လူႉၵႃႇ 10
10
ၸဝ်ႈယေႇသူႉပွႆႇၸႂ်ႉတပႄးၸဝ်ႈၸဵတ်းသိပ်းၵေႃႉ
1လိုၼ်းၼၼ်ႉ ၸဝ်ႈၽြႃးၶၢၼ်းဝႆႉတပႄးၸဝ်ႈတၢင်ႇၵေႃႉၸဵတ်းသိပ်းၵေႃႉလႄႈ ပွႆႇၸႂ်ႉသွင်ၵေႃႉယေႈၸိူဝ်း သွင်ၵေႃႉယေႈၸိူဝ်း ၵႂႃႇဢွၼ်တၢင်းမၼ်းၸဝ်ႈၸူးၵႃႈတီႈဝၢၼ်ႈဝဵင်းၸိူဝ်းဢၼ်မၼ်းၸဝ်ႈတၵ်းၵႂႃႇၵူႈတီႈၵူႈလႅၼ်ၼၼ်ႉဢေႃႈ။- 2မၼ်းၸဝ်ႈလၢတ်ႈတီႈၶဝ်ၼၼ်ႉလႄႈဝႃႈၸမ်ႉ၊ ၶဝ်ႈဢၼ်လီပၢတ်ႇမီးၼမ်ၼႃႇဢေႃႈ။ ၵူၼ်းၸိူဝ်းဢၼ်ပၢတ်ႇမီးၵေႇဢေႃႈ။ ပိူဝ်ႈၼႆလႄႈ ၼင်ႇႁိုဝ်တၵ်းပွႆႇၸႂ်ႉၵူၼ်းၸိူဝ်းဢၼ်တၵ်းပၢတ်ႇၼၼ်ႉမႃးပုၼ်ႈဢၼ်တၵ်းလႆႈပၢတ်ႇၶဝ်ႈၸိုင်၊ သူးတွင်းယွၼ်းတီႈၸဝ်ႈၶဝ်ႈတႃႉ။- 3ၵႂႃႇၸွမ်းတၢင်းသူၼၼ်ႉတႃႉ။ ၵဝ်ပွႆႇၸႂ်ႉသူၵႂႃႇၸိူဝ်ႉၼင်ႇဢၼ်ပွႆႇၸႂ်ႉသူဝ်းၵႂႃႇၵႃႈၼႂ်းၽုင်မႃထိူၼ်ႇၼၼ်ႉဢေႃႈ။- 4ယႃႇပေပႃးထူင်ငိုၼ်း ထူင်ပႃး ၶႅပ်းတိၼ်။ ၼႂ်းမိူဝ်ႈဢၼ်ယင်းတိုၵ်ႉၵႂႃႇၸွမ်းတၢင်းယူႇၼၼ်ႉၸိုင်၊ ယႃႇပေတၵ်ႉလၢတ်ႈၽူႈလႂ်သေၵေႃႉ။- 5မိူဝ်ႈဢၼ်ၶဝ်ႈၵႃႈၼႂ်းႁိူၼ်းလႂ်သေဢမ်ႇဝႃႈ၊ လၢတ်ႈဢွၼ်တၢင်းလႄႈဝႃႈ၊ ႁႂ်ႈၵႃႈတီႈႁိူၼ်းၼၼ်ႉမီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆတႃႉ။- 6ပေႃးမီးၵူၼ်းမင်ႇၵလႃႇၵႃႈတီႈႁိူၼ်းၼၼ်ႉၸိုင်၊ မင်ႇၵလႃႇဢၼ်သူဝႃႈၼၼ်ႉတၵ်းတႄႇယူႇဢေႃႈ။ ဢမ်ႇၼၼ်ၵေႃႈ တၵ်းၶိုၼ်းမႃးတီႈသူဢေႃႈ။- 7ယူႇၵႃႈၼႂ်းႁိူၼ်းၼၼ်ႉသေလႄႈ ၵိၼ်တၢင်းၵိၼ်တၢင်းၶူပ်းဢၼ်လႆႈၼၼ်ႉတႃႉ။ လွင်ႈမၼ်းၸမ်ႉ ၵေႃႉဢၼ်ႁဵတ်းတၢင်းႁဵတ်းၼၼ်ႉထိူၵ်ႈၶၢမ်ႇဢဝ်ၵႃႈမၼ်းၶၼ်မၼ်းဢေႃႈ။ ယႃႇပေလႄႇၵႂႃႇႁိူၼ်းၼိုင်ႈယဝ်ႉႁိူၼ်းၼိုင်ႈ။- 