Tegagia 44
44
Pialano i Yusupu hinawe a kampilino i Benami
44:1-17
1I Yusupu parentao puu pompekakaako a rahano, ”Ihiiakonomo kaanga kampilido mia atuudo tompaano pinokowawado, ka naaomo doido singge mia a nganga kampilino. 2Naaomo pialaku, piala salaka atuu, a nganga kampilino nana'ote anu tompasusu saru doi po'owahino gandu.” Ka i'amba weweuo kana anu itenaakono i Yusupu. 3Mansano mo'oru mewantaomo oleo, mia atuudo mempino'inee melako saru kalidedo. 4Napi olai lahi dompeluarako inso a ngkota atuu, tempono i Yusupu motaeakono mia mompekakaako a rahano, ”Lakomo lulu ira mia atuudo, ka tewala hawekomo ndi ondae, potaeako ira: Tembio moikoa imensuloakono anu mosa'o? 5Kombake andio piala anu pinakedo ueku mo'inu ka anu wela pinakedo mompau anu ta gagi? Mosa'o ntu'u wineweumiu atuu!”
6Mansano hawe ndi ondae, ipauako ira pauno i Yusupu atuu. 7Mesangki ira, ”Tembio ueku ka ipepau kanatuu? Omami atamiu andio nahi kimpoweweu kanatuu! 8Kombake doi anu hinawemami a laro nganga kampilimami wali kamimo mewawao ndi omiu inso i wita Kana'a? Nde kana'umpe kami mponako salaka ke wulaa inso a rahado uemiu? 9Isemamo koa i olomami atamiu andio anu hinawe numaao piala atuu, po'ineeomo imate ka omami mbo'u megagi atamiu ueku.” 10Umarino atuu ipotae, ”Humbee, pohawemiu atuu moiko. Sine, isema i olomiu anu hinawe numaao piala atuu, onaemo anu ta gagi ataku, sekono anu susua nahi ta pinokonsala.” 11Singge ira ronga mpotiio kampilido a wita. Ka i'amba singge mia umungkahio kampilino. 12Ka i'amba puu pompekakaako a raha atuu paresao ntu'u moiko. Ipu'uo inso anu te'aka hawe anu tompasusu, ka piala atuu hinawe a laro kampilino i Benami. 13Domeberio lemba meloedo ka singge mia patekeo kalideno, ka do'amba mpepokule a ngkota.
14Sahaweno i Yehuda ka luwuno pepaekompono a rahano i Yusupu, i Yusupu da kongko i tu'ai. Ka do'amba mpesomba i arono hawe a wita. 15Motae i Yusupu ndi ondae, ”Poweweu hapa anu wineweumiu andio? Nahi imento'orioke nine mia kana ongkue andio manasa kuto'orio anu ta gagi?” 16Motae i Yehuda, ”Kami mpokompotae hapa ndi omiu ueku? Hapa anu kami mpokopauo? Hapa anu kami mpokopauakomiu? Kana'umpe kami mpokomenteeo koroimami? Dopopokitaomo Ue Ala salado atamiu andio. Gagi, po'ineeomo kimegagi atamiu ueku, moiko omami maupo mia anu hinawe numaa piala atuu.” 17Sine isangkio, ”Komba aku moweweu kanatuu! Isema anu hinawe numaao piala atuu, onaemo anu ta gagi ataku, sine omiu imelakomo mpekule ndi ondae amamiu temoiko.”
I Yehuda mepatinda gagi euno i Benami
44:18-34
18Ka i'amba i Yehuda rumangkuhio i Yusupu ka ipotae, ”Tabeamiu, ueku, Po'ineeomo atamiu andio mompohawe pau ndi omiu ueku. Siimo itekudaakono atamiu andio, hangano omiu ueku kanamo i Pirao. 19Hori komiu ueku mesikeno a luwuno atamiu andio: Da hinaoke ama ke pepaekompomiu? 20Ka ki'amba mesangki komiu ueku: Da kongko ira amamami anu mota'u iramo ka da hinao anado anu mongura, anu hina tempono domota'umo. Pepaekompono ntu'u mateomo ka butu onae asa-asano anu mo'ia inso ndi ondae me'asa ine. Onaemo pu'uno, amano tedoa mehohawao. 21Omiu mbo'u ueku motae a luwuno atamiu andio: Wawaomo onae i ndi'ai ndi ongkue, ka kukitaakono mataku. 22Sine mesangki kami ndi omiu ueku: Nana'ote atuu nahi pokobintao amano, hangano tewala ibintao amano, manasa ta mate amano. 23Ka i'amba omiu ueku motae a luwuno atamiu andio: Tewala uai tompasusumiu nahi petonda meronga saru omiu aiwa i ndi'ai, si ntu'u imengkitao mbo'u rupaku. 24Mansamami mpekule ndi ondae amamami, atamiu atuu, kimempauako ira paumiu atuu ueku. 25Ka i'amba ondae amamami motae: Imelakomo wali mpo'oliakita tedei kaanga. 26Sine mesangki kami: Nahi kami mpokomelako i ra'ai. Tewala uaimami tompasusu metonda merongaakami, ka ki'amba melako i ra'ai. Hangano nahi moiko kimengkitao rupano mia atuu, tewala uaimami tompasusu nahi perongaakami. 27Ka do'amba motae amaku, atamiu atuu, ndi omami: Imento'orio nine beineku me'anaakono orua ira anaku; 28anu asa lumakoomo inso i horiku; kupewowoloo: Manasa iperangkamiomo kondehora lambaha, ka ranta kanandio-andio nahi kukitao mbo'u. 29Tewala nana'ote mbo'u andio komiu me'alao inso i horiku ka i'aluo masolaa, komiu meweweuo wuu me'uwa andio metii a mpo'iangado mia mate a laro masusaa. 30Gagi kanandio-andio, tewala hawe aku ndi ondae amaku, atamiu atuu, ka nana'ote atuu nahi perongaakami, kahinaano ondae amaku nahi dopokotuwu ba nahi saru onae, 31manasa ondae amaku ira mate tewala dokitao nana'ote atuu nahi kongko. Luwuno atamiu andio ta weweu ira amamami, atamiu anu me'uwa atuu metii a mpo'iangado mia mate a laro masusaa. 32Sine atamiu andio anu ta sumusuruo nana'ote atuu i arodo amaku, kupotae: Tewala nahi kuwawao mekule ndi omiu, tehala aku ndi omiu, amaku, asa ntinuwuku. 33Kanandio-andio, po'ineeomo atamiu andio mo'ia gagi atamiu ueku umeuo nana'ote atuu. Sine, i'eheakonomo nana'ote atuu mekule meronga luwuno pepaekompono. 34Hangano kana'umpe aku mekule ndi ondae amaku, tewala nana'ote atuu nahi perongaakune? Nahi aku polio kumitao masusano aroado amaku.”
বর্তমানে নির্বাচিত:
Tegagia 44: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
