Tegagia 41
41
Puu mpo'ipi pauo pengkonaano mo'ipino i Pirao
41:1-36
1Mansano telalo orua nta'u, mo'ipiomo i Pirao nine onae mentade a wiwi ngkoro Nili. 2Tengkitaomo, inso a ngkorono atuu meluarako opitu sapi anu tekosi tadeno ka mewalo koroino, ka do'amba mpongkaa ewo gelaga. 3Ka i'amba tengkitaomo opitu sapi anu susua meluarako inso a ngkorono atuu, mosa'o tadeno ka morungku koroino, ka do'amba pentade i horido sapi hieno a wiwi ngkorono atuu. 4Luwuno sapi anu mosa'o tadeno ka morungku koroino atuu kumaano opitu sapi anu tekosi tadeno ka mewalo atuu. Ka i'amba mewanguomo i Pirao.
5Onae tekoturi mbo'u ka mo'ipi anu kompenduano: Tengkitaomo inso a asa tangke meluarako opitu tonggino gandu anu me'ihi ka moiko. 6Sine, umarino atuu tuwuomo opitu tonggino gandu anu morungku ka moleu hangano angi i sabaano oleo. 7Tonggino anu morungku atuu tumeleo opitu tonggino anu me'ihi hieno. Ka i'amba mewanguomo i Pirao. Ipokonto'oriomo nine atuu mo'ipi! 8Tisomono mo'oru maka'aliomo, ka i'amba metenaomo moboi ira luwuno mia mponto'ori mpebali-bali mata ka luwuno mia anu hinao ponto'orino i wita Masiri. I Pirao tumutuluo mo'ipino ndi ondae, sine nahina maupo te'asa mia mokopauo pengkonaano ndi Pirao. 9Ka i'amba petewawado puu mpo'atora inua motae ndi Pirao, ”Oleo andio asalakono aku pauo salaku anu i ndi'ipua. 10Tempo atuu omiu ueku Pirao tekuda a luwuno pegawaimiu, ka tumorungku aku a laro rahano puu mpodagai langkanae, saru petewawado puu mpo'atora roti. 11Ia asa wongi mo'ipi kami, ongkue ka puu mpo'atora roti singge mo'ipi ka pada hinao pengkonaano. 12Meronga omami i ra'ai hinao asa mia mongura to Ibarani, atano petewawado puu mpodagai langkanae. Omami tumutuluo mo'ipimami ndi onae ka onae pauakami pengkonaano singge mo'ipimami. 13Ka i'amba kana anu ipauakami pengkonaano ndi omami, kanandiomo anu gagi: Ongkue pinokule a mpotoroku, sekono puu mpo'atora roti atuu ndinoe.”
14Metenaomo i Pirao moboio i Yusupu, ka i'amba ronga linuarako inso a aa torungku. Umarino mekeru ka umeuo sangkano, onae lumako me'aro ndi Pirao. 15Motae i Pirao ndi Yusupu, ”Mo'ipi akumo, ka nahina maupo te'asa mia mokopauo pengkonaano, sine kurongeo mongkona omue nine butu koa rumongeo mo'ipi omue mokopauo pengkonaano.” 16Sumangki i Yusupu ndi Pirao, ”Komba ongkue, tendeano Ondae Ue Ala anu Ira mompau manangaia ndi omiu ueku Pirao.” 17I Pirao motaeakono i Yusupu, ”A laro mo'ipiku, ongkue mentade a wiwi ngkoro Nili, 18ka i'amba tengkitaomo inso a ngkorono atuu meluarako opitu sapi anu mewalo koroino ka tekosi tadeno, ka mpongkaa ewo gelaga. 19Ka i'amba tengkitaomo meluarako opitu sapi anu susua, kulimo koa montongo wuku, tedoa mosa'o tadeno ka morungku koroino. Nahi kuhori mongkita anu mosa'o kanatuu i asa wawo wita Masiri. 20Sapi anu morungku ka mosa'o atuu kumaano opitu sapi mewalo anu tese'elu. 21Sapi mewalo andio mewinso a laro kompodo, sine nahi tengkita maupo tedei nine ondae mpewinso iramo a laro kompodo: tadedo mosa'o koa mpiha kana amba-ambano. Ka i'amba melike akumo. 22Umarino atuu kukitao a laro mo'ipiku, inso a asa tangke meluarako opitu tonggino gandu anu me'ihi ka moiko. 23Sine, umarino atuu tuwuomo opitu tonggi anu mokari, morungku ka moleu hangano angi i sabaano oleo. 24Tonggi anu morungku atuu kumaano opitu tonggi anu moiko hieno. Tempono kututuluako ira luwuno anu mponto'ori bali-bali mata, nahina maupo te'asa mia mokopauo pengkonaano ndi ongkue.”
