Joanes 12

1Is apan Bedane a Iesu an naopan iyehki um ti pan itac nadiat is siks, ja pah caig napaska, is amen eahki a Lasarus, aien ahki is mas aien, ja is imyinusjai yin aien vai inmas o un. 2Eris ago nitai caig incan ara eahki an jupura; is aheca ura a Marda: is atimi is ethi a Lasarus ira ra eris ateuc ehelen ara um hag. 3Is leh nitai aspi nidincai upene nipin a Mere, is idim esjilid, is apapa pan a paunt is ethi, um aspi neduei Iesu iran, um yiri mese neduon irai umri idjinin: is apaahni nipin nitai aspi iyehki anliin neom asega. 4Is ika a natimi atahaijeg yin is ethi, Jutas nupu Karyot, inhal o Saimona, aien aigki is ika aien etpu aniv yin, 5Er auri par eti ahtai nitai aspi ineigki, um leh tollar et forte im faiv, um alupai ilpu ihki atimi? 6Is eti asan tas ineigki aien va naiheuc vai ilpu ihki atimi o un; ja is atimi ehneg itai aien, is amen ehelen incedpai mune, is apos mune ineig aien eris atohwaig iran. 7Is ika a Iesu, Ude yin aiek: is aminjinaig nitai ineigki aien va natelmoi nyak: 8era amen ehelemia a ilpu ihki atimi irai iji adiat; ja inki ti amen ehelemia ainyak irai iji adiat. 9Eris ato a nupu Jutaia is ahinag, nikavaig, is amen aien eahki: ja eris eti apan ara vai Iesu ache, ja eris apan ara par alum Lasarus, natimi iyehki is imyinusjai yin aien vai inmas o un. 10Eris upyi tas jipe a ilpu atimi ahlap esjilid, um ika eri lep atgei Lasarus; 11va nitai ineigki, nikavaig, eris apan a nupu Jutaia is ahinag, um asgeig irai Iesu vai yin.

12Is wat lahlah an tak apnyin, eris wat atahaijeg natimi is ahinag, eris apan u nasjapicnaig, mika is apan Jerusalem a Iesu, 13eris leucse neri eaig ara, um apan, um aubillid yin, um ahlaig ijinies, um ika, Hosana! Naaurineig vai Natimarid u nupu Isreel, et ham aien an nidai Ihova! 14Is ecetai inhakli nifo a Iesu, um ateuc iran; et idivaig eris aged, um ika, 15“Jim imtitaig, ak inhalav atahaig o Saion: et mun ham a Natimarid unyum, um ateuc an hakli nifo.” 16Eris eti fi ato nitai iji eigki a ilpu atimi atahaijeg yin an naopan iyehki; ja eris wat ehvaig natimi alupas a Iesu, eris imyiehva ara mika eris upyi aged nitai iji eigki vai yin, um lep ago nitai iji eigki iran. 17Eris asuptecnaig a ilpu atimi ahced yin mika is ahlaig vai Lasarus aien an nehpanitai, um imyinusjai yin vai inmas o un: 18va nitai ineigki eris lep aubillid yin atimi, eris idim atahaijeg ara mika is ago nauritai ehka ineigki aien. 19Eris tas jipe a ilpu Farisi, um ika, Eka aktaktai aijaua, ka o’o? et takitai nauritai unyimia; almoi, era apitac yin natimi asega.

20Eris eteuc nahaiji nupu Crisi iji ehki eris apan ara u nasjapicnaig par alaigaheni: 21eris apan ehele Filipus ara, is upu Bedseta aien, an pece Calili, um ugni yin, um ika, Ak natimi alupas, ecra merit aijama nalum Iesu vaig. 22Is apan a Filipus um asuptecnaig ehele Antrius: erus han asuptecnaig ehele Iesu a Antrius im Filipus. 23Is tas ehele rau a Iesu, um ika, Et mun ubutpotet u naopan ineig uhpu ehvaig natimi alupas o Inhal o natimi. 24Et idim inivaijec ineig ek asaig ehelemia ainyak mika, El et eti etjose nohoai hwiit an nobohtan, um muttit, inyi tup asjeuc: ja el et muttit, etpu ohou um ahinag nohoan. 25Aien et imyicoho nohun aien, etpu mas aien; ja aien et eti imyicoho nohun aien an nobohtan ineigki, etpu leh nitai umoh iran ineig aien inyi ti lep ti. 26El et aheca unyak tah natimi, etmu ahced nyak aien; etpu lep amen a naheca unyak an nuarin ineig ek amen iran ainyak: el et aheca unyak tah natimi, etpu imyiahpas yin a Etmak. 27Et ohocred inliinmopok ainyak an naopan ineig; inki asanhe ainyak? ekpu ika ainyak, Ak Etmak, apu imyiatamaig nyak aiek va naopan ineig, ka o’o? ja ek mun yetpam ainyak an naopan ineig va nitai ineigki. 28Ak Etmak, namu ika aiek eri imyiahpas nidam.

