လူႉၵႃႇ 9

ၸဝ်ႈယေႇသူႉပွႆႇၸႂ်ႉတမၢၼ်ႇၸဝ်ႈသိပ်းသွင်ပႃး

(တူၺ်း၊ မၢတ်ႈ 10:5-15။ မႃႇ 6:7-13)

1မၼ်းၸဝ်ႈႁႂ်ႈတပႄးၸဝ်ႈသိပ်းသွင်ပႃးၸူႉၵၼ်တုမ်ၵၼ်ယဝ်ႉၸင်ႇ၊ ဢၢပ်ႈပၼ်တၼ်းၶူဝ်းဢၼ်ပႄႉၼႅင်ႇၽီႁၢႆႉတင်းလၢႆ ဢိၵ်ႇတင်းဢၶႂၢင်ႉတၼ်းၶူဝ်းပုၼ်ႈလွင်ႈၼင်ႇႁိုဝ်တၵ်းႁႂ်ႈတၢင်းၶႆႈတၢင်းပဵၼ်တင်းလၢႆႁၢႆၼၼ်ႉတီႈၶဝ်ဢေႃႈ။- 2မၼ်းၸဝ်ႈပွႆႇၸႂ်ႉၶဝ်ၵႂႃႇႁႂ်ႈလႆႈႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈ ဢိၵ်ႇတင်းႁႂ်ႈၵူၼ်းၶႆႈၵူၼ်းပဵၼ်တင်းလၢႆၵတ်းယဵၼ်ၶျၢမ်းသႃႇလႄႈ သင်ႇလၢတ်ႈလႄႈဝႃႈ၊- 3ပုၼ်ႈဢၼ်တၵ်းၵႂႃႇတၢင်းၸိုင်၊ သူယႃႇပေဢဝ်ၵႃႈသင်သေၸိူဝ်ႉသေပိူင်ၵႂႃႇ။ ယႃႇပေဢဝ် ၶွၼ်ႉတဝ်ႉ၊ ထူင်ပႃး၊ ၶဝ်ႈမုၼ်း၊ ငိုၼ်းၵႂႃႇ။ သိူဝ်ႈသွင်ၽိုၼ်ၵေႃႈယႃႇပေပႃး။- 4မိူဝ်ႈဢၼ်ၶဝ်ႈၵႃႈၼႂ်းႁိူၼ်းလႂ်သေဢမ်ႇဝႃႈ၊ ၸူဝ်ႈဢၼ်ဢမ်ႇပႆႇဢွၵ်ႇၵႂႃႇသေတီႈၼၼ်ႉၸိုင်၊ ယူႇၵႃႈတီႈႁိူၼ်းၼၼ်ႉတႃႉ။- 5ၽူႈလႂ်သေဢမ်ႇဝႃႈ၊ ၶဝ်ၸိူဝ်းဢၼ်ဢမ်ႇႁပ်ႉတုင်းဢဝ်သူၼၼ်ႉ၊ ၼႂ်းမိူဝ်ႈဢၼ်သူယင်းတိုၵ်ႉဢွၵ်ႇၵႂႃႇသေၵႃႈၼႂ်းဝဵင်းၶဝ်ၼၼ်ႉယူႇၼၼ်ႉၸိုင်၊ သၼ်ႇမုၼ်ႈလိၼ်ဢၼ်ၸပ်းၵႃႈတီႈတိၼ်သူၼၼ်ႉပႅတ်ႈ ႁႂ်ႈပဵၼ်သၢၵ်ႈသေႇတီႈၶဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။

6ၶဝ်ၼၼ်ႉ ဢွၵ်ႇၵႂႃႇတေႇသႃႉၸႃႇရီႇလႄႇလဵပ်ႈၵႃႈၼႂ်းဝၢၼ်ႈၼႂ်းဝဵင်းတင်းလၢႆလႄႈ ႁေႃးလၢတ်ႈတြႃးသတၢင်းသိူဝ်းပျေႃႇယူႇသေလႄႈ ႁႂ်ႈတၢင်းၶႆႈတၢင်းပဵၼ်တင်းလၢႆႁၢႆၵူႈတီႈၵူႈလႅၼ်ယူႇဢေႃႈ။

ၸဝ်ႈၽႃႉႁေႇရူတ်ႈၵႂင်ၸႂ်ယုင်ႈၸႂ်

(တူၺ်း၊ မၢတ်ႈ 14:1-12။ မႃႇ 6:14-29)