8သူၶဝ်ႈၵႃႈၼႂ်းဝဵင်းလႂ်သေဢမ်ႇဝႃႈလႄႈ ၵူၼ်းဝဵင်းၼၼ်ႉႁပ်ႉတုင်းဢဝ်သူၸိုင်၊ ၵႃႈၼႂ်းဝဵင်းၼၼ်ႉ၊ ၵိၼ်တၢင်းၵိၼ်ၵႃႈဢၼ်ၶဝ်သႂ်ႇတမ်းပၼ်ၵႃႈတီႈၽၢႆႇၼႃႈသူၼၼ်ႉတႃႉ။- 9ပၼ်ၵတ်းယဵၼ်ၶျၢမ်းသႃႇတီႈၵူၼ်းပဵၼ်တင်းလၢႆဢၼ်မီးၼႂ်းတီႈၼၼ်ႈၼၼ်ႉတႃႉ။ မိူင်းၽြႃးပဵၼ်ၸဝ်ႈႁွတ်ႈမႃးႁိမ်းသူယဝ်ႉ၊ ဝႃႈၼႆ၊ မွၵ်ႇလၢတ်ႈတီႈၶဝ်ၼၼ်ႉတႃႉ။- 10သူၶဝ်ႈၵႃႈၼႂ်းဝဵင်းလႂ်သေဢမ်ႇဝႃႈလႄႈ ၵူၼ်းဝဵင်းၼၼ်ႉဢမ်ႇႁပ်ႉတုင်းဢဝ်သူၸိုင်၊ ဢွၵ်ႇၵႂႃႇၸူးၵႃႈၼႂ်းသဵၼ်ႈတၢင်းဝဵင်းၸိူဝ်းၼၼ်ႉယဝ်ႉၸင်ႇ၊ လၢတ်ႈလႄႈဝႃႈ၊ ႁဝ်းသၼ်ႇပႅတ်ႈမုၼ်ႈလိၼ်ဝဵင်းသူဢၼ်ၸပ်းၵႃႈတီႈတိၼ်ႁဝ်းၼႆႉဢေႃႈ။- 11ၼႂ်းဝႃႈၼၼ်သေၵေႃႈ လွင်ႈဢၼ်မိူင်းၽြႃးပဵၼ်ၸဝ်ႈႁွတ်ႈမႃးႁိမ်းသူၸိုင် ႁူႉတႃႉဝႃႈၼႆ၊ လၢတ်ႈတီႈၶဝ်ၼၼ်ႉတႃႉ။- 12ၵဝ်ဝႃႈတီႈသူၸမ်ႉ၊ ၼႂ်းဝၼ်းဢၼ်သုတ်းပုၼ်ႉၼၼ်ႉ၊ ဝဵင်းၼၼ်ႉယဵင်ႈၶႅၼ်းတၵ်းလႆႈၶၢမ်ႇၼႃႇသေဝဵင်းသေႃးတုမ်ႇဢေႃႈ။
13ဝဵင်းၶေႃးရၸႅၼ်ႇဢိူၺ်း၊ မႂ်းမီးဢႃႉမင်ႇၵလႃႇဢေႃႈ။ ဝဵင်းပႅတ်ႉၸေးတႃႉဢိူၺ်း၊ မႂ်းမီးဢႃႉမင်ႇၵလႃႇဢေႃႈ။ လွင်ႈမၼ်းၸမ်ႉ တၼ်းၶူဝ်းတင်းလၢႆဢၼ်ၼႄပျႃးၼႂ်းသူၼႆႉ၊ သင်ယၢမ်ႈလႆႈၼႄပျႃးၵႃႈၼႂ်းဝဵင်းတူႉရူႉတင်းဝဵင်းၸီႉတုမ်ႇၸိုင်၊ ဝဵင်းၸိူဝ်းၼၼ်ႉတၵ်းၼုင်ႈၼင်ႇပေႃလႄႈ ၼင်ႈၵႃႈၼႂ်းတဝ်ႈယူႇသေလႄႈ ၶုၵ်းၸႂ်လႆႈမႆႈၸႂ် မိူဝ်ႈၵႃႇလႃႉဢွၼ်ၼႆႉၼၼ်ႉဢေႃႈ။- 14ဝၼ်းဢၼ်ၸီႇယၢင်ႇတြႃးၼၼ်ႉ၊ သူယဵင်ႈၶႅၼ်းတၵ်းလႆႈၶၢမ်ႇၼႃႇသေဝဵင်းတူႉရူႉ တင်းဝဵင်းၸီႉတုမ်ႇၼၼ်ႉဢေႃႈ။- 15ဝဵင်းၵပိူဝ်ႇၼေႇဢုမ်ႇဢိူၺ်း၊ မႂ်းၼႆႉပိၵ်ႉသမ်ႉလႆႈၶၢမ်ႇတၢင်းဢၼ်ယုၵ်ႉယွင်ႈတေႃႇထိုင်ႁွတ်ႈၼိူဝ်ၽႃႉၵၢင်ႁၢဝ်သေၵေႃႈ၊ တၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇတေႃႇထိုင်ႁွတ်ႈမိူင်းမရၼႃႉ ပုၼ်ႉဢေႃႈ။- 16ၵေႃႉဢၼ်ထွမ်ႇဢဝ်ၵႂၢမ်းသူၼၼ်ႉ ထွမ်ႇဢဝ်ၵႂၢမ်းၵဝ်ဢေႃႈ။ ၵေႃႉဢၼ်ပႄႇပႅတ်ႈသူၼၼ်ႉ ပႄႇပႅတ်ႈၵဝ်ဢေႃႈ။ ၵေႃႉဢၼ်ပႄႇပႅတ်ႈၵဝ်ၼၼ်ႉ ပႄႇပႅတ်ႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။
17တပႄးၸဝ်ႈၸဵတ်းသိပ်းၵေႃႉၼၼ်ႉ မီးၸႂ်ဢၼ်သိူဝ်းပျေႃႇၶိုၼ်းမႃးလႄႈလဝ်ႊလၢတ်ႈဝႃႈ၊ ၸဝ်ႈႁဝ်း၊ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ ႁဝ်းၶႃႈလႆႈပႄႉလႆႈၼႅင်ႇၽီႁၢႆႉတင်းလၢႆၶႃႈဢေႃႈ၊ ဝႃႈၼင်ႇၼႆဢေႃႈ။- 18မၼ်းၸဝ်ႈၵေႃႈလၢတ်ႈတီႈၶဝ်လႄႈဝႃႈ၊ ၵဝ်ႁၼ်ၸႃႇတၢၼ်ႇတူၵ်းသေၵႃႈၼိူဝ်ၵၢင်ႁၢဝ်မႃး မိူၼ်ၸိူဝ်ႉၼင်ႇၽႃႉမႅပ်ႈၼၼ်ႉယဝ်ႉ။- 19ၵဝ်ပၼ်ဢၶႂၢင်ႉဢၼ်သူယိပ်းၵမ်ငူးလႂ်၊ မႅင်းငေႃးလႂ်လႆႈ ဢိၵ်ႇတင်းတၼ်းၶူဝ်းဢၼ်ပႄႉၼႅင်ႇရၢၼ်ႇသူႇလႆႈၼၼ်ႉတီႈသူယဝ်ႉ။ ၽေးဢၼ်လႂ်တၵ်းဢမ်ႇလႆႈၼိၵ်ႈၸၢၵ်ႈငႅၼ်းသႄးသူ။- 20ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈဢၼ်ပႄႉၼႅင်ႇၽီႁၢႆႉလႆႈၼၼ်ႉလႄႈ ယႃႇပေမီးတၢင်းဢၼ်သိူဝ်းပျေႃႇ။ မီးတၢင်းဢၼ်သိူဝ်းပျေႃႇလူၺ်ႈလွင်ႈဢၼ်ၸိုဝ်ႈသဵင်သူ တႅမ်ႈသႂ်ႇဝႆႉၵႃႈၼႂ်းၸရၢင်းၵၢင်ႁၢဝ်ၼၼ်ႉတႃႉ၊ ဝႃႈၼင်ႇၼႆဢေႃႈ။
