Zɛnɛse 9
9
Ɣâla è kpanaŋ-wooi gɛ̀ Nôa yêei
1Nya ƃe Ɣâla è lûwa làa Nôa ma da ǹônii ǹyɛɛ diai, “Ka ƃûu ƃó, ká ǹɔii láa fɛ́ɛ. 2Fɛnɛ-sãa kélee da pâi yaôi kâa da ŋɔni-ŋai, da dɔara-sãai é pɛ́lɛ ǹyɛ̃ɛ-ŋai dîa. Ŋa díkelee tɛ́ɛ kápɔ. 3Fúlu sãa kélee díkaa a mii-sãa kámɛni ma. Yɛ̂ɛ berei ŋá tuma-laa tɛ̀ɛ la kápɔi, ŋa sɛŋ kélee tɛ́ɛ kápɔ. 4Kɛ́lɛ káfe ŋ̀ãa lɛ́ɛ zu ká mìi. 5Kɛ́lɛ ŋa pâi káfulu-laai kpɛɣɛŋ ƃôi kákîe-ni yêei. Ŋ̀a pâi fúlu sãa kélee dífulu-laai kpɛɣɛŋ ƃôi da núu-kpune. Ŋa pâi núu-kpune ŋɔfúlu-laai kpɛɣɛŋ ƃôi díkîe-ni yêei. 6Ǹúui kélee a m̀arâŋ ŋãa pûi, da pâi ŋɔ̂i pûi. Kpɛ́ni fêi, ŋá núu-kpune kpɛ̀tɛ a ŋ́gbîŋ ƃóloŋ-maa.
7“Mɛni ma, ka ƃûu ƃó, ká táma ǹɔii su ká ǹáa fɛ́ɛ.”
8Nya ƃe Ɣâla è mò Nôa ma da ǹônii ǹyɛɛi, 9“Ka gáa, ŋa ŋ́gono tée káyêei ka kálônii nyii-ŋai pâi lɛɛ̂i kápôlui, 10da vúlu sãai kélee ka dîa-ni kákaa ǹɔii sui, ŋɔni, taa-tulɛ da fɛnɛ-sãai kélee, nyii-ŋai kùla géleŋ sui. 11Ŋa ŋ́gono tée káyêei a gɛɛ ya-fɛɛ fé ŋɔ́nɔ wɔ́lɔ pâi ǹɔii su-sãa su karâi, a gɛɛ ya-fɛɛ fé ŋɔ́nɔ pâi ǹɔii su karâi.” 12Ɣâla è mò ǹyɛɛi, “Gbanaŋ-wooi maa ŋɛi-kɛ-maai ká ŋí nyii ŋá gɛ̀ kwa káa-ni kúloai, da vúlu sãai kélee díkaa ǹɔii sui, kásuui kélee mɛni ma. 13Ŋa ŋágbeimɛlɛi lâai ŋ̀elei su, ǹyaŋ a pâi kɛ̂i a ŋákpanaŋ-wooi maa ŋɛi-kɛ-maa kwa ǹɔii kúloai. 14Tãi ŋa gbeimɛ̂lɛi lâa la ŋ̀elei su ká gáai, 15Ŋákpanaŋ-wooi maa mɛni a tôo ŋ́gili ŋá nyii gáa kúloai kwa káa-ni da fúlu sɛŋ kéleei. Ǹyaŋ gɛ̀ ní ya-fɛɛ fé ŋɔ́nɔ wɔ́lɔ pâi fúlu sãa kélee su karâi. 16Gbeimɛ̂lɛi à kɛ̀ ŋ̀elei su, ŋa pâi gâai, gɛ̀ ní ŋ́ɔlɔ-wɔlɔ kpanaŋ-wooi a pâi toôi ŋ́gili ŋá nyii gáa kúloai kwa fúlu sãa kélee díkaa ǹɔii sui.” 17Ɣâla è mò Nôa ma ǹyɛɛ, “Gbanaŋ-wooi maa ŋɛi-kɛ-maai ká ŋí nyii ŋá gɛ̀ kwa fúlu sãa kélee kúloai nyii-ŋai díkaa ǹɔii sui.”
Nôa da ǹônii-sinaai
18Nôa ǹônii ká ŋí nyii-ŋai kùla géleŋ sui. Sɛ̂ŋ, Aaŋ da Zafɛ. (Aaŋ è kɛ̀ a Keena ǹâŋ.) 19Ǹúu saaƃai ŋí ƃé kɛ̀ a Nôa ǹônii, ǹyaŋ dísuui su ƃé núu kélee è kùla naa.
20Nôa ƃé kɛ̀ a kpâlaŋ ŋá tii-kɛ-nuu maa-ŋuŋ nyii kpɔmɔ-kpalaŋ kɛ̂i. 21Tãi tɔnɔ è lɔɔ kpêle, nɔ̀ɔi é gɛ́ é láa ŋɔsua kɔlɔ seɣe pɛrɛi mu a gaŋ. 22Keena ǹâŋ, Aaŋ è ǹâŋ Nôa kaŋ kâa, é mò ǹêɣe-ni dîa ŋ̀énii ŋá. 23Sɛŋ da Zafɛ dí seɣe sîɣe dí bɛ́lɛ díkâraŋ ŋá dí sía a dípôlu-pere dí dínâŋ kaŋ mɛi pɛ́lɛ. Díŋɛi è kɛ̀ a dínaŋɔɔ, dífe dínâŋ kaŋ káa ní. 24Tãi Nôa è ŋ̀ɛ́i lá ƃô la ŋuŋ su é séɣeŋ, è mɛnii kɔ́lɔŋ ǹóŋ guro-tei è gɛ̀i, 25È mò ǹyɛɛi,
“Náɣaŋ é kɛ́ Keena ma!
Tɔɔ é kɛ́ a luɛ koi luɛ ŋɔnûai sáma.
26Lûwa é kɛ́ Yâwɛɛ Ɣâla ma nyii gáa a Sɛ̂ŋ ŋɔɣâlai!
Tɔɔ Keena é kɛ́ a Sɛ̂ŋ ŋɔluɛ.
27Tɔɔ Ɣâla é Zafɛ ŋɔsuui ƃûu ƃó!
Tɔɔ é kɛ́ Sɛ̂ŋ ŋɔsua kɔlɔ seɣe pɛrɛi mu!
Keena é kɛ́ a ŋɔluɛ.”
28Ǹya-fɛɛi pôlu ma, Nôa è kɛ̀ ɣele ma a kóraŋ ŋuŋ saaƃa pôlu buu lɔ́ɔlu (350). 29Nôa è kɛ̀ a kóraŋ ŋuŋ lɔ́ɔlu mɛi náaŋ pôlu buu lɔ́ɔlu (950) é lɛ́ɛ saâi.
বর্তমানে নির্বাচিত:
Zɛnɛse 9: KWB
হাইলাইট
শেয়ার
কপি
Want to have your highlights saved across all your devices? Sign up or sign in