7ၸဝ်ႈၽႃႉႁေႇရူတ်ႈ ငိၼ်းလွင်ႈတၢင်းၵႃႈဢၼ်ပဵၼ်မႃးတင်းသဵင်ႈတင်းလူင်ၸိူဝ်းၼၼ်ႉလႄႈ မီးတၢင်းဢၼ်ၶႆႈၸႂ်ဝူၼ်ႉၸႂ်ယူႇဢေႃႈ။ လွင်ႈမၼ်းၸမ်ႉ ၵူၼ်းၵမ်ႈၽွင်ႈဝႃႈ၊ ယူဝ်းႁၢၼ်ႇ လုၵ်ႉၵႃႈတၢင်းတၢႆၶိုၼ်းလိပ်းယဝ်ႉ၊ ဝႃႈၼင်ႇၼႆဢေႃႈ။- 8ၵမ်ႈၽွင်ႈၵေႃႈဝႃႈ၊ ဢေးလီႉယႃႉပေႃႇမႃးယဝ်ႉ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ ပရေႃးၽႅတ်ႈဢွၼ်တၢင်း မိူဝ်ႈၼၼ်ႉၸိူဝ်းၼၼ်ႉသေပႃးပႃးၶိုၼ်းလုၵ်ႉယဝ်ႉ၊ ဝႃႈၼင်ႇၼႆဢေႃႈ။- 9ၶုၼ်ႁေႇရူတ်ႈၵေႃႈလၢတ်ႈလႄႈဝႃႈ၊ ၵဝ်လႆႈတႅပ်းႁူဝ်ယူဝ်းႁၢၼ်ႇယဝ်ႉ။ ၵေႃႉဢၼ်ၵဝ်လႆႈငိၼ်းသတၢင်းသဵင်ၶၢဝ်ႇလွင်ႈမၼ်းထၢၼ်ႇၼႆႉၼၼ်ႉၸမ်ႉ၊ ပဵၼ်ၽူႈလႂ်၊ ဝႃႈၼင်ႇၼႆလႄႈ ၵျၢမ်ႇႁႃႁႂ်ႈလႆႈထူပ်းႁၼ်ယေႇသူႉယူႇဢေႃႈ။

ၸဝ်ႈယေႇသူႉလဵင်ႉလူၵူၼ်းႁႃႈႁဵင်

(တူၺ်း၊ မၢတ်ႈ 14:13-21။ မႃႇ 6:30-44။ ယူဝ်း 6:1-14)

10တမၢၼ်ႇၸဝ်ႈတင်းလၢႆၶိုၼ်းမႃးၵႃႈတီႈမၼ်းၸဝ်ႈလႄႈ လဝ်ႊလၢတ်ႈလွင်ႈတၢင်းၵႃႈဢၼ်ၶဝ်လႆႈႁဵတ်းတင်းသဵင်ႈတင်းလူင်ၼၼ်ႉဢေႃႈ။ မၼ်းၸဝ်ႈႁွင်ႉဢဝ်ၶဝ်လႄႈ တဵတ်ႇတဵတ်ႇၵႂႃႇၵႃႈတီႈဝဵင်းဢၼ်လႆႈႁွင်ႉႁဵၵ်ႈပႅတ်ႉၸေးတႃႉပုၼ်ႉဢေႃႈ။- 11မိူဝ်ႈဢၼ်ၵူၼ်းဢၼ်ၸူႉဢၼ်တုမ်တင်းလၢႆႁူႉၸိုင်၊ ၶဝ်ၸွမ်းမၼ်းၸဝ်ႈၵႂႃႇဢေႃႈ။ မၼ်းၸဝ်ႈႁပ်ႉတုင်းဢဝ်ၶဝ်ၼၼ်ႉသေယဝ်ႉ၊ ႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈ ႁႂ်ႈၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၼၼ်ႉၶႅၼ်းမႃးဢေႃႈ။

12မိူဝ်ႈဢၼ် ႁွတ်ႈထိုင်ၶိင်ႇႁူဝ်ၶမ်ႈၸိုင်၊ တပႄးၸဝ်ႈသိပ်းသွင်ပႃးသုတ်ႉၸပ်းသုတ်ႉၸူးသေလႄႈ လဝ်ႊလၢတ်ႈလႄႈဝႃႈ၊ ပိူဝ်ႈဢၼ်ၵႃႈတီႈၼႆႈပဵၼ်ထိူၼ်ႇလႄႈ ၼင်ႇႁိုဝ်ၵူၼ်းဢၼ်ၸူႉဢၼ်တုမ်ၸိူဝ်းၼႆႉ တၵ်းလႆႈၵႂႃႇၵႃႈတီႈဝၢၼ်ႈၼွၵ်ႈၼႃးပၢင်ႇပုၼ်ႉလႄႈ ႁႃတီႈဢၼ်တၵ်းၼွၼ်းဢိၵ်ႇတင်းတၢင်းၵိၼ်တၢင်းၶူပ်းၸိုင်၊ ၸဝ်ႈႁဝ်းပွႆႇၵႂႃႇသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 13မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ သူပၼ်ပုၼ်ႈဢၼ်ၶဝ်တၵ်းၵိၼ်တႃႉ၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလဝ်ႊလၢတ်ႈလႄႈဝႃႈ၊ ပေႃးႁဝ်းၶႃႈဢမ်ႇၵႂႃႇလႄႈသိုဝ်ႉဢဝ်တၢင်းၵိၼ်ပုၼ်ႈဢၼ်ၵူၼ်းတင်းသဵင်ႈတင်းလူင်တၵ်းၵိၼ်ၸိုင်၊ ၵႃႈတီႈႁဝ်းၶႃႈၼႆႉလိူဝ်သေၶဝ်ႈမုၼ်းႁႃႈႁူၺ်ႇတင်းပႃသွင်တူဝ်၊ ဢမ်ႇမီးတၢင်းၵိၼ်သေၸိူဝ်ႉသေပိူင်ၶႃႈ၊ ဝႃႈၼင်ႇၼႆဢေႃႈ။- 14ပိူဝ်ႈဢၼ်မီးၵူၼ်းသေ ႁႃႈႁဵင်ၼိုင်ႈၸမ်ၸမ်လႄႈ လဝ်ႊလၢတ်ႈၼင်ႇၼႆဢေႃႈ။ ၵမ်းၼၼ်ႉ မၼ်းၸဝ်ႈမီးဢမိင်ႉတီႈတပႄးၸဝ်ႈတင်းလၢႆ ႁႂ်ႈၵူၼ်းၸိူဝ်းၼၼ်ႉႁဵတ်းယေႈမုၵ်ႉယေႈႁႃႈသိပ်းလႄႈဢိင်ယူႇဢေႃႈ။- 15ၶဝ်ၼၼ်ႉႁဵတ်းၸွမ်းၼင်ႇဢမိင်ႉၸဝ်ႈလႄႈ ႁႂ်ႈၵူၼ်းတင်းသဵင်ႈတင်းလူင်ဢိင်ယူႇယဝ်ႉၸင်ႇ၊- 16မၼ်းၸဝ်ႈဢဝ်ၶဝ်ႈမုၼ်းႁႃႈႁူၺ်ႇတင်းပႃသွင်တူဝ် ႁႅၼ်တူၺ်းၵႃႈၼိူဝ်ၵၢင်ႁၢဝ်လႄႈ ယွင်ႈယေႃးၵျေးၸူးၸဝ်ႈယဝ်ႉၸင်ႇ၊ ဝိတ်းၶဝ်ႈမုၼ်းလႄႈပၼ်တီႈတပႄးၸဝ်ႈတင်းလၢႆ ႁႂ်ႈသႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉဢေႃႈ။- 17ၵူၼ်းတင်းသဵင်ႈတင်းလူင်ၸိူဝ်းၼၼ်ႉၵိၼ်လႄႈဢိမ်ႇယဝ်ႉၸင်ႇ၊ ၵဵပ်းသိမ်းဢဝ်ဢၼ်ၵိုတ်းဢၼ်ႁၵ်းဢၼ်ႁဵၵ်းမၼ်းလႄႈ လႆႈတဵမ်သိပ်းသွင်ပဵတ်ႈဢေႃႈ။

ပေႇတရူႉလၢတ်ႈလွင်ႈၸဝ်ႈယေႇသူႉ

(တူၺ်း၊ မၢတ်ႈ 16:13-19။ မႃႇ 8:27-29)

18မိူဝ်ႈဢၼ်မၼ်းၸဝ်ႈ မီးယူႇလူၺ်ႈၵၼ်တင်းတပႄးၸဝ်ႈတင်းလၢႆလႄႈ သူးတွင်းယူႇၵႃႈတီႈဢၼ်ပိူၼ်ႈဢမ်ႇမီးၼၼ်ႉၸိုင်၊ မၼ်းၸဝ်ႈထၢမ်တီႈၶဝ်ၼၼ်ႉလႄႈဝႃႈ၊ ၵူၼ်းတင်းလၢႆဝႃႈ၊ၵဝ်ၼႆႉပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊- 19ၶဝ်ၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၵမ်ႈၽွင်ႈဝႃႈ၊ၸဝ်ႈႁဝ်းပဵၼ်ယူဝ်းႁၢၼ်ႇ ဢၼ်ပၼ်ပပ်ႉတီႉၸမ်ႇၼၼ်ႉ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ၊ ပဵၼ်ဢေးလီႉယႃႉ၊ ဝႃႈၼင်ႇၼႆၶႃႈဢေႃႈ။ ၵမ်ႈၽွင်ႈၵေႃႈဝႃႈ၊ ပရေႃးၽႅတ်ႈမိူဝ်ႈၵွၼ်ႇဢွၼ်ၼႆႉၼၼ်ႉသေပႃးပႃးလုၵ်ႉၶိုၼ်းမႃးယဝ်ႉ၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆဢေႃႈ။- 20မၼ်းၸဝ်ႈသမ်ႉထၢမ်ထႅင်ႈလႄႈဝႃႈ၊ သူၸိုင် ဝႃႈၵဝ်ၼႆႉပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ပေႇတရူႉၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းပဵၼ်ၸဝ်ႈၶရိၸ်ႈ လုၵ်ႈၽြႃးပဵၼ်ၸဝ်ႈၶႃႈဢေႃႈ၊ ဝႃႈၼင်ႇၼႆဢေႃႈ။- 21ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈတီႈႁဵင်းၼႆႉတီႈၽူႈလႂ်သေၵေႃႉသေၵူၼ်းၸိုင်၊ မၼ်းၸဝ်ႈပိင်းၺၢပ်ႈဝႆႉတီႈတပႄးၸဝ်ႈၸိူဝ်းၼၼ်ႉၼႃႇလူင်လၢင်လႄႈ၊- 22သမ်ႉလၢတ်ႈလႄႈဝႃႈ၊ လုၵ်ႈၵူၼ်းတၵ်းလႆႈၶၢမ်ႇၼမ်ၼႃႇလူင်လၢင်ဢေႃႈ။ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းၵူၼ်းဢၼ်ပဵၼ်ၵႄႇပဵၼ်ႁူဝ်၊ ယိတ်ႈပရေႃးႁဵၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆဢေႃႈ။ တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။ တၵ်းလုၵ်ႉၶိုၼ်းလိပ်းၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

