Bgah 3
3
Bţeŋan bi pŧiinkar ţi Nawat Kabuka na bañaaŋ
1« Woli aloŋ ţi an ado bţeŋan bi bŧiinkar ţi Nawat Kabuka na bañaaŋ na unŧaam uweek, awo i kaţij ţi kadun ki nji Yawe Nawat Kabuka uwit ukaş këme waaţ unwoyi uunţakëm ţi nin dko dloŋ. 2Apaf kañen ţi bkow bi unŧaam kaşë kafaal wa ţi ukëbi wi kaloona ki bayiti. Wi afaaluŋ, baţeŋan babuk Aaron başë jej pñaak kalëŧ pa kafooyan bliit bi mngur. 3Kafah kaloŋ ki bţeŋan buŋ katër bŧi pa Nawat Kabuka. Mniir mambooluŋ iko imeeţ, na manjabuŋ ţi ya, 4na kbuuku na mniir manfooyuŋ ka, dko dannuurnaaniiŋ ţi udeeb na kbuuku. 5Baţeŋan babuk Aaron batër kafah kuŋ bŧi kaba ţi bliit bi mngur kanaakrën na bţeŋan bi baţënkuŋ ţi imul inkyikuŋ yuŋ. Uwo uko untëruŋ wi pţëkëñ pajaaŋ palil Nawat Kabuka.
6« Woli ñaaŋ ado bţeŋan bi bŧiinkar ţi Nawat Kabuka na bañaaŋ na unŧaam umpoţi awo i kaţij ţi kadun ki Nawat Kabuka upi këme unkaneel, unwooŋ ukaş këme waaţ awo uunţakëm nin dko dloŋ. 7Woli ado bţeŋan na unkaneel, aţij wa ţi kadun ki Nawat Kabuka, 8kapaf kañen ţi bkow bi wa, kaşë kafaal wa ţi kadun ki kaloona ki bayiti. Wi afiŋuŋ, baţeŋan babuk Aaron başë jej pñaak kalëŧ kafooyan bliit bi mngur. 9Ţi bţeŋan mënţ, apënan mniir katër bŧi pa Nawat Kabuka : akib ptant bŧi kapënan ţi unŧaam, mniir mambooluŋ iko imeeţ, na manjabuŋ ţi ya, 10na kbuuku na mniir manfooyuŋ ka, dko dannuurnaaniiŋ ţi udeeb na kbuuku. 11Naţeŋan atër yuŋ mënţ kaba bŧi ţi bliit bi mngur. Uwo uko ude untëruŋ pa Nawat Kabuka.
12« Woli ado bţeŋan na upi, aţij wa ţi kadun ki Yawe Nawat Kabuka. 13Apaf kañen ţi bkow bi wa kaşë kafaal wa ţi kadun ki kaloona ki bayiti. Baţeŋan, babuk Aaron bajej pñaak kalëŧ kafooyan bliit bi mngur. 14Ţi bţeŋan bi akdoluŋ pa Yawe Nawat Kabuka apënan mniir manfooyuŋ iko imeeţ, 15kbuuku na mniir manwooŋ ţi ka na dko dannuurnaaniiŋ ţi udeeb na kbuuku. 16Naţeŋan ajej iko mënţ bŧi katër bŧi ţi bliit bi mngur. Uwo uko untëruŋ wi pţëkëñ pajaaŋ palil Nawat Kabuka.
« Idaaş inniiruŋ bŧi iwo yi Yawe Nawat Kabuka.
17« Uko wi, wi wi nawooŋ naanwo kado te mnţo an na pntaali pankpënnuŋ ţi an du dko bŧi di nakfëţaaruŋ : naankde mniir, naankde pñaak pi unŧaam. »
S'ha seleccionat:
Bgah 3: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal