Tegagia 47
47
I Yako mohawe wita pine'ueno inso ndi Pirao
47:1-12
1I Yusupu lumako pauakono i Pirao, ”Ondae amaku ka luwuno pepaekompoku saru asa bawaa bembe bimba, sapi ka luwuno arataado mehawe iramo inso i wita Kana'a. Kanandio-andio mekongko ira i wita Gose.” 2Onae wawa ira olima mia inso i olodo pepaekompono atuu me'aro ndi Pirao. 3I Pirao mesikeno a mpepaekompono i Yusupu, ”Hapake po'anggaamiu?” Domesangkio i Pirao, ”Luwumami atamiu andio puu pompakambi bawaano bembe bimba, moiko omami maupo uempu'umami.” 4Mpotae ira mbo'u ndi Pirao, ”Omami me'aiwa mpo'ia i wita andio gagi mia mehawe, hangano nahina mbo'u ewo pada kaangado bawaano pinotuwumami atamiu andio ka hangano mongkokongirino mokoninggoa atuu i wita Kana'a. Kanandio-andio i'ehe kamimo atamiu andio mpo'ia mpiha i wita Gose.” 5Ka i'amba motae i Pirao ndi Yusupu, ”Amamu ka luwuno pepaekompomu mehawe iramo ndi omue. 6Wita Masiri andio te'ungkahi ndi omue. Wawa iramo amamu ka luwuno pepaekompomu po'ia mpiha a mpo'ianga lalu moiko i wita andio; po'ineeomo dompo'ia i wita Gose. Tewala hinao mia tino'orimu i olodo anu hinao pompolino, naa ira gagi puu mpodagai pinotuwuku.”
7I Yusupu wawao mbo'u i Yako, amano me'aro ndi Pirao. Ka i'amba i Yako metabe ndi Pirao. 8Ka i'amba i Pirao mesikeno ndi Yako, ”Opia nta'umo tinuwumu?” 9Sumangki i Yako ndi Pirao, ”Tempo pelakopiaku gagi mia mehawe onaemo asa etu ka tolu pulu nta'u. Tempoku tuwu atuu sarai ka bukeako masusaa, napi haweo tinuwudo uempu'uku tempono dompelakopi gagi mia mehawe.” 10Ka i'amba i Yako metabe ndi Pirao ka i'amba meluarako inso i arono i Pirao. 11I Yusupu wawa ira amano ka luwuno pepaekompono a mpo'ianga lalu moiko i wita atuu. Ka weeako ira gagi wita pine'uedo i wita Masiri, i wita Ramesesi, kana anu iparentaakono i Pirao. 12I Yusupu mekaria ira amano, luwuno pepaekompono ka pe'asa rahano amano ka mompatindaako ira kaanga menunu saru hadiono anado.
Wineweuno i Yusupu
47:13-26
13I asa wawo wita atuu nahina kaanga, hangano mokoninggoa atuu tedoa mongkokongiri, ranta luwuno ihino wita Masiri ka wita Kana'a memolema nahi dompokompelelu hangano mokoninggoa atuu. 14Ka i'amba i Yusupu pumpuo luwuno doi anu hinawe i wita Masiri ka i wita Kana'a, doi po'owahi gandu anu me'inolido. I Yusupu wawao doi atuu a langkanaeno i Pirao. 15Mansano pingko doi i wita Masiri ka i wita Kana'a, mehawe iramo luwuno to Masiri mpe'aro ndi Yusupu ka dompotae, ”Poweekami kaanga! Tembio omami asalakono memate i aromiu? Hangano doimami pingkoomo.” 16Sumangki i Yusupu, ”Tewala pingkoomo doimiu, peweengakono pinotuwumiu ka kupoweeakomiu kaanga gagi euno pinotuwumiu atuu.” 17Ka do'amba mewawao pinotuwudo ndi Yusupu. I Yusupu moweeako ira kaanga gagi euno ngara, bawaano bembe bimba, bawaano sapi ka kalide. Ipatindaako ira kaanga gagi euno luwuno pinotuwudo a nta'u atuu. 18Mansano tampula ta'u atuu, me'aiwa ira ndi Yusupu a nta'u anu ko'orua, ka dompotae ndi onae, ”Nahi kimpokompewuniakono ndi omiu ueku nine doimami pingkoomo ka pinotuwumami gagiomo omiu me'ue ira ueku. Nahina mbo'u anu torea tiamiu ueku sangkadio koroimami ka witamami. 19Tembio omami asalakono memate i arono matamiu, moiko omami maupo witamami? I'oli kamimo ka witamami gagi euno kaanga, ka i'amba omami saru witamami ta gagi atano i Pirao. Ipoweekami inii ka kidamentuwu, ka si kimemate, ka wita atuu nahi tepo'ia.” 20Ka i'amba i Yusupu umolio luwu witado to Masiri tiano i Pirao. Luwuno to Masiri singge umasao lereno hangano mongkokongirino mokoninggoa anu umalu ira. Kanandiomo wita atuu gagiomo i Pirao me'ueo. 21Ipe'ata ira palilino wita Masiri inso itompano anu aasa hawe i tompano anu susua. 22Butu witado sando mpesomba anu nahi olio, hangano luwuno sando mpesomba mpohawe ira mpiha tambo inso ndi Pirao ka ondae mentuwu inso a ntambo atuu. Onaemo pu'uno nahi dome'asao witado. 23Motae i Yusupu a mpalili, ”Ia oleo andio ku'oli komiumo ka witamiu tiano i Pirao. Ndiomo inii tiamiu, ka impokomporawo a wita atuu. 24I tempono mensowi, omiu asalakono mpeweengakono asa ntia olima ndi Pirao, ka anu opaa ntia mbo'u gagi inii a leremiu, kaangamiu ka pe'asa rahamiu, saru kaangado anamiu.” 25Ka do'amba mpotae, ”Ikaduduiomo tuwumami. Po'ineeomo kimpohawe pompehohawamiu ueku ka kimegagi atano i Pirao.” 26Kanandiomo i Yusupu moweweu pompakosi mongkona wita i Masiri anu pinake hawe kanandio-andio asa ntia olima inso a hasilino gagi tiano i Pirao, butu witado sando mpesomba nahi pe'ueo i Pirao.
I Yako umpedaomo mateano
47:27-31
27I Isaraeli rodo mo'ia i wita Masiri, i wita Gose. Ondae mpohawe wita pine'uedo i tu'ai, mpo'ule ka ntetiangi hadio ntu'u. 28I Yako tuwu hopulu ka opitu nta'u i wita Masiri, ranta tinuwuno i Yako hawe asa etu pato pulu ka opitu nta'u. 29#Teg. 49:29-32; 50:6Mansano umpedaomo mateano i Isaraeli, ipoboio i Yusupu, anano, ka ipotaeakono, ”Tewala mohawe aku pompehohawamu, po'ineeomo ka unaao kaemu i totono puu mpa'aku, ka pesumpamo nine omue komopokitao pompehohawa ka petenunumu ndi ongkue: Si kaburu aku i Masiri. 30Ineheku mohawe penaa-naaaku saru uempu'uku. Onaemo pu'uno wawa akumo meluarako inso i Masiri ka kaburu akumo a mpekaburuado.” Isangkio, ”Aku koa weweuo kana pinaumiu atuu.” 31Ka i'amba motae i Yako, ”Pesumpamo ndi ongkue.” Mesumpaomo i Yusupu ndi onae. Ka i'amba i Isaraeli menggolontu mesomba a mpe'uluano poturiano.
বর্তমানে নির্বাচিত:
Tegagia 47: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