25Ka i'amba motae i Yusupu ndi Pirao, ”Orua mo'ipimiu atuu ueku Pirao mengkena koa. Dopauomo Ue Ala ndi omiu ueku Pirao hapa anu Ira weweuo. 26Opitu sapi anu moiko atuu onaemo opitu nta'u, ka opitu ntonggi gandu anu moiko atuu onaemo opitu nta'u koa mbo'u, orua mo'ipi atuu mengkena. 27Opitu sapi anu morungku ka mosa'o, anu meluarako lembui, pengkonaano opitu nta'u. Kanatuu koa mbo'u, opitu ntonggi gandu anu mo'apa ka moleu hangano angi i sabaano oleo atuu pengkonaano ta hina opitu nta'u mokoninggoa. 28Onaemo atuu tinoono tempono kupauakomiu ueku Pirao nine Ondae Ue Ala mopokitaakomiumo hapa anu Ira weweuo. 29Ka ito'oriomo, ta hawe opitu nta'u gagi ntu'u ponta'ua i asa wawo wita Masiri. 30Ka i'amba ta hawe opitu nta'u mokoninggoa, ranta luwuno ponta'ua anu gagi ntu'u i wita Masiri ta kinolupe, hangano mokoninggoa atuu rumopuo ihino wita andio. 31Ponta'ua anu gagi ntu'u i wita andio nahi ntu'u ta rinambe mbo'u hangano mokoninggoa atuu, hangano mokoninggoa atuu tedoa mongkokongiri. 32Hawe pendua mo'ipi atuu iwinali ndi omiu ueku Pirao pengkonaano mongkona atuu Dopakosiomo Ue Ala ka Ondae Ue Ala Ira ronga mokogagio. 33Onaemo pu'uno, moikoomo ueku Pirao ipo'ungke te'asa mia anu molino pinewowolono ka pande mosongka, ka moweeakono pabawa i wita Masiri. 34Moiko mbo'u ueku Pirao inaa ira anu medagaio wita andio ka i larono opitu nta'u gagi ntu'u ponta'ua atuu dome'alao asa ntia olima inso a hasilino wita Masiri. 35Ondae asalakono mepumpuo luwuno kaanga i larono luwuno ta'u moiko anu ta hawe andio ka itotono pabawamiu ueku Pirao, mehowuo gandu a luwuno kota gagi kaanga, ka menaao. 36Kanandiomo luwuno kaanga atuu gagi pepatindano wita andio i larono opitu nta'u mokoninggoa anu ta gagi i wita Masiri, ka si domemate mia i wita andio hangano mokoninggoa atuu.”