Is ahes an nohatag nohran tah, um ika, Ek mun imyiahpas ainyak, ekpu lep imyiahpas ainyak. 29Eris wat atahaijeg a ilpu atimi aiji ubutpotet, eris ika ara, Inmunuka ineigki: eris ika nahaiji ra, Is tas ehelen a nagelo. 30Is tas a Iesu, um ika, Et eti ehcohos nohran ineigki vai nyak, ja vai caua: 31uhpu aru nedo has an nobohtan an naopan ineig: uhpu lep atipagki natimarid an nobohtan ineigki: 32eh wit atijai nyak ijinies an nobohtan, ekpu aihiaig pam atimi asega ehelek ainyak. 33Is asan tas ineigki aien par asuptecnaig nedo vai inmas o un. 34Eris um ika ehelen atimi, Ecra ato aijama an tas alep er ika, etpu amen a Kristo irai iji mesese: na auri aiek par ika, Eris idim ika uhpu atijai Inhal o natimi? Inhal o natimi neigki di? 35Is um ika ehele ra a Iesu, Etpu eti elvamen ehelemia inlah: akumu atga aijaua an lah, va yi jim yetpam naupat iramia: aien et atga aien an naupat, et eti ato aien nuarin ineig et apan iran aien: 36et wat amen inlah ehelemia, akumu asgeig irai inlah aijaua, mika aki ilpu halav an lah aijaua. Is asaig nitai iji eigki a Iesu, um atga o un, um atpuh vai ra.

37Is ago nauritai ehka is ahinag aien an nuhup ura, ja eris eti asgeig iran ara: 38mika yi ehneijid intas ineig is asaig a Aiseya naprofeta, um ika, “Ak Natimarid, era eteuc an tas unyima a di? eh mun ehvaig nikmai Ihova ehele di?” 39Is ehka vai ra nimyiisjis ninivaijec vaig, va nitai ineig, is lep asaig a Aiseya, um ika, 40“Is ago aupat nesganimtara aien, um ago ipjin inliinmopura; mika eri jim alum itai ara an nesganimtara, um ato itai anliinmopura, um adumoij,” mika ki ago cehcehe ra ainyak. 41Is asan tas iji eigki a Aiseya, is wat almoi natimi alupas o un aien, um tas vai yin. 42Ja eris imyiisjis ninivaijec vai yin a ilpu atimi alupas an pece is ahinag; ja eris eti asuptecnai yin ara vai ilpu Farisi, va eri jim ahlo ra ara irai eom alaigaheni ura: 43eris merit alupas ara va nimyiahpas o atimi, jam merit tintin va nimyiahpas o Atua.

44Is efehtas a Iesu, um ika, Aien et asgeig irak aien, et eti asgeig irak ache aien, ja et lep asgeig iran aien is abrai nyak aien. 45Aien et alum nyak aien, et alum yin aien is abrai nyak aien. 46Kis ham ainyak par itai lah an nobohtan, mika eri jim amen an naupat a ilpu atimi asgeig irak asega. 47El et atahaijeg niji tas unyak tah natimi, jam eti eteuc iran, inki ti aru nedo o un ainyak: kis eti ham ainyak mika ki aru nedo o atimi, jam imyiatamaig ra ache: 48et eteuc tah par aru nedo o un et esjum vai nyak aien, um eti leh niji tas unyak: uhpu asuptecnaig nimtan imi yin an nadiat apitac an tas ineigki ek mun asuptecnaig ainyak. 49Kis eti tup ispuk tas ainyak; ja is alupai nyak intas alep a Etmak is abrai nyak aien, nikavaig, intas ineig ekpu asuptecnaig ainyak, im lep intas ineig ekpu esege ainyak. 50Ek idim ato ainyak, mika et itai umoh iran ineig inyi ti lep ti intas alep o un: nitai iji eigki ache ek esege ainyak is asuptecnaig ehelek a Etmak.

বর্তমানে নির্বাচিত:

Joanes 12: ATY1863

হাইলাইট

কপি