Tegagia 42
42
Pepaekompono i Yusupu mpo'oli gandu i Masiri
42:1-38
1Mansano mohawe lele i Yako nine hinao gandu i Masiri, ipotaeako ira anano, ”Tembio ka ibutu memambekita?” 2#Tin. 7:12Ipotae mbo'u, ”Kurongeomo, nine hinao gandu i Masiri. Imelakomo ka impo'oliakita gandu i ra'ai, ka todamentuwu koa, si tomansa memate.” 3Ka i'amba melako iramo hopulu mia pepaekompono i Yusupu ira mpo'oli gandu i Masiri. 4Sine, i Yako nahi beheakono i Benami, uaino i Yusupu, lumako merongaako ira pepaekomono, hangano ipewowoloo, ”Ba mansa i'aluo masolaa te'ingka.” 5Kanandiomo luwuno anano i Isaraeli tewinso i olodo mia anu me'aiwa mpo'oli gandu, hangano gagi mokoninggoa i wita Kana'a.
6Kontongaano atuu i Yusupu gagiomo anu pabawaa i wita atuu. Onaemo anu mo'asa gandu a luwuno palili i wita atuu. Tempono domehawe pepaekompono i Yusupu, mpesomba ira ndi onae saru rupado hawe a wita. 7I Yusupu kumita ira pepaekompono ka ronga ito'ori ira, sine onae melelu ndi ondae kana onae mia mehawe. Meroku ka montaso ipepauako ira, ipotae, ”Omiu inso isua?” Mesangki ira, ”Inso i wita Kana'a aiwa mpo'oli kaanga.” 8I Yusupu tumo'ori ira pepaekompono atuu, sine onae nahi domento'orio. 9#Teg. 37:5-10Ka i'amba mokompewowoloo i Yusupu luwuno mo'ipino mongkona ondae. Ipotaeako ira, ”Omiu andio puu pompadaso; omiu me'aiwa mengkitao molemano wita andio.” 10Sine, mesangki ira, ”Naahi ueku! Omami atamiu andio me'aiwa butu kami mpo'oli kaanga. 11Luwumami ana inso a asa ama. Omami mia moleo; luwuno atamiu andio komba puu pompadaso.” 12Sine, ipotaeako ira, ”Nahi mentee! Omiu me'aiwa mengkitao molemano wita andio.” 13Ka do'amba mesangki, ”Omami atamiu andio hopulu ka orua mpepaekompo, ana inso a asa ama i wita Kana'a, sine anu tompasusu kanandio-andio kongko ndi ondae amamami ka anu asa mia mbo'u nami kongko.” 14Motae i Yusupu ndi ondae, ”Sompoomo! Kana anu kupauakomiu hieno: omiu puu pompadaso. 15Saru atoramo andio omiu asalakono me'inarahako: me'empehiako tuwuno i Pirao, nahi komiu ntu'u melako inso i ndi'ai, sangkadio pepaekompo tompasusumiu atuu aiwa i ndi'ai. 16Impontenamo asa mia inso i olomiu lumako umalao uaimiu atuu, sine anu susuano asalakono tinaha i ndi'ai. Ba kanandio, tamo pinokonto'ori menteeno pinaumiu; tewala naahi, me'empehiako tuwuno i Pirao, mentee ntu'u omiu andio puu pompadaso.” 17Ka i'amba winso ira luwu a laro torungku ilarono otolu oleo.
