Jọnị 6
6
Jizọsị Fịye Kẹ Kịnị Oyi Maa Ẹndẹ Finji Na Kịnị Oyia Asi Na Pịrị Fịm
(Mat 14.13-21; Mak 6.30-44; Luk 9.10-17)
1Miemẹ ḅọrọ tẹso, Jizọsị nwẹnị Galili tọrụ mẹ saḅa osi pakịrị anga mu (anị tọrụ mẹ Tayịberiyasị tọrụ sọ ịn kẹ anị sịn sịnm). 2Gbọrụ opu tomina-ogbo tẹ ọ̀ ḅụụ-buama ḅara kẹ obi apụ gwọ ye ẹrị tẹ apụ sọ anị gotẹ ò ḍuka-mum. 3Jizọsị nwẹnị ò ḍukamẹnjịapụ ma na tụndụ kpọlị tẹ lẹgị-sime. 4Anị sakị Juu-ḅẹ-apụ ma Saḅaḅọrọ-Alalị mẹ ḅo kpeki tẹ. 5Jizọsị nwẹnị ḍiki ikelema tẹ ẹrị mịnẹ opu tomina-ogbo ọ̀ dama-ḅoarị, mie ḅụ ọ̀ nwẹnị Filipu gbela, “Wa inetẹ tọ-anga mị opu tomina-ogbo mẹ kịra ḅẹ fịye ẹrị fẹẹ ḅẹ?” 6(Kẹ Filipu ḅịḅị paka ḅẹ ye ḍọkị anie Jizọsị gotẹ miemẹ gbela ye, ori kụma ọ̀ mịẹ ḅẹ ye ò nimi wẹrịm.)
7Filipu nwẹnị pakịrị, “Ọrụḅọ-ọrụḅọ kalịye, kalịye ọkị sọ seleḅa igbigi oyia asi nẹngị fịturu in nwẹn ḅii ḅa.”
8Jizọsị ḍukamẹnjịapụ ma ḅẹ jen gbọrụḅọ, ori ẹrẹ Anduru, Sayịmọnị Pita iyimbere, nwẹnị ḅẹẹ, 9“Mịanga gbọrụ owiḅọtụḅọ ḅara bali fịlawa kẹ mịẹ fịturu sọnọa akpo na inji amẹngbọ na emi. Kụma karakara-ḅara-ḅụ mịna atomi mamgba ḅụ arị la ḅẹ anga ofori.”
10Jizọsị nwẹnị ḍuko ịn pịrị, “Ó tomi ma mie ịn lẹgị-sime.” (Anịanga mẹ osuka kiri mamgba gbaịn wararị.) Mie ḅụ tomi ma nwẹnị lẹgị-sime; ịna kịẹn-ḅịḅị oyi maa ẹndẹ finji na kịnị oyia asi na pembe ye. 11Jizọsị nwẹnị fịturu mẹ ọkị tẹ ịmịẹtẹ kẹ Tamụnọ ḅẹẹ, tẹ anị ḍiya tomi ma pịrị, ịn lẹgị-sime anga mẹ ḅụ. Anie ọ̀ pịkị kẹ inji mẹ sọ mịẹ ḅara, tẹ inimgba in ḅii ḅara, ḅii ḅara ọkịm. 12Inimgba furo ḅin tẹso, ori ò ḍukamẹnjịapụ ma ḅẹẹm, “Ọmịnị ịn fị kọnma kọsị-sara aị ma kolokolo gbolomaa, ọ́ ḍụkụ tẹ wa gbọrụ kalịye sọ guluguluma ma.” 13Mie ḅụ ịn nwẹnị arịmgba kolokolo gboloma, tẹ bali fịturu sọnọa akpo ma ḅụ tomi ma fị kọnma aị ma tan oyi maa kana finji sụa ḅinmam.
14Tomi ma ḅo Jizọsị mịẹ ḅụụ-buamaye mẹ ẹrị sakị ini mẹẹ, “Piki-pikiye-ofori ḅara ḅụ ḅieḅe anie tomikiri ḅo ḅẹ Ịkịankoroḅọ ḅee!” 15Jizọsị nimi tẹ mịnẹ in ḅo kụrọ-ḅara kẹ ò kun sọ-mu amadaḅọ sọma ḅẹ ye ḅụ ọ̀ nwẹnị anịanga koroma so tẹ ngẹrị mu tụndụ ọgọnọ sime.
