ငဝ်ႈၵမ်ႇၽႃႇ 12
12
ၽြႃးပဵၼ်ၸဝ်ႈႁွင်ႉဢဝ်ဢႃႇပြမ်ႇ
1ထႃႇဝရႃႉၽြႃးၵေႃႈလၢတ်ႈတီႈဢႃႇပြမ်ႇလႄႈဝႃႈ၊ ဢွၵ်ႇသေၵႃႈၼႂ်းမိူင်းမႂ်းဢိၵ်ႇတင်းႁိူၼ်းပေႃႈမႂ်းတင်းၸိူဝ်ႉၶိူဝ်းမႂ်းလႄႈၵႂႃႇၵႃႈတီႈမိူင်းဢၼ်ၵဝ်တၵ်းၼႄပၼ်တီႈမႂ်းၼၼ်ႉတႃႉ။- 2ၵဝ်တၵ်းႁႂ်ႈမႂ်းပဵၼ်မဵဝ်းၵူၼ်းဢၼ်ယႂ်ႇၼႃႇဢေႃႈ။ ၵဝ်တၵ်းပၼ်တၢင်းလီတီႈမႂ်းလႄႈ ႁႂ်ႈၼႃႇမႃႉၸိုဝ်ႈသဵင်မႂ်းယႂ်ႇမျၢတ်ႈၼႃႇဢေႃႈ။ မႂ်းတၵ်းပဵၼ်ၵေႃႉဢၼ်လႆႈပၼ်တၢင်းလီဢေႃႈ။- 3ၵဝ်တၵ်းပၼ်တၢင်းလီတီႈၵေႃႉဢၼ်ပၼ်တၢင်းလီတီႈမႂ်းၼၼ်ႉဢေႃႈ။ ၵဝ်တၵ်းၵိၼ်ႇဝႃႈၵေႃႉဢၼ်ၵိၼ်ႇဝႃႈမႂ်းၼၼ်ႉဢေႃႈ။ ၵူၼ်းမဵဝ်းတင်းသဵင်ႈတင်းလူင်ၵႃႈၼိူဝ်လိၼ်မိူင်းၼႆႉတၵ်းလႆႈၶၢမ်ႇတၢင်းလီမင်ႇၵလႃႇၵႃႈၼႂ်းမႂ်းဢေႃႈ၊ ဝႃႈၼင်ႇၼႆဢေႃႈ။- 4ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉ၊ ဢႃႇပြမ်ႇဢွၵ်ႇၵႂႃႇလႄႈ လေႃးတႃႉၵေႃႈၸွမ်းဢေႃႈ။ မိူဝ်ႈဢၼ်ဢွၵ်ႇသေၵႃႈၼႂ်း ဝဵင်းၶႃႇရၢၼ်ႇၵႂႃႇၼၼ်ႉ၊ ဢႃႇပြမ်ႇဢသၢၵ်ႈလႆႈၸဵတ်းသိပ်းပၢႆႁႃႈပီႊဢေႃႈ။- 5ဢႃႇပြမ်ႇဢဝ်မေးမၼ်းၸႃႇရေးဢိၵ်ႇတင်းလေႃးတႃႉလုၵ်ႈၸၢႆးပီႈဢၢႆႈမၼ်း တင်းဢုၵ်ႉၸႃႇၶူဝ်းလဵင်းၵႃႈဢၼ်ၶဝ်မီး တင်းၵူၼ်းဢၼ်ၶဝ်လႆႈၵႃႈၼႂ်းဝဵင်းၶႃႇရၢၼ်ႇၸိူဝ်းၼၼ်ႉသေယဝ်ႉ၊ ဢွၵ်ႇၵႂႃႇႁႂ်ႈလႆႈႁွတ်ႈထိုင်ၵႃႈတီႈမိူင်းၶႃႇၼၢၼ်ႇလႄႈ ႁွတ်ႈထိုင်ၵႃႈတီႈမိူင်းၼၼ်ႉဢေႃႈ။
6 ဢႃႇပြမ်ႇပႆလတ်းၵႃႈၼႂ်းမိူင်းၼၼ်ႉၵႂႃႇလႄႈ ႁွတ်ႈထိုင်ၵႃႈတီႈသီႉၶိမ်ႇ၊ တီႈတူၼ်ႈမႆႉၼိမ်မေႃႇရေးဢေႃႈ။ မိူဝ်ႈၼၼ်ႉ ၵူၼ်း ၶႃႇၼၢၼ်ႇတင်းလၢႆ မီးယူႇၵႃႈၼႂ်းမိူင်းၼၼ်ႉဢေႃႈ။- 7ထႃႇဝရႃႉၽြႃးပေႃႇမႃးတီႈဢႃႇပြမ်ႇလႄႈလၢတ်ႈဝႃႈ၊ ၵဝ်တၵ်းဢဝ်မိူင်းၼႆႉပၼ်တီႈၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆဢေႃႈ။ ၼႂ်းတီႈၼၼ်ႈ မၼ်းႁဵတ်းယိတ်ႈပလၢင်ႇ ပုၼ်ႈထႃႇဝရႃႉၽြႃး ဢၼ်ပေႃႇမႃးတီႈမၼ်းၼၼ်ႉဢေႃႈ။
