Bgah 8
8
Pţooran baţeŋan
1 Yawe Nawat Kabuka aţiini na Moyiŧ aji : 2« Duun Aaron na babukul biinţ, ijej imişa yi baţeŋan, na ukëra uţeŋanaani, uwit ukaş udolni bţeŋan bi ppënan ipekadu, ŋkaneel ŋtëb ŋkaş na kacah kanwooŋ na ipoom indaţ. 3Woli ibaa kşë yitrën bañaaŋ bŧi biki Iŧrayel du ukëbi wi kaloona ki bayiti. » 4Moyiŧ ado uko wi Nawat Kabuka ajakuluŋ : kë bañaaŋ bŧi bayit du ukëbi wi kaloona.
5Wi wi Moyiŧ aşaaŋ aji na bañaaŋ aya kado uko wi Nawat Kabuka ajakuluŋ. 6Ado kë Aaron añog ul na babukul aşë do baka bañow bi meel. 7Awoharan Aaron kamişa kayul, atana katël, awoharana bayeti na Efod#8.7 Efod dawo kamişa ki naţeŋan naweek ajaaŋ awoh woli ado iţeŋan., di aliinŧanuŋ na katël ki da ki atanuluŋ. 8Aţu ţi bjënŧ bi Aaron ŋnuŋu ŋi bañëguŋ aşë kaban ţi ŋa iko idolni pţoori yi bajaaŋ badu Urim na Tumim#8.8 Urim na Tumim : Iwo kko ktëb kanjaaŋ kadolna pţoori kameena uko wi Yawe Nawat Kabuka aŋaluŋ.. 9Ataaya bkow aşë ţu ţi kadun ki uleenŧ wuŋ uko uloŋ wi uwuuru, wul ujaaŋ udiiman kë ayimani, jibi Nawat Kabuka abiiŋ aji na Moyiŧ ado.
10Moyiŧ ajej wal mënţ ukëra uţeŋanaani, akër kaloona kanjaaŋ kadiiman kë Naşibaţi awo da na iko inwooŋ da bŧi. 11Alëŧ ukëra ŋyaaş paaj na uloŋ ţi bliit bi mngur, akër bliit bi mngur na iko inwooŋ da bŧi, bhem bi dko dñownaani na uţeeh wi ba kadolna iko mënţ iyiman. 12Akak ajeeş ukëra ţi bkow bi Aaron, akëra kadolna ayiman. 13Wi abaaŋ, aşë do babuk Aaron kë bañogi, kë awoharan baka imişa iyul, atan baka itël, aţu baka ŋleenŧ jibi Nawat Kabuka ajakuŋ na a ado.
14Wi adoluŋ haŋ aşë do kë baţij uwit ukaş wi bţeŋan bi ppënan ipekadu. Aaron na babukul bapaf kañen ţi bkow bi wa, 15kë Moyiŧ aşë faal wa. Ajej wal mënţ pñaak na pkoñ aţu ţi itiim inwooŋ ţi ibaŋ yi bliit bi mngur kadolna ba bajinţ ţi këş ki Nawat Kabuka ; ajej pñaak atul ţi bliit uţeeh, akakan ba byimanaan kahilna kado da iţeŋan yi ppënan ipekadu. 16Ajej mniir mambooluŋ iko imeeţ, na manjabuŋ ţi ya, na kbuuku na mniir manfooyuŋ ka, dko dannuurnaaniiŋ ţi udeeb na kbuuku atër ma bŧi kaba ţi bliit bi mngur. 17Iko indukiiŋ ţi uwit, kanjan, uyemaţ na mbeţ, ajej ya katër bŧi kalowan dko di bafëţuŋ jibi Nawat Kabuka ajakuluŋ ado.