23လိူဝ်သေၼၼ်ႉ မၼ်းၸဝ်ႈလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈၸမ်ႉ၊ ပေႃးသေၵေႃႉသေၵူၼ်းမီးဢလူဝ်ႇၶႂ်ႈၸပ်းမႃးပႃႈလင်ၵဝ်ၸိုင်၊ ႁႂ်ႈမၼ်းပႄႇပႅတ်ႈတူဝ်ၸဝ်ႈၵဝ်ႇသေလႄႈ ႁၢပ်ႇဢဝ်သဝ်လၵ်းဝႃးၵၢပ်ႈ တူဝ်ၸဝ်ႈၵဝ်ႇ ၵူႈမိုဝ်ႉၵူႈဝၼ်းလႄႈၸွမ်းပႃႈလင်ၵဝ်တႃႉ။- 24လွင်ႈမၼ်းၸမ်ႉၽူႈလႂ်သေဢမ်ႇဝႃႈ၊ ၵေႃႉဢၼ်မီးဢလူဝ်ႇၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉ၊ ၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်သုမ်းဢသၢၵ်ႈၵွပ်ႈပိူဝ်ႈၵဝ်ၼၼ်ႉ၊ ၵေႃႉၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။- 25ၵေႃႉဢၼ်လႆႈဢုပ်ႉပိူင်ႇလေႃးၵႃႉၼႆႉတင်းသဵင်ႈတင်းလူင်လႄႈ တူဝ်ၸဝ်ႈၵဝ်ႇသုမ်းၼၼ်ႉတၵ်းမီးၵျေးၸူးၵႃႈသင်။- 26ၽူႈလႂ်သေဢမ်ႇဝႃႈ၊ ၵေႃႉဢၼ်ဢူၵ်းဢၢႆၵွပ်ႈပိူဝ်ႈၵဝ် ဢိၵ်ႇတင်းၵွပ်ႈပိူဝ်ႈၵႂၢမ်းၵဝ်ၼၼ်ႉ၊ ၵေႃႉၼၼ်ႉၸိုင်၊ လုၵ်ႈၵူၼ်းတၵ်းဢူၵ်းဢၢႆ မိူဝ်ႈဢၼ်ပႃးတင်းမုၼ်ၽုင်းတူဝ်ၸဝ်ႈၵဝ်ႇ၊ မုၼ်ၽုင်းပေႃႈတူဝ်ၸဝ်ႈၵဝ်ႇ ဢိၵ်ႇတင်းမုၼ်ၽုင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆၸိူဝ်းၼၼ်ႉမႃးၼၼ်ႉဢေႃႈ။- 27ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ ၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼႆႈၼႆႉ၊ ၸူဝ်ႈဢၼ်ၶဝ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈၼၼ်ႉၸိုင်၊ တၵ်းဢမ်ႇလႆႈႁွတ်ႈထိုင်တၢင်းတၢႆ၊ ဝႃႈၼင်ႇၼႆဢေႃႈ။

လွင်ႈတၢင်းဢၼ်ၼႃႈၸဝ်ႈႁိူဝ်ႈႁိူင်း

(တူၺ်း၊ မၢတ်ႈ 17:1-8။ မႃႇ 9:2-8)

28ဝၢႆးသေမၼ်းၸဝ်ႈလၢတ်ႈၸိူဝ်ႉၼင်ႇၼၼ်ယဝ်ႉၼၼ်ႉ မိူဝ်ႈဢၼ်ပူၼ်ႉပႅတ်ႇဝၼ်းၸမ်ၸမ်ၸိုင်၊ ယေႇသူႉႁွင်ႉဢဝ်ပေႇတရူႉ၊ ယူဝ်းႁၢၼ်ႇတင်းယႃႇၵုပ်ႈလႄႈ ၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈသူးတွင်းဢေႃႈ။- 29ၼႂ်းမိူဝ်ႈဢၼ် မၼ်းၸဝ်ႈသူးတွင်းယူႇၼၼ်ႉၸိုင်၊ ၼႃႈမၼ်းၸဝ်ႈမီးႁၢင်ႈၽၢင်ဢၼ်လၢၵ်ႇလၢႆးလႄႈ၊ ၶူဝ်းၼုင်ႈမၼ်းၸဝ်ႈၵေႃႈၽိူၵ်ႇၶၢဝ်လႄႈႁိူဝ်ႈလႅင်းယူႇဢေႃႈ။- 30ၵူၼ်းသွင်ၵေႃႉဢၼ်ဝႃႈ မူဝ်းသေႇတင်း ဢေးလီႉယႃႉ ပေႃႇမႃးဢိၵ်ႇလူၺ်ႈၵၼ်တင်းမုၼ်သရေႇသေယဝ်ႉ၊- 31တွင်ႈထၢမ်ၵၼ်တင်းမၼ်းၸဝ်ႈလႄႈ လၢတ်ႈလွင်ႈဢၼ်မၼ်းၸဝ်ႈၸမ်တၵ်းလႆႈတၢႆၵႃႈၼႂ်းဝဵင်းယေႇရူႉသလႅမ်ႇၼၼ်ႉယူႇဢေႃႈ။