8မၼ်းသမ်ႉဢွၵ်ႇသေၵႃႈၼႂ်းတီႈၼၼ်ႈ ၶၢႆႉၵႂႃႇၵႃႈတီႈလွႆဢၼ်မီးၽၢႆႇတၢင်းဝၼ်းဢွၵ်ႇဝဵင်းပေႇသလႃႉၼၼ်ႉလႄႈ ဝဵင်းပေႇသလႃႉ မီးတၢင်းဝၼ်းတူၵ်း၊ ဝဵင်းဢႃႇဢီႉမီးတၢင်းဝၼ်းဢွၵ်ႇလႄႈ မၼ်းမုင်းမူဝ်းၵႃႇ ၵႃႈတီႈၼၼ်ႈသေလႄႈ ႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃးသေယဝ်ႉ၊ ႁဵတ်းပထၼႃႇတီႈၼႃႇမႃႉၸိုဝ်ႈသဵင်ထႃႇဝရႃႉၽြႃးဢေႃႈ။- 9ဢႃႇပြမ်ႇၵွႆႈၶၢႆႉၵွႆႈၶၢႆႉတီႈယူႇမၼ်းၵႂႃႇၸူးၵႃႈတီႈပွတ်းတၢင်းၸၢၼ်းသေဢေႃႈ။
ဢႃႇပြမ်ႇႁွတ်ႈၵႂႃႇမိူင်းဢေႇၵိပ်ႉတူႉ
10ဝၢႆးၼၼ်ႉ၊ ၵႃႈၼႂ်းမိူင်းၶႃႇၼၢၼ်ႇၼၼ်ႉ ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းဢေႃႈ။ ၵွပ်ႈပိူဝ်ႈဢၼ်ၶဝ်ႈၵႃႈမၢၵ်ႇပႅင်းၼႃႇလူင်လၢင်ၼၼ်ႉလႄႈ၊ ဢႃႇပြမ်ႇသမ်ႉလူင်းၵႂႃႇၵႃႈတီႈမိူင်းဢေႇၵိပ်ႉတူႉ ႁႂ်ႈလႆႈသွၼ်ႈပိုင်ႈၵႃႈတီႈၼၼ်ႈထႅင်ႈဢေႃႈ။- 11မိူဝ်ႈဢၼ်ႁွတ်ႈထိုင်ၵႃႈတီႈဢၼ် ၸမ်တၵ်းၶဝ်ႈၵႃႈၼႂ်းမိူင်းဢေႇၵိပ်ႉတူႉၼၼ်ႉၸိုင်၊ မၼ်းလၢတ်ႈတီႈမေးမၼ်းၸႃႇရေးလႄႈဝႃႈ၊ တူၺ်းလူး၊ ၵဝ်ႁူႉလွင်ႈဢၼ်မႂ်းပဵၼ်ၽူႈယိင်းဢၼ်ႁၢင်ႈလီၽၢင်လီဢေႃႈ။- 12မိူဝ်ႈဢၼ်ၵူၼ်းဢေႇၵိပ်ႉတူႉတင်းလၢႆႁၼ်မႂ်းၸိုင်၊ ၶဝ်တၵ်းဝႃႈ၊ ၽူႈယိင်းၼႆႉပဵၼ်မေးမၼ်းၼၼ်ႉဢေႃႈ၊ ဝႃႈၼင်ႇၼႆသေလႄႈ၊ တၵ်းဢဝ်ၵဝ်တၢႆလႄႈ ပၼ်ဢသၢၵ်ႈမႂ်းၵူၺ်း ၵတ်းယဵၼ်ၶျၢမ်းသႃႇဢေႃႈ။- 13ပိူဝ်ႈၼႆလႄႈ မႂ်းလၢတ်ႈလႄႈဝႃႈ၊ ပဵၼ်ၼွင်ႉယိင်းၵဝ်၊ ဝႃႈၼင်ႇၼႆတႃႉ။ ပေႃးလၢတ်ႈၸိူဝ်ႉၼင်ႇၼၼ်ၸိုင်၊ ၵဝ်တၵ်းလႆႈယူႇ လီလီငၢမ်းငၢမ်းၵွပ်ႈပိူဝ်ႈမႂ်းဢေႃႈ။ ၵဝ်တၵ်းလႆႈဢသၢၵ်ႈၵတ်းယဵၼ်ၶျၢမ်းသႃႇၵွပ်ႈပိူဝ်ႈၵျေးၸူးမႂ်းဢေႃႈ၊ ဝႃႈၼင်ႇၼႆဢေႃႈ။