21မိူဝ်ႈၼၼ်ႉ မၼ်းၸဝ်ႈမီးတင်းၸႂ်ဢၼ်သိူဝ်းၸူမ်းလႄႈဝႃႈ၊ ဢူဝ်းပေႃႈၸဝ်ႈၵၢင်ႁၢဝ်တင်းလိၼ်မိူင်းတီႈၶႃႈ၊ လွင်ႈတၢင်းၸိူဝ်းၼႆႉၸိုင်၊ ပိူဝ်ႈဢၼ်ၸဝ်ႈႁဝ်းသိူင်ႇဝႆႉလပ်ႉဝႆႉတီႈၶဝ်ၸိူဝ်းဢၼ်မီးပိင်ႇၺႃႇတၢင်းလၵ်းတၢင်းလႅမ်တင်းလၢႆၼၼ်ႉသေယဝ်ႉ ၽုၺ်ႇဢွၵ်ႇၼႄပျႃးတီႈလုၵ်ႈဢွၼ်ႇတင်းလၢႆၵူၺ်းလႄႈ ၵဝ်ၶႃႈယွင်ႈယေႃးၵျေးၸူးၸဝ်ႈႁဝ်းတီႈၶႃႈဢေႃႈ။ ပိူဝ်ႈဢၼ်ၸဝ်ႈႁဝ်းမီးဢလူဝ်ႇၸိူဝ်ႉၼင်ႇၼၼ်လႄႈ ၸႂ်ႈတီႈၶႃႈယဝ်ႉပေႃႈ။- 22ၸဝ်ႈပေႃႈၵဝ်ၼၼ်ႉဢဝ်ၵႃႈဢၼ်မီးတင်းသဵင်ႈတင်းလူင် ဢၢပ်ႈပၼ်တီႈၵဝ်ယဝ်ႉ။ လုၵ်ႈၸဝ်ႈၸမ်ႉ၊ ပဵၼ်ၽူႈလႂ်ဝႃႈၼႆ၊ လိူဝ်သေပေႃႈၸဝ်ႈၵူၺ်းၽူႈလႂ်သေၵေႃႉသေၵူၼ်းဢမ်ႇႁူႉ။ ပေႃႈၸဝ်ႈၸမ်ႉ၊ ပဵၼ်ၽူႈလႂ်ဝႃႈၼႆ၊ လိူဝ်သေလုၵ်ႈၸဝ်ႈဢိၵ်ႇတင်းၵေႃႉဢၼ်လုၵ်ႈၸဝ်ႈၶႂ်ႈႁႂ်ႈလႅင်းၼၼ်ႉၵူၺ်း ၽူႈလႂ်သေၵေႃႉသေၵူၼ်းဢမ်ႇႁူႉ၊ ဝႃႈၼင်ႇၼႆဢေႃႈ။
23မိူဝ်ႈၼၼ်ႉ မၼ်းၸဝ်ႈဝၢႆႇတူၺ်းတီႈတပႄးၸဝ်ႈတင်းလၢႆသေလႄႈ တဵတ်ႇတဵတ်ႇလၢတ်ႈပၼ်လႄႈဝႃႈ၊ မၢၵ်ႇတႃဢၼ်ႁၼ်ၵႃႈဢၼ်သူလႆႈႁၼ်တင်းသဵင်ႈတင်းလူင်ၸိူဝ်းၼႆႉၼၼ်ႉမီးမင်ႇၵလႃႇဢေႃႈ။- 24ၵဝ်ဝႃႈတီႈသူၸမ်ႉ၊ လွင်ႈဢၼ်သူလႆႈႁၼ်ၸိူဝ်းၼႆႉၸိုင်၊ ပိၵ်ႉသမ်ႉပရေႃးၽႅတ်ႈဢိၵ်ႇတင်းၶုၼ်ႁေႃၶမ်းတင်းလၢႆ မီးဢလူဝ်ႇၶႂ်ႈႁၼ်သေၵေႃႈ၊ ဢမ်ႇလႆႈႁၼ်။ လွင်ႈတၢင်းဢၼ်သူလႆႈငိၼ်းၸိူဝ်းၼႆႉၸိုင်၊ ပိၵ်ႉသမ်ႉၶဝ်မီးဢလူဝ်ႇၶႂ်ႈငိၼ်းသေၵေႃႈ၊ ဢမ်ႇလႆႈငိၼ်း၊ ဝႃႈၼင်ႇၼႆဢေႃႈ။
လွင်ႈၵူၼ်းသမႃႇရီႉဢၼ်လီ
25မိူဝ်ႈၼၼ်ႉ ၵူၼ်းမေႃၵျၢမ်းၵေႃႉၼိုင်ႈလုၵ်ႉသေလႄႈ၊ ၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၸိုင်၊ လဝ်ႊထၢမ်လႄႈဝႃႈ၊ ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ႁႂ်ႈလႆႈၶၢမ်ႇဢမူၺ်ႇထႃႇဝရႃႉဢသၢၵ်ႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 