32 ပေႇတရူႉ တင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၼၼ်ႉ မၢၵ်ႇတႃၼၵ်းၼႃႇလႄႈ ငဝ်ၼွၼ်းယူႇဢေႃႈ။ မိူဝ်ႈဢၼ်တိုၼ်ႇႁူႉတူဝ်မႃးၸိုင်၊ ၶဝ်လႆႈႁၼ်မုၼ်သရေႇမၼ်းၸဝ်ႈ ဢိၵ်ႇတင်းၵူၼ်းသွင်ၵေႃႉဢၼ်ၸုၵ်းယူႇလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။- 33ၼႂ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇသေၵႃႈတီႈမၼ်းၸဝ်ႈယူႇၼၼ်ႉၸိုင်၊ ပေႇတရူႉၵေႃႈလဝ်ႊလၢတ်ႈတီႈယေႇသူႉလႄႈဝႃႈ၊ ၸဝ်ႈႁဝ်း၊ ၵႃႈတီႈၼႆႈပုၼ်ႈဢၼ်ႁဝ်းၶႃႈတၵ်းယူႇၸိုင်လီၶႃႈဢေႃႈ။ ႁႂ်ႈႁဝ်းၶႃႈလႆႈႁဵတ်းသုမ်ႉသၢမ်လင်၊ ပုၼ်ႈၸဝ်ႈႁဝ်းလင်ၼိုင်ႈ၊ ပုၼ်ႈမူဝ်းသေႇ လင်ၼိုင်ႈ၊ ပုၼ်ႈဢေးလီႉယႃႉ လင်ၼိုင်ႈသေၵမ်းၶႃႈ၊ ဝႃႈၼႆ၊ ၵႂင်ၵႂႃႇလႄႈလဝ်ႊလၢတ်ႈၸိူဝ်ႉၼင်ႇၼၼ်ဢေႃႈ။- 34ၼႂ်းမိူဝ်ႈဢၼ်မၼ်းလဝ်ႊလၢတ်ႈၸိူဝ်ႉၼင်ႇၼၼ်ယူႇၼၼ်ႉ၊ မွၵ်ႇၵုမ်ႈမုင်းႁူမ်ႇၶဝ်လႄႈ ၶဝ်ၵူဝ်ႁႄတၢင်းဢၼ် မူဝ်းသေႇဢိၵ်ႇတင်း ဢေးလီႉယႃႉ ၶဝ်ႈၵႂႃႇၵႃႈၼႂ်းမွၵ်ႇၵုမ်ႈယူႇၼၼ်ႉဢေႃႈ။- 35ၵမ်းၼၼ်ႉ သဵင်ပဵၼ်မႃးၵႃႈတီႈမွၵ်ႇၵုမ်ႈၼၼ်ႉလႄႈဝႃႈ၊ ပဵၼ်လုၵ်ႈၵဝ်ဢၼ်ၵဝ်လိူၵ်ႈၵဵပ်းဢဝ်ဢေႃႈ။ ထွမ်ႇဢဝ်ၵႂၢမ်းမၼ်းတႃႉ၊ ဝႃႈၼင်ႇၼႆဢေႃႈ။

36မိူဝ်ႈဢၼ်သဵင်ၸဝ်ႈပဵၼ်မႃးၼၼ်ႉၵမ်းလဵဝ်၊ ယေႇသူႉမီးယူႇပႃးလဵဝ်ၵူၺ်းဢေႃႈ။ ၶဝ်ၼၼ်ႉယူႇတဵတ်ႇတဵတ်ႇလႄႈ ၼႂ်းမိူဝ်ႈၶိင်ႇဝၼ်းၼၼ်ႉဢမ်ႇလၢတ်ႈလွင်ႈတၢင်းဢၼ်ၶဝ်လႆႈႁၼ်ၸိူဝ်းၼၼ်ႉသေၸိူဝ်ႉသေပိူင်တီႈၽူႈလႂ်သေၵေႃႉသေၵူၼ်း။

ၸဝ်ႈယေႇသူႉႁေႃႈၽီႁၢႆႉဢွၵ်ႇ

(တူၺ်း၊ မၢတ်ႈ 17:14-18။ မႃႇ 9:14-27)