Jizọsị Minji Ọgọnọ Mẹnjịm
(Mat 14.22-33; Mak 6.45-52)
16Ene ḅoḅiri tẹso, Jizọsị ḍukamẹnjịapụ ma ideri tọrụ mẹ akaka mu, 17tẹ arụ ḅụkụlọ tẹ dọkụ pịkịma so Kepanọmụ da mum. Ene gbaịn sakị Jizọsị paa ḅo ịn la-a. 18Anị ḅo ọkọ la sakị erise fẹrụ saakị ọnụngọ pakama tẹ. 19Jizọsị ḍukamẹnjịapụ ma dọkụ mu lama tẹso, ịn nwẹnị ori ẹrị ò minji mẹ ọgọnọ mẹnjị ḅo arụ mẹ kpekiarị, tẹ ịn kpọma ḅalafaam. 20Jizọsị nwẹnị ḍuko ịn pịrị; “Ọ́ ḅalafa ma, yẹrịị!” 21Anịtẹso ịn nwẹnị minini tẹ ori arụ mẹ ḅụkụlọ, tẹ anị gbọrụ sakị ḅụ ịn nwẹnị ḅo in muarị anga ḅụ sọma.
Tomi Ma Jizọsị Ḍọkịm
22Anị ḅẹ ene-ḅaa ḅụ tomina-ogbo mẹ tẹ osi saḅa-anga sime apụ ma nwẹnị nimi mịnẹ gbọrụ arụ kịngẹ mie anịanga ḅụ sime ye, tẹ Jizọsị pịkị ò ḍukamẹnjịapụ ma ḅụ sọ tẹ so-a, kụma ini ngẹrị som. 23Tayịberiyasị ḅụ ḅo ja arụ nwẹnị KỊNỊNYANAḄỌ ḅe ịmịẹtẹ kẹ Tamụnọ ḅẹẹ tẹ fịturu kẹ tomina-ogbo mẹ pịrị fị anga mẹ na kpeki pọkụ ḅụ sọma. 24Tomina-ogbo mẹ ḅo ẹrịm mịnẹ Jizọsị na ò ḍukamẹnjịapụ ma na ḅarị anịanga ofori ḅẹ sakị ini arụ ma ḅụkụlọ tẹ Kepanọmụ mu tẹ Jizọsị ḍọkịm.
Jizọsị Anie Ḍumo Fịturu
25Tomi ma tọrụ mẹ ḅẹ osi saḅa-anga Jizọsị ḍọkị-ẹrị sakị ini ọ̀ ḅẹẹm, “Ye-tolumaḅọ, tọ sakị í ḅo mịanga la?”
26Jizọsị nwẹnị pakịrị, “À karakara mẹ ḍuko ọ́ pịrịarị: ó gotẹ ị̀ ḍọkịarị ye ọ́ fị furo ḅinma fịturu mẹẹ, ọmịnị à mịẹ ḅụụ-buamaye mẹ fiearị ye naam ḅẹ ye-a. 27Ọ́ ḅụrụ-ḅụrụ fịye gotẹ kọrịnama kọrị ḅụụ-ḅaa ma, kụma ọ́ kọrịnama kọrị sime mu gbamaso ḍumo laarị fịye mẹ rẹ pịrịị. Miemẹ anie Tomḅọ Tụḅọ ḅe kẹ ọ́ pịrị ḅarị fịye mẹ, gbala Tamụnọ Ḍaḅọ ḅe ọ̀ kọrịnama iḅim ḅẹ elekima kẹ ọ̀ ḅụ sụa tẹ.”
28Mie ḅụ ịn nwẹnị ò gbela, “Wa inetẹ tiye mịẹ kụma wa Tamụnọ ḅiiarị wa mịẹ ḅẹ ye mịẹ apụ sọ ḅẹ?”
29Jizọsị nwẹnị pakịrị, “Tamụnọ ḅiiarị ọ́ mịẹ ḅẹ ye anie ọmịnị ọ̀ kẹ fịrịmaḅọ ḅe mininii.”
