ḅọ in jen kẹ sụa mḅọ pịrị ḅa, kụma ye ḅara ḅụ ofori ḅọ ḅe, mḅọ kuromarị mḅọ nyana tẹ nwẹn ḅẹẹ kala ye mẹ sọ, ini mḅọ ḅara ọkị ḅa.”
Jizọsị Iyingi Na Ori Amịnapụ Owiapụ Na Ori Ẹrị Ḅẹ Ḅiim
(Mat 12.46-50; Mak 3.31-35)
19Anịtẹso Jizọsị iyingi na ori owiapụ-amịnapụ na ori ẹrị ḅẹ ḅo sakị tomi ponoma ḅara ḅụ in tolu mu ọ̀ la ḅẹ ọkụ ofori. 20Gbọrụḅọ nwẹnị mu Jizọsị ḅẹẹ; “Í iyingi na í owiapụ-amịnapụ na etela anga sịẹ tẹ ị́ ẹrị ḅẹ ḅiiarị.”
21Jizọsị nwẹnị inimgba ḅẹẹ, “Tamụnọ ẹkwẹn mẹ naa tẹ anị ḍuko ye mịẹarị apụ ma anie ì iyingi, pịkị ì owiapụ amịna apụ.”
Jizọsị Erise Deinmam
(Mat 8.23-27; Mak 4.35-41)
22Gbọrụ ene Jizọsị nwẹnị ò ḍukamẹnjịapụ ma na arụ ḅụkụlọ, tẹ ịn ḅẹẹ, “Ó yee wa tọrụ mẹ saḅa mu osi pakịrị la.” Mie ḅụ ịn nwẹnị saakị mu. 23Ịn dọkụ muarị ogbo mono Jizọsị ọkịm. Tẹ bẹkẹ ḅara ḅụ erise nwẹnị fie, tẹ ọnụngọ ḅakụ, ḅakụ arụ mẹ sọ tẹ inimgba nwẹnị kpọma ḅalafa, arụ mẹ ḅile ḅẹ tẹ ḅoto. 24Jizọsị ḍukamẹnjịapụ ma nwẹnị ò jike saakị tẹ ọ̀ ḅẹẹ, “Sịḅịdaḅọ, Sịḅịdaḅọ! Wa fịị ḅẹ-yearị!”
Jizọsị nwẹnị saakị tẹ tọn fẹrụ mẹ na ọnụngọ mẹ na pịrị, tẹ arị biin tẹ tọrụ mẹ nwẹnị kpọma yaụ-sime. 25Anịtẹso ori ò ḍukamẹnjịapụ ma ḅẹẹm, “Ndẹẹ ḅọrọ ọmịna minini mẹ sịẹ anga?”
Anị sakị opu ḅalafa ịn gbaịn wararị tẹ ịn jụmọ-jụmọ gbelam, “Mie ḅọrọ ndẹndẹ sime tomḅọ, tẹ ḅẹrẹtọn fẹrụ na ọnụngọ na sọ pịrị tẹ arị ọ̀ ḅịḅị pokiarị!”
Jizọsị Tọnwa Oru Ḅụụ Ḅio Sime Owiḅọ Gwọm
(Mat 8.28-34; Mak 5.1-20)
26Jizọsị na ò ḍukamẹnjịapụ ma na nwẹnị dọkụ Galili tọrụ saḅa-koro ḅụ Gẹrasa ama iri mu. 27Tẹ Jizọsị paa arụ ḅio koro kiri sịẹ gbọrụ sakị mie tọnwa oru ḅụụ ḅio sọ ḅin wararị gbọrụḅọ ama mẹ ḅio sime tẹ ḅo ori na bịama ye. Ḅị tomḅọ ḅe ọ̀ kapa sụa-a tẹ mẹnjịarị kụra-ḅio iḅerea, warị sọ ọ̀ sọ-a, kụma ḍụẹịn ḍiḅi piri-ḅio anie ori anga ye. 28Ò Jizọsị ẹrị tẹso, ọ̀ nwẹnị kararama-oloku, tẹ mu Jizọsị ḅụọ suku ọ̀ ḅụụ sẹma-kiri-gbin tẹ oloku, “Jizọsị, Geletẹịn Tamụnọ ḅe Tụḅọ, í tiye kẹ ị̀ mịẹ ḅẹ ḍọkịarị? Sisi, àrị ị́ tẹkẹm, ị̀ kẹ tọrụsiẹrịma ma!” 29Ò gotẹ mie ḍuko ye, Jizọsị tarị tọn ọ̀ ḅụụ ḅio sime si-tẹmẹ ḅe pịrị tẹ ori ọ̀ ḅụụ ḅio paka-soo. Tọnwa sakị anị ò kun kụma ini ikoli kẹ ori aḅụọ na ori aḅara na sụa tẹ ọ̀ kẹ warị-ḅio koroma sọ ori arị anyịma tẹ oru ḅe ò dogi ịkpa ḅio sọ-mu mum.