37ၼႂ်းဝၼ်းမိူဝ်ႈၽုၵ်ႈ မိူဝ်ႈဢၼ်ၶဝ်လူင်းသေၵႃႈၼိူဝ်လွႆမႃးၼၼ်ႉ၊ ၵူၼ်းဢၼ်ၸူႉဢၼ်တုမ်ၼမ်ၼႃႇမႃးႁပ်ႉႁူဝ်တၢင်းမၼ်းၸဝ်ႈဢေႃႈ။- 38ၵူၼ်းဢၼ်ပႃးၼႂ်းၶဝ်ၸိူဝ်းဢၼ်ၸူႉဢၼ်တုမ်ၼၼ်ႉ ၵေႃႉၼိုင်ႈႁွင်ႉသႅၼ်ႇလႄႈလဝ်ႊဝႃႈ၊ သြႃႇၸဝ်ႈ၊ ၵဝ်ၶႃႈတွင်းပၢၼ်ႇ ႁႂ်ႈၸဝ်ႈႁဝ်းတူၺ်းလုၵ်ႈၸၢႆးၵဝ်ၶႃႈၶႃႈဢေႃႈ။ တီႈၵဝ်ၶႃႈမီးလုၵ်ႈၸၢႆးၵေႃႉလဵဝ်ၵူၺ်းၶႃႈဢေႃႈ။- 39ၽီတီႉဢဝ်မၼ်းသေယဝ်ႉ၊ မၼ်းၸၢင်ႈႁွင်ႉသႅၼ်ႇၵမ်းလဵဝ်လႄႈ ႁွတ်ႈတၢင်းဢၼ်ၵႅၼ်ႇၶႅင်ၵႂႃႇတေႃႇထိုင်ႁွတ်ႈထၼ်ႈပေႃးပူၵ်ႇဢွၵ်ႇယူႇၶႃႈဢေႃႈ။ ၼိၵ်ႈၸၢၵ်ႈငႅၼ်းသႄးမၼ်းၼႃႇလူင်လၢင်ၸိူဝ်ႉၼင်ႇၼၼ်ယဝ်ႉၸင်ႇ၊ ၽီၼၼ်ႉဢွၵ်ႇယၢပ်ႇဢွၵ်ႇယဵၼ်းၼႃႇၶႃႈဢေႃႈ။- 40ပိၵ်ႉသမ်ႉၵဝ်ၶႃႈတွင်းပၢၼ်ႇတီႈတပႄးၸဝ်ႈတင်းလၢႆ ႁႂ်ႈၶဝ်ႁေႃႈၽီႁၢႆႉၼၼ်ႉဢွၵ်ႇပႅတ်ႈသေၵေႃႈ၊ ၶဝ်ဢမ်ႇတၢတ်ႈၼိူင်ႇလႆႈၶႃႈ၊ ဝႃႈၼင်ႇၼႆဢေႃႈ။

41 ယေႇသူႉၵေႃႈ ၶိုၼ်းလၢတ်ႈလႄႈဝႃႈ၊ ၵူၼ်းမဵဝ်းဢၼ်ဢမ်ႇမီးတၢင်းဢၼ်ယုမ်ႇမၢတ်ႈလႄႈၸၢင်ႈၶၢႆႉပုတ်ႈၼႆႉဢိူၺ်း၊ ၵဝ်တၵ်းလႆႈယူႇလူၺ်ႈၵၼ်တင်းသူလၢႆၶိင်ႇလၢႆမိူဝ်ႈ။ တၵ်းလႆႈယိူၼ်ႉၶၢမ်ႇသူလၢႆၶိင်ႇလၢႆမိူဝ်ႈ။ ဢဝ်လုၵ်ႈၸၢႆးမႂ်းၼၼ်ႉမႃးတီႈၵဝ်တႃႉ၊ ဝႃႈၼင်ႇၼႆဢေႃႈ။- 42ၼႂ်းမိူဝ်ႈဢၼ်မၼ်းယင်းတိုၵ်ႉမႃးယူႇၼၼ်ႉၸိုင်၊ ၽီႁၢႆႉၼၼ်ႉႁႂ်ႈမၼ်းလူမ်ႉၵႃႈၼိူဝ်လိၼ်လႄႈ ႁႂ်ႈၵႅၼ်ႇၶႅင်ၵႂႃႇဢေႃႈ။ ယေႇသူႉသင်ႇသွၼ်ပၼ်ၽီဢၼ်ၵူဝ်ႈၵိူၵ်ႇၼၼ်ႉလႄႈ ႁႂ်ႈလုၵ်ႈဢွၼ်ႇၼၼ်ႉလႆႈၵတ်းယဵၼ်ၶျၢမ်းသႃႇယဝ်ႉၸင်ႇ၊ ဢဝ်မၼ်းဢၢပ်ႈပၼ်တီႈပေႃႈမၼ်းဢေႃႈ။- 43ၵူၼ်းတင်းသဵင်ႈတင်းလူင်ၸိူဝ်းၼၼ်ႉ လႆႈႁၼ်မႁႃႇတၼ်းၶူဝ်းၽြႃးပဵၼ်ၸဝ်ႈလႄႈ မီးတၢင်းဢၼ်ၵႂင်ၸႂ်ယုင်ႈၸႂ် ၼႃႇလူင်လၢင်ယူႇဢေႃႈ။ ၼႂ်းမိူဝ်ႈဢၼ်ၵူၼ်းတင်းသဵင်ႈတင်းလူင်ဢၢမ်းလွင်ႈတၢင်းဢၼ် ယေႇသူႉႁဵတ်း တင်းသဵင်ႈတင်းလူင်ၸိူဝ်းၼၼ်ႉယူႇၼၼ်ႉၸိုင်၊ မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊- 44သူထွမ်ႇၵႂၢမ်းၵဝ်ၼႆႉလႄႈတွင်းဝႆႉတႃႉ။ လုၵ်ႈၵူၼ်းၸမ်ႉ တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆယဝ်ႉ၊ ဝႃႈၼင်ႇၼႆဢေႃႈ။- 45ဢထိၵ်ႈပႄႇၵႂၢမ်းမၼ်းၸဝ်ႈၼၼ်ႉဢမ်ႇပေႃႇဢမ်ႇဢွၵ်ႇလႄႈ သိူင်ႇဝႆႉဢမ်ဝႆႉတီႈၶဝ်တေႃႇထိုင်ႁွတ်ႈထၼ်ႈပေႃးၶဝ်ဢမ်ႇႁူႉဢမ်ႇၸႅင်ႈဢေႃႈ။ လွင်ႈဢထိၵ်ႈပႄႇၼၼ်ႉၵေႃႈ ၶဝ်ဢမ်ႇႁတ်းလဝ်ႊႁတ်းထၢမ်။

လွင်ႈၽူႈလႂ်ယႂ်ႇမျၢတ်ႈသေပိူၼ်ႈ

(တူၺ်း၊ မၢတ်ႈ 18:1-5။ မႃႇ 9:33-37)

46မိူဝ်ႈၼၼ်ႉ ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ထဵင်ၵၼ်လူၺ်ႈလွင်ႈဢၼ်ၵႃႈၼႂ်းၶဝ်ၼၼ်ႉ ၽူႈလႂ်တၵ်းယႂ်ႇမျၢတ်ႈၼႃႇသေပိူၼ်ႈၼၼ်ႉယူႇဢေႃႈ။- 47ယေႇသူႉႁူႉႁၼ်တၢင်းၵျၢမ်ႇတၢင်းပွင်ၶဝ်ၼၼ်ႉသေယဝ်ႉ၊ ဢဝ်လုၵ်ႈဢွၼ်ႇၵေႃႉၼိုင်ႈလႄႈ ဝႆႉၵႃႈတီႈႁိမ်းမၼ်းၸဝ်ႈယဝ်ႉၸင်ႇ၊

48လၢတ်ႈတီႈၶဝ်လႄႈဝႃႈ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ဢိင်ပိုင်ႈၸိုဝ်ႈသဵင်ၵဝ်သေလႄႈ ႁပ်ႉတုင်းဢဝ်လုၵ်ႈဢွၼ်ႇၼႆႉၼၼ်ႉ၊ ၵေႃႉၼၼ်ႉႁပ်ႉတုင်းဢဝ်ၵဝ်ဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉၵေႃႈ၊ ၵေႃႉၼၼ်ႉႁပ်ႉတုင်းဢဝ် ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။ လွင်ႈမၼ်းၸမ်ႉ ၵေႃႉဢၼ်လဵၵ်ႉသေပိူၼ်ႈၵႃႈၼႂ်းသူၼႆႉၼၼ်ႉ ပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈဢေႃႈ၊ ဝႃႈၼင်ႇၼႆဢေႃႈ။

49 ယူဝ်းႁၢၼ်ႇၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ႁဝ်းၶႃႈလႆႈထူပ်းၵူၼ်းဢၼ်ဢိင်ပိုင်ႈၸိုဝ်ႈသဵင်ၸဝ်ႈႁဝ်းသေလႄႈ ႁေႃႈၽီႁၢႆႉဢွၵ်ႇပႅတ်ႈယူႇၼၼ်ႉၵေႃႉၼိုင်ႈၶႃႈဢေႃႈ။ ပိူဝ်ႈဢၼ်မၼ်းဢမ်ႇၸွမ်းလူၺ်ႈၵၼ်တင်းႁဝ်းၶႃႈလႄႈ ႁဝ်းၶႃႈႁႄႉၶႅၼ်မၼ်းၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 50ယေႇသူႉၵေႃႈလၢတ်ႈတီႈမၼ်းလႄႈဝႃႈ၊ ယႃႇပေႁႄႉပေၶႅၼ်။ ၵေႃႉဢၼ်ဢမ်ႇမီးၽၢႆႇရၢၼ်ႇသူႇၼၼ်ႉ မီးယူႇၽၢႆႇသူဢေႃႈ၊ ဝႃႈၼင်ႇၼႆဢေႃႈ။

ၵူၼ်းသမႃႇရီႉဢမ်ႇႁပ်ႉၶၢမ်ႇၸဝ်ႈယေႇသူႉ

51မၼ်းၸဝ်ႈၼၼ်ႉ၊ မိူဝ်ႈဢၼ်ၸမ်တၵ်းထိုင်ႁွတ်ႈၶိင်ႇဢၼ်တၵ်းလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၸိုင်၊ ဝၢႆႇၼႃႈႁႂ်ႈလႆႈၵႂႃႇၸူးၵႃႈတီႈဝဵင်းယေႇရူႉသလႅမ်ႇ သိုဝ်ႈသိုဝ်ႈဢေႃႈ။- 52မၼ်းၸဝ်ႈပွႆႇၸႂ်ႉၵူၼ်းၵႂႃႇဢွၼ်တၢင်းမၼ်းၸဝ်ႈလႄႈ ၶဝ်ၼၼ်ႉၵႂႃႇလႄႈၶဝ်ႈၵႃႈၼႂ်းဝၢၼ်ႈၵူၼ်းသမႃႇရီႉ ဝၢၼ်ႈၼိုင်ႈ ႁႂ်ႈလႆႈမႄးႁႅၼ်းဝႆႉပုၼ်ႈမၼ်းၸဝ်ႈဢေႃႈ။- 53ပိူဝ်ႈဢၼ်ၼႃႈမၼ်းၸဝ်ႈဝၢႆႇၵႂႃႇၸူးၵႃႈတီႈဝဵင်းယေႇရူႉသလႅမ်ႇ သိုဝ်ႈသိုဝ်ႈယူႇလႄႈ ၵူၼ်းဝၢၼ်ႈၸိူဝ်းၼၼ်ႉဢမ်ႇႁပ်ႉတုင်းဢဝ်မၼ်းၸဝ်ႈ။- 54တပႄးမၼ်းၸဝ်ႈယႃႇၵုပ်ႈတင်းယူဝ်းႁၢၼ်ႇၼၼ်ႉ ႁၼ်လွင်ႈတၢင်းၼၼ်ႉသေယဝ်ႉ၊ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၼင်ႇႁိုဝ်ႁဝ်းၶႃႈတၵ်းလႆႈႁႂ်ႈၽႆးတူၵ်းသေၵႃႈၼိူဝ်ၵၢင်ႁၢဝ်မႃးလႄႈ မႆႈၶဝ်ၸိူဝ်းၼႆႉ မိူၼ်ၸိူဝ်ႉၼင်ႇဢၼ် ဢေးလီႉယႃႉႁဵတ်းၼၼ်ႉၸိုင်၊ ၸဝ်ႈႁဝ်းမီးဢလူဝ်ႇၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၼၼ်ႉ၊- 55ယေႇသူႉဝၢႆႇတူၺ်းသေလႄႈသင်ႇသွၼ်ပၼ်လႄႈဝႃႈ၊ သူဢမ်ႇႁူႉၸႂ်သၽေႃးသူ၊ ဝႃႈၼင်ႇၼႆယဝ်ႉၸင်ႇ၊- 56ၵႂႃႇၸူးၵႃႈတီႈဝၢၼ်ႈတၢင်ႇတီႈဢေႃႈ။

ၵူၼ်းဢၼ်ထိူၵ်ႈၸွမ်းလင်ၸဝ်ႈ

(တူၺ်း၊ မၢတ်ႈ 8:19-22)

57ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇၸွမ်းတၢင်းယူႇၼၼ်ႉၸိုင်၊ ၵူၼ်းၵေႃႉၼိုင်ႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵဝ်ၶႃႈတၵ်းၸွမ်းၸဝ်ႈႁဝ်းၵႂႃႇ ၵႃႈတီႈၵႃႈဢၼ်ၸဝ်ႈႁဝ်းၵႂႃႇၵူႈတီႈၵူႈလႅၼ်ၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 58ယေႇသူႉၵေႃႈ လၢတ်ႈတီႈမၼ်းလႄႈဝႃႈ၊ မႃလိၼ်တင်းလၢႆယင်းမီးႁူးလိၼ်ဢေႃႈ။ ၼူၵ်ႉဢၼ်မိၼ်ၵႃႈၼိူဝ်ၵၢင်ႁၢဝ်တင်းလၢႆယင်းမီးႁင်းဢေႃႈ။ လုၵ်ႈၵူၼ်းၸမ်ႉ၊ တီႈဢၼ်တၵ်းဝၢင်းႁူဝ်ၵေႃႈ၊ဢမ်ႇမီး၊ ဝႃႈၼင်ႇၼႆဢေႃႈ။- 59မၼ်းၸဝ်ႈလၢတ်ႈတီႈၵူၼ်းတၢင်ႇၵေႃႉလႄႈဝႃႈ၊ ၸွမ်းပႃႈလင်ၵဝ်တႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၵေႃႈလဝ်ႊလၢတ်ႈလႄႈဝႃႈ။ ၸဝ်ႈႁဝ်း၊ ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇလႄႈ သၢင်းၵျူဝ်ႇပေႃႈၵဝ်ၶႃႈ ဢွၼ်တၢင်းလူးၵွၼ်ႇသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 60မၼ်းၸဝ်ႈၵေႃႈလၢတ်ႈလႄႈဝႃႈ၊ ႁႂ်ႈၵူၼ်းတၢႆတင်းလၢႆသၢင်းၵျူဝ်ႇၵူၼ်းတၢႆၶဝ်တႃႉ။ မႂ်းၸမ်ႉ၊ ၵႂႃႇလႄႈမွၵ်ႇလၢတ်ႈလွင်ႈမိူင်းၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆဢေႃႈ။- 61ပိူၼ်ႈတၢင်ႇၵေႃႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵဝ်ၶႃႈတၵ်းၸွမ်းပႃႈလင်ၸဝ်ႈႁဝ်းၶႃႈဢေႃႈ။ ၼႂ်းဝႃႈၼၼ်သေၵေႃႈ ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇလႄႈ တၵ်ႉလၢတ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇယူႇၵႃႈၼႂ်းႁိူၼ်းၵဝ်ၶႃႈၼၼ်ႉဢွၼ်တၢင်းလူးၵွၼ်ႇသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊- 62ယေႇသူႉၵေႃႈ လၢတ်ႈတီႈမၼ်းလႄႈဝႃႈ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ယိပ်းၵၼ်းထိူၼ်ႇယူႇလႄႈ ဝၢႆႇတူၺ်းတၢင်းလင်ၼၼ်ႉၸမ်ႉ၊ ၵေႃႉၼၼ်ႉဢမ်ႇထိူၵ်ႈဢမ်ႇတၢၼ်ႇၵၼ်တင်းမိူင်းၽြႃးပဵၼ်ၸဝ်ႈ၊ ဝႃႈၼင်ႇၼႆဢေႃႈ။

বর্তমানে নির্বাচিত:

လူႉၵႃႇ 9: CBMS

হাইলাইট

কপি