ငဝ်ႈၵမ်ႇၽႃႇ 14
14
ဢႃႇပြမ်ႇၵႄႇသႄႇလေႃးတႃႉ
1မိူဝ်ႈၼၼ်ႉၶုၼ်လူင်ဢမ်ရေႇၽႄးလႃႉ မိူင်းသီႉၼႃႉ၊ ၶုၼ်လူင်ဢႃႇရုတ်ႉ မိူင်းဢေႇလႃႉသႃႇ၊ ၶုၼ်လူင်ၶေးတေႃးရလေႃးမႃႉ မိူင်းဢေႇလမ်ႇ၊ ၶုၼ်လူင်တီႉတလႃႉ မိူင်းၵေႃးဢိမ်ႇၸိူဝ်းၼၼ်ႉ၊- 2တိုၵ်းၵၼ်တင်းၶုၼ်လူင်ပႄႇရႃႉ မိူင်းသေႃးတုမ်ႇ၊ ၶုၼ်လူင်ၽီႉရသႃႉ မိူင်းၵေႃးမေႃးရႃႉ၊ ၶုၼ်လူင်သီႉၼပ်ႉ မိူင်းဢႃႇတမႃႇ၊ ၶုၼ်လူင်သေႇမပႃး မိူင်းၸေႇၽူဝ်းဢိမ်း၊ ၶုၼ်လူင်ပေႇလႃႇၸိူဝ်းၼၼ်ႉဢေႃႈ။ မိူင်းပေႇလႃႇၸမ်ႉ၊ ပဵၼ်မိူင်းၸေႃးရႃႉဢေႃႈ။- 3ၶဝ်တင်းသဵင်ႈတင်းလူင်ၸိူဝ်းၼၼ်ႉ ၽွမ်ႉၵၼ်လႄႈၸူႉၵၼ်တုမ်ၵၼ်ၵႃႈၼႂ်းပၢင်ႇပဵင်းၸိတ်ႉတိမ်ႇဢၼ်ပဵၼ်ၼမ်ႉၼွင်သေႃးတုမ်ႇဢေႃႈ။- 4ၶဝ်ၶၢမ်ႇႁဵတ်းၶႃႈႁဵတ်းၵူၼ်းတီႈၶုၼ်လူင်ၶေးတေႃးရလေႃးမႃႉသိပ်းသွင်ပီႊတဵမ်တဵမ်သေယဝ်ႉ၊ ၼႂ်းပီႊဢၼ်ထူၼ်ႈထိုင်သိပ်းသၢမ်ပီႊၼၼ်ႉၶဝ်ပုင်ႇၵၢၼ်ႇဢေႃႈ။- 5ၼႂ်းပီႊဢၼ်ထူၼ်ႈထိုင်သိပ်းသီႇပီႊၼၼ်ႉ၊ ၶုၼ်လူင်ၶေးတေႃးရလေႃးမႃႉဢိၵ်ႇတင်းၶုၼ်လူင်ဢၼ်ယူႇၽၢႆႇမၼ်းၸိူဝ်းၼၼ်ႉဢွၼ်ၵၼ်မႃးလႄႈတိုၵ်းတေႃးယႃႉပႅတ်ႈၵူၼ်းရေႇၽဵမ်ႇဢၼ်မီးယူႇၵႃႈၼႂ်းဝဵင်းဢႃသတရုတ်ႉၵႃၼိမ်ႇလႂ်၊ ၵူၼ်းၸူးၸိမ်ႇဢၼ်မီးယူႇ ၵႃႈၼႂ်းဝဵင်းႁႃႇမႃႉလႂ်၊ ၵူၼ်းဢေႇမိမ်ႇဢၼ်မီးယူႇၵႃႈၼႂ်းပၢင်ႇပဵင်းၵီႉရီႉယသိမ်းလႂ်၊- 6ၵူၼ်းႁေႃးရီႉဢၼ်မီးယူႇၵႃႈၼိူဝ်လွႆၸီႉရႃႉလႂ်ၸိူဝ်းၼၼ်ႉလႄႈလိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်းဢေးလႃပႃရၼ်ႇ ဢၼ်မီးၵႃႈတီႈႁိမ်းထိူၼ်ႇၼၼ်ႉဢေႃႈ။- 7ၵမ်းၼၼ်ႉ ၶဝ်သမ်ႉၶိုၼ်းမႃးလႄႈ ႁွတ်ႈထိုင်ၵႃႈတီႈဝဵင်းဢိၼ်ႇမီႉသပတ်ႉဢၼ်ပဵၼ်ဝဵင်းၵႃႇတေႇသႃႉ သေယဝ်ႉ၊ တိုၵ်းတေႃးယႃႉပႅတ်ႈမိူင်းဢႃႇမလႅၵ်ႉၵႃႈမီးတင်းသဵင်ႈတင်းလူင်ဢိၵ်ႇတင်း