Luku 7
7
Jizọsị Romu Ḅẹ Ọmụ-alaḅọ Fịrịmẹnjịḅọ Gwọm
(Mat 8.5-13)
1Jizọsị ma ẹkwẹn mamgba kọn tomi ma pịrị fama tẹso ọ̀ nwẹnị Kepanọmụ mu. 2Anị ama mẹ ḅụ sime Romu ḅẹ ọmụ-alaḅọ fịrịmẹnjịḅọ, tẹ kpọma ọmụ-alaḅọ ḅe ḅụụ yela lama ḅọ, obi tẹ fịị, fịị ḅara simearị, Jizọsị ama mẹ la sakị. 3Ọmụ-alaḅọ ḅe Jizọsị gbolomaye naa tẹso, ọ̀ nwẹnị Juu-ḅẹ omongiapụ fịrịma, mịnẹ ịn paa mu Jizọsị tẹkẹ tẹ ò ḅo ọ̀ fịrịmẹnjịḅọ ḅe gwọ. 4Ịn nwẹnị ḅọ tẹ tẹmẹ-la ḅara kẹ Jizọsị tẹkẹ: “Ḅị tomḅọ ḅe mie ị́ sụn ḅarasụa pịrị na-iḅi ḅọ. 5Ọ̀ wamịna ama ḅẹlẹma lamarị tẹ wamịna ama-warị mẹ sọ ori anie ḅarana anị nama wa pịrị ye.”
6Mie ḅụ Jizọsị nwẹnị ini na mu. Ọ̀ warị mẹ la ḅẹ-yearị ogbo, ọmụ-alaḅọ ḅe ikia apụ, tẹ ọ̀ fịrịma apụ nwẹnị ḅo Jizọsị la, tẹ ọ̀ kẹ ịn fịrịma fịrị mẹ ḍuko ọ̀ pịrị, mịnẹ, “Ị̀ Nyanaḅọ, ị́ ḅụụ fụkama ị̀ pịrị ma. Ị̀ warị í pembema ḅọ da su la-a, 7à pịkị ị̀ ḅụụ ọkị-a mịnẹ à ḅarana ḅo ị́ la gbẹẹm. Paa ḅịḅị kịngẹ kẹ tọn, ị̀ fịrịmẹnjịḅọ ḅe ḅụụ iḅi ḅa. 8Yẹrị sọ kụrọ nyana ị̀ nẹngị apụ suku-ḅio emi, tẹ ị̀ suku-ḅio simearị ọmụapụ sọ emi. À tọn ḅie pịrịm, ‘Muu!’ ḅẹẹ kụma, ò mum; à tọn anị ḅọ pịrịm, ‘Ḅoo!’ ḅẹẹ kụma, ò ḅom, à tọn ì omoniḅọ pịrịm, ‘Mie mịẹ!’ ḅẹẹ kụma, ọ̀ mịẹm.”
9Jizọsị nwẹnị ḅụụ-bua, ò miemẹ naa sakị, tẹ nwẹnị pịkị ori ọḅụ ḍiki, tẹ ò ḍuka ḅoarị tomina-ogbo mẹ ḅẹẹ: “À ḍuko ọ́ pịrịarị, jene-jene mie kịka minini amụ àrị, Izirẹlị ḅụ sọ ẹrị-a!”
10Oku mẹ ḅo apụ ma nwẹnị pịkịma ọmụ-alaḅọ ḅe warị mu tẹ ẹrị mịnẹ ọ̀ fịrịmẹnjịḅọ ḅe ḅụụ iḅi tẹ.
