Ppën 6
6
1 Yawe Nawat Kabuka aji wal mënţ na Moyiŧ : « Hënkuŋ iwin uko wi nji kadoluŋ Farawuna. Mnhina mi kañen naan mandola awut baka baya, mandoo dola do adook baka ţi uŧaakul. »
Kahoŋ ki Naşibaţi adoluŋ aji abuuran Iŧrayel
2Naşibaţi akak aji na Moyiŧ : « Nji dwooŋ Yawe Nawat Kabuka. 3Dpën ţfa awinana ţi kadun ki Abraham, ki Iŧaak, na ki Yakob kë bameenën ţi katim ki El Şaday, Naşibaţi Anhiniiŋ iko bŧi, kë katim ki Yawe Nawat Kabuka mëndo kë bañaaŋ bame ka. 4Ddo bhoŋar na baka aji dwul baka uŧaak wi Kanaan, uŧaak wi babiiŋ awo ţfa bayaanţ. 5Kë nji nşë ŧiink ŋwooni ŋi bañaaŋ biki Iŧrayel biki bañaaŋ biki Ejiptu bakhajanuŋ aşë leş bhoŋar bi nja.
6« Ukaaŋ kë ikya kaji na biki Iŧrayel : “Nji dwooŋ Nawat Kabuka, dpënanan ţi ŋlemp ŋi biki Ejiptu baţu'anaŋ, dpënanan ţi pjuuk pi baţu'anaŋ. Dbuuranan na mnhina mi kañen naan, biki uŧaak mënţ bame wal mënţ kë nji dwooŋ Nawat Kabuka. 7Ddolan nawo pntaali pi naan, nji nşë wo Naşibaţi i nan. Name wal mënţ kë nji dwooŋ Nawat Kabuka, Naşibaţi i nan ankpënananaŋ ţi ŋlemp ŋi biki Ejiptu baţu'anaŋ. 8Dñooţan du mboş mi mehniiŋ aji dwul ma Abraham, Iŧaak na Yakob, nji Nawat Kabuka, dwulan ma manwo mi nan.” »
9Moyiŧ aţup uko waŋ biki Iŧrayel, kë başë wo baanŧiinka ţiki banoor maakan ţi ulemp utam wi baţuuŋ baka. 10Kë Nawat Kabuka aşë ji na Moyiŧ : 11« Yaan iji na Farawuna naşih i Ejiptu awut biki Iŧrayel bapën ţi uŧaakul. »
12Kë Moyiŧ aşë ţiini ţi kadun ki Nawat Kabuka aji : « Dji kanoor na bţup, biki Iŧrayel baandoo ŧiinkën, kë hum di di Farawuna akyaaŋ kaŧiinkën ? »
13Nawat Kabuka akak aţiini na bi Moyiŧ na Aaron ayil baka du biki Iŧrayel na du Farawuna, naşih i Ejiptu, biki Iŧrayel bahilna bapën ţi Ejiptu.
Biki itoh yi bi Ruben, Ŧimeoŋ na Lewi
14Itim yi baweek biki itoh yi Iŧrayel yii yi :
Biinţ babuk Ruben bajeen i Iŧrayel bawo : Henok na Palu, Heŧron na Karmi. Bukuŋ bawooŋ baweek biki katoh ki Ruben.
15Biinţ babuk Ŧimeoŋ bawo : Yemuwel, Yamin, Ohad, Yakin, Şohar na Şawul abuk ñaaţ i Kanaan. Bukuŋ bawooŋ baweek biki katoh ki Ŧimeoŋ.
16Itim yi biki Lewi na pntaali pampënuŋ ţi a yii yi : Gerşon, Kehat, na Merari. Ŋşubal ŋi Lewi adoluŋ ţi mboş ŋawo iñeen-week na iñeen ŋwajanţ na paaj na uloŋ (137). 17Babuk Gerşon bawo : Libni, Şimey na biki itoh yi baka. 18Biki Kehat bawo : Amram, Yiŧehar, Hebroŋ na Uŧiyel. Ŋşubal ŋi Kehat adoluŋ ţi mboş ŋawo iñeen-week na iñeen ŋwajanţ na ŋwajanţ (133).
19Biki Merari bawo : Mahli na Muşi. Bukuŋ bawooŋ baweek biki babuk Lewi na itoh yi baka.
20Amram aniim Yokebed aşinul ñaaţ kë abukara bi Aaron na Moyiŧ. Ŋşubal ŋi Amram adoluŋ ţi mboş ŋawo iñeen-week na iñeen ŋwajanţ na paaj na uloŋ (131). 21Babuk Yiŧar bawo : Kore, Nefeg na Ŧikri. 22Biki Uŧiyel bawo : Mişayel, Elŧafan na Ŧitri.
23Aaron aniim Elişeba, abuk Aminadab, aţa Nahşon ; kë aşë bukara Nadab, Abihu, Eleyaŧar na Itamar.
24Babuk Kore bawo : Aŧir, Elkana na Abiyaŧaf. Bukuŋ bawooŋ biki katoh ki Kore.
25Eleyaŧar abuk Aaron aniim aloŋ ţi babuk Putiyel, kë abukara Pinaŧ.
Bukuŋ bawooŋ baweek biki babuk Lewi andoli na katoh ki ŧul.
26Bi Aaron na Moyiŧ biki Yawe Nawat Kabuka ajakuŋ : « Napënaan biki Iŧrayel ţi uŧaak wi Ejiptu bado kawoona pşini pşini kapoş bnuura ji bangoli. » 27Bukal bayaaŋ aţiini na Farawuna naşih i Ejiptu, biki Iŧrayel bapënna ţi uŧaak.
28Kë uko unţëpuŋ ţi unuur wi Nawat Kabuka aţiiniiŋ na Moyiŧ wii wi, 29aji : « Nji dwooŋ Nawat Kabuka, yaan iţup Farawuna, naşih i Ejiptu uko bŧi wi nji kaţupiiŋ. »
30Moyiŧ aŧeema aji : « Nji dji kanoor na bţup, hum di di Farawuna akyaaŋ kaŧiinkën ? »
S'ha seleccionat:
Ppën 6: knf
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2014, Wycliffe Bible Translators, Inc. in cooperation with Le Groupe CIM-TBM, Senegal