Tegagia 45
45
I Yusupu mepopoto'ori a luwuno pepaekompono
45:1-28
1 #
Tin. 7:13
I Yusupu nahi pokompeteao mbo'u aroano i arodo luwuno atano, ka i'amba mebooli, ”Tena iramo luwu mia mpeluarako inso i ndi'ai.” Ka nahina maupo te'asa mia anu mo'ia i tu'ai perongano i Yusupu, tempono ipopoto'orio koroino a luwuno pepaekompono. 2Ka i'amba mengese meroku, ranta domerongeo to Masiri, ka maupo luwuno ihino langkaneno i Pirao merongeo mongkona anu gagi atuu. 3Motae i Yusupu a luwuno pepaekompono, ”Ongkue andio i Yusupu. Da tuwu irake i ama?” Sine, luwuno pepaekompono nahi dompokosangkio, hangano ntekokodoho medoito i arono. 4Ka i'amba i Yusupu motaeako ira pepaekompono atuu, ”Imperangkuhakomo ndi ongkue.” Ka do'amba mperangkuhako. Ipotae mbo'u, ”Ongkue andio i Yusupu, pepaekompomiu, anu inasamiu i Masiri. 5Kanandio-andio, siimo imemasusa aroa ka siimo impe'o'oleakono, hangano ime'asa aku i ndi'ai. Tendeano ka itekaduduimo tumuwu Ondae Ue Ala tumena aku mese'elungi komiu. 6Hangano, da orua nta'u igagi mokoninggoa i wita andio ka da olima nta'upo mbo'u mia nahi ira mpopadeko ke mensowi. 7Ondae Ue Ala tumena aku mese'elungi komiu dumagaio potilalono inulemiu i tolino ka mekariao tumuwumiu, ranta hadio anu tekadudui. 8Gagi, komba omiu anu tumena aku aiwa i ndi'ai tendeano Ondae Ue Ala. Ondaemo anu mokogagi aku pine'ama ndi Pirao ka pe'uea a luwuno langkanaeno saru uminio pabawa a luwuno wita Masiri. 9#Tin. 7:14Impotuturakomo mpekule ndi ondae i ama ka imempauako ira. Kanandiomo pauno i Yusupu, anamiu: Ondae Ue Ala mokogagi aku pe'uea a luwuno Masiri. Aiwamo ndi ongkue, si mpotuluo. 10Komiu mo'ia i wita Gose ka umpeda ndi ongkue, omiu saru inulemiu, bawaano bembe bimba ka sapimiu saru luwuno arataamiu. 11I ra'ai aku mekaria komiu, hangano olima nta'upo mbo'u mokoninggoa andio, omiu ka si gagi mongkokolaro saru pe'asa rahamiu ka luwuno mia anu tumonda komiu. 12Omiu saru pepaekompoku i Benami mengkitaakono matamiu nine ngangaku isa'a pauo ndi omiu. 13Tutuluako iramo i ama luwuno marambaku i wita Masiri andio ka luwuno anu kinitamiu, ka i'amba ronga wawa ira i ama ramai.” 14Ka i'amba kumopuio i Benami, uaino atuu ka ipengese ka i Benami mbo'u mengese a oweano i Yusupu. 15I Yusupu woo-woo ira luwu pepaekompono ka ipengese a oweado. Umarino atuu ka do'amba pepaekompono mpepau-pau saru onae.
16Tempono iteronge lele a laro langkanaeno i Pirao nine pepaekompono i Yusupu mehawe, mongkona atuu ipemoikoo i Pirao ka luwuno pegawaino. 17Ka i'amba i Pirao motaeakono i Yusupu, ”Pauako iramo pepaekompomu, ’Weweuomo kanandio: Imempatekeomo luwuno pinotuwumiu ka imelakomo i wita Kana'a. 18Wawa iramo amamiu ka pe'asa rahamiu ka ime'aiwamo ndi ongkue. Aku moweeakomiu hapa anu lalu moiko i wita Masiri, ranta ka imperapio mewalono wita andio.’ 19Omue tinena mohaweo parenta andio, ’Weweuomo kanandio: Wawaomo kareta inso i wita Masiri pe'ulaado anamiu ka beinemiu, wawa iramo amamiu ka ime'aiwamo i ndi'ai. 20Si mpesosalao binta ira sangkamiu, hangano hapa anu lalu moiko i asa wawo wita Masiri andio komiu mpe'ueo.’ ” 21Kanandiomo domeweweuo anano i Isaraeli atuu. I Yusupu moweeako ira kareta montonda parentano i Pirao. Ipoweeako ira mbo'u pebakudo a nsala. 22Ndi ondae singge mia ipoweeako ira asa mpole sangka pe'eu sekono ndi Benami iweeakono tolu etu lempe salaka ka olima mpole sangka pe'eu. 23Ndi amano i'oliwio hopulu kalide lakino pinatekeako hapa anu lalu moiko i Masiri. I'oliwio mbo'u hopulu kalide waino anu pinatekeako gandu, roti ka pepatinda kaangado amano a nsala te'ipua. 24Ka i'amba mo'inee ira pepaekompono melako ka ipotaeako ira, ”Si mpegaga a nsala.” 25Kanandiomo domelako inso i wita Masiri ka domehawe i wita Kana'a, ndi Yako, amado. 26Domentutuluakono, ”I Yusupu da tuwu, tendeano onaemo anu mo'ini pabawa a luwuno wita Masiri.” Sine aroano i Yako morini mpiha, hangano nahi pe'ala-ala ira. 27Sine mansano dompohaweakono luwuno pau anu pinauno i Yusupu, ka mansano kumitao kareta anu inoliwino i Yusupu aiwa umalao, waliomo tewangu rosono i Yako, amado. 28Motae i Isaraeli, ”Sompoomo atuu! Anaku i Yusupu da tuwu! Aku lumako kumitao, se'eluno napi kumate.”
বর্তমানে নির্বাচিত:
Tegagia 45: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
