Peluarakoa 1
1
To Isaraeli medinadai i wita Masiri
1:1-22
1 #
Teg. 46:8-27
Ndiomo needo luwuno anano i Isaraeli anu me'aiwa i wita Masiri meronga saru i Yako; me'aiwa ira saru somborido: 2i Rube, i Simeo, i Lewi, i Yehuda, 3i Isakari, i Sebulo, i Benami, 4i Dani, i Napatali, i Gadi ka i Asiere. 5Luwuno inuleno i Yako pitu pulu mia, sekono i Yusupu rauomo i wita Masiri. 6Mateomo i Yusupu, saru luwuno pepaekompono ka luwuno mia pe'asa ntinuwuno. 7#Tin. 7:17-19 To isaraeli mpe'ana ue ka nahi pinokodoa hadiodo. Ondae ntetiangi hadio ka tedoa mokongkongiri donte'ule, onaemo wita atuu bukeako ondae.
8Umarino atuu hinao asa mokole anu da'iaopo ipoparenta i wita Masiri, anu nahi to'orio i Yusupu. 9Motaeomo mokole atuu a mpalilino, ”To Isaraeli atuu mehadio irapo ka memoroso irapo sekono ontae. 10Aiwamo kato mpo'ungke akala kasi dontetiangi mbo'u hadiodo, ka tewala gagi peteaa, kasi domansa ntepo'asa saru iwalito ka dome'ewai kita, ka domelako inso i wita andio.” 11Onaemo ka dompontiso anu mpodagai mia mpo'angga rodi anu ta dumadai ira ka dompo'angga mobea: ondae asalakono mewanguakono i Pirao kota Pitomi ka Ramese, ponaapa arataa. 12Sine kongkodomo mempinokonsii, kongkodomo ntetiangi hadiodo ka nte'ule ira, ranta ka domedoito a nto Isaraeli atuu. 13Onaemo ka ilansara to Masiri dumadai ira to Isaraeli mpo'angga, 14ka doweweu ira marasai tuwudo hangano mpo'angga mobea, onaemo mpo'angga wita pulu, mpoweweu watu tela ka mperupa-rupa anggaa i tonga mpada. Luwuakoano anggaa atuu lansara dodadaiako ira to Masiri ndi ondae.
15Mokoledo to Masiri parenta ira mbo'u sando mpe'ana to Ibarani, asa mia meneeako i Sipira ka anu susua meneeako i Pua, ipotae, 16”Tewala montulungi komiu beine to Ibarani ba dompe'ana, asalakono i poposoo hapa anano atuu: tewala tama anano, asalakono i pepateo, sine tewala beine, po'ineeomo ka ituwu.” 17Sine sando mpe'ana atuu doito ira ndi Ondae Ue Ala ka nahi doweweuo kana anu ipauako ira mokoledo to Masiri ndi ondae, onaemo ka dopo'inee ira nana'ote atuudo mentuwu. 18Ka i'amba mokoledo to Masiri moboi ira sando mpe'ana atuudo ka ipesikeno ndi ondae, ”Tembio ka ipoweweu kanandio mo'inee ira nana'ote atuudo mentuwu?” 19Sumangki ira sando mpe'ana atuudo ndi Pirao, ”Hangano beine to Ibarani nahi dompekena kana beine to Masiri; ondae memoroso ira. Napi dohawe sando mpe'ana, mpe'ana iramo.” 20Ondae Ue Ala moweweu moiko ia sando mpe'ana atuudo; tongku atuu tekense ira ntetiangi ka gagi ira tedoa memoroso. 21Hangano sando mpe'ana atuu doito ira ndi Ondae Ue Ala, Doweweu ira ka dompo'ule. 22#Tin. 7:9Ka i'amba i Pirao moluarako parenta a luwuno palilino, ”Impetadiako ira luwuno ana ntama anu pine'anaakodo to Ibarani a ngkoro Nili, sine luwuno ana anu beine impo'inee iramo mentuwu.”
বর্তমানে নির্বাচিত:
Peluarakoa 1: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