ၵူၼ်းဢႃႇမေႃးရီႉ ဢၼ်ယူႇၵႃႈၼႂ်းဝဵင်းႁႃႇၸၸုၼ်ႇတႃႇမႃႇၸိူဝ်းၼၼ်ႉဢေႃႈ။- 8မိူဝ်ႈၼၼ်ႉၶုၼ်လူင် မိူင်းသေႃးတုမ်ႇ၊ ၶုၼ်လူင်မိူင်းၵေႃးမေႃးရႃႉ၊ ၶုၼ်လူင်မိူင်းဢႃႇတမႃႇ၊ ၶုၼ်လူင်မိူင်းၸေႇၽူဝ်းဢိမ်း၊ ၶုၼ်လူင်မိူင်းပေႇလႃႇဢၼ်ဝႃႈ မိူင်းၸေႃးရႃႉၼၼ်ႉၸိူဝ်းၼၼ်ႉ ဢွၼ်ၵၼ်ဢွၵ်ႇမႃးလႄႈၶဵင်ႇတိုၵ်းၵၼ် ၵႃႈၼႂ်းပၢင်ႇပဵင်းၸိတ်ႉတိမ်ႇၼၼ်ႉဢေႃႈ။- 9ၼင်ႇၼၼ်လႄႈၶုၼ်လူင်ၶေးတေႃးရလေႃးမႃႉ မိူင်းဢေႇလမ်ႇ၊ ၶုၼ်လူင်တီႉတလႃႉ မိူင်းၵေႃးဢိမ်ႇ၊ ၶုၼ်လူင်ဢမ်ရေႇၽႄးလႃႉ မိူင်းသီႉၼႃႉ၊ ၶုၼ်လူင် ဢႃႇရုတ်ႉ မိူင်းဢေႇလႃႉသႃႇ၊ ဢၼ်ဝႃႈၶုၼ်လူင်သီႇပႃးၼၼ်ႉ ၶဵင်ႇတိုၵ်းၵၼ်တင်းၶုၼ်လူင်ႁႃႈပႃးၼၼ်ႉဢေႃႈ။- 10ၵႃႈတီႈပၢင်ႇပဵင်းၸိတ်ႉတိမ်ႇၼၼ်ႉ၊ မီးလုၵ်းမီးၶုမ်ၼမ်ၼႃႇဢၼ်တဵမ်ဝႆႉတင်းၵႆးတဝ်း ဢၼ်ပဵၼ်ၵႃႉပဵၼ်ယၢင်မဵဝ်းၼိုင်ႈဢေႃႈ။ ၶုၼ်လူင်မိူင်းသေႃးတုမ်ႇတင်းၶုၼ်လူင်မိူင်းၵေႃးမေႃးရႃႉပၢႆႈလႄႈ တူၵ်းသႂ်ႇၵႃႈၼႂ်းလုၵ်းၼႂ်းၶုမ်ၸိူဝ်းၼၼ်ႉဢေႃႈ။ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၸိုင်ပၢႆႈၸူးၵႃႈတီႈလွႆဢေႃႈ။- 11ၶုၼ်ဢၼ်ပႄႉၼႅင်ႇၸိူဝ်းၼၼ်ႉ ဢွၼ်ၵၼ်ဢဝ်တၢင်းၵိၼ်တၢင်းၶူပ်း ဢုၵ်ႉၸႃႇၶူဝ်းလဵင်းဢၼ်မီးၵႃႈၼႂ်းဝဵင်းသေႃးတုမ်ႇ တင်းဝဵင်းၵေႃးမေႃးရႃႉၵႃႈမီးတင်းသဵင်ႈတင်းလူင်သေလႄႈၵႂႃႇဢေႃႈ။- 12လေႃးတႃႉဢၼ်ပဵၼ်လုၵ်ႈပီႈဢၢႆႈဢႃႇပြမ်ႇဢၼ်ယူႇၵႃႈၼႂ်းဝဵင်းသေႃးတုမ်ႇၼၼ်ႉၵေႃႈ ၶဝ်သိမ်းဢဝ်ၵႂႃႇ ဢိၵ်ႇလူၺ်ႈၵၼ်တင်း ဢုၵ်ႉၸႃႇၶူဝ်းလဵင်းမၼ်းဢေႃႈ။
