Bgah 9
9
Baţeŋan bajun ulemp
1Wi unuur uţënk bakreŋ ubanuŋ Moyiŧ adu Aaron na babukul biinţ na bantohi biki Iŧrayel 2aşë ji na Aaron : « Jejan ubay ukaş pa pdo bţeŋan bi ppënan ipekadu yi nu na unkaneel ukaş ŋi baktëruŋ bŧi, ŋul bŧi ŋaanwo kaţakëm nin dko dloŋ këme kawo na ujad uloŋ, iţij ŋa ţi kadun ki Yawe Nawat Kabuka. 3Woli ido kşë ji na babuk Iŧrayel : “Najejan upi udow naţeŋan Nawat Kabuka ahilna amiiran ipekadu, najejan kak uwit ukaş na unkaneel ukaş ŋankaaŋ uşubal ŋanwooŋ ŋaanţakëm nin dko dloŋ këme awo na ujad uloŋ ŋi naktëruŋ bŧi. 4Na manjoonan nţa Nawat Kabuka apën kawinana ţi kadunan, ukaaŋ kë nawo kajej uwit ukaş na unkaneel ukaş pa bţeŋan bi bŧiinkar ţi Nawat Kabuka na bañaaŋ kafiŋ ţi kadun ki nul, kabot kado indak kanaakrën na ukëra.” »
5Baţij iko bŧi yi Moyiŧ ajakuŋ ţi ukëbi wi kaloona ki bayiti, kë bañaaŋ bŧi başë bi añog anaţ ţi kadun ki Nawat Kabuka. 6Kë Moyiŧ aşë ji : « Uko wi, wi wi Nawat Kabuka ajakuŋ nawo i pdo ; nadoon kado wa, mndëm mi nul manhilna manwinana ţi kadunan. »
7Moyiŧ aji wal mënţ na Aaron : « Ñogan keeri ţi bliit bi mngur, ido bţeŋan bi nu pa ppënan ipekadu na bţeŋan bi iktëraduŋ bŧi Nawat Kabuka, hënk amiir ipekadu yi nu na yi biki katohu#9.7 na yi biki katohu : Bapiiŧ ţi ŋlibra ŋloŋ aji : na yi bañaaŋ biki Iŧrayel bŧi. Ibale kşë do bţeŋan pa bañaaŋ biki Iŧrayel bŧi, jibi Nawat Kabuka ajakuŋ, ahilna amiir ipekadu yi baka. »
8Aaron aya añog keeri du bliit bi mngur aşë junna afaal ubay ukaş Nawat Kabuka ahilna amiir pekadu di nul. 9Babukul baţija pñaak, kë aŧoop pkoñ ţi pa aşë kër ţi itiim inwooŋ ţi ibaŋ yi bliit bi mngur abot ajeeş ploŋ ţi bliit uţeeh. 10Ajej mniir na kbuuku na dko dannuurnaaniiŋ ţi udeeb ado kë batër bŧi du bliit bi mngur jibi Nawat Kabuka ajakuŋ na Moyiŧ ado. 11Aaron ajej uyemaţ na katël atër bŧi du bdig bi dko di bafëţuŋ.
12Wi wi Aaron aşaaŋ afaal unkaneel ukaş wi bţeŋan bi nul. Babukul bawula pñaak, kë alëŧ pa afooyan bliit bi mngur. 13Bawula unŧaam wi bţeŋan wi bafal falanuŋ, na bkow, kë ajej atër bŧi du bliit bi mngur. 14Anaj ipëş na ikuţaţ aşë do kë batër ya bŧi aba na iko indukiiŋ yi unŧaam wi bţeŋan.
15Wi abaaŋ pdo bţeŋan bi nul, aşë jej bţeŋan bi bañaaŋ, kaţen Nawat Kabuka : Ajej upi udow wi bţeŋan bi ppënan ipekadu yi bañaaŋ, afaal wa aşë do bţeŋan jibi adoluŋ na ubay ukaş. 16Ado kë baţij ŋnŧaam ŋi bţeŋan ŋi bawooŋ i katërad bŧi Nawat Kabuka aşë ţeŋan ŋa jibi ajakuluŋ. 17Wi wi aşaaŋ aţij indak yi bañaaŋ biki Iŧrayel bawululuŋ yuŋ, aŧuman kañen aşë tër ya bŧi du bliit bi mngur. Bţeŋan bi adoluŋ hënk baanji baneenan ptër bŧi bi bajaaŋ batër nfa mandoli.
18Abaañşaan wal mënţ uwit ukaş na unkaneel ukaş ŋi akfaaluŋ kadolna bţeŋan bi bŧiinkar ţi Nawat Kabuka na bañaaŋ. Babukul bawula pñaak pi ŋnŧaam ŋuŋ, kë alëŧ pa afooyan bliit bi mngur, 19aţu na mniir mi uwit, na mi upi, ptant pi ŋa, mniir mambooluŋ iko imeeţ, na manjabuŋ ţi ya, na kbuuku na mniir manfooyuŋ ka, na dko dannuurnaaniiŋ ţi udeeb. 20Baţu yuŋ mënţ ţi ijënŧ, kë Aaron atër mniir bŧi aba du bliit bi mngur. 21Ajej ijënŧ na pnkant pdeenu adiiman Nawat Kabuka, jibi Moyiŧ abiiŋ aji na a ado.
22Wi abaaŋ pdo iţeŋan bŧi, Aaron atar wal mënţ iñen adek du bañaaŋ añehan Nawat Kabuka awul baka bnuura, aşë wala du bliit bi mngur, 23aneej na Moyiŧ du kaloona ki bayiti. Wi babaaŋ aşë pën, añehan Nawat Kabuka awul bañaaŋ bnuura. Wal mënţ, kë mndëm mi Nawat Kabuka manşë pën awinana ţi kadun ki bañaaŋ bŧi. 24Bdoo bloŋ bamara mara awoona du Nawat Kabuka atër iko inwooŋ ţi bliit bi mngur duuţ bŧi aba : ŋnŧaam ŋi bafaaluŋ na mniir. Wi bañaaŋ bawinuŋ uko waŋ, bukal bŧi balilan ahuuran aşë jot afëţ kaara ţi mboş.
S'ha seleccionat:
Bgah 9: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal