Joanes 10

1ET idim inivaijec ineig ek asaig ehelemia ainyak mika, Aien et eti atga an neucse nirahed o siip aien, jam algauwaig an taka uarin, et atimi ehneg itai aien, um atimi ahrincai: 2ja aien et atga an neucse nirahed aien, et atimi asgi siip aien: 3et asalgei vai yin a natimi aminjinaig intapanes; era atahaijeg nohran siip: et ahlaig vai nidai siip o un aien, um uhup pan itac ira ra: 4et wat imyiapan itac siip o un aien, et uhup ira ra aien; era apitac yin ara: era idim ato nohran ara: 5era eti apitac natimi et eche ara, jam aha vai yin: era eti ato nohrai tak atimi ara. 6Is asan tas ecsipece ineigki ehele ra a Iesu: ja eris eti ato nitai iji eigki ara is asaig ehele ra aien. 7Ja is lep ika ehele ra a Iesu, Et idim inivaijec ineig ek asaig ehelemia ainyak mika, Ek eucse irahed irai siip ainyak: 8ara asega eris uhup irak ara, eris atimi ehneg itai ara, um atimi ahrincai: ja eris eti atahaijeg ra siip. 9Ek eucse irahed ainyak: el et atga anliin nirahed tah natimi irak, uhpu imyiatamaig yin; etpu atga iran aien, um lep apan itac, um leh nitai caig incan. 10Et idim apan natimi ehneg itai mika yi ehneg itai, um atgei atmas, um auahas itai: kis ham ainyak mika eri umumoh ara, yi lep esjilid acen numumoh ura. 11Ek atimi asgi upene siip ainyak: et ahtai nitai umoh iran o un a natimi asgi upene siip vai siip o un. 12Ja aien et asgi siip va nimtan ache aien, jam eti ohuun, et eti atimi asgi siip aien, et wat almoi kuri aleg aien napamvaig, et ude siip aien um aha: et aces siip kuri aleg, era terimterim ara: 13et aha natimi asgi siip va nimtan ache, va nitai ineig, nikavaig, et atimi asgi siip aien va nimtan ache, et eti aktaktai vai siip aien. 14Ek atimi asgi upene siip ainyak; ek ato siip unyak ainyak, era lep ato nyak siip unyak, 15et idivaig nato nyak o Etmak, im lep nato Etmak unyak: ek ahtai nitai umoh iran unyak ainyak vai siip unyak. 16Et unyak siip et eche, era eti amen ara anliin nirahed ineigki: eris idim ika ekpu uhup ira ra ainyak, erupu atahaijeg nohrak ara; etpu ethi ache nasjapicnaig siip, um ethi ache natimi asgi siip. 17Et aiyu inliinmopoi Etmak vai nyak va nedo unyak, nikavaig, ekpu ahtai nitai umoh iran unyak ainyak, ja par lep nusjai. 18Inyi eti atipagki nitai umoh iran unyak tah natimi, ek tup ispuk ahtai ainyak: ek emda ainyak intup ispuk ahtaivaig, um lep emda ainyak par lep nusjai. Kis leh intas alep ineigki ehele Etmak ainyak.

19Eris imyiisjis jipe intas iji eigki a nupu Jutaia. 20Eris ika nahaiji ra is ahinag, Et amen iran a nagelo has, et um ahnag aien; eka auri aijaua par atahaijeg yin? 21Eris lep ika nahaiji ra, Et ti intas o natimi et amen iran nagelo has iji eigki: et ehka vai nagelo has nago lah vaig nesganimtai ilpu atimi aupat nesganimtara. 22ERIS asjapicnaig Jerusalem an naopan iyehki va nativaig neom ahlap, is mesese. 23Is atga a Iesu an naiyu u Solomon an neom ahlap. 24Eris asjapicnaig pan ehelen a nupu Jutaia, um ika ehelen, Na ika aiek ecri amen aijama um aktaktai um yetpan eig id? el et Kristo aiek, asuptecnaig upene ehelema. 25Is um ika ehele ra a Iesu, Ek mun asuptecnaig ehelemia ainyak, ja eka imyiisjis nahcil aijaua: et asuptecnai nyak niji auritai iji eigki ek ago ainyak an nidai Etmak. 26Ja eka eti imyiisjis ninivaijec aijaua, va nitai ineigki, nikavaig, eka eti siip unyak aijaua: et idivaig kis asaig ehelemia ainyak, 27era atahaijeg nohrak siip unyak, ek ato ra ainyak, era apitac nyak ara: 28ek alupai ra nitai umoh iran ineig ainyak inyi ti lep ti; uhpu eti auahas ra, inyi ti atoraliak ra tah natimi an nikmak. 29Et esjilid a Etmak is alupai nyak ra aien irai iji itai asega; et eti emda tah natoraliak ra vaig an nikmai Etmak. 30Ek tup ethi ache ainyak im Etmak. 31Eris lep arapse vai hat a nupu Jutaia mika eri asji yin. 32Is um ika ehele ra a Iesu, Kis ehvaig ehelemia ainyak niji auritai upene is ahinag is ahes ehele Etmak; nehva auritai ineigki eka ika aijaua aki asji nyak vaig? 33Eris tas ehelen a nupu Jutaia, um ika, Ecra eti asji euc aijama vaig tah nauritai upene; ja vai intas has esjilid; na atimi aiek, jai na ika aiek, na idim Atua. 34Is um ika ehele ra a Iesu, Eris aged an tas alep unyimia mika, “Kis ika ainyak, Eka ilpu atua aijaua.” 35El is anvi nidai ra sji eigki aien is yetpan intas o Atua ehele ra, par ika ilpu atua, (et ehka nauahasvaig intas eris aged;) 36el eka auri aijaua par ika vai yin is ati yin a Etman, um abrai yin mika yi ham aien an nobohtan, Na mun asan tas has esjilid aiek; vai intas unyak, nikavaig, ek ika ainyak, Ek hal o Atua ainyak? 37El ek eti ago niji auritai o Etmak ainyak, el eka jim eteuc an tas unyak aijaua: 38ja el ek ago ainyak, el eka eti eteuc an tas unyak aijaua, akumu imyiisjis ninivaijec niji auritai unyak aijaua: mika aki ato aijaua, um imyiisjis ninivaijec, nikavaig, et amen ehelek a Etmak, um lep amen ehelen ainyak. 39Eris lep merit ara narop iran vaig: ja is tiblaitiblai ra aien um atga o un, 40um lep apan an nahaijin Jortan itac, an nuarin iyehki is upyi hup a Joanes um baptiso ira atimi iran; um amen eahki. 41Eris asjapicnaig pan ehelen natimi is ahinag, um ika, Is eti ago tah nauritai ehka a Joanes: ja et inivaijec intas asega is asaig a Joanes vai natimi ineigki. 42Eris imyiisjis ninivaijec vai yin natimi is ahinag eahki.

বর্তমানে নির্বাচিত:

Joanes 10: ATY1863

হাইলাইট

কপি