30Ini nwẹnị pakịrị, “Ị́ tọ ḅụụ-buamaye mịẹ tẹ wa ẹrị tẹ í minini ḅẹ? Ndẹẹ ị́ mịẹ ḅarịye? 31#Pks 16.4,15; Dev 78.24Wamịna atẹngịapụ ma mana fịm ịkpa mẹ ḅio, Fịafịa Ḍiri mẹ ḅẹẹ ḅara, ‘So ḅio ọ̀ fịturu koroma ḅo ịn pịrị fịm.’ ”
32Jizọsị nwẹnị ḅẹẹ, “À karakara mẹ ḍuko ọ́ pịrịarị; Mozizi kẹ ọ́ pịrị ye mẹ anie So-ḅio koro ḅo fịturu mẹ anị-a; ị̀ Ḍa ḅe anie So-ḅio koro ḅo karakara fịturu mẹ kẹ ọ́ pịrịarị. 33Tamụnọ kẹ tomi pịrịarị fịturu mẹ anie ori tẹ So-ḅio sime tẹ koro ḅo, tẹ ò ḍumo kẹ tomikiri mẹ pịrịarị ḅọ ḅee.”
34Ịn nwẹnị ọ̀ ḅara ḅii, “Wa nyanaḅọ, sakị mamgba nwẹn ḅẹẹ fịturu mẹ kẹ wa pịrịị.”
35Jizọsị nwẹnị ḍuko ịn pịrị, “Yẹrị anie ḍumo fịturu mẹ. Ị̀ ḍọkụma-ḅoarị ḅọ ḅuru ḅarị jen kẹ mḅọ tarị ḅịa; ì mininiarị ḅọ minji ḅarị jen kẹ mḅọ pọkọ tarị ḅịa. 36Mịọkụ, àrị ọ́ ḅẹẹm, mịnẹ ọmịnị ị̀ ẹrị tẹ, kụma ọ́ ḍụkụ tẹ ì minini ḅịa. 37Ị̀ Ḍa ḅe kẹ ị̀ pịrị ḅọ, pịrị ḅọ ị̀ ḍọkụma-ḅo ḅa; ị̀ ḍọkụma-ḅo tẹ à dee ḅẹ ḅọ ofori, 38gbala à So-ḅio koro ḅo tẹ ì ḅiotọn ye mịẹ ḅẹ ẹrẹsị ḅo-a, kụma ị̀ kẹ fịrịma ḅọ ḅe ḅii ye mịẹ mie à gotẹ ḅo ye. 39Tẹ anie ị̀ kẹ fịrịma ḅọ ḅe ḅiiarị ḅara mịnẹ ọ̀ kẹ ị̀ pịrị tẹ apụ ma ḅẹ gbọrụḅọ-sọ à fama ma, kụma kunoma ene ḅụ àrị inimgba saakịma tẹ in ḍumo ḅa. 40Gbala ị̀ Ḍa ḅe ḅiiarị ye anie Tụḅọ ḅe ẹrị tẹ ò minini apụ mamgba sime gbamaso ḍumo nyana. Tẹ àrị ịn saakịma tẹ in ḍumo ḅa kunoma ene mẹ ḅụ.”
41Tomi ma nwẹnị saakị ò ḍuko ye mẹ gotẹ mbụrụmbụrụ, anie ọ̀ ḅẹẹm, “Yẹrị anie So-ḅio koro ḅo fịturu mẹ, ẹrẹsị.” 42Mie ḅụ ịn nwẹnị ḅẹẹ, “Ḅị tomḅọ ḅe anie Josẹfụ tụḅọ Jizọsị ḅe ori-a? Wa kọkọ ọ̀ ḍa na ò iyingi na nimi wararị; ọkọ ḅẹ kụma ndẹẹ ọ̀ pịkị mịọkụ ḅẹẹarị ḅara, mịnẹ ò So-ḅio koro-ḅom?”