18Ia oleo anu ko'otolu i Yusupu motaeako ira, ”Imeweweuomo andio, ka komiu kongko mentuwu. Ongkue andio doitoako Ira Ue Ala. 19Tewala omiu mia moleo, po'ineeomo asa mia inso i olomiu mpepaekompo inuko a laro torungku, sine anu susuano domelakomo ka mewawaomo gandu tiado pe'asa rahamiu anu memokoninggo. 20Sine, pepaekompo tompasusumiu asalakono imewawao ndi ongkue, ka ipine'ala-ala pinaumiu atuu ka si memate.” Kanandiomo anu wineweudo. 21Mpotae iramo pada ondaedo, ”Mentee ntu'u tomentembio halato a uaito atuu, hangano tomengkitao ma'iso ntu'u aroano tempono ipo'ema pompehohawato, sine nahi tomperorongeakono po'emano. Onaemo pu'uno ma'isoa andio umalu kita.” 22#Teg. 37:21-22Ka i'amba i Rube sumangki ira, ”Kombake i ndi'ipua kupotaeakomiu: Si mpoweweu hala a nana'ote atuu! Sine, nahi mperorongeakono pinauku. Kanandio-andio reano tinuntu ndi ontae.” 23Sine, nahi domento'orio nine i Yusupu tumo'orio pinaudo, hangano hinao puu mpolimba pau gagi po'oloti. 24I Yusupu meliahako inso ndi ondae, ka i'amba mengese. Ka i'amba mekule ndi ondae ka mepauako ira. I Simeo i'alao inso i olodo ka iponguo i arono matado. 25Umarino atuu i Yusupu meparenta, ponaapado gandu ka i'inihiiako gandu, doido singge mia pinokule a laro kampilino, ka pebaku a nsala domewineeako. Kanandiomo anu iweweuako ira.
26Ka do'amba me'ulao gandu atuu a wawo ngkalidedo ka dompelungka inso i tu'ai. 27Tempono asa mia inso i olodo umungkahio kampilino ta pakao kalideno a mperatoado wongi, onae tededengke kumitao doino kongko a laro nganga kampilino. 28Ipotaeako ira pepaekompono, ”Doiku pinokule; kitao, kongko a laro kampiliku!” Mondendeomo aroado ka pada ira memambekita saru mpondidi-ndidi ka dompotae, ”Tembio andio ka Doweweuo Ue Ala ndi ontae?”
29Mansado mehawe ndi Yako, amado i wita Kana'a, domentutuluo luwuakoano anu pinembasaido, dompotae, 30”Mia anu gagi pe'uea i wita atuu mepau meroku ka montaso ndi omami ka weweu kami kana puu pompadaso wita atuu. 31Sine kimempauakono, Omami mia moleo, omami komba puu pompadaso. 32Omami hopulu ka orua mpepaekompo, luwuno anado amamami; asa mia nami kongko mbo'u, ka anu tompasusu kanandio-andio kongko ndi ondae amamami i wita Kana'a. 33Ipotae mia anu gagi pe'uea i wita atuu, ndi omami: Saru atoramo andio aku tumo'orio ba mia komiu moleo: asa mia inso i olomiu mpepaekompo asalakono imebintao ndi ongkue. Ka i'amba mewawao gandu tiano pe'asa rahamiu anu memokoninggo ka imelakomo. 34Ka i'amba mewawao ndi ongkue pepaekompo tompasusumiu, ka akumo tumo'orio nine omiu komba puu pompadaso, sine mia moleo. Aku koa mokuleo pepaekompomiu atuu ndi omiu ka omiu moiko impelelu po'ehemiu i wita andio.”
35Tempono dompokomoao kampilido, tengkitaomo kadu-kadu doi singge mia a laro kampilino. Kumitao kadu-kadu doi atuu, ondae ka amado medoito iramo. 36Motae i Yako, amado, ndi ondae, ”Imeweweu aku ka dontetadi anaku: i Yusupu nami kongko mbo'u, i Simeo nami kongko mbo'u. Kanandio-andio maupo i Benami komiu mewawao mbo'u. Ongkuemo anu tumembio luwuno andio!” 37Ka i'amba i Rube motae ndi amano, ”Orua ira anaku tama moiko ipepate ira tewala nahi kuwawao mekule ndi omiu. Ipeweengakonomo a ngkaeku ka aku koa wawao mekule ndi omiu.” 38Sine sangkino, ”Anaku atuu nahi ta lumako merongaakomiu, hangano pepaekompono mateomo ka butumo koa onae anu mo'ia. Tewala masolaa umaluo a nsala anu tinondamiu, komiu meweweuo wuu me'uwa andio metii a mpo'iangado mia mate a laro masusaa.”
বর্তমানে নির্বাচিত:
Tegagia 42: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
