Tegagia 50
50
1Mebanguakoomo i Yusupu kumopuio rupano amano, mengese ka iwoo-wooo. 2I Yusupu parenta ira atano, luwuno sando, ka domerampa-rampao wata ngkoroino amano ka si moboo. Ka do'amba luwuno sando atuu medoloakono rampa-rampa wata ngkoroino i Isaraeli. 3Mongkona atuu pinoko'umari i larono pato pulu oleo, hangano kanandiomo tempo anu kinere a mporampaa wata ngkoroi. To Masiri mpo'inomboakono i larono pitupulu oleo. 4Mansano telaloomo luwuno oleo po'inomboa atuu, i Yusupu motaeako ira luwuno ihino langkanaeno i Pirao, ”Tewala impehohawa aku, imempauakono i Pirao 5#Teg. 47:29-31nine dotena akumo amaku mesumpa, dopotae: Nahi tehine mbo'u akumo mate. A ngkaburu anu kukekeomo i wita Kana'a, asalakono i tu'aimo ukaburu aku. Onaemo pu'uno, i'eheakunemo lumako ndiraane, ka kukaburu ira amaku. Umarino atuu aku koa mekule.” 6Ka i'amba motae i Pirao, ”Lakomo ka kaburuomo amamu atuu, kana sumpa anu itenaakomu.” 7Ka i'amba i Yusupu melungka ta kumaburuo amano. Meronga onae mpelungka mbo'u luwuno pegawaino i Pirao, luwuno mia memota'u inso a langkanaeno, ka luwuno mia memota'u i wita Masiri, 8saru pe'asa rahano i Yusupu, luwuno pepaekompono ka luwuno ihino rahano amano. Butu luwuno anado saru bawaano bembe bimba ka sapido domebintao i wita Gose. 9Meronga onae mpetonda melako luwuno sorodadu mpengara ka luwuno karetano; petotondado langkai ntu'u. 10Sahawedo i Gorene-Ha'atada, anu po'iangano i asatowano Koro Yarade, mpoweweu ira ponsabangia anu tedoa langkai ka magaga i tu'ai. I Yusupu moweweu po'inomboa i larono opitu oleo hangano amano. 11Tempono palilino wita atuu, to Kana'a, mengkitao po'inombo i Gorene-Ha'atada atuu, dompotae, ”Onaemo andio po'inombodo to Masiri anu tedoa magaga.” Onaemo pu'uno po'ianga atuu nineeako Abeli-Misiraimi, anu po'iangano i asatowano Yarade. 12Luwuno anano i Yako meweweuakono kana anu i'oliwiako ira. 13#Tin. 7:16 Onae domewawao anano i wita Kana'a ka mengkaburuo a laro ngkunepo i lere Makapela, lere i sabaano oleo Mamere, anu i'oliomo i Burahima inso ndi Eperoni, to Heti atuu, anu gagi kaburu pine'ueno. 14Umarino kumaburuo amano, i Yusupu mekule i Masiri, saru luwuno pepaekompono ka luwuno mia anu melako meronga onae mengkaburuo amano.
I Yusupu umampuni ira pepaekompono ka umalumi ira
50:15-21
15Tempono domengkitao pepaekompono i Yusupu nine mateomo amado, mpotae ira, ”Bara'ura i Yusupu da monaa aroa ndi ontae ka ta mombaloakono ndi ontae luwuno wineweu mosa'o anu tomeweweuomo ndi onae.” 16Onaemo pu'uno ondae mpotena mia mohaweo pe'oliwi andio ndi Yusupu, ”Napi domate amamiu, me'oliwi iramo: 17Kanandiomo asalakono imempauakono i Yusupu: Po'ineeomo i'ampunio sala ka halado pepaekompomu, hangano mpoweweu iramo anu mosa'o ndi omiu. Kanandio-andio, po'ineeomo ka i'ampunio sala anu wineweudo tetenaa-Do Ue Alado amamiu.” Ka i'amba mengeseomo i Yusupu mansano rumongeo dompepau kanandio ndi onae. 18Luwuno pepaekompono mbo'u me'aiwa ka dompenggolontu mpesomba i arono ka dompotae, ”Omami me'aiwa ka kimegagi atamiu.” 19Sine, motae i Yusupu ndi ondae, ”Siimo imedoito, hangano ongkue andioke Ue Ala? 20Lano mposongka komiumo anu mosa'o ndi ongkue, sine Ondae Ue Ala mosongka Iramo moikoa, mokomengkaao hapa anu gagi kanandio-andio, onaemo mekariao tuwuno mia hadio. 21Gagi siimo imedoito, aku mekariakomiu ka luwuno anamiu mbo'u.” Kanandiomo itareroako ira pauno ka mokorodoo aroado.
I Yusupu mate
50:22-26
22I Yusupu mo'ia mpiha i Masiri saru pe'etuno. Tinuwuno i Yusupu asa etu ka hopulu nta'u. 23I Yusupu da mokokitao ana'ueno i Eparai hawe inule anu ko'otolu; luwuno mbo'u anano i Makihiri, anano i Manase, pineanaako a wawo mpa'ano i Yusupu. 24I Yusupu motaeako ira pepaekompono, ”Nahi tehine mbo'u akumo mate. Sine Ondae Ue Ala manasa Ira mekakaakomiu ka wawa komiu mpeluarako inso i wita andio a wita anu Dodandiakonomo sumpa ndi Burahima, ndi Saki ka ndi Yako.” 25#Pel. 13:19; Yos. 24:32; Ibr. 11:22Ka i'amba i Yusupu tumena ira anano i Isaraeli mpesumpa, ipotae, ”Ondae Ue Ala manasa Ira mekakaakomiu. I tempo atuu asalakono imewawao luwuno wukuku inso i ndi'ai.”
26Ka i'amba i Yusupu mate a ntinuwu asa etu ka hopulu nta'u. Wata ngkoroino rinampa-rampa ka simoboo, ka ninaa a laro bangkano mia mate i Masiri.
বর্তমানে নির্বাচিত:
Tegagia 50: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
