Zɛnɛse 7
7
Ǹya-fɛ̂ɛ kɛ́tɛi
1Yâwɛɛ è mò Nôa ma ǹyɛɛ, “Ka ípɛrɛi mu-ƃelai kélee ka tɛ́ géleŋ su, kpɛ́ni fêi, ŋa gáa a gɛɛ íkaa a núu sãa íƃarâai sáma. 2Sua sîi kélee maa waâi, zirɛ lɔ́ɔlu mɛi feerɛ síɣe da záa lɔ́ɔlu mɛi feerɛ. Í sua sîi kélee maa fé waa ní, zirɛ tɔnɔ da záa tɔnɔ siɣe. 3Í ŋɔni sîi kélee zirɛ lɔ́ɔlu mɛi feerɛ síɣe da záa lɔ́ɔlu mɛi feerɛ a gɛɛ dí lɛ́ɛ a dífulu ŋ̀éniɛi su. 4Kpɛ́ni fêi, fólo lɔ́ɔlu mɛi feerɛ à tɛ̀ɛ ŋa pâi tuna pûi ǹɔii mâ a fólo kûu buu náaŋ a da kpíni kûu buu náaŋ. Ŋa pâi fúlu sɛŋ kélee su karâi ǹɔii ma nyii-ŋai ŋá dí gbɛ̀tɛi.” 5Nya ƃe Nôa è mɛni-ŋai kélee kɛ̀ nyii-ŋai Yâwɛɛ è mò ma a gɛɛ é gɛ́i.
6Nôa è kɛ̀ a kóraŋ ŋuŋ lɔ́ɔlu mɛi da (600) a tãi ǹyá-fɛɛ kɛ́tɛi è sìa la ǹɔii mɛi. 7Nya ƃe Nôa è tɛ̀ géleŋ su da nônii, ŋɔnɛnîi é pɛ́lɛ nônii dínɛyâai dîa a gɛɛ ǹyá-fɛɛi fé sèri dîa. 8Zua maa waa-ŋai da nyii-ŋai dímaa fé waa níi, da ŋɔni-ŋai da ŋála sãai kélee ǹɔii mai, 9da Nôa-ni dí tɛ̀ géleŋ su feerɛ-feerɛ, zirɛ da záa, yɛ̂ɛ berei Ɣâla è mò la Nôa mai. 10Ɣele kûu lɔ́ɔlu mɛi feerɛ tɛ́ɛ pôlu ma, ǹya-fɛɛ kɛ́tɛi è pà ǹɔii ma.
11Tãi Nôa è kɛ̀ la a kóraŋ ŋuŋ lɔ́ɔlu mɛi dai (600), ŋáloŋ veerɛi ŋɔɣele kûu puu káo lɔ́ɔlu mɛi feerɛi, maa ɣelei tí ǹɔii è kpɛ̀liŋ ǹá é ƃó, yá é kúla mu, ŋ̀ele-kɔlɔŋ lá é ƃó. 12Nya ƃe tuna è pù a fólo kûu buu náaŋ da kpíni kûu buu náaŋ.
13Maa ɣelei tí Nôa da nônii, Sɛ̂ŋ, Aaŋ da Zafɛ é pɛ́lɛ Nôa ŋɔnɛnîi ma da dílônii dínɛyâa saaƃai dí tɛ̀ géleŋ su. 14Dí tɛ̂ géleŋ su da fɛnɛ-sãa sii kélee, taai-tulɛ sii kélee, tɔara sãa sii kélee, ŋɔni sîi kélee da koôŋ sãa sii kélee, zirɛ da záa.
15Fúlu sãa sii kélee veerɛ-feerɛ dí tɛ̀ géleŋ su da Nôa-ni. 16Fúlu sãa kélee, zirɛ da záa dí tɛ̀ géleŋ su yɛ̂ɛ berei Ɣâla è mò la mai. Nya ƃe Yâwɛɛ è géleŋ lá tɛ̀. 17Ǹya-fɛɛi è kɛ̀ ǹɔii ma a ɣele kûu buu náaŋ. Ǹyái è fɛ̀ɛ a gɛ́tɛ é géleŋ tɛ́ ɣelêi. 18Ǹyái è fɛ̀ɛ a zu kɛ́tɛ é sɛŋ kélee mɛi pɛ́lɛ ǹɔii su. Nya ƃe géleŋ è nâa kɛ̀ seêni ǹyái ŋá gɛ́ tɛ̀ɛ-tɛɛ. 19Ǹyái è kɛ̀ a vɛ́ɛ ǹɔii ma nyii ǹyée tɔɔ-ŋai kélee mɛi pɛ̂lɛi.
20Ǹya-fɛɛi ŋɔmɛi-koya è kɛ̀ a kɔ́ɔ-ƃɔlɔnii buu feerɛ káo lɔ́ɔlu ǹyée-ŋai mɛi. 21Sɛŋ fúlu kélee è sàa ǹɔii ma. Ŋɔni-ŋa, taa-tulɛ-ŋa, lɔɔ fɛnɛ sãa, tɔara sãa é pɛ́lɛ núu-kpune kélee ma. 22Fúlu sɛŋ kélee kɛ̀ ǹɔii mai dí sàa. 23È sɛŋ kélee su kâra, núu-kpune, fɛnɛ-sãa, tɔara sãa da ŋɔni-ŋai. Nôa da nyii-ŋai kɛ̀ géleŋ sui dîa nɔ́ ƃé lɛ̀ɛ. 24Ǹya-fɛɛi è kɛ̀ ǹɔii ma a ɣele kûu ŋuŋ tɔnɔ pôlu buu lɔ́ɔlu (150).
বর্তমানে নির্বাচিত:
Zɛnɛse 7: KWB
হাইলাইট
শেয়ার
কপি
Want to have your highlights saved across all your devices? Sign up or sign in
