Joanes 11

1Is emehe natimi is ethi, nidan Lasarus, Bedane, inuarin-pece o Mere im Marda etoan. 2(Is atamaig irai Mere iyehki a Lasarus natimi emehe, is aspi neduei Natimarid aien an nitai aspi, um yiri mese irai umri idjinin.) 3Erus abraig pan tah ehelen ahwat atahaig iran, um ika, Ak Natimarid, et emehe aien et aiyu inliinmopom aiek vai yin. 4Is wat atahaijeg intas ineig a Iesu, is ika aien, Inyi ti mas aien va nemehe ineig, ja et eteuc mika uhpu ecetai natimi alupas o Atua, im lep natimi alupas o Inhal o Atua vaig. 5Is aiheuc vai Marda a Iesu, im etoan, im Lasarus. 6Is wat atahaijeg aien, nikavaig, is emehe aien, is amen aien an nadiat is ero an nuarin iyehki is amen iran aien. 7Ja par apitac um ika ehele ilpu atimi atahaijeg yin, Intumu lep apan Jutaia akaija. 8Eris um ika ehelen a ilpu atimi atahaijeg yin, Ak Natimi esege, eris tup pam ahilek euc a nupu Jutaia mika eri asji euc irai hat; na auri aiek par apan eahki? 9Is um ika a Iesu, Et eteuc aur et twelv an nadiat et ethi: el et atga tah natimi an nadiat, et eti epihtau aien, et alum itai aien vai inlah an nobohtan: 10ja el et atga tah natimi an nepeig, et epihtau aien, va neti lahvaig ehelen. 11Is asan tas iji eigki aien: ja par ika ehele ra, Et umjeg a Lasarus etoaija; ja ekpu apan ainyak, um ahugni yin va numjeg o un. 12Eris ika a ilpu atimi atahaijeg yin, Ak Natimarid, el et umjeg aien, etpu umoh aien. 13Ja is tas a Iesu vai inmas o un: ja eris aktaktai ara mika, is tas aien va natumop o un um umjeg. 14Ja is asuptecnaig upene ehele ra a Iesu, um ika, Et idim mas a Lasarus: 15ek imyiacitak ainyak vai caua, va nitai ineigki, nikavaig, kis eti amen ainyak eahki, mika aki imyiisjis ninivaijec aijaua; ja intumu apan ehelen akaija. 16Is um ika a Tomas, tak idan Titimus, ehele ilpu atimi atahaijeg Iesu, ilpu etoan, Intumu apan akaija, mika ti emesmas ehelen.

17Is wat han a Iesu is ato aien, nikavaig, is amen aien an nehpanitai an nadiat is for. 18Is ubutpotet pan Jerusalem nuarin-pece Bedane et idivaig et ero mail: 19eris apan ehele Marda im Mere a nupu Jutaia is ahinag, par ataraces rau vai natamaig ira rau. 20Is wat ato napam o Iesu a Marda, is apan aien um aubillid yin: ja is tup amen a Mere anliin neom. 21Is um ika a Marda ehele Iesu, Ak Natimarid, el is wat amen aiek igcaki, el is eti mas a natamaig irak: 22ja ek ato ainyak, nikavaig, etpu idim alupai euc nitai ineig a Atua an naopan ineig, napu lep ugni Atua vaig aiek. 23Is um ika ehelen a Iesu, Etpu lep nusjai a natamaig iram. 24Is ika ehelen a Marda, Ek ato ainyak, nikavaig, etpu lep nusjai aien an nusjai o atimi an nadiat apitac. 25Is um ika ehelen a Iesu, Ek itai anusjai vaig ainyak, um itai umoh iran: aien et asgeig irak aien, el is mas aien, etpu umoh aien: 26aien et umoh aien um asgeig irak, inyi idim eti mas aien irai iji mesese. Na imyiisjis ninivaijec nitai ineigki aiek, ka o’o? 27Is um ika ehelen aien, Maiya, ak Natimarid: ek imyiisjis ninivaijec ineig ainyak, nikavaig, nai Kristo aiek, Inhal o Atua, eris ika, Etpu ham aien an nobohtan.