13ၵူၼ်းဢၼ်လွတ်ႈသေၽေးၼၼ်ႉလႄႈပၢႆႈၵေႃႉၼိုင်ႈမႃးၸူးၵႃႈတီႈဢႃႇပြမ်ႇၵူၼ်းႁေႇပြႄးဢၼ်ယူႇၵႃႈၼႂ်းပႃႇတူၼ်ႈမႆႉၼိမ်မမ်ႇရေႇဢၼ်ပဵၼ်ၵူၼ်းဢႃႇမေႃးရီႉလႄႈ ပဵၼ်ပီႈဢၢႆႈဢေႇသၵေႃးလႃႉတင်းဢႃႇၼေႇရႃႉ ဢၼ်ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်း ဢႃႇပြမ်ႇၼၼ်ႉသေလႄႈ မွၵ်ႇလၢတ်ႈသတၢင်းသဵင်ၶၢဝ်ႇဢေႃႈ။- 14ဢႃႇပြမ်ႇလႆႈငိၼ်းလွင်ႈဢၼ်တီႉဢဝ်ၼွင်ႉၸၢႆးမၼ်းၵႂႃႇၼၼ်ႉသေယဝ်ႉ၊ ဢဝ်ၵူၼ်းသၢမ်ပၢၵ်ႇပၢႆသိပ်းပႅတ်ႇဢၼ် ၵိူတ်ႇလဵင်ႉမႃးၵႃႈၼႂ်းႁိူၼ်းမၼ်းယေးမၼ်းလႄႈ လႆႈသင်ႇလႆႈသွၼ်ယဝ်ႉၸိူဝ်းၼၼ်ႉ လိုပ်ႈၸွမ်းလမ်းၸွမ်းၵႂႃႇတေႃႇထိုင်ႁွတ်ႈဝဵင်းတၢၼ်ႇဢေႃႈ။- 15ၶိင်ႇၵၢင်ၶိုၼ်းမၼ်းၽႄၶႂၢႆးၵူၼ်းမၼ်းၸိူဝ်းၼၼ်ႉလႄႈ တိုၵ်းတေႃးယႃႉပႅတ်ႈၶဝ်သေယဝ်ႉ၊ သမ်ႉလိုပ်ႈၸွမ်းလမ်းၸွမ်းၶဝ်ၵႂႃႇတေႃႇထိုင်ႁွတ်ႈဝဵင်း ႁေႃၽႃႉဢၼ်မီး ၵႃႈတီႈၽၢႆႇတၢင်းသၢႆႉဝဵင်းထမ်ႇမသႅတ်ႉၼၼ်ႉဢေႃႈ။- 16မၼ်းသမ်ႉၶိုၼ်းဢဝ်ဢုၵ်ႉၸႃႇၶူဝ်းလဵင်းဢၼ်ၶဝ်သိမ်းဢဝ်ၵႂႃႇၵႃႈမီးတင်းသဵင်ႈတင်းလူင် ဢိၵ်ႇတင်းၼွင်ႉၸၢႆးမၼ်းလေႃးတႃႉ တင်းဢုၵ်ႉၸႃႇၶူဝ်းလဵင်းမၼ်း တင်းၵူၼ်းယိင်း တင်းၵူၼ်းၸၢႆးၼမ်ၼႃႇမႃးဢေႃႈ။
မေႇလၶီႉၸေႇတႅၵ်ႈပၼ်တၢင်းလီတီႈဢႃႇပြမ်ႇ
17မိူဝ်ႈဢၼ် ဢႃႇပြမ်ႇလုၵ်ႉသေၵႃႈတီႈဢၼ်တိုၵ်းတေႃးယႃႉပႅတ်ႈၶုၼ်လူင်ၶေးတေႃးရလေႃးမႃႉဢိၵ်ႇတင်းၶုၼ်လူင်တင်းလၢႆဢၼ်ယူႇၽၢႆႇမၼ်းၸိူဝ်းၼၼ်ႉသေလႄႈမႃးၼၼ်ႉၸိုင်၊ ၶုၼ်လူင်မိူင်းသေႃးတုမ်ႇဢွၵ်ႇၸူးၵႃႈတီႈပၢင်ႇႁူၺ်ႈသႃႇဝေႇဢၼ်ပဵၼ်ပၢင်ႇႁူၺ်ႈၶုၼ်လူင်ၼၼ်ႉ ႁႂ်ႈလႆႈႁပ်ႉႁူဝ်တၢင်းမၼ်းဢေႃႈ။- 18ၶုၼ်လူင်မေႇလၶီႉၸေႇတႅၵ်ႈမိူင်းသႃႇလိမ်း ဢၼ်ပဵၼ်ယိတ်ႈပရေႃးႁဵၵ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉၵေႃႈ၊ ပႃးဢဝ်ၶဝ်ႈမုၼ်းတင်းၼမ်ႉၸပိတ်ႈမႃးသေယဝ်ႉ၊- 19ပၼ်တၢင်းလီတီႈ ဢႃႇပြမ်ႇလႄႈဝႃႈ ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈ၊ ၸဝ်ႈၵၢင်ႁၢဝ်တင်းလိၼ်မိူင်းၼၼ်ႉပၼ်တၢင်းလီတီႈဢႃႇပြမ်ႇသေၵမ်းလူၺ်ႈ။- 20ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈ၊ ဢၼ်ဢဝ်ရၢၼ်ႇသူႇမႂ်းဢၢပ်ႈပၼ်ၵႃႈၼႂ်းမိုဝ်းမႂ်းၼၼ်ႉမီးမင်ႇၵလႃႇသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။ ဢႃႇပြမ်ႇၵေႃႈဢဝ်ၼႂ်းဢုၵ်ႉၸႃႇၶူဝ်းလဵင်း ၵႃႈမီးတင်းသဵင်ႈတင်းလူင် သိပ်းပုၼ်ႈပုၼ်ႈၼိုင်ႈ လူႇတီႈ ၶုၼ်ၼၼ်ႉဢေႃႈ။- 21ၶုၼ်လူင်မိူင်းသေႃးတုမ်ႇၵေႃႈ၊ လၢတ်ႈတီႈဢႃႇပြမ်ႇလႄႈဝႃႈ၊ ၶိုၼ်းပၼ်ၵူၼ်းၵဝ်ၸိူဝ်းၼၼ်ႉတီႈၵဝ်သေၵမ်း။ ဢုၵ်ႉၸႃႇၶူဝ်းလဵင်းၸမ်ႉ တူဝ်ၸဝ်ႈၵဝ်ႇဢဝ်သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 22ဢႃႇပြမ်ႇၵေႃႈလၢတ်ႈတီႈၶုၼ်လူင်မိူင်းသေႃးတုမ်ႇၼၼ်ႉလႄႈဝႃႈ၊- 23ၼင်ႇႁိုဝ်တၵ်းဢမ်ႇလႆႈမီးတီႈလၢတ်ႈလႄႈဝႃႈ၊ ၶုၼ်လူင်ႁႂ်ႈဢႃႇပြမ်ႇ မၢၵ်ႈမီးယဝ်ႉ၊ ဝႃႈၼင်ႇၼႆၸိုင်၊ လိူဝ်သေလွင်ႈတၢင်းဢၼ် ၵူၼ်းၼုမ်ႇၵူၼ်းၵမ်တင်းလၢႆ ၵိၼ်ယဝ်ႉဢိၵ်ႇတင်းဢၼ်ပဵၼ်ပုၼ်ႈပဵၼ်တႃႇ ၶဝ်ၸိူဝ်းဢၼ်ၸွမ်းလူၺ်ႈၵၼ်တင်းၵဝ်ၼၼ်ႉၵူၺ်း၊ ဢုၵ်ႉၸႃႇၶူဝ်းလဵင်းၶုၼ်လူင် မႆသဵၼ်ႈၼိုင်ႈသေဢမ်ႇဝႃႈ၊ သၢႆၶႅပ်းတိၼ်သဵၼ်ႈၼိုင်ႈသေဢမ်ႇဝႃႈ၊ ၵဝ်ၶႃႈဢမ်ႇဢဝ်သေၸိူဝ်ႉသေပိူင်ဝႃႈၼႆ၊ ၵဝ်ၶႃႈ ယုၵ်ႉမိုဝ်းၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈ၊ ၸဝ်ႈၵၢင်ႁၢဝ်တင်းလိၼ်မိူင်းၼၼ်ႉလႄႈ ႁဵတ်းတိၵ်ႈထၢၼ်ႇယဝ်ႉ။- 24ႁႂ်ႈဢႃႇၼေႇရႃႉ၊ ဢေႇသၵေႃးလႃႉ၊ မမ်ႇရေႇၸိူဝ်းၼၼ်ႉ လႆႈဢဝ်ပုၼ်ႈဢဝ်တႃႇၶဝ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။
বর্তমানে নির্বাচিত:
ငဝ်ႈၵမ်ႇၽႃႇ 14: CBMS
হাইলাইট
শেয়ার
কপি
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