26မၼ်းၸဝ်ႈၵေႃႈထၢမ်လႄႈဝႃႈ၊ ၼႂ်းၵျၢမ်းပိင်းၺၢပ်ႈတီႉမႃးၸိူဝ်ႉၼင်ႇႁိုဝ်။ မႂ်းၽတ်းၸိူဝ်ႉၼင်ႇႁိုဝ်။ ဝႃႈၼင်ႇၼႆယဝ်ႉၸင်ႇ၊- 27ၵေႃႉၼၼ်ႉၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၽြႃးပဵၼ်ၸဝ်ႈမႂ်းထႃႇဝရႃႉၽြႃးၸိုင်၊ ပႃးတင်းၸႂ်သဵင်ႈသဵင်ႈ၊ တင်းႁူဝ်ၸႂ်သဵင်ႈသဵင်ႈ၊ တင်းၵႃႈဢၼ်ၵတ်ႉဢၼ်ၶၼ်သဵင်ႈသဵင်ႈ၊ တင်းၺၢၼ်ႇၵႃႈဢၼ်မီးတင်းသဵင်ႈတင်းလူင်သေလႄႈႁၵ်ႉတႃႉ။ ၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉၸိုင်၊ ႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇတႃႉ၊ မီးမႃးၼင်ႇၼႆၶႃႈ၊ ဝႃႈၼင်ႇၼႆဢေႃႈ။- 28မၼ်းၸဝ်ႈၵေႃႈလၢတ်ႈလႄႈဝႃႈ၊ ၵႂၢမ်းမႂ်းၼႆႉၸႂ်ႈတႄႉတႄႉဢေႃႈ။ ပေႃးႁဵတ်းၸိူဝ်ႉၼင်ႇၼႆၸိုင်၊ တၵ်းလႆႈဢသၢၵ်ႈယဝ်ႉ၊ ဝႃႈၼင်ႇၼႆဢေႃႈ။- 29ၵေႃႉၼၼ်ႉၵေႃႈ မီးၸႂ်ဢၼ်ၶႂ်ႈႁဵတ်းၸိူဝ်ႉၼင်ႇႁၢင်ႈ ဢၼ်တူဝ်ၸဝ်ႈၵဝ်ႇဢမ်ႇမီးဢပႅတ်ႈၼၼ်ႉလႄႈ ၶိုၼ်းလဝ်ႊလၢတ်ႈတီႈယေႇသူႉလႄႈဝႃႈ၊ ၽူႈလႂ်ပဵၼ်ၵေႃႉဢၼ်ၸၢပ်ႈသႅင်ႇၵၼ်တင်းၵဝ်ၶႃႈ၊ ဝႃႈၼင်ႇၼႆဢေႃႈ။- 30ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵူၼ်းၵေႃႉၼိုင်ႈ လုၵ်ႉသေၵႃႈတီႈဝဵင်းယေႇရူႉသလႅမ်ႇ ၵႂႃႇၵႃႈတီႈဝဵင်းယေႇရီႉၶူဝ်းလႄႈထူပ်းၸူၼ်ဢေႃႈ။ ၶဝ်ၼၼ်ႉထွတ်ႇဢဝ်ၶူဝ်းၼုင်ႈၵေႃႉၼၼ်ႉသေလႄႈ ပေႃႉယႅၼ်ႉၸဵပ်းၼႃႇလူင်လၢင်ယဝ်ႉၸင်ႇ၊ မိူဝ်ႈဢၼ်မၼ်းႁၢမ်ႉတၵ်းတၢႆၸိုင်၊ ပႅတ်ႈဝႆႉလႄႈၵႂႃႇသေဢေႃႈ။- 31ယိတ်ႈပရေႃးႁဵၵ်ႈၵေႃႉၼိုင်ႈ ယင်းဢမ်ႇႁူႉဢမ်ႇႁၼ်လွင်ႈတၢင်းၼၼ်ႉၸွမ်းသဵၼ်ႈတၢင်းၼၼ်ႉၵႂႃႇလႄႈ ထူပ်းႁၼ်ၵေႃႉၼၼ်ႉသေယဝ်ႉ၊ ဝႄႈပႅတ်ႈလႄႈၵႂႃႇသေဢေႃႈ။- 32မိူၼ်ၼင်ႇၼၼ် ၵူၼ်းလေႇဝီႉ ၵေႃႉၼိုင်ႈ မိူဝ်ႈဢၼ်ႁွတ်ႈထိုင်ၵႃႈတီႈၼၼ်ႈၼၼ်ႉၸိုင်၊ မႃးထူပ်းႁၼ်ၵေႃႉၼၼ်ႉသေယဝ်ႉ၊ ဝႄႈပႅတ်ႈလႄႈၵႂႃႇသေဢေႃႈ။
33ၵူၼ်းသမႃႇရီႉၵေႃႉၼိုင်ႈ ၼႂ်းမိူဝ်ႈဢၼ်ၸွမ်းတၢင်းၵႂႃႇယူႇၼၼ်ႉ၊ ႁွတ်ႈထိုင်ၵႃႈတီႈဢၼ်ၵေႃႉၼၼ်ႉမီးၼၼ်ႉလႄႈ မိူဝ်ႈဢၼ်ထူပ်းႁၼ်မၼ်းၸိုင်၊ မီးတင်းၸႂ်ဢၼ်ဢဵတ်းလူလႄႈ၊- 34သုတ်ႉၸပ်းသုတ်ႉၸူးတီႈမၼ်းသေယဝ်ႉ၊ ဢဝ်ၼမ်ႉမၼ်းတင်းၼမ်ႉၸပိတ်ႈ ထွၵ်ႇသႂ်ႇၵႃႈတီႈတၢင်းၸဵပ်းမၼ်းၸိူဝ်းၼၼ်ႉလႄႈဢဝ်ၶူဝ်းလဵင်းပူၵ်ႉႁေႃႇယဝ်ႉၸင်ႇ၊ ဢဝ်တၢင်ႇၵႃႈၼိူဝ်တရိၵ်ႈသၢၼ်ႇမၼ်းလႄႈ ၵႂႃႇသူင်ႇၵႃႈတီႈႁိူၼ်းဢၼ်ၶႅၵ်ႇယူႇၼၼ်ႉဢေႃႈ။- 35ဝၼ်းမိူဝ်ႈၽုၵ်ႈ၊ မိူဝ်ႈဢၼ်မၼ်းဢွၵ်ႇၵႂႃႇၼၼ်ႉ၊ မၼ်းဢဝ်တေႇၼႃႇရီႇသွင်ၶႅပ်းဢွၵ်ႇလႄႈပၼ်တီႈၸဝ်ႈႁိူၼ်းၼၼ်ႉသေလႄႈ လၢတ်ႈဝႃႈ၊ ပႂ်ႉလူပႂ်ႉတူၺ်းၵေႃႉၼႆႉသေၵမ်းၶႃႈ၊ ၵႃႈဢၼ်သဵင်ႈၼၼ်ႉၸိုင်၊ မိူဝ်ႈဢၼ်ၵဝ်ၶႃႈၶိုၼ်းမႃးၼၼ်ႉ၊ ၵဝ်ၶႃႈတၵ်းတႅၼ်းပၼ်ဢေႃႈ၊ ဝႃႈၼင်ႇၼႆဢေႃႈ။- 36မႂ်းထၢင်ႇၸိူဝ်ႉၼင်ႇႁိုဝ်။ ၼႂ်းၶဝ်သၢမ်ၵေႃႉၼၼ်ႉ၊ ၽူႈလႂ်ပဵၼ်ၵေႃႉဢၼ်ၸၢပ်ႈသႅင်ႇၵၼ်တင်းၵေႃႉဢၼ်တူၵ်းၼႂ်းမိုဝ်းၸူၼ်ၼၼ်ႉ၊ မိူဝ်ႈဢၼ်မၼ်းၸဝ်ႈထၢမ်၊ ဝႃႈၼင်ႇၼႆၸိုင်၊- 37ၵူၼ်းမေႃၵျၢမ်းၵေႃႈလဝ်ႊလၢတ်ႈလႄႈဝႃႈ၊ ပဵၼ်ၵေႃႉဢၼ်ဢဵတ်းလူၵူၼ်းၸဵပ်းၼၼ်ႉၶႃႈဢေႃႈ၊ ဝႃႈၼင်ႇၼႆယဝ်ႉၸင်ႇ၊ ယေႇသူႉၵေႃႈလၢတ်ႈလႄႈဝႃႈ၊ မႂ်းၵႂႃႇလႄႈ ႁဵတ်းၸိူဝ်ႉၼင်ႇၼၼ်တႃႉ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉၵႂႃႇလႄႇႁိူၼ်းမႃႇထႃႉတင်းမႃႇရီႉ
