Tegagia 40
40
Puu mpo'ipi mompau pengkonaano mo'ipi
40:1-23
1Ba opia tempo lembuino puu mpo'atora inuado mokole i Masiri ka puu mpo'atora rotido sala mpelelu a uedo, mokole i Masiri. 2Tekudaomo i Pirao a orua mia langkai potorono atuu, petewawado puu mpo'atora inua ka petewawado puu mpo'atora roti. 3Itorungku ira a rahano petewawado puu mpodagai mokole, a laro torungku ukoano i Yusupu. 4Petewawado puu mpodagai mokole moweeakono anggaa i Yusupu mokowali ira mpompekakaako ndi ondae. Kanandiomo domekongko a laro torungku ba opia tempo tehineno.
5Ia asa wongi mo'ipi iramo orua ira, moiko puu mpo'atora inua maupo puu mpo'atora rotido mokole i Masiri, anu tinaha a laro torungku atuu. Singge ira mo'ipi ka mo'ipido pada hinao pengkonaano. 6Tisomono mo'oru i Yusupu aiwa ndi ondae ka ikita ira kontongaado mompemasusa. 7Ka i'amba mesikeno a orua mia langkai potorodo ndi Pirao anu tinaha saru onae a laro rahano uedo atuu, ”Tembio ka nahi sanaa rupamiu oleo andio?” 8Dosangkio, ”Omami mo'ipi, sine nahina mia anu mokonto'orio pengkonaano.” Ka i'amba motae i Yusupu ndi ondae, ”Kombake Ondae Ue Ala anu mopoto'orio pengkonaano mo'ipi? Itutuluomo mo'ipimiu atuu ndi ongkue.” 9Ka i'amba puu mpo'atora inua atuu tumutuluo mo'ipino ndi Yusupu, ipotae, ”A laro mo'ipiku tengkita hinao keu anggoro i aroku. 10A ngkeuno anggoro atuu hinao otolu sampano. Dasaraipo keu atuu imentumba, sisino meluarakoomo ka luwuno tonggino buke wua anggoro anu motahaomo ntu'u. 11Pialano i Pirao kongko a ngkaeku, ka i'amba wua anggoro atuu ku'alao ka kuporo'io a laro pialano i Pirao. Ka i'amba tonde mekaru atuu kupeweengakono a ngkaeno i Pirao.” 12Motae i Yusupu ndi onae, ”Kanandiomo pengkonaano mo'ipi atuu: otolu sampa atuu pengkonaano otolu oleo. 13I larono otolu oleo i Pirao ta tumandeko ka mokuleko a mpotoromu se'eluno ka omue komeweengakono piala atuu a ngkaeno i Pirao kana se'eluno, tempono da ugagi puu mpo'atora inuado. 14Sine, rambe aku koa tempono teweweumu wali moiko. Popokitaomo pe'aroamu ndi ongkue ka ututuluakono i Pirao mongkona ongkue, ka doluarako aku inso a raha andio. 15Hangano, mentee ntu'u ongkue pinolaisako inso i witado to Ibarani ka maupo i ndi'ai nahi kuhori moweweu hapa-hapa anu tekona kuwininso a laro aa torungku andio.”
16Mansano kumitao petewawado puu mpo'atora roti moiko ntu'u pengkonaano mo'ipi atuu, ipotaeakono, ”Ongkue mbo'u mo'ipi. Tengkitaomo ongkue monsu'u otolu baki me'ihi kakaanga. 17A baki i wawono ntu'u hinao mperupa-rupa kaanga tiano i Pirao, wineweudo puu mpo'atora roti, sine manu-manu mengkaano inso a baki a wawo uluku.” 18Sumangki i Yusupu, ”Kanandiomo pengkonaano mo'ipi atuu: otolu baki atuu pengkonaano otolu oleo. 19I larono otolu oleo andio i Pirao ta tumandeo ulumu i wawono ka ndumoeko a asa keu pinontade, ka do'amba mengkaano manu-manu ihimu inso a ngkoroimu.”
20Ka i'amba, a oleo ko'otolu, oleo hinaano i Pirao, i Pirao moweweu pelimbua tiado luwuno pegawaino. Itande ira petewawado puu mpo'atora inua ka petewawado puu mpo'atora roti atuu i olodo luwuno pegawaino: 21Petewawado puu mpo'atora inua atuu pinokule a mpotorono, onaemo ka ipokompoweeakono mbo'u piala a ngkaeno i Pirao. 22Posuleno, petewawado puu mpo'atora roti atuu indoeo, kana anu pinauno i Yusupu ndi ondae. 23Sine, petewawado puu mpo'atora inua atuu nahi rambeo mbo'u i Yusupu; ikolupeo.
বর্তমানে নির্বাচিত:
Tegagia 40: XMZ
হাইলাইট
শেয়ার
কপি
Want to have your highlights saved across all your devices? Sign up or sign in
LAI 2021