14မိူဝ်ႈဢၼ်ဢႃႇပြမ်ႇ ႁွတ်ႈထိုင်ၵႃႈတီႈမိူင်းဢေႇၵိပ်ႉတူႉၼၼ်ႉၸိုင်၊ ၵူၼ်းဢေႇၵိပ်ႉတူႉတင်းလၢႆ ႁၼ်လွင်ႈဢၼ် မေးမၼ်းႁၢင်ႈလီၽၢင်လီၼႃႇလူင်လၢင်ၼၼ်ႉဢေႃႈ။- 15မူးမၢတ်ႈၽွင်းမိူင်းၶုၼ်ႁေႃၶမ်းၽႃႇရေႃးတင်းလၢႆၵေႃႈ ႁၼ်မၼ်းလႄႈ ယွင်ႈယေႃးမၼ်းၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးသေယဝ်ႉ၊ မၼ်းလႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈၼႂ်းႁေႃဢေႃႈ။- 16ၶုၼ်ႁေႃၶမ်းၽႃႇရေႃးႁဵတ်းၵျေးၸူး တီႈဢႃႇပြမ်ႇ ၵွပ်ႈပိူဝ်ႈၽူႈယိင်းၼၼ်ႉလႄႈ၊ မၼ်းမီးသူဝ်းလႂ်၊ ဝူဝ်းလႂ်၊ လီႈတူဝ်ပေႃႈလႂ်၊ လီႈတူဝ်မႄႈလႂ်၊ ၶႃႈၵူၼ်းၸၢႆးလႂ်၊ ၶႃႈၵူၼ်းယိင်းလႂ် တင်းၵလႃးဢုၵ်ႉလႂ်ဢေႃႈ။- 17ၵွပ်ႈပိူဝ်ႈၸႃႇရေး မေးဢႃႇပြမ်ႇၼၼ်ႉလႄႈ၊ ထႃႇဝရႃႉၽြႃးဢဝ်ၽေးတၢမ်ႇဢၼ်ယႂ်ႇၼႃႇသင်ႇသွၼ် ၸႃႉၸဵမ်ၶုၼ်ႁေႃၶမ်းၽႃႇရေႃး ဢိၵ်ႇတင်းၵူၼ်းၵႃႈဢၼ်မီးၵႃႈၼႂ်းႁေႃမၼ်းၸဝ်ႈၼၼ်ႉဢေႃႈ။- 18ၶုၼ်ႁေႃၶမ်းၽႃႇရေႃးၵေႃႈႁွင်ႉဢဝ်ဢႃႇပြမ်ႇလႄႈဝႃႈ၊ လွင်ႈတၢင်းဢၼ်မႂ်းႁဵတ်းတီႈၵဝ်ၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။ ႁဵတ်းႁိုဝ်လႄႈမႂ်းဢမ်ႇလၢတ်ႈလွင်ႈဢၼ် မၼ်းပဵၼ်မေးမႂ်းၼၼ်ႉတီႈၵဝ်ၼင်ႇႁိုဝ်။- 19ႁဵတ်းသင်လႄႈမႂ်းဝႃႈ၊ မၼ်းပဵၼ်ၼွင်ႉယိင်းၵဝ်ဢေႃႈ၊ ဝႃႈၼင်ႇၼႆႁႂ်ႈၵဝ်လႆႈသိမ်းဢဝ်ၼင်ႇႁိုဝ်။ တေႃႈလဵဝ်ၼႆႉဢဝ်မေးမႂ်းသေလႄႈၵႂႃႇတႃႉ၊ ဝႃႈၼင်ႇၼႆဢေႃႈ။- 20ၼင်ႇၼၼ်လႄႈၶုၼ်ႁေႃၶမ်းၽႃႇရေႃး ၸီႇယၢင်ႇလွင်ႈမၼ်းတီႈၵူၼ်းမၼ်းၸဝ်ႈတင်းလၢႆသေလႄႈ ၶဝ်ၼၼ်ႉဢွၼ်ၵၼ်ဢဝ် ၸႃႉၸဵမ်မၼ်းဢိၵ်ႇတင်းမေးမၼ်းလႄႈ ဢုၵ်ႉၸႃႇၶူဝ်းလဵင်းၵႃႈဢၼ်မီးတီႈမၼ်းၼၼ်ႉ ပွႆႇၵႂႃႇသေဢေႃႈ။
বর্তমানে নির্বাচিত:
ငဝ်ႈၵမ်ႇၽႃႇ 12: CBMS
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