Jizọsị Diḅọ-fịtẹ-ẹrẹḅọ Tụḅọ Saakịmam Fịị Ḅụ
11Anịtẹso ala-a ogbo Jizọsị nwẹnị Nahini nwẹn-sịn ama mu, ò ḍukamẹnjịapụ ma na opu tomina-ogbo na ọ̀ ḅụụ sọ tẹ mum. 12Ọ̀ paa ḅo ama mẹ ḅe ogigo-ḅọkọ mẹ la gbọrụ sakị ḍụẹịn dogi tẹ kẹ ḍiḅi ḅẹ-muarị apụ ọgbụrụ-sụn tẹ paka-ḅoarị. Fịịḅọ ḅe anie diḅọ-fịtẹ-ẹrẹḅọ ngẹrị tụḅọ, tẹ opu tomina-ogbo á gbori tẹ árị na ḅoarị. 13KỊNỊNYANAḄỌ ḅe árị ẹrị sakị ori á ḍiki tọrụ-kụrụkụrụ lamam. Tẹ ọ̀ nwẹnị á ḅẹẹ, “Owu ma, ị́ na.” 14Anịtẹso ọ̀ nwẹnị saḅa mu ḅara kẹ ḍụẹịn igbe mẹ lama, tẹ anị dogiapụ ma nwẹnị daasịẹ. Jizọsị nwẹnị ḅẹẹ, “Asatụḅọ, yẹrị ị́ ḅẹẹarị, saakịị.” 15Fịtẹ tomḅọ ḅe nwẹnị saakị lẹgị, tẹ ẹkwẹn. Jizọsị nwẹnị ḍumo ḅụ ọ̀ kẹ ò iyingi pịrị.
16Ḅalafa nwẹnị inimgba ḅụụ ḅio sọ, tẹ ịn nwẹnị Tamụnọ tokini, ḅẹẹ mịnẹ, “Opu ịkịankoroḅọ paka-ḅo tẹ wamịna ogboku! Tamụnọ ori atomi ḅọrọma ḅẹ ḅo tẹ.”
17Miemẹ tẹ Jizọsị kọrị ye mẹ bebe Judiya sịẹ mẹ na anị ikelema-koro iri mamgba na kana-korom.
Minji-sara Jọnị Oku-mẹnjịapụ Kẹ Jizọsị Fịrịmam
(Mat 11.2-19)
18Jọnị ḍukamẹnjịapụ mịna aị mamgba ḅẹlẹma ọ̀ pịrị tẹso, ọ̀ nwẹnị ịna ḅụ ḅẹ maa apụ sịn tẹ ịn 19fịrịma mịnẹ in mu KỊNỊNYANAḄỌ ḅe gbela, “Ḅo ḅẹ tẹ Jọnị ḍuko ḅọ ḅe mụnọọ wa paa jụmọ ḍiki ḅẹ?”
20In ḅo Jizọsị la tẹso, ịn nwẹnị ḅẹẹ; “Minji-sara Jọnị mẹẹ wa ì gbela, ị́yẹrị anie ḅo ḅẹ tẹ ò ḍuko ḅọ ḅe mụnọọ wa paa jụmọ ḍiki ḅẹ?”
21Anị gbọrụ sakị mẹ ḅụ Jizọsị tọnwa tomi gwọm ịna kịrị-kịrị obi ḅụ, pịkị si-tẹmẹ ḅụụ ḅio sime apụ na. Ọ̀ pịkị tọnwa tọrụngbọ-pụụntẹ-apụ mịẹ tẹ ịna atọrụngbọ ye ẹrịm. 22#Ayị 35.5,6; Ayị 61.1Ọ̀ Jọnị oku-mẹnjịapụ ma pakịrịm, “Ọ́ pịkịma-so tẹ ọmịnị ẹrị ye na ọ́ naa ye na ḅẹlẹma Jọnị pịrịị: tọrụngbọ-pụụntẹ-apụ inetẹ ye ẹrịarị; ekeliapụ sakị iḅima mẹnjị tẹẹ; sofịnị-obi-kọnapụ gwọọ tẹẹ; ḅeri-iningiapụ sọ iḅiọkụ ye naa tẹẹ; fịtẹ-apụ sọ fịị ḅụ saakịarị; igoin-apụ sọ iḅi-oku mẹ naa tẹẹ. 23Ị̀ ḅụụ ḅụ ḅio-maaịn-tọn nyana-a apụ ma ịn kpọma boma tẹẹ!”