30Jizọsị nwẹnị ò gbela, “Ị́ ẹrẹ tiye?”
Ọ̀ nwẹnị pakịrị, “Igurube.” Ò gotẹ ọkọ ḅẹẹ ye tọnwa oru ọ̀ ḅụụ ḅio sọ-mu tẹ. 31Oru ma nwẹnị Jizọsị tẹkẹ mịnẹ ori in dee owolo ḅio koroma ma.
32Anị sakị ḅụ opuropo ogbo tụndụ mẹ akaka ye kọn fịarị. Oru ma nwẹnị Jizọsị tẹkẹ mịnẹ ori ịn wẹrịso tẹ ini opuropo ma ḅụụ ḅio sọ-mu. Ọ̀ nwẹnị ọkọ minini ịn pịrị. 33Anịtẹso ịn nwẹnị tomḅọ ḅe ḅụụ ḅio paka so tẹ mu opuropo ma ḅụụ ḅio sọ, tẹ opuropo ma nwẹnị tụndụ mẹ ọgọnọ gbere-gberema mangị ideri-mu tọrụ mẹ ḅio sombi fịị.
34Tẹ opuropo ma ḍikiḍikiapụ ma pakaye mẹ ẹrị tẹso ịn mangị mu ḍuko ama mẹ ḅio ḅẹ apụ na ḍụọ ḅio ḅẹ apụ na pịrịm. 35Tomi nwẹnị pakaye mẹ ḍiki ḅẹ tẹ mu. In ḅo Jizọsị la sakị ini oru ma ḅụụ ḅio sime-sime tomḅọ ḅe ẹrịm ò Jizọsị ḅụọ-suku lẹgị wararị, ọ̀ kapa sụa tẹ pịkị sịḅị ḅio kpaịntẹ ḅara sime wararị, tẹ inimgba nwẹnị ḅalafa. 36Anị ẹrị apụ nwẹnị tomḅọ ḅe wẹrịtẹ gwọ ḅara ḅẹlẹma tomi ma pịrị. 37Anịtẹso anịanga mẹ ḅẹ apụ mamgba nwẹnị opu ḅalafa ḅụ Jizọsị dee mịnẹ ori ịna ama soo. Anịtẹso Jizọsị arụ ḅụkụlọ tẹ som. 38Oru ma ḅụụ ḅio sime tomḅọ ḅe nwẹnị Jizọsị tẹkẹ, “Yee àrị ị́ na so.”
Kụma Jizọsị ọ̀ kẹ ori ama fịrịma tẹ ḅẹẹm, 39“Pịkị-so ama mu tẹ Tamụnọ kọrị ị́ pịrị ye mẹ ḍuko ị́ ama ḅẹ apụ pịrị.”
Tomḅọ ḅe nwẹnị bebe ama mẹ mẹnjị-mẹnjị tẹ Jizọsị kẹ ọ̀ mịẹ iḅi mẹ ḍuko ma ḅọrọ.
Jizọsị Fịtẹ Ẹrẹḅọtụḅọ Saakịmam Pịkị Ọmbie Ḅụụ Ḅụ Sararị Ẹrẹḅọ Gwọm
(Mat 9.18-26; Mak 5.21-43)
40Jizọsị pịkịma tọrụ mẹ saḅa-koro ḅo sakị anịanga ò koru sime apụ ma nwẹnị ọ̀ daa-ọkị. 41Anịtẹso ama-warị mẹ ḅio kọrịnama kọrịarị, Jayịrọsị nwẹn-sịn gbọrụḅọ nwẹnị ḅo Jizọsị ḅụọ suku amịna ḅụụ sẹma-kiri-gbin, tẹ ọ̀ tẹkẹ mịnẹ ọ̀ paa ọ̀ warị ḅo, 42ọ̀ tụḅọ oyi maa kụra finji sịḅị ḅụ ḅọrọtẹ kpọkpọ gbọrụ ẹrẹḅọtụḅọ, obi fịịarị ẹrẹsị.
