Tegagia 48
48
I Yako rumonsoo i Manase ka i Eparai
48:1-22
1Umarino atuu pinauako i Yusupu, ”Amamiu mahaki!” Ka i'amba wawao orua ira anano, i Manase ka i Eparai. 2Mansano pinauako i Yako, ”Anamiu i Yusupu haweomo ndi omiu,” ipumpuomo luwu i Isaraeli rosono ka ipentoro a mpoturiano. 3#Teg. 28:13-14Motae i Yako ndi Yusupu, ”Ondae Ue Ala Anu Tedoa Pabawa mepopokita Iramo ndi ongkue i Lusi i wita Kana'a ka Doronso aku, 4saru mepau ndi ongkue: Ongkuemo anu weweuko mo'ule, ka weweuko tetiangi hadio, saru gagi tepumpuano luwuno tongku. Aku meweengakono wita andio a inulemu ka dompe'ueo ranta nahina tampulaano. 5Kanandio-andio, orua ira anamu anu pine'anaako i wita Masiri, ongkue me'ueo. I Eparai ka i Manase ta gagi ongkue me'ueo mengkena kana i Rube ka i Simeo. 6Inulemu anu hinawemu umarino ondae, omuemo me'ueo, sine a laro pontiaa pusaka, ondae ira ntewinso a needo orua pepaekompono atuu. 7#Teg. 35:16-19Tempono ku'aiwa inso i Padana, ibinta aku i Raheli anu mate a nsala i wita Kana'a, nahi olai inso i Eparata. Kukaburuo i ra'ai, a nsala lumako i Eparata, onaemo Beteleme.” 8Tempono ikita ira i Isaraeli anano i Yusupu, ipotae, ”Isemake ondae andio?” 9Motae i Yusupu ndi amano, ”Ondaemo andio anaku anu Doweeakune Ue Ala i ndi'ai.” Motae mbo'u i Yako, ”Wawa iramo umpeda ndi ongkue, ka kuronso ira.” 10Matano i Isaraeli morawuomo hangano mota'u, onaemo ka nahi pongkita mbo'u. Ka i'amba i Yusupu moko'umpeda ira ndi amano, ka do'amba winoo-woo ka dokalampasi ira amano. 11Motaeomo i Isaraeli ndi Yusupu, ”Nahi kukoo-kooo nine aku kumitao mbo'u rupamu, sine kanandio-andio Ondae Ue Ala mowee aku tempo kumitao inulemu.” 12Ka i'amba i Yusupu dumii ira inso a orua olontuuno amano, ka ipenggolontu mesomba saru rupano hawe a wita. 13Umarino atuu i Yusupu umini ira oruano, i Eparai i koanano me'aro i manggalino i Isaraeli ka i Manase i manggalino me'aro i koanano i Isaraeli. Ka i'amba i Yusupu moko'umpeda ira ndi onae. 14Sine i Isaraeli tendeano tumandeo kae ngkoanano ka inaao a wawo uluno i Eparai, ana anu tompasusu, ka kae manggalino a wawo uluno i Manase, ana anu aka, ranta kaeno tepotamba. 15Ironsoo i Yusupu, ipotae,
”Ueku i Burahima ka amaku i Saki,
tuwu iramo i aro-Do Ue Ala,
Ue Ala anu pakambi akumo
a laro ntumuwuku hawe kanandio-andio,
16ka kana Mala'eka anu motola akumo inso a luwuno masolaa,
Po'ineeomo Ondae anu rumonso ira mia mongura andio.
Po'ineeomo neeku saru needo ueku ka amaku,
i Burahima ka i Saki,
telele hangano ondae ka ira tetiangi hadiodo i tolino.”
17Kumitao amano numaao kae ngkoanano a wawo uluno i Eparai, potaeno i Yusupu anu gagi atuu nahi pine'inungako. Ka i'amba uminio kaeno amano ta lumimbao inso a wawo uluno i Eparai a wawo uluno i Manase. 18Ipotaeakono amano, ”Si kanandio, ama, hangano onaemo andio anu aka. Inaaomo kae ngkoanamiu a wawo uluno.” 19Sine nahi behe amano, ipotae, ”Kuto'orio, anaku, kuto'orio. Onae mbo'u ta gagi asa tongku ka gagi langkai. Sine, uaino ta lalu langkai sekonopo onae, ka inuleno uaino atuu ta gagi hadio tongku.” 20#Ibr. 11:21Ka i'amba rumonso ira i tempo atuu, ipotae, ”Saru pauomo neemiu to Isaraeli ira mporonso, kanandio: Po'ineeomo Ondae Ue Ala weweuko kana i Eparai ka kana i Manase.” Kanandiomo inaao i Eperai laluaopo sekono i Manase. 21Ka i'amba i Isaraeli motaeakono i Yusupu, ”Nahi tehine mbo'u akumo mate, sine Ondae Ue Ala Ira kumongkomi komiu ka wawa komiu mpekule i witado uempu'umiu. 22Kanandio-andio, lumaloio tiado pepaekompomu kuweeakomu asa wawo ntorukuno anu kupongko'alaakono ponai ka panaku inso a ngkaedo to Amori.”
বর্তমানে নির্বাচিত:
Tegagia 48: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