43Jizọsị nwẹnị pakịrị, “Ọ́ ḅarị ọmịna ogboku mbụrụmbụrụ ma. 44Gbọrụḅọ-sọ inetẹ ị̀ ḍọkụma-ḅo ḅịa, Ḍaḅọ ḅe tẹ ị̀ kẹ fịrịma ḅọ ḅe mḅọ nụnụ ḅo ị̀ pịrị sikima tẹ; tẹ à nwẹnị mḅọ saakịma tẹ mḅọ ḍumo ḅa kunoma ene mẹ ḅụ. 45#Ayị 54.13Ịkịankoro apụ ma kẹẹm, ‘Tamụnọ ye kẹ ḅẹḅọ-ḅẹḅọ toluma ḅa.’ Ḍaḅọ ḅe ḍukoarị ye naa tẹ ọ̀ ḅara ye ḍawọarịḅọ mie ị̀ ḍọkụma-ḅoarị ḅọ. 46Miemẹ fie-a mịnẹ Ḍaḅọ ḅe ẹrị tẹ ḅọ emi; ori Tamụnọ ḅụ sime tẹ ḅo ḅọ ḅe kịngẹ mie Ḍaḅọ ḅe ẹrị tẹ ye. 47À karakara mẹ ḍuko ọ́ pịrịarị; mininiarị ḅọ mẹ sime gbamaso ḍumo nyana wararị. 48Yẹrị anie ḍumo fịturu ḅe. 49Ọmịna atẹngịapụ ma tẹ ịkpa mẹ ḅio mana fị apụ ma ịn fịịm. 50Kụma So-ḅio koro ḅo fịturu mẹ sime-ḅara anie anị fị ḅọ, fị ḅọ ḅarị fịị ḅịa gbamaso ḅarị ḅara. 51Yẹrị anie ḍumo wararị fịturu mẹ, tẹ So-ḅio koro ḅo ye mẹ. Tomḅọ mị fịturu mẹ fị-fị, mḅọ ḍumo gbamaso ḅa. À kẹ ọ́ pịrị ḅarị fịturu mẹ anie ì oju ḅẹ meni mẹ, anie tomikiri mẹ ḍumo gotẹ à kẹ pịrịarị ye mẹ.”
52Miemẹ nwẹnị kpọma opu ịganị na nụnụa na dogi-ḅo ịna ogboku, tẹ ịn nwẹnị gbela, “Ndẹẹ ḅị tomḅọ ḅe inetẹ ori oju ḅẹ meni kẹ fịye sọma wa pịrị fị ḅẹ ḅara?”
53Jizọsị nwẹnị ịn ḅẹẹ, “À karakara mẹ ḍuko ọ́ pịrịarị: ó Tomḅọ Tụḅọ ḅe oju ḅẹ meni mẹ kẹ fịye sọma tẹ fị-a, pịkị ori ọmbie mẹ ḅuu-a ḅẹḅẹ ó ḍumo nyana ḅịa ọmịna aḅụụ ḅio. 54Ḅẹḅọ-ḅẹḅọ tẹ ì oju ḅẹ meni mẹ kẹ fịye sọma tẹ fị tẹ pịkị ị̀ ọmbie mẹ ḅuu ḅọ sime gbamaso ḍumo nyana tẹ, tẹ àrị mḅọ saakịma tẹ mḅọ ḍumo ḅa kunoma ene mẹ ḅụ. 55Gbala ì oju ḅẹ meni anie karakara fịye mẹ ị̀ ọmbie anie karakara ḅuuye mẹ. 56Ḅẹḅọ-ḅẹḅọ tẹ ì oju ḅẹ meni kẹ fịye sọma tẹ fịarị ḅọ, tẹ ị̀ ọmbie ḅuuarị ḅọ, mḅọ ị̀ ḅụụ ḅio angarị, tẹ yẹrị pịkị mḅọ ḅụụ ḅio angarị. 57Ḍumo wararị Ḍaḅọ ḅe ị̀ kẹ fịrịmam, tẹ ó ḍumo wararị ẹrẹsị yẹrị sọ ḍumo wararị. Anị gbọrụ ḅara mie ị̀ kẹ fịye sọma tẹ fị ḅọ, fị ḅọ pịkị ḍumo ḅarị ḅara. 58Anị sime-ḅara ḅụ miemẹ anie So-ḅio koro ḅo fịturu mẹ; anị ọmịna atẹngịapụ ma fị tẹ fịị fịturu mẹ kịka-a. Mị fịturu mẹ fị ḅọ mẹ mḅọ ḍumo gbamaso ḅa.”
