Wikhikən 19
19
1Toci nit tehc Pilot wikwehlal Sesohsəl omatəhal.
2Səmakənəssək otələskən watəməniya citokepisot minosiye, ocitokepilaniya, moskwən imkwəpehtek wisekənəsot onasehtowaniya.
3Petapasiniyal, itəmotowək: Kolasikolpən kil kincaməswiyən Leswihsow ikək. Okaski kwehtahawal.
4Pilot apc otəlihan 'tiya: Sakihok, npecipha ewoltcekw kocikcicitoniya nil skat nməskəmowən lahkəmiksowakən ohəkek.
5Nit tehc weckowinotahat Sesohs opəskəmən citokepisot minosiye, naka moskwən imkwəpehtek wisekənəsot, 'tiya: Sakihək skitap.
6Nit tehc kcipahtəliyasək nocik wənkaticik nemihatit, ksikawe westotowək, itəmotowək: Sitakwtəhan! Sitakwtəhan! Pilot 'tiya: Kilowaw wikwehlok sitakwtohok! Ipəcəl nil skat nməskəmowən lahkəmiksowakən ohəkek.
7Leswihsək 'tasitemawal: Potosowakən ntihinen; Nilon ntpaskowakənən elkəmawik cowimecinep; ipəcəl lehləsopən Kelowəsit 'Kwəssəl.
8Nit tehc Pilot notək yot kəlosowakən, opiyemiseksin,
9Apc ksehe kcisakəmawikwamək, 'tiyal Sesohsəl: Tama ktətleyaw? Kenok Sesohs kətama 'tasitemawiyəl.
10Toci Pilot 'tiyal: Skat kəloliw? Skat kəcicitowən nil ntin təpeltəmowakən ktasitakwtəholən? Naka ntin təpeltəmowakən kponehlələn?
11Sesohs asitewtəm: Kil skatəp kteyiywən təpeltəmowakən oci nil, skat ocimilomok spəmək. Nit tehc nekəm nət tan milowet nhək, piyemkikon lahkəmiksowakən eyit.
12Nit wecehtakemək Pilot otəkweciponehlal. Kenok Leswihsək kintakwsoltowək itəmotowək: Ponehlət wət skitap, skat kosiwewiwən Sisəl. Tan wen kisepləsit okinceməsowin, onathəmowal Sisələl.
13Nit tehc Pilot notək yohtəl kəlosowakənəl onotephal Sesohsəl oləpehlal tpaskowakən kwotəpot, tan tet liwihtaso Lapsənikən awt, Leswihsowatowemək, Kappata.
14Nit kisok olacoltin nankəmihakewe wikhəpaltimək, tamahal paskwe. 'Tiya Leswihs: Sakihək, kinceməsmowah!
15Kenok kintakwsoltowək: Ŭlmiphan! Ŭlmiphan! Sitakwtəhan! Pilot 'tiya: ntasitakwtahac kinceməsəmowa? Kcipahtəliyasək 'tasitemawal: Kətama ntiwawin kinceməs tepəkt Sisəl.
16Toci nit tehc oponehtowananiyal Sesohsəl opitinowak otasitakw təhasilin. Nekəmaw wikwehlawal Sesohsəl, otəliphawal.
17Pəmihkalal ocipiyatkoməl, əlihe nit tan eliwihtasik, Osəkatəp, tan Leswihsowatowemək liwihtaso, Kalkata;
18Tan tet etli sitakwtəhatit, nekəm naka sitakwtəhasowək kətəkihi ni so wiciyeyacihi, təhetowikako, Sesohs epahsiw.
19Pilot wisowənhaso ewikhək, osasitaskehton cipiyatkək. Lowikhaso: Sesohs Nasaletkew, Leswihsək okinceməsəmowal.
20Nit tehc yot wisowənhaso ktanakwsowək Leswihsək ekitəmotit, ipəcəl nit etlisitakwtohot kwihiw otenek; əlowikhaso Leswih sowatowewiw, Klikewatowewiw Latənwatowewiw.
21Nit tehc Leswihsək kcipahtəliyasəmowa 'tiyawal Pilotəl: Mo sahk əlowikəmokəc, Leswihsək okinceməsəmowal: əlowikhəmontak: Itəmopən nil Leswihsək okinceməsəmowal.
22Pilot asitewtəm: Tan kiswikhəm, nkisiwikhəmən.
23Toci səmakənəssək kisi sitakwtəhatit Sesohsəl, wikwehtowaniyal ohəlkwotewakənəl onewicpənməniyal, ehtasiw səmakənəss nkocihpət; naka otəpskwəns. Nit pəskonas kətama likwatikəniw, ocimaciyatəkitahasos kwonaskwiw maləməte emeken.
24Nit tehc yəhotoltowək:
Cikaw skat skwoskinehtowəkw, kətotehmawtoltinec tahk wenəc oməcesom.
Welaman Kelowəsitwe Wikhikən tan itəmowik əlihe:
Osisenmaniyal ntəlkwotewakənəl, okətoteh mawtoltiniya ntəpskwons.
25Yohtəl kekwsal səmakənəssək elokhətihtitpənil. Kwihiw skəltowək Sesohs ocipiyatkomək, Sesohs wikowasəl, naka Mali Clopəs onisowiticil, naka Mali Matlen.
26Sesohs nit tehc nemihat wikowasəl naka nit notəkehkimocil tanil mosalacil sehke kwihiw 'tiyal wikowasəl: Ehpit, sakihok kwəss.
27Toci 'tiyal notəkehkimocil: Sakihok kikowos. Wecehtakemək, nit təpaskotikən nət notəkehkimot otəliphal wikək Sesohs wikowasəl.
28Nit akimte Sesohs ipəcəl okəcicihton msiw kekwsal təkec nkikahkisehtasin, welaman Kelowəsitwe Wikhikən tan itəmowik kisehtasop, itəm: Nkətowosəm.
29Nit malikiyesihs nit popsənpe pinikəl; ocipsənpehtoniya sinkəlatikən onasakwhəməniya otəlakw həmowaniya otonək.
30Sesohs nit tehc kis mesənək pinikəl itəm: Kisehtaso əlahko, ekolamo.
31Nit tehc Leswihsək ipəcəl olacowakəni kiskət nit kiskət, welaman mhəkiyəl skatəp eyiwewl cipiyatkw ikək atəlahsimowikiskwək, ipəcəl nit atəlahsimowikiskwək kcikiskət nit opakowomaniya Pilotəl okatowal təmihtehmo otəpəlcwopliphak.
32Nit tehc səmakənəssək petapasiniya təmehtowaniyal təmkeweyal okatəl naka kətəkil tanil wici sitakwtohot.
33Kenok peciyahtit Sesohsəl nemihatil omecinalin təkec, kətama otemehtoowniyal okatəl.
34Kenok peskw nit səmakənəssək osaphal epmelwalit təkətikənək, nəkəsayw pəkahkən samakwan wecisakhicowək.
35Nət tan kisi nəmihtakw kci sinspiwolameh, onəspiwəlamewakən olamewiw, okəcicihton tan itək olame, welaman kilowaw naka kolamsətəm otiniyap.
36Epəcəl yohtəl kekwsal wecikisehtasikəl welaman tan Kelowəsitewe Wikhikən itəmowik leyo: Peskon oskənisəm skat təmehtasiw.
37Apih kətək tan ewikhasik Kelowəsitewa Wikhikən ikək, itəmowik: 'Təsakihawalc nekəm tanil saphatitpənil.
38Akimte yot, Sosep tan 'cey Alimətiyak, tan Sesohs ohəkek wetəkehkimot, kenok kikimiw ipəcəl onəkahla Leswihs, pakowoman. Pilotəl okiseltəmakon omaceptowan Sesohsəl ohək: Pilot kiseltəmowan. Nit tehc pəkəcihe omaceptowan ohək Sesohsəl.
39Naka Nikotem pəkəciye tan təmk opəkəcihaneyepənil Sesohsəl nipayiw, opecipton [npisonəl] məlalos wawyəkihe tamahal nkotatkw kesitkikon.
40Toci wihkwehtowaniya Sesohsəl ohək, wisekehlawal atolhawekənikək, mawiw yohtəl milipokil: tan Leswihsək ilehlahtit npowinowəl poskənatit.
41Nit tan tet etlisitakwtəhotpən npisonkikan iyopən, npisonkikanəkewpən piley poskənikənaləkw, nit tet mesk wen mehc kisi ponawənawihpən.
42Nit tehc nit tet ponatit Sesohsəl oci Leswihsək olaco akəni kiskətəmowa; ipəcəl nit poskənikənaləkw kwihiw iyopən.
বর্তমানে নির্বাচিত:
Wikhikən 19: PQM2014
হাইলাইট
শেয়ার
কপি
Want to have your highlights saved across all your devices? Sign up or sign in
Maliseet Gospel of John © Canadian Bible Society, 2014