28Is asan tas ineigki aien, ja par atga o un, um apan, um echim ahlaig ache vai Mere etoan, um ika, Et mun ham a Natimi esege, um ahlaig vai euc. 29Is wat atahaijeg aien, is auroauro aien, um atidai, um apan ehelen. 30Is eti fi yetpan an nuarin-pece a Iesu, ja is amen aien an nuarin iyehki is uhum pan yin a Marda. 31Eris amen ehele Mere anliin neom a nupu Jutaia, um ataraces yin; eris wat alum yin ara natidaivaig, um auroauro um alau ijo, eris apitac yin ara, um ika, Et apan aien u nehpanitai, mika yi taig eahki. 32Is apan a Mere an nuarin iyehki is amen iran a Iesu, um ecet yin, um atpuse u neduon, um ika ehelen, Ak Natimarid, el is wat amen aiek igcaki, el is eti mas a natamaig irak. 33Is wat almoi intaig o un a Iesu, im lep nehtigtaig o nupu Jutaia iji ehki eris ahced yin ara, is ohocred inliinmopon aien, um ahoacni yin; 34is um ika aien, Akis ati yin eda aijaua? Eris ika ara, Ak Natimarid, apam aiek um almoi. 35Is taig a Iesu. 36Eris um ika a nupu Jutaia, Almoi, is idim aiyu inliinmopon aien vai yin! 37Eris um ika nahaiji ra, Natimi ineigki is asalgei nesganimtai ilpu atimi aupat nesganimtara, is auri aien par eti emda um ahtapanes inmas vai natimi ineigki? 38Is wat yetpan u nehpanitai a Iesu, is lep ohocred inliinmopon aien. Immun nij iyehki, is amen inhat atapanes iran. 39Is um ika a Iesu, Atipagki inhat aijaua. Is ika ehelen a Marda, natahaig irai natimi mas, Ak Natimarid, et idivaig et mun epiv aien: is mas aien is for nadiat iran. 40Is um ika ehelen a Iesu, Ek mun idim asaig ehelum ainyak mika, el et imyiisjis ninivaijec aiek, napu almoi nemda o Atua aiek. 41Eris atipagki inhat ara an nuarin iyehki eris ati natimi mas iran. Is easji pan a Iesu, um ika, Ak Etmak, naaurineig, na mun atahaijeg nyak aiek: 42kis ato ainyak, nikavaig, na atahaijeg nyak aiek irai iji adiat: ja ek mun asaig ainyak va atimi iji eigki era aiji arahed irak, mika eri imyiisjis ninivaijec ara, nikavaig, as abrai nyak aiek. 43Is wat ucce intas o un, is ahlaig ijinies aien, um ika, Ak Lasarus, alau ijo aiek. 44Is um alau ijo a natimi iyehki is mas aien, ja is amen irai ikman im neduon napelumai eris aso yin iran: is lep amen napelumai an nesganimtan. Is um ika ehele ra a Iesu, Ehtihiyi itai iran aijaua, yi pu atga aien. 45Eris wat almoi nitai iji eigki is ago a Iesu, eris asgeig iran a nupu Jutaia iji ehki is ahinag eris apan ehele Mere ara. 46Ja eris atga ura nahaiji ra um apan ehele ilpu Farisi, um asuptecnaig ehele ra nitai iji eigki is ago a Iesu.

47Eris asjapicnaig a ilpu atimi ahlap esjilid im ilpu Farisi, um tas jipe, um ika, Inta ago inhe akaija? et idim ago niji auritai ehka et ahinag a natimi ineigki: 48el ta tup ude yin akaija, erupu asgeig iran natimi asega: erupu ham a nupu Roma, um auahas inpece uja um atimi asega iran. 49Is tas a natimi is ethi ira ra, nidan Keafas, is atimi esjilid an nahlap aien an mesese iyehki, um ika ehele ra, Eka eti ato itai aijaua, 50um eti aktaktai mika et upene vai caija mika yi mas natimi et ethi vai nup uran pece, va eri jim emesmas nup uran pece asega. 51Is eti tup ispun asan tas ineigki aien: ja is atimi esjilid an nahlap aien an mesese iyehki, va nitai ineigki, is upyi asaig aien, um ika, etpu mas a Iesu va atimi an pece iyehki; 52jam eti mas va atimi an pece iyehki ache, jam asjapicnaig ilpu hal o Atua eris terimterim ara eri tup ethi ache. 53Eris atupun ara an naopan iyehki, um tas jipe mika eri atgei yin. 54Va nedo ineigki, is eti lep atga a Iesu an nuhup u nupu Jutaia; ja is ahes eahki aien um apan an pece iyehki ubutpotet u namasacen, an nuarin-pece is ethi nidan Ifreim, is amen aien eahki im ilpu atimi atahaijeg yin.

55Is um ubutpotet u napaska u nupu Jutaia: eris ahes an pece iyehki natimi is ahinag, um apan Jerusalem, mika eri ago adicinadicin ra ara, ja pah caig napaska. 56Eris ahilek Iesu ara, um tas jipe anliin neom ahlap, um ika, Eka ikha aijaua? etpu ham aien u nasjapicnaig, ka o’o? 57Eris tas alep a ilpu atimi ahlap esjilid im ilpu Farisi, um ika, El et ato tah natimi nuarin ineig et amen iran aien, etmu asuptecnaig aien, -- mika eri arop iran ara.

বর্তমানে নির্বাচিত:

Joanes 11: ATY1863

হাইলাইট

কপি