18Wi abaaŋ aşë do kë baţij unkaneel ukaş wi bawooŋ i ptërad bŧi Nawat Kabuka, kë Aaron na babukul bapaf kañen ţi bkow bi wa. 19Moyiŧ ajej wa afaal aşë lëŧ pñaak ţi ibaŋ yi bliit bi mngur. 20Atibëş tibëş uyemaţ, atër bkow bŧi na uyemaţ untibëşuŋ wuŋ, na mniir. 21Ajej ipëş na ikuţaţ anaj ya atër ya bŧi aba bŧi ţi bliit bi mngur. Atër wa bŧi aba kë uwo bţeŋan bi badoluŋ pa Nawat Kabuka jibi abiiŋ aji na a ado, uwo uko untëruŋ wi pţëkëñ pajaaŋ palila.
22 Moyiŧ ado wal mënţ kë baţij unkaneel ukaş utëbanţën, wi bţeŋan pa pţooran baţeŋan, kë Aaron na babukul bapaf kañen ţi bkow bi wa. 23Wi wi Moyiŧ aşaaŋ afaal wa ajej pñaak aţu ţi plep pi kabaţ kadeenu ki Aaron, na ţi pndëŋ pi kañen kadeenu na ţi pndëŋ pdeenu pi kahoţ. 24Wi abaaŋ aşë do kë babuk Aaron kë bañogi, kë akak aţu baka pñaak ţi plep pi kabaţ kadeenu, ţi pndëŋ pi kañen kadeenu na ţi pi kahoţ kadeenu. Ajej pñaak alëŧ ţi ibaŋ yi bliit bi mngur. 25Ajej mniir : mi ptant, mambooluŋ iko imeeţ, na manjabuŋ ţi ya, na kbuuku na manfooyuŋ ka, dko dannuurnaaniiŋ ţi udeeb na kbuuku, na pnkant pdeenu. 26Apënan kapoom kaloŋ ţi kacah ki ipoom indaţ inwooŋ ţi kadun ki Nawat Kabuka, kapoom kanwooŋ na ukëra na pntaŋ apaf ya ţi mniir na pnkant pdeenu. 27Ajej iko mënţ bŧi aţu ţi iñen yi Aaron na ţi yi babukul kë başë deeŋ ya adek du baţi adiiman ya Nawat Kabuka. 28Akak ayeenk ya, atër ya bŧi aba du bliit bi mngur aţu na iko intëruŋ bŧi aţeŋan, kë uwo bţeŋan bi bajaaŋ baţooranaan baţeŋan kë pţëkëñ palil Nawat Kabuka.
29Moyiŧ ajej bjënŧ aşë deeŋ ba adek baţi adiiman Nawat Kabuka, kë bawo kafah ki Moyiŧ jibi Nawat Kabuka ajakuluŋ. 30Wi adoluŋ haŋ, ajej ukëra wi bajaaŋ baţeŋanaan na pñaak panwooŋ ţi bliit bi mngur alëŧ ţi Aaron na babukul na ţi imişa yi baka. Hënk di di adoluŋ kë Aaron na imişa yi nul na babukul na imişa yi baka kë bayimani.
31Wi abaaŋ, aşë ji na Aaron na babukul : « Najuŋan uyemaţ du ukëbi wi kaloona ki bayiti, nade wa na ipoom indaţ imbëkanuŋ ţi kacah ki bajaaŋ badolna bţeŋan bi pţooran baţeŋan jibi njakuŋ aji an naluŋ kade wa. 32Uko unkdukiiŋ ţi ipoom na uyemaţ, natër wa bŧi. 33Nado ŋnuur paaj na uloŋ ţi ukëbi wi kaloona ki bayiti, bë naankpën da, te wal wi pţooran pi nan pakbaaŋ, ţiki pawo ŋnuur paaj na uloŋ. 34Nawat Kabuka ajakuŋ ŋdo jibi ŋdoluŋ nţa aşë miir ipekadu yi nan. 35Kë hënk di nakţooŋ ŋnuur na ŋŧejan paaj na uloŋ du ukëbi wi kaloona kabaa kahil pdo kado iteŋan yi Nawat Kabuka aţuuŋ pdo kabuurna pkeţ. Uko waŋ wi wi ajakuŋ ndo. » 36Aaron na babukul biinţ bado iko bŧi yi Nawat Kabuka aţëpnuŋ ţi Moyiŧ aji na baka bado.
S'ha seleccionat:
Bgah 8: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal