Ppën 7
7
Kakob ki Naşibaţi akkobuŋ Ejiptu.
1Kë Yawe Nawat Kabuka aşë ji na Moyiŧ : « Tenan, ddolu iwo ji Naşibaţi pa Farawuna naşih i Ejiptu, Aaron ţmaku awo naţuparu. 2Iwi ido kaţupa uko bŧi wi nji kaţu'iiŋ pdo, ul aşë do kakakalëş wa Farawuna ahilna awutan biki Iŧrayel bapën ţi uŧaakul. 3Kë nji nşë dënëţëna uhaaş, kaşë kado mlagre na iko iñoŋarënaan iŧum maakan ţi uŧaak wi Ejiptu. 4Aankdi pŧiinkan wal mënţ nşë ndeeŋ kañen ţi Ejiptu mpënan Iŧrayel pntaali pi naan bado kawoona pşini pşini kapoş bnuura ji bangoli, dkob biki Ejiptu kakob kaweek maakan. 5Wal wi nji kadeeŋuŋ kañen kakob bañaaŋ biki uŧaak wi, kapënan biki Iŧrayel ţi wa, biki Ejiptu bame kë nji dwooŋ Nawat Kabuka. »
6Moyiŧ na Aaron bado iko bŧi jibi Nawat Kabuka ajakuŋ na baka. 7Wal wi bakţiiniiŋ na Farawuna, Moyiŧ aka ŋşubal iñeen bakreŋ (80) kë Aaron aka iñeen bakreŋ na ŋşubal ŋwajanţ (83)
Pmul pankakuŋ upula
8 Yawe Nawat Kabuka aji na bi Moyiŧ na Aaron aji : 9« Woli Farawuna aji na an nado uko uloŋ uñoŋarënaan, kji na Aaron ajej pmul pi nul afël pa ţi kadun ki Farawuna, pakak upula. »
10Moyiŧ na Aaron baya du Farawuna ado jibi Nawat Kabuka ajakuŋ. Aaron afël pmul ţi kadun ki Farawuna na ki bañaaŋ banjaaŋ baţënka pşih kë pakak upula. 11Kë Farawuna aşë do kë badu banwooŋ na ŋşal ŋnŧuŋa na bado dayaamu biki Ejiptu kë bado jibi Aaron adoluŋ na dayaamu di baka. 12Bafël imul yi baka kë ikak ŋpula, kë pmul pi Aaron pankakuŋ upula kë payoor ŋundu. 13Kë uhaaş wi Farawuna uşë dënëm kë apok pŧiink baka, ado jibi Nawat Kabuka abiiŋ aji.
Kakob kaŧeek : Meel mankak pñaak
14 Yawe Nawat Kabuka aji na Moyiŧ : « Uhaaş wi Farawuna udënëţi, kë apok pwutan pntaali pi naan paya. 15Yaan faan na nfa du Farawuna wal wi akyaaŋ bdëk. Naţan iyoonka ţi kakab ba, jejan pmul pambiiŋ akak upula iţijan, 16işë ijaka : “Nawat Kabuka Naşibaţi i bahebërë bajaaŋ badëman ayilën ţi iwi aji njaku, iwutan pntaali pi nul paya du pndiiş padëmana, te hënkuŋ iindi pŧiink”. 17Nawat Kabuka aţiini aji : “Uko wi, ukţuuŋ ime kë dwo Nawat Kabuka : dkob pmul pi mmëbanuŋ pi ţi meel mi bdëk manşë mankak pñaak. 18Ŋţëb ŋakeţ, bdëk bapuţ, bañaaŋ baankak ahil pdaan ţi meel mi ba.” »
19Nawat Kabuka aji na Moyiŧ : « Jakan na Aaron ajej pmul adeeŋ pa adek ţi dko bŧi danwooŋ na meel ţi Ejiptu, adek du itant, ibuul, na ilaaña. Meel mi dko duŋ bŧi mankak pñaak, pñaak paniink uŧaak wi Ejiptu bŧi, iko iţuuni meel ido wo na pa. »
20Moyiŧ na Aaron bado jibi Nawat Kabuka ajakuŋ. Aaron adeeŋ pmul ţi kadun ki Farawuna na banjaaŋ baţënka ulemp akob meel mi bdëk kë mankak bŧi pñaak. 21Ŋţëb ŋakeţi, kë bdëk bapuţi, bañaaŋ baankak ahil pdaan meel. Pñaak paniink uŧaak wi Ejiptu bŧi.
22Kë bado dayaamu biki Ejiptu bakak ado uko mënţan wuŋ na dayaamu di baka. Kë uhaaş wi Farawuna udënëţi kë apok pŧiink bi Moyiŧ na Aaron, jibi Nawat Kabuka abiiŋ aji. 23Farawuna adek baka feţ aţiiş katohul aandoo şal şal uko mënţ. 24Bañaaŋ biki Ejiptu bŧi babi ajip kakab bdëk kakaana meel mnuura ţiki baanhil pdaan meel mi bdëk. 25Ŋnuur paaj na uloŋ ŋaţëpi wi Nawat Kabuka akobuŋ bdëk.
Kakob katëbanţën : Ŋbopal
26 Yawe Nawat Kabuka aji na Moyiŧ : « Yaan du Farawuna ijaka Nawat Kabuka aţiini aji : “Wutan pntaali pi naan paya padëmanaan. 27Ipokle pwutan pa, kaţu ŋbopal ţi uŧaak bŧi, ddo ŋa ŋaŧum. 28Ŋaŧum du bdëk, ŋapën kapaya du katohu, du meeţ di ikpiinţuŋ, du kalişa ki nu. Ŋawo du itoh yi banjaaŋ baţënku pşih na du yi pntaali pi nu bŧi. Ŋawo du dko djuŋni ipoom na du iko iweek inagni pşon pi ya. 29Ŋadoo payi'u, na pntaali pi nu na banjaaŋ baţënku pşih bŧi.” »
S'ha seleccionat:
Ppën 7: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal