Wikhikən 20

1Nit əmskowasewe kiskət kisi atəlahsimowikiskwək, Mali Matlen pəkəcihe poskənikənaləkok wisəki ospaswiw cel mehc piskətpokət, nəmihton pənapskw weci semahtasiks poskənikənaləkok.

2Nit tehc kwaskwho opəkəcihanəl Simo Piyeləl kətəkil notəkehkimocil tanil Sesohs keselmacil, 'tiya: Cimaciphawaw Ksakəmamowal poskən ikənaləkok, skat nkəcicitonewin tan tet ponatits.

3Nit tehc Piyel macehe kətək notəhkehkimot, petkaotowək poskənikənaləkək.

4Təkwiw kwaskhowək, kətək notəkehkimot onəkəlal Piyeləl, təmk pəkəcihe pokənikənaləkək.

5Citowamkwessit onəmihtonəl atolhawekənol elakwekil kenok kətama ksehewi.

6Toci Simo Piyel opəkocihan onosotehkowal ksehe poskənikənaləkok, onəmihtonəl atolhawekənol elakwekil.

7Kasikəhosot tan wisatpepisitpən, skat witewi atolhawekən ikək, kenok kisankənaso cpahte.

8Toci nit tehc kətək notəkehkimot naka okəsahan, tan təmk pekəcihatpən poskənikənaləkək, onəmihton olamsətəmən.

9Ipəcəl meskw onəstəmoniya tan elwikhasik Kelowəsitewe Wikhikənək, cəhocinəmceso npowakənək.

10Nit tehc notəkehkimocik apc macehkaw otowək wikowawikowak.

11Mali skeh kwihiw poskənikənaləkok kwəcəmiw, təltemo. Aptətemit cihtowamkwessit optiyapətəmən poskənikənaləkək.

12Onəmiya nisowaseli wapekənəhmok, epilicihi pəskw elkwesinlitpən, kətək elsitesinəlitpən Sesohs ohək etekpən.

13'Tiyawal: Ehpit, kekwse wetemiyən? 'Tiya: Ipəcəl macephawaw Nsakəmam, skat nkəcicihawiyək tan tet ponehlatits.

14Kisi itək yot weswekapoweso onəmiyal Sesohsəl sehkelicil, skahəlo okəcicihawiyəl Osesoswilin.

15Sesohs 'tiyal: Ehpit, kekwse wetemiyən? Mali litəhaso nocinpisonkikanihket, 'tiyal: Sakəm kil kisi macephətsəpən, nsətomowin tan tet ponət, nil nmacepha.

16Sesohs 'tiyal: Mali! Mali kwəlpikapoweso 'tiyal: Laponi! (Leswiswatowemək) Tan itəmowik, Notəkehkikemit!

17Sesohs 'tiyal: Mosahk samelihkəc, iləcəl mehc meskw nonakihaw Nmihtakws. Kenok əlih nsiwesək ewoltitit ktihan, nonakih nil Nmihtakwsək kilowaw Kmitakwsowak, nil Kelowəsitk, kilowaw Ki siyolkonowak.

18Mali Matlen pəkəcihi peciptowan kəlosowakən notəkehkimocik nit nekəm okisinəmiyal 'Sakəmamowəl, yohtəl kekwseyal okisi iyalhacəl.

19Nit tehc nit kiskət welakwiwik amskwahsewe kiskət, kisi atəlahsimowikiskwək, khakənəl kpapasowəl etli mawihatit notəhkehkimocik ipəcəl onəkalawa Leswihs, Sesohs pəkəciye epahsiw sehke, 'tiya: Wantəkewowakən ihic khəkewak.

20Kosiyəhat nihtəl kəlosowakənəl omeswehtowanəl opitinəl epmelwat. Toci notəkehkimocik wəlitəhasoltowək nemihatit 'Sakəmamowal.

21Nit tehc apc Sesohs 'tiya: Wantəkewowakən ihic khəkewak. Tan iliyəlkimitpən Nmihtakws nil eliyəlkimlekw kilowaw.

22Kisi itək nihtəl onesemotowah, 'tiya: Kəməsənawa Kehci-niweskwit.

23Tanik wenik otəlkəmiksowakənowal nheltəmowekw, nheltənowanəl: tanik wenik otəlkəmiksowakənowal skat nheltəmowekw, skat nheltasiwiyəl.

24Kenok Toma tan iliwihotnaka Təkwehs, skat wiciyew awipənihi tan toci Sesohs pekəcihat.

25Nit tehc kətəkik notəkehkimocik 'tiyawal: Ksakəmamowa kisi nəmiyano. Kenok Toma 'tiya: Skat nəmihtowawan opitinək cilmikil cisəkhikənəl; skat picehtowan (ntəlowikənic) npəskelcawən cilmikil cisəkhikənəl, skat ponehtowan npitin epmelwat, skatəc nolamsətəmowən.

26Kisi okəmolcin kesokənəkak notəkehkimocik apc mawihiyək lamikowam, Toma wiciyewa. Sesohs pəkəcihe khakənəl kpahasowəl, epahsiw sehke, itəm: Wantəkewowakən ihic khəkewak.

27Akimte 'tiyal Tomahəl: Ckoweht, kpəskelcawən sakihtowin npitinəl, ckowinskes poneht epmelwiy: mosahk kəlotəmokəc, kanokəlo wolamsətəmon.

28Toma asitewtəm: Nsakəmam, Kelowəsitəm.

29Sesohs 'tiyal: Toma, ipəcəl kisinəmihi kisiwolamsətəmən. Wəlewoltowək tanik skat nemitotikw kisi olamsətəməniya.

30Ŭktanakətol kətəkil kinowaskoltikənəl Sesohs kisehtakwpənil elkwepihalit ekehkimatpənihi, tanil skat ewikhasinokil yot wikhikənək.

31Kenok yohtəl weciwikpasikil welaman kilowaw kowaw kolamsətəmənitp Sesohs. Oniweskowin, Kelowəsit 'Kwəssəl; welaman ktiyeniyap askəmawsowakən eliyolamsətəmekw.

বর্তমানে নির্বাচিত:

Wikhikən 20: PQM2014

হাইলাইট

কপি