24Jọnị oku-mẹnjịapụ ma so tẹso, Jizọsị nwẹnị ò gboloma ye ḍuko tomi ma pịrị: “Ịkpa mẹ ḅio ó tiye ḍiki ḅẹ mu? Ọ́ fẹrụ asịra jikearị ye ḍiki ḅẹ mu mụnọọ? 25Ọ́ sụn tiye ḍiki ḅẹ mu? Gẹnị-gẹnị kapa sụa ḅọ mụnọọ? Anị ḅara kẹ ye ḅiri tẹ woso-woso anga kọn-arị apụ, amadapụ warị ḅio mie tomi ini ẹrị ḅarịye! 26Ó ḍuko ị̀ pịrịị, ó gbeke tiye ḍiki ḅẹ mu? Ịkịankoroḅọ ḅarị ya? Inn, ọkọ kụma ịkịankoroḅọ nẹngị ḅọ mie ọmịnị ẹrị ḅọ. 27#Mal 3.1Kẹ gotẹ ọkọ ḍukoarị, Jọnị anie Fịafịa Ḍiri mẹ ḅẹẹ ḅọ ḅe: ‘Tamụnọ nwẹnị ḅẹẹ àrị ị̀ oku-mẹnjịḅọ kẹ ị́ tọrọkọ tarị fịrịma ḅa, tẹ ori etela mẹ finji ị́ pịrị ḅa.’ ” 28Jizọsị nwẹnị mie kẹ sụa ḍuko, “À ḍuko ọ́ pịrịarị, ḅẹẹ tomḅọ-tomḅọ tẹ tomikiri anga tẹ ḅọ tẹ Jọnị na gbasị ḅọ ofori. Anịsọ, Tamụnọ Ama-da suku-ḅio simearị atomi ma ogboku ḅụ iderima tẹịn ḅọ Jọnị nẹngị wararị.”
29 #
Mat 21.32; Luk 3.12 Jizọsị kọn ẹkwẹn mẹ naa apụ mamgba, jen-a jen-a ama-igbigi da apụ ma, nwẹnị Tamụnọ karakara etela mẹ ḅiiarị ye mịẹ, tẹ Jọnị ḅara ḅụ minji-sara. 30Kụma Farịsiiapụ ma na Oloko toluma apụ ma na Tamụnọ tọn ịn pịrị ye sịkịm, tẹ ḍụkụ tẹ Jọnị minji kẹ ịn sara-a.
31Jizọsị nwẹnị paa ẹkwẹn tẹ ḅẹẹ, “Mị ḅụọ ḅẹ apụ ma ḅioju à gbeke tiye kẹ ịn tọnma ḅẹ? Ndẹẹ ịn kịkarị ye? 32Ama-ogbo kobiri tẹ tii ḅẹ awọmẹ mie à kẹ ịn tọnma ḅarịye. Ini ḅẹ ja apụ oloku tẹ osi-apụ ḅẹẹarị, ‘Wa ere-ịya akwa farị ọ́ pịrịm, ọ́ sẹkị-a; wa ḍụẹịn owu nume-sunm, ọmịnị owu-a.’ 33Minji-sara Jọnị ḅo ye ò ḅuru-ịmọm, ọ̀ pịkị iru sọ ḅuu-a, tẹ ọmịnị mẹẹ, ‘oru dogiḅọ!’ 34Tomḅọ Tụḅọ ḅe ḅo tẹ fị-na-ḅuu-naarị, tẹ ọmịnị mẹẹ, ‘Ḅieḅe ḍikii! Fị ye fị ye pọkọ-ta-a ḅọ, iru ḅuuḅọ, ama-igbigi da apụ na ama sịkịtẹ apụ na ikiaḅọ!’ 35Anị sime-ḅara, sime-ḅara sọ, Tamụnọ nimi mẹ daa-ọkị apụ mamgba ḅụ tomi anị ḅẹ karakara mẹ ẹrị ḅa.”
Jizọsị Farịsii-ḅẹ Sayịmọnị Warị Mum
36Gbọrụ Farịsiiḅọ Jizọsị sịnm ò ḅo ọ̀ warị ye fị, tẹ Jizọsị nwẹnị mu ye mẹ fị ḅẹ tẹ lẹgị-sime. 37#Mat 26.7; Mak 14.3; Jọn 12.3Anị ama ḅụ si ḍumo kọn-kọn gbọrụ ẹrẹḅọ simem. Á naam Jizọsị Farịsiiḅọ ḅe warị ḅụ yefịarị tẹ á nwẹnị kụnụ lamarị sẹntị tẹ alabasịta nwẹn-sịn ḍụḅarị ololo ḅio sime ye kẹ mu, 38tẹ Jizọsị ọḅụjụ sịẹsime, ori aḅụọ akaka ḅụ, tẹ owu-owu tẹ kẹ ori aḅụọ ḅụ saram. Anịtẹso á nwẹnị á sịḅị-ḅẹ-inume kẹ ori aḅụọ ma sin, ḅịḅị kẹ arị nọnjị tẹ sẹntị mẹ ọsụma arị ḅụ sara. 39Farịsiiḅọ ḅe miemẹ ẹrị sakị ọ̀ nwẹnị ḅịḅị kẹ ḅụụ fiema, “Ḅị tomḅọ ḅe nwẹnị karakaramatẹ ịkịankoroḅọ kụma, ò nimi na-iḅim, ḅara kẹ ọ̀ lamarị ẹrẹḅọ ma sime-ḅara; ò nimi na-iḅim á kọn-arị si ḍumo mẹ!”