59Kepanọmụ ḅẹ ama-warị ḅụ ò ye tolumarị sakị ḅụ Jizọsị mị ẹkwẹn mẹ kọnm.
Sime Gbamaso Ḍumo Ẹkwẹn Ma
60Jizọsị ḍukamẹnjịapụ ma ḅẹ tọnwa-apụ miemẹ naa tẹ ḅẹẹm, “Mị tolumaye mẹ kụrọ ḅakam. Tụḅọ inetẹ anị fiearị ye naa ḅẹ?”
61Kịnị ḍuko ọ̀ pịrị-a ḅara ḅụ Jizọsị nimim mịnẹ ini mbụrụmbụrụ simem miemẹ gotẹ, mie ḅụ ọ̀ nwẹnị ịn ḅẹẹ, “Miemẹ mịẹtẹ ọ́ ḅarị minini ḅịa ḅarịya? 62Ọkịị, mịnẹ ó Tomḅọ Tụḅọ ḅe ẹrịm ori iwo ò sime tẹ ḅo anga muarị kụma ndẹẹ anị sime ọ́ pịrị ḅẹ ḅara? 63Tamụnọ Tẹmẹ ḅe mie ḍumo pịrịarị, tomḅọ kụrọ mịẹ ḅẹ gberie-sọ ofori. À kọn ọ́ pịrị tẹ ẹkwẹn ma mie Tamụnọ ḍumo pịrị Tẹmẹ kẹ ḅoarị. 64Anịsọ ọmịna ḅụ ḅẹ ja apụ paa minini-a.” (Sukuyọ-saakị kụra-ḅio Jizọsị ò minini ḅịa apụ na ọ̀ kẹ tomina ḅara-ḅio dẹrịma ḅẹ ḅọ na nimim.) 65Tẹ ọ̀ nwẹnị pịkị ḅẹẹ, “Miemẹ anie gbọrsịḅị ye ḅụ ḅẹ karakara mẹ, tẹ à gotẹ ọ̀ ḅẹẹ ye mịnẹ gbọrụḅọ-sọ inetẹ ị̀ ḍọkụma-ḅo ḅịa Ḍaḅọ ḅe mḅọ mịẹtẹ mḅọ ọkọ mịẹ sikima.”
66Miemẹ ẹrẹsị Jizọsị ḍukamẹnjịapụ ma ḅẹ tọnwa-apụ ọ̀ ḅụ som, tẹ ḅarị ò ḍukamẹnjị ḍụkụ-a. 67Mie ḅụ ọ̀ nwẹnị ò Ḍukamẹnjị Oyi Maa apụ Finji ma gbela, “Ọmịnị ndẹẹ anị sime ọ́ pịrị ḅara, ọmịnị sọ ì koroma so ḅarị ḅoto?”
68 #
Mat 16.16; Mak 8.29; Luk 9.20 Sayịmọnị Pita nwẹnị ọ̀ pakịrị, “KỊNỊNYANAḄỌ, wa ḅọrọ so tụḅọ ḍọkụma-mu ḅẹ? Ị́yẹrị anie sime gbamaso ḍumo ẹkwẹn ma nyana ḅọ. 69Tẹ mịọkụ wa minini tẹ pịkị nimi tẹ mịnẹ ị́yẹrị anie Fịafịa Ḅọ ḅe, tẹ Tamụnọ ḅụụ sime tẹ ḅo ḅọ ḅee.”
70Jizọsị nwẹnị pakịrị, “Yẹrị ọmịnị oyi maa apụ finji ma sẹlẹ ọkịm, àrị ọkọ mịẹ-a? Anịsọ ọmịna ḅụ gbọrụḅọ anie si-mịẹḅọ ḅe ḅioju!” 71Judasị gboloma ye mie ò ḍuko sime ye, anie Sayịmọnị Isikarịyọtị tụḅọ ḅe. Ò gotẹ ọkọ ḍuko ye, karakaraye Judasị ḅe sọ Jizọsị Ḍukamẹnjị Oyi Maa apụ Finji ma ḅẹ gbọrụḅọ sọ, ori mie Jizọsị kẹ mu tomina ḅara ḅio dẹrịma ḅarị ḅọ.
S'ha seleccionat:
Jọnị 6: KBTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(C) The Bible Society of Nigeria