I Yusupu gagi uminio pabawa i Masiri
41:37-57
37Pohawe atuu ipemoikoo i Pirao ka luwuno pegawaino. 38Ka i'amba i Pirao motaeako ira pegawaino, ”Kita koa mpohaweke mia kanandio, asa mia anu bukeako Penaa-Do Ue Ala?” 39Motae i Pirao ndi Yusupu, ”Hangano Dopauomo Ue Ala luwuno andio ndi omue, nahina maupo te'asa mia anu molino pinewowolono ka pande mosongka kana omue. 40#Tin. 7:10Omuemo anu gagi puu mpo'ini pabawa a langkanaeku, ka luwuno paliliku ta inatora a parentamu. Butu kadera poparentaa andio polaluaku inso ndi omue.” 41I Pirao motae mbo'u ndi Yusupu, ”Saru andio kuweeakomu pabawa a luwuno wita Masiri.” 42I Pirao lumohuo sinsi pontondonino inso a ntonisono ka ipokonao a ntonisono i Yusupu. Ka i'amba moposangkao i Yusupu sangka inso a lena alusu ka mokonao enu-enu wulaa a we'uno. 43I Pirao metena wuatakono i Yusupu a laro ngkaretano anu ko'orua, ka mpebooli iramo mia i arono i Yusupu ”Pompelangkai!” Kanandiomo i Yusupu ipotoroo i Pirao gagi puu mpo'ini pabawa a luwuno wita Masiri. 44Motae i Pirao ndi Yusupu, ”Ongkuemo i Pirao, sine ba nahi u'induo, maupo isema nahi moiko ipelelu a luwuno wita Masiri.” 45Ka i'amba i Pirao numeeakono i Yusupu i Sapanati-Pa'aneahi, saru weeakono i Asanati, anano i Potipera, sando mpesomba i Oni, gagi beineno. Kanandiomo i Yusupu mentade gagi puu mpo'ini pabawa a luwuno wita Masiri.
46Tinuwuno i Yusupu tolu pulu nta'u tempono ipo'angga ndi Pirao, mokole i Masiri. Ka i'amba i Yusupu lumako inso i arono i Pirao ka lumimbuo luwuno wita Masiri. 47Wita atuu moluarako hasili hadio ntu'u i larono opitu nta'u ponta'ua gagi ntu'u atuu. 48I Yusupu pumpuo luwuno kaanga i larono opitu nta'u ponta'ua gagi ntu'u i wita Masiri, ka i'amba numaao a luwuno kota. Hasili inso i wita petengi-tengino sompo kota inaao a laro kota atuu. 49Kanandiomo i Yusupu mohowu gandu kana one a ntahi, hadio ntu'u ranta-ranta mpenaa-naa mia medoao, hangano nahi pinokodoa.
50Se'eluno napi hawe ta'u mokoninggoa atuu hinaomo anano i Yusupu orua ana ntama, anu pine'anaakono i Asanati, anano i Potipera, sando mpesomba i Oni. 51I Yusupu numeeakono ana akano i Manase, hangano ipotae, ”Doweweu akumo Ue Ala kumolupeo ntu'u masukaraku ka rahado amaku.” 52Anano anu ko'orua ineeakono i Eparai, hangano ipotae, ”Ondae Ue Ala weweu aku mo'ule i wita marasaiaku.”
53Mansano tampula opitu nta'u gagi ntu'u ponta'ua anu gagi i wita Masiri atuu, 54#Tin. 7:11mompu'uomo hawe opitu nta'u mokoninggoa, kana anu pinauno i Yusupu. I asa wawo wita gagi mokoninggoa, sine a luwuno wita Masiri hinao roti. 55Tempono luwuno wita Masiri marasai mokoninggo ka palili mpebooli mpo'ema roti ndi Pirao, motaeomo i Pirao a luwudo to Masiri, ”Imelakomo ndi Yusupu, imeweweuomo hapa anu ipauakomiu.” 56Mokoninggoa atuu umaluo asa wawontolino. Ka i'amba i Yusupu umungkahio luwuno si'e ka umasao gandu a nto Masiri, hangano mokoninggoa atuu tepahe mongkokongiri i wita Masiri. 57Inso i asa wawontolino mehawe iramo mia i Masiri ira mpo'oli gandu ndi Yusupu, hangano mokoninggoa atuu mongkokongiri i asa wawontolino.
বর্তমানে নির্বাচিত:
Tegagia 41: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