38ၼႂ်းမိူဝ်ႈဢၼ်ၶဝ်ၸွမ်းတၢင်းၵႂႃႇယူႇၼၼ်ႉၸိုင်၊ မၼ်းၸဝ်ႈၶဝ်ႈၵႂႃႇၵႃႈၼႂ်းဝၢၼ်ႈဝၢၼ်ႈၼိုင်ႈလႄႈ မႄႈယိင်းၵေႃႉၼိုင်ႈဢၼ်လႆႈၸိုဝ်ႈမႃႇထႃႉၼၼ်ႉ ႁပ်ႉတုင်းဢဝ်မၼ်းၸဝ်ႈသေလႄႈၶၢမ်ႇၶႅၵ်ႇၵႃႈၼႂ်းႁိူၼ်းမၼ်းဢေႃႈ။- 39တီႈမႄႈယိင်းၼၼ်ႉမီးၼွင်ႉယိင်းၵေႃႉၼိုင်ႈဢၼ်လႆႈၸိုဝ်ႈမႃႇရီႉဢေႃႈ။ မၼ်းၼၼ်ႉၼင်ႈယူႇၵႃႈတီႈႁိမ်းတိၼ်မၼ်းၸဝ်ႈသေလႄႈ ထွမ်ႇၵႂၢမ်းမၼ်းၸဝ်ႈယူႇဢေႃႈ။- 40မႃႇထႃႉၸမ်ႉ၊ မီးတၢင်းဢၼ်မႆႈၸႂ်ၶီၸႂ်လူၺ်ႈလွင်ႈတၢင်းဢၼ်ႁဵတ်းလဵင်ႉႁဵတ်းလူၼၼ်ႉလႄႈ သုတ်ႉၸပ်းသုတ်ႉၸူးတီႈမၼ်းၸဝ်ႈသေယဝ်ႉ၊ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်းဢမ်ႇၶႆႈၸႂ်လူၺ်ႈလွင်ႈဢၼ်ၼွင်ႉယိင်းၵဝ်ၶႃႈပႅတ်ႈဝႆႉၵဝ်ၶႃႈ ႁႂ်ႈၵဝ်ၶႃႈလႆႈႁဵတ်းလဵင်ႉႁဵတ်းလူၵေႃႉလဵဝ်ၵူၺ်းၼႆႉၶႃႈႁိုဝ်။ ၶႅၼ်းတေႃႈမီးဢမိင်ႉႁႂ်ႈမၼ်းၸွႆႈၵမ်ႉၸွႆႈထွၵ်ႈၵဝ်ၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 41ယေႇသူႉၵေႃႈလၢတ်ႈလႄႈဝႃႈ၊ မႃႇထႃႉ၊ မႃႇထႃႉဢိူၺ်း၊ မႂ်းၼႆႉမႆႈၸႂ်ယၢပ်ႇၸႂ်လူၺ်ႈလွင်ႈတၢင်းၼမ်ၼႃႇလႄႈ လႆႈၶၢမ်ႇတၢင်းဢၼ်ယႃႉယူၵ်ႉဢေႃႈ။ လွင်ႈဢၼ်လူဝ်ႇထႅင်ႈယင်းမီးယူႇဢၼ်ၼိုင်ႈဢေႃႈ။- 42မႃႇရီႉၸမ်ႉ၊ လိူၵ်ႈၵဵပ်းဢဝ်ပုၼ်ႈဢၼ်လီဝႆႉယဝ်ႉ။ ပုၼ်ႈၼၼ်ႉၸိုင် ၽူႈလႂ်သေၵေႃႉသေၵူၼ်းဢမ်ႇႁိမ်ဢမ်ႇဢဝ်လႆႈ၊ ဝႃႈၼင်ႇၼႆဢေႃႈ။
বর্তমানে নির্বাচিত:
လူႉၵႃႇ 10: CBMS
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
