ငဝ်ႈၵမ်ႇၽႃႇ 13
13
ဢႃႇပြမ်ႇတင်းလေႃးတႃႉၽၢတ်ႇၵၼ်
1 ဢႃႇပြမ်ႇဢဝ်မေးမၼ်းဢိၵ်ႇတင်းလေႃးတႃႉတင်းဢုၵ်ႉၸႃႇၶူဝ်းလဵင်းၵႃႈဢၼ်မီးတီႈမၼ်းၼၼ်ႉ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉလႄႈ ၶိုၼ်းၶိုၼ်ႈမႃးၸူးၵႃႈတီႈပွတ်းတၢင်းၸၢၼ်းၼၼ်ႉဢေႃႈ။- 2မိူဝ်ႈၼၼ်ႉဢႃႇပြမ်ႇၼၼ်ႉ မၢၵ်ႈမီးၸႃႉၸဵမ်သူဝ်းလႂ်၊ ဝူဝ်းလႂ်၊ ငိုၼ်းၶမ်းလႂ်ဢေႃႈ။- 3ၵမ်းၼၼ်ႉ မၼ်းသမ်ႉလုၵ်ႉသေၵႃႈတီႈပွတ်းတၢင်းၸၢၼ်းၼၼ်ႉၶၢႆႉၵႂႃႇလႄႈ သမ်ႉၶိုၼ်းႁွတ်ႈထိုင်ၵႃႈတီႈဢၼ်မၼ်းမုင်းမူဝ်းၵႃႇမိူဝ်ႈၼၼ်ႉ ၵႃႈၼႂ်းၵႄႈဝူင်ႈၵၢင် ဝဵင်းပေႇသလႃႉတင်းဝဵင်းဢႃႇဢီႉလႄႈ၊- 4လႆႈႁဵတ်းယိတ်ႈပလၢင်ႇၼၼ်ႉသေယဝ်ႉ၊ ႁဵတ်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၵႃႈၼႂ်းတီႈၼၼ်ႈဢေႃႈ။
5 လေႃးတႃႉဢၼ်ၸွမ်းလူၺ်ႈၵၼ်တင်းဢႃႇပြမ်ႇမႃးၼၼ်ႉၵေႃႈ မီးသူဝ်းလႂ်၊ ဝူဝ်းလႂ် ဢိၵ်ႇတင်းမူဝ်းၵႃႇလႂ်ဢေႃႈ။- 6လိၼ်ၼၼ်ႉ ဢမ်ႇပေႃးဢမ်ႇၵုမ်ႇပုၼ်ႈဢၼ်သွင်ၶႃတၵ်းယူႇလူၺ်ႈၵၼ်လႆႈ။ လွင်ႈမၼ်းၸမ်ႉ ဢုၵ်ႉၸႃႇၼမ်ၼႃႇလူၼ်ႉလိူဝ်ၵႂႃႇလႄႈ သွင်ၶႃဢမ်ႇယူႇတီႈလဵဝ်ၵၼ်လႆႈ။- 7ၵူၼ်းလဵင်ႉဝူဝ်းဢႃႇပြမ်ႇလႂ်၊ တင်းၵူၼ်းလဵင်ႉဝူဝ်းလေႃးတႃႉလႂ် ႁဵတ်းတၢင်းၽိတ်းသႂ်ႇတီႈၵၼ်ဢေႃႈ။ မိူဝ်ႈၼၼ်ႉၵူၼ်းၶႃႇၼၢၼ်ႇလႂ်၊ ၵူၼ်းၽေႇရၸီႉလႂ် ယူႇၵႃႈၼႂ်းမိူင်းၼၼ်ႉယူႇဢေႃႈ။- 8ဢႃႇပြမ်ႇၵေႃႈလၢတ်ႈတီႈလေႃးတႃႉလႄႈဝႃႈ၊ ယႃႇႁႂ်ႈတၢင်းဢၼ်ၽိတ်းၵၼ်မီးတီႈၵဝ်တင်းမႂ်း၊ တီႈၵူၼ်းလဵင်ႉဝူဝ်းၵဝ်လႂ်တင်းၵူၼ်းလဵင်ႉဝူဝ်းမႂ်းလႂ်သေၵမ်း။ လွင်ႈမၼ်းၸမ်ႉ ႁႃးၼႆႉပဵၼ်ပီႈၼွင်ႉၵၼ်ဢေႃႈ။- 9ၼႃႈလိၼ်တင်းသဵင်ႈတင်းလူင်မီးယူႇၵႃႈတီႈၽၢႆႇၼႃႈမႂ်းဢမ်ႇၸႂ်ႈႁိုဝ်။ ၽၢတ်ႇၵၼ်တင်းၵဝ်သေလႄႈယူႇသေၵမ်း။ ပေႃးမႂ်းၵႂႃႇၽၢႆႇသၢႆႉၸိုင် ၵဝ်တၵ်းၵႂႃႇၽၢႆႇၶႂႃဢေႃႈ။ ပေႃးမႂ်းၵႂႃႇၽၢႆႇၶႂႃၸိုင် ၵဝ်တၵ်းၵႂႃႇၽၢႆႇသၢႆႉဢေႃႈ၊ ဝႃႈၼင်ႇၼႆဢေႃႈ။- 10မိူဝ်ႈၼၼ်ႉလေႃးတႃႉမုင်ႈတူၺ်းလႄႈႁၼ်လွင်ႈဢၼ် ၸူဝ်ႈဢၼ်ထႃႇဝရႃႉၽြႃးဢမ်ႇပႆႇယႃႉဝဵင်းသေႃးတုမ်ႇတင်းဝဵင်းၵေႃးမေႃးရႃႉ ပႅတ်ႈၼၼ်ႉ ၵႃႈတီႈပၢင်ႇပဵင်းႁိမ်းႁွမ်းၼမ်ႉႁွင်ႈယေႃးတၢၼ်ႇၵူႈတီႈၵူႈလႅၼ်ၼၼ်ႉ ၼမ်ႉလိူင်ႇၼႃႇလႄႈ ပဵၼ်ၸိူဝ်ႉၼင်ႇသူၼ်ဢူးယဵၼ်ႇထႃႇဝရႃႉၽြႃး ဢိၵ်ႇတင်းပဵၼ်ၸိူဝ်ႉၼင်ႇ မိူင်းဢေႇၵိပ်ႉတူႉသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းၸေႃးရႃႉၼၼ်ႉယဝ်ႉ၊- 11ၸင်ႇလိူၵ်ႈၵဵပ်းဢဝ်ပၢင်ႇပဵင်းၼမ်ႉႁွင်ႈယေႃးတၢၼ်ႇ တင်းသဵင်ႈတင်းလူင်ၼၼ်ႉသေလႄႈ ၶၢႆႉၵႂႃႇၵႃႈတီႈၽၢႆႇၼႃႈဝၼ်းဢွၵ်ႇသေယဝ်ႉ၊ သွင်ၶႃၵေႃႉၼိုင်ႈလႄႈၵေႃႉၼိုင်ႈ ၽၢတ်ႇၽႄၵၼ်သေဢေႃႈ။- 12ဢႃႇပြမ်ႇယူႇၵႃႈၼႂ်းမိူင်းၶႃႇၼၢၼ်ႇၼၼ်ႉယူႇဢေႃႈ။ လေႃးတႃႉၸမ်ႉ၊ ယူႇၵႃႈၼႂ်းဝဵင်းဢၼ်မီးၵႃႈၼႂ်းပၢင်ႇပဵင်းၸိူဝ်းၼၼ်ႉလႄႈ မုင်းမူဝ်းၵႃႇမၼ်းၶၢႆႉၸူးၵႃႈတီႈႁိမ်းဝဵင်းသေႃးတုမ်ႇဢေႃႈ။- 13ၵူၼ်းဝဵင်းသေႃးတုမ်ႇၸိူဝ်းၼၼ်ႉ ပဵၼ်ၵေႃႉဢၼ်ႁၢႆႉမိူၵ်ႈ၊ ၵေႃႉဢၼ်ဢပႅတ်ႈၼမ်ၼႃႇလူင်လၢင် ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။
14လိုၼ်းသေလေႃးတႃႉၽၢတ်ႇၵၼ်တင်းဢႃႇပြမ်ႇသေလႄႈၵႂႃႇယဝ်ႉၼၼ်ႉ၊ ထႃႇဝရႃႉၽြႃးလၢတ်ႈတီႈဢႃႇပြမ်ႇလႄႈဝႃႈ၊ ယူႇၵႃႈတီႈဢၼ်မႂ်းမီးယူႇၼႆႉသေလႄႈ မုင်ႈတူၺ်းၽၢႆႇတၢင်းတူၵ်း၊ ၽၢႆႇတၢင်းဢွၵ်ႇ၊ ၽၢႆႇတၢင်းႁွင်ႇ၊ ၽၢႆႇတၢင်းၸၢၼ်းတႃႉ။- 15လိၼ်ဢၼ်မႂ်းႁၼ်တင်းသဵင်ႈတင်းလူင်ၼၼ်ႉၸိုင် ၵဝ်တၵ်းပၼ်တီႈမႂ်း ဢိၵ်ႇတင်းၸိူဝ်ႉၶိူဝ်းမႂ်းသေႇသေႇဢေႃႈ။- 16ၸိူဝ်ႉၶိူဝ်းမႂ်းၵေႃႈ ၵဝ်တၵ်းႁႂ်ႈယႂ်ႇၽႄႈၼမ်ၵိုၼ်းမႃး မိူၼ်ၸိူဝ်ႉၼင်ႇမုၼ်ႈလိၼ်ဢေႃႈ။ ပိူဝ်ႈၼႆလႄႈ ပေႃးၵူၼ်းၼပ်ႉဢၢၼ်ႇမုၼ်ႈလိၼ်လႆႈၸိုင်၊ တၵ်းၼပ်ႉဢၢၼ်ႇၸိူဝ်ႉၶိူဝ်းမႂ်းလႆႈဢေႃႈ။- 17မႂ်းလုၵ်ႉသေလႄႈ လႄႇၵႂႃႇလဵပ်ႈၵႂႃႇၸွမ်းၼႃႈယၢဝ်း ဢိၵ်ႇတင်းၼႃႈပွတ်းလိၼ်ၼႆႉတႃႉ။ ၵဝ်တၵ်းပၼ်တီႈမႂ်းဢေႃႈ၊ ဝႃႈၼင်ႇၼႆဢေႃႈ။- 18ၵမ်းၼၼ်ႉ ဢႃႇပြမ်ႇၶၢႆႉမူဝ်းၵႃႇမၼ်းလႄႈ ႁွတ်ႈထိုင်ၵႃႈတီႈပႃႇတူၼ်ႈမႆႉၼိမ်မမ်ႇရေႇ ဢၼ်မီးၵႃႈတီႈဝဵင်းႁေႇပြုၼ်ႇၼၼ်ႉသေယဝ်ႉ၊ ၶျႃးတီႈယူႇလႄႈ ႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃးၵႃႈတီႈၼၼ်ႈဢေႃႈ။
বর্তমানে নির্বাচিত:
ငဝ်ႈၵမ်ႇၽႃႇ 13: CBMS
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