40Jizọsị nwẹnị ḅarị gbọsime-a tẹ ọ̀ ḅẹẹ, “Sayịmọnị, à ḍuko ị́ pịrị ḅẹ ye emi.”
Sayịmọnị nwẹnị ḅẹẹ, “Ḍuko ị̀ pịrịị, Ye-tolumaḅọ.”
41Jizọsị mẹẹ, “Sakị ḅẹ gbọrụ sakị ḅụ maa apụ igbigi kẹ kịnị ḅọlọ-ḅọlọ gbọrụḅọ ḅara saa fịm. Gbọrụḅọ ọ̀ ḅara seleḅa igbigi ẹndẹ sọnọa si finji ọlọm; osi ḅọ mesi oyi finji kịngẹ ọlọm. 42Ini maa apụ ma gbọrụḅọ-sọ inetẹ saa mẹ gbẹẹ ḅịa gotẹ ọ̀ nwẹnị saa mẹ ḅụ ḅara-siin ịn pịrị. Ị́ sịn-arị ini maa apụ ma ḅụ tụḅọ ọ̀ ḅẹlẹma tẹịn ḅẹ?”
43Sayịmọnị nwẹnị pakịrị, “À sịn-arị ori opu ye wẹrịso pịrị ḅọ ḅee.”
Jizọsị nwẹnị ḅẹẹ, “Ị́ karakaram.” 44Tẹ ọ̀ nwẹnị tọrụ kẹ ẹrẹḅọ ma da tẹ Sayịmọnị ḅẹẹ, “Ma ẹrẹḅọ ma ị́ árị ẹrị tẹ? Àrị ị́ warị ḅo ye, ḅụọ sịkịrị minji kịngẹ sọ ị̀ kẹ ị̀ pịrị-a, kụma árị á tọrụ ḅẹ owu minji kẹ ị̀ aḅụọ sịkịrị tẹ, pịkị á sịḅị-ḅẹ-inume kẹ sin tẹ. 45Ḅẹlẹma ḅara ḅụ ekpe kẹ ị̀ fịnama tẹ alụa! kẹ ị̀ ḅẹẹ sọ ị́ mịẹ-a, kụma à ḅo kụra-ḅio á ḅịḅị kẹ ị̀ aḅụọ nọnjịarị. 46À kẹ sịḅị lama ḅẹ olivu olo sọ ị́ ị̀ pịrị-a, kụma á sẹntị kẹ ị̀ aḅụọ ḅụ sara tẹ. 47Mịọkụ à ḍuko ị̀ pịrịarị mịnẹ á ḅẹlẹma ḍụḅa la ḅara gotẹ, árị atọnwa asi ma ịn wẹrịso á pịrị fama tẹ. In boowa kalịye wẹrịso pịrị-ḅọ, ḅẹlẹma kalịye mie mḅọ pịkị ḍie pakamarị ye.”
48Anịtẹso Jizọsị nwẹnị ẹrẹḅọ ma ḅẹẹ, “Ị́ asi ịn wẹrịso ị́ pịrị tẹ.”
49Tẹ ini na sọ fịye mẹ fịarị ja apụ nwẹnị mbụrụmbụrụ, “Ḅie ḅọrọ tụḅọ tẹ si sọ wẹrịso kịnị pịrịarị?”
50Kụma Jizọsị ẹrẹḅọ ma ḅẹẹm, “Í minini ị́ ḅọrọma tẹ; dein na muu.”
S'ha seleccionat:
Luku 7: KBTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(C) The Bible Society of Nigeria