Tegagia 49
49
I Yako rumonso ira anano rangku mateano
49:1-28
1Ka i'amba i Yako moboi ira anano ka ipotae, ”Ime'aiwamo mpepumpu, ka kupauakomiu, hapa anu komiu mpembasaio lembuino.
2Impepumpumo ka imerongeomo,
luwuno anano i Yako. Imerongeo i Isaraeli, amamiu,
3Rube, omue ana akaku,
rosoku ka wua amba-ambano mosiaku,
omuemo anu lalua a laro pompelangkai,
anu lalua a laro mpabawa.
4Omue anu mebubulaka kana uwoi,
komba omue mbo'u anu lalua,
hangano upewuatakoiomo poturiano amamu
ka sumosa'aio.
Ipewuatakoiomo poturiaku!
5I Simeo ka i Lewi mepaekompo;
parewa mpeteado onaemo parewa pobobarasai.
6Ka si mansa koroiku tetonda a mpedandiado mpoweweu mosa'o,
ka si mansa tepo'asa aroaku saru tepumpuado,
a laro ntekudado ondae pompepate mia
ka montonda po'ehedo mpototopi dii-diino sapi.
7Tetotonaaomo tekudado,
hangano tekudado lambaha,
tetotonaaomo bamburudo,
hangano bamburudo mongkokongiri.
Aku tumia-tia ira i olodo anano i Yako
ka sumiarawo ira i olodo anano i Isaraeli.
8I Yehuda, omue ira me'unde-undeko pepaekompomu,
kaemu ta dumansoo bangawe'udo iwalimu,
ndi omue ira mpenggolontu mpesomba luwuno anano amamu.
9 #
Pod. 24:9; Meng. 5:5 I Yehuda kana anano singa.
Umari morako, komewuatako mantande, hei anaku.
Onae me'opo ka mepombole kana singa lakino ke singa waino,
isemake anu mosia wanguo?
10Tuko poparentaa nahi ta melimba inso ndi Yehuda
ka tuko poparenta inso i olono karuno,
ranta ka ihawe onae anu tekona ndi onae,
ka ndi onae ira mpetuundu luwuno tongku.
11Onae metanggoakono kalideno a ngkeu anggoro
ka ana kalideno a ngkeu anggoro bininiki;
onae ta molombo sangkano mompake anggoro
ka lembano mompake rea wua anggoro.
12Matano motaha hangano anggoro
ka ngisino mopute hangano susu.
13I Sebulo ta rodo i wiwi ntahi,
onae gagi tiimano kapala,
ka tidano hawe i Sidoni.
14I Isakari kana kalide anu moroso wukuno,
anu me'opo i'asio tinembino.
15Tempono kumitao moiko ntu'u penaa-naaa atuu ka tedoa tekosi wita atuu,
ilingkeo oweano ta montembi,
ka gagi ata mo'angga dinadai.
16Kanatuu mbo'u i Dani, onae ta bitara ira tongkuno
mengkena kana asa suku Isaraeli.
17Po'ineeomo i Dani gagi kana ule a nsala,
kana ule me'ipo a nsala kodei, anu motungku tundono ngara,
ranta ka itewangunsule anu mesawikio.
18Ongkue monsisikori tekaduduia inso ndi Omiu, oo Ue.
19I Gadi ira mensapoio gerombola ponsapoi,
sine onae ta sumapoio tundodo.
20Kaanga inso ndi Asere memo'ahi
ka onae ta mompatinda kaangado luwuno mokole.
21I Napatali kana rusa waino anu pinotola,
onae ta me'anaako ira nana'ote anu tekosi.
22I Yusupu kana keu mongura anu mewua,
keu mongura anu mewua umpeda mata uwoi.
Luwuno sampano mewuatako lumaloio rere watu.
23Puu mpepana mensapoio,
mpepana ka mentolahio,
24sine panano moroso mpiha,
ka tokiano ipokomelongkuo,
hangano kae-Do Anu Tedoa Moroso, Ondae Ue Alano i Yako,
hangano puu pompakambino, Torukuno Watuno i Isaraeli,
25Ondae Ue Alano amamu anu Ira tumulungiko,
Ondae Ue Ala Anu Tedoa Pabawa,
anu Ira rumonsoakomu ronso inso i langi i wawono,
saru ronso inso a ntahi malua anu metotoako itotono,
saru ronso uo ka pe'anakaa.
26Ronsono amamu lumaloio ronsono luwuno torukuno nahina tampulaano,
ka anu memo'ahi a luwuno pongku anu mompu'u i ndi'upua.
Luwuno atuu ta metii a wawo uluno i Yusupu,
a wawo taku uluno mia bininiki inso i olodo pepaekompono.
27I Benami kana Serigala anu momperangkami;
i tempono mo'oru ikaano pinongko'alano
ka i tempono ngkiniwia itia-tiao rinontuno.”
28Onaemo atuu luwuno suku Isaraeli, hopulu ka orua porokono. Kanandiomo anu pinauno amano ndi ondae. Singge mia ironsoakono ronso anu lano tiado.
I Yako maate i wita Masiri ka kinaburu i wita Kana'a
49:29–50:14
29Ka i'amba i Yako me'oliwi ndi ondae, ”Tewala te'ipua ongkue pinumpu a uempu'uku, imengkaburu akumo i horido uempu'uku a laro ngkunepo anu po'iangano a lereno i Eperoni, to Heti atuu, 30#Teg. 23:3-20a laro ngkunepo a lere i Makapela i sabaano oleo Mamere i wita Kana'a, lere anu umariomo i'olio i Burahima inso ndi Eperoni, to heti, gagi pekaburua pine'ueno. 31#Teg. 25:9-10; 35:29I tu'aimo ikinaburu i Burahima saru i Sara, beineno; i tu'aimo mbo'u ikinaburu i Saki ka i Ribeka, beineno, 32ka imengkaburuo mbo'u i Lea i tu'ai, a lere saru kunepo anu inoliomo inso a nto Heti.”
33 #
Tin. 7:15
Umarino me'oliwi a luwuno anano, i Yako padiio karuno a wawo mpoturiano ka tampulaomo penaano. Onae pinumpu a uempu'uno.
বর্তমানে নির্বাচিত:
Tegagia 49: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