Jizọsị mẹnjị muarị sakị anga-anga ḅụ tomi ma ḅo ọ̀ bịan-arị. 43Tẹ ọmbie oyi maa kụra finji kẹ ḅụụ ḅụ saratẹ, amịna nyana aị mamgba kẹ ḅịrịapụ pịrị fama tẹ sọ paa gwọ-a ẹrẹḅọ sọ ịna ogboku simem. 44Á nwẹnị tomina-ogbo mẹ ḅio ḅụ puu sọ ḅo Jizọsị ọḅụjụ la tẹ ḅara kẹ ọ̀ kapa suku lama, tẹ á ḅụụ sara sime ọmbie mẹ nwẹnị anị gbọrụ sakị ḅụ kiki. 45Tẹ Jizọsị nwẹnị gbela, “Tụḅọ ḅara kẹ ị̀ lama?”
Gbọrụḅọ-sọ minini-a, mie Pita ḅẹẹ ye, “Sịḅịdaḅọ, tomi kọkọ í gbori tẹ sukuruma sukurumarị.”
46Kụma Jizọsị mẹẹ, “Kịnị ḅara kẹ ị̀ lamam; à nimim kụrọ ị̀ ḅụụ ḅụ mẹnjị paka sakị.” 47Ẹrẹḅọ ma ẹrịm mịnẹ kịnị á mịẹ ye mẹ nimi tẹ ḅẹ sakị, á nwẹnị oju sẹkịma ḅo Jizọsị ḅụọ suku á ḅụụ sẹma-kiri-gbin. Anị anga ḅẹḅọ-ḅẹḅọ tọrọkọ mie árị á gotẹ ḅara kẹ ọ̀ lama ye na anị gbọrụ sakị ḅụ á gwọ ḅara na ḍuko ọ̀ pịrị ye. 48Jizọsị nwẹnị á ḅẹẹ, “Ị̀ tụḅọọ, í minini mịẹtẹ ị́ gwọọ tẹ. Dein na soo!”
49Jizọsị paa miemẹ ḍukoarị ogbo Jayịrọsị warị oku ḅo ọ̀ lam mịnẹ tụḅọ ma fịị tẹ ẹrẹsị ọ̀ ḅarị jen kẹ ye-tolumaḅọ ḅe ḅụụ fụkama ma.
50Kụma Jizọsị anị naa tẹ Jayịrọsị ḅẹẹm, “Ḅalafa ma tẹ paa mininii, tụḅọ ma á kụrọma ḅa.”
51Ò ḅo warị mẹ la sakị Pita na, Jọnị na, Jemusị na tụḅọ ma ḍa na iyingiḅọ na sikima ọ̀ ḍụkụ tẹ jụmọ warị mẹ sọ-a. 52Ọrụḅọ-ọrụḅọ tụḅọ ma gotẹ owu-owu tẹ kururuarị anịanga. Jizọsị nwẹnị ḅẹẹ, “Ọmịnị owu ma, tụḅọ ma amụ á fịị-a, á monoarị.”
53Ini ẹrị ḅara ḅụ tụḅọ ma fịị tẹ gotẹ, inimgba nwẹnị ọ̀ ḍẹrị. 54Kụma Jizọsị nwẹnị á ḅara ọlọ tẹ á ḅẹẹ, “Ị̀ tụḅọọ, saakịị.” 55Á tẹmẹ nwẹnị anị gbọrụ sakị ḅụ pịkịma ḅo á ḅụụ sọ, tẹ á nwẹnị saakị sịẹ, tẹ Jizọsị nwẹnị tọn mịnẹ ịn fịye kẹ á pịrị fị. 56Miemẹ nwẹnị kpọma á ḍa-na-iyingi-na ḅụụ-buama, kụma Jizọsị tọn ịn pịrịm in ḍụkụ tẹ kịnị nimi ma.
S'ha seleccionat:
Luku 8: KBTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(C) The Bible Society of Nigeria