Zɛnɛse 8
8
Ǹya-fɛ̂ɛi kpɛɛ ŋá
1Kɛ́lɛ Ɣâla fé nia ní Nôa ma da vɛnɛ-sãai é pɛ́lɛ daa tulɛ-ŋai dîa nyii-ŋai da dîa-ni díkelee dí kɛ̀ géleŋ sui. Nya ƃe Ɣâla è fãa kɛ̀ é tɛ́ɛ ǹɔii mɛi, ǹyái é yéŋ. 2Nyá pɛlɛɛi kɛ̀ kulâi ǹɔii mui da dunai kɛ̀ kulâi ŋ̀ele-kɔlɔŋ sui, díkelee dí kpèra. 3Ǹyaŋ ǹyái è nâa kɛ̀ kpâlai ǹɔii ma. Ŋele kûu ŋuŋ tɔnɔ pôlu buu lɔ́ɔlu (150) kpɛɛ ŋá, ǹyái è nâa yèŋ. 4Ŋ̀áloŋ nɔ́ɔlu mɛi feerɛi ŋɔɣele kûui buu káo lɔ́ɔlu mɛi feerɛi su, géleŋ è nâa yèŋ é sée Alala Yeei ma. 5Ǹyái è kɛ̀ yenîi é lɛ́ɛ la zu é seri ŋ̀áloŋ buui ma. Ŋ̀áloŋ buui ŋɔfólo maa-ŋuŋ mâ, ǹyée-ŋai ŋuŋ è nâa kùla.
6Ɣele kûu buu náaŋ kpɛɛ ŋá, Nôa è géleŋ ŋɔwênai lá ƃò. 7È ƃíli-woo tɔnɔ tɛ̀ɛ gɛ́ koôŋ ǹɔii mɛi gɛ́ pà pôlu géleŋ su é lɛ́ɛ la zu ǹyái é kpála. 8È ŋɔ́nɔ tòloŋ tɔnɔ tɛ̀ɛ a gɛɛ é gáa à kɛ̀ ǹyái a kpála ǹɔii ma. 9Kɛ́lɛ dòloŋ fé zeêi káa ní, è lì pôlu géleŋ su, kpɛ́ni fêi, ǹyái è kɛ̀ niî ǹɔii ma. Nya ƃe Nôa è ǹyée kùla é dòloŋ sóŋ é ǹɔ́ géleŋ su. 10È maa kpɛŋ kɛ̀ ŋɔ́nɔ a ɣele kûu lɔ́ɔlu mɛi feerɛ. Nàa pôlu ma è dòloŋ tɛ̀ɛ ŋɔ́nɔ pôlu. 11Nya ƃe dòloŋ è pà pôlu a ŋ̀ele-wulii, láa ŋunu kɛ́ ƃô ǹá. Nôa è nâa gɔ̀lɔŋ a gɛɛ ǹyái a kpála ǹɔii ma. 12È ŋɔ́nɔ maa kpɛŋ kɛ̀ a ɣele kûu lɔ́ɔlu mɛi feerɛ. Nàa pôlu ma è ŋɔ́nɔ dòloŋ tɛ̀ɛ pôlu. Dòloŋ fé ŋɔ́nɔ pá ní pôlu géleŋ su.
13Nôa kɛ́ɛ a kóraŋ ŋuŋ lɔ́ɔlu mɛi da káo tɔnɔ (601), ŋ̀áloŋ maa-ŋuŋ ŋɔfólo maa-ŋuŋ sui, ǹyái è kpàla ǹɔii ma. Nya ƃe Nôa è géleŋ lá ƃò é ǹɔii mâ káa, é gáa a gɛɛ ǹyái kélee a kpála. 14Ŋ̀áloŋ veerɛi ŋɔfólo buu feerɛ káo lɔ́ɔlu mɛi feerɛ ɣelei, ǹɔii mâ è nâa kpàla.
15Nya ƃe Ɣâla è mò Nôa ma ǹyɛɛi, 16“Ka ínɛnîi da ílônii é pɛ́lɛ dínɛyâai dîa ka kula géleŋ su. 17Vúlu sãai kélee ka dîa-ni kákaa naai, kula a dîa, ŋɔni-ŋa, vɛnɛ-sãai, tɔara sãai, a gɛɛ dí lóŋ káa dí támaa dí ǹɔii láa fɛ́ɛ.” 18Nya ƃe Nôa da ŋɔnɛnîi da dílônii é pɛ́lɛ dílônii dínɛyâai dîa dí kùla géleŋ su. 19Vɛnɛ-sãai kélee, dɔara sãai kélee, ŋɔni-ŋa é pɛ́lɛ vúlu sãai kélee dîa, dí kùla géleŋ su yɛ̂ɛ berei dísîi káa lai.
Nôa è sâla kùla
20Nôa è Ɣâla-teƃele kpɛ̀tɛ Yâwɛɛ mɛni ma, é vɛnɛ-sãa maa waa-ŋai da ŋɔni maa waa-ŋai dɔnɔ-tɔnɔ síɣe é kéreŋ sala kula a dîa ŋ̀âla-teƃelei ma. 21Tãi Yâwɛɛ è géreŋ sala kúŋ nɛ̃ɛi kúŋ mɛ̀ni lai, è mò ǹyɛɛi, “Fé pâi ŋɔ́nɔ wɔ́lɔ ǹɔii náɣanîi núu-kpune mɛni ma, kpɛ́ni fêi, núu-kpune ŋɔkili-ŋa-sîai nyɔ́mɔɔ̂i é síɣe gɔ́ɔ pîlanii. Fé pâi ŋɔ́nɔ wɔ́lɔ fúlu sɛŋ kélee su karâi ǹɔii mâ yɛ̂ɛ berei ŋá gɛ̀ lai. 22Tãi nɔ́ ǹɔii káa niî la naai, sí-sɛŋ sí tãi, dée tãi, kɔ́lɛ da wúleŋ-wuleŋ, sama-ɣêle da fólo ɣêle, kpíni da ɣele ƃɔ́ɔ dífe pâi kpɛɛ̂i ǹɔii ma.”
বর্তমানে নির্বাচিত:
Zɛnɛse 8: KWB
হাইলাইট
শেয়ার
কপি
Want to have your highlights saved across all your devices? Sign up or sign in
