Zan 16
16
1«Gè niima vaiti bogɛ wo ma, nii a kɛ wo mina ʋa ɠɛlɛzu kidaaleʋei ʋa. 2Ta ʋaazu wo ɓɛɛzu GALA dɛbi ʋɛlɛiti bu. Yeeɠɛɠalai ta ɠa ʋaazu vɔlɔ, niiti ta ɠɛ wo ʋaazu, naati ta ɗa ɠisiɛ ga GALA ka ti dɛbizu ɠana. 3Ta naa pɛ kɛɛzu, tɔɔzei ti la Kɛ̀ɛ ɠwɛɛni, ti la nà ɓalaa kwɛ̀ɛ. 4Gè niima vaiti bogɛ wo ma, nii a kɛ siɛgi zu ma yeeɠɛɠalai zeelizu la, wo-ɠi ge loo su ga gè boni wo ma. Gè la kɛɛni gè ʋa bo wo ma kaite tɔɔzeizuʋɛ, mazɔlɔɔ gè ɠɛa dɛ wo ʋa.»
Zɛnvu Ɲadegai ná-botii
5«Niima ziɛgi zu, nà ga li naama nui ʋɔ bɛ, nii é tèʋegai, tama wo tanɔpɛ ge la gàazaɠasu ga ‹Mini ɠa è liizu ná?› 6Kɛlɛ tɛi gè niima wooiti boga wo ma, naa ɠɛa wo ʋɛ ga ziiɓɔlɔi. 7Tama gaamai ɠa gè bosu wo ma ɠani ga: Fizɔgɛ wo ma ga gè li, tɔɔzei ni gè la liini, Kpɔba Nui la ʋaa wo ʋɔ. Kɛlɛ ni nà liina, nà teʋe wo ma. 8Siɛgi zu é ʋaazu la, toɠa eteai zu nuɓusɛiti ta-ɠakagi lɛ ga tiye, é ʋilɛ kotoi ʋa, ta telebodai, naa ʋɛɛ GALA ná-tukpɔɠaaleʋe ʋelei ʋa, 9é ʋilɛ kotoi ʋa, tɔɔzei ti la ɠidaaleʋeni mà, 10é ʋilɛ telebodai ʋa, tɔɔzei nà ga li Kɛ̀ɛ ʋɔ bɛ, tama wo la mɔ pɛ̀tɛga, 11é ʋilɛ GALA ná-tukpɔɠaaleʋe ʋelei ʋa, tɔɔzei zɔi é zeini eteai nii unda, naa ná-tukpɔi ɠaa ɓega ga leʋe.
12«Faa mɔinmɔin kiligaa ta dɛ bɛ̀ ga gè bo wo ma, kɛlɛ naati buiʋɛ wo ma dɛ, ga wo ʋa ziɛ bu. 13Siɛgi zu Gaama Yɛnvui ʋaazu la, toɠa lo wo luɠɔ gaamai pɛ su. Wooi nii pɛ a ɠɛ bosu wo ma, é la naa woga nɔ ɓɔɠɔ ʋɛ, kɛlɛ nii pɛ é mɛnigai, naa ɠa a bo, toɠa ʋelela ʋele vaiti bo wo ma. 14Toɠa nà-lɛbiyai ɠula kɛlɛma, tɔɔzei nii é zèa, naa nɔ ɠa a ta zeɠe su, é bo wo ma. 15Nii nɔpɛgi é Kɛ̀ɛ ya, naa ɠa ga nɔ̀nɔ, naa ɠa é kɛa gè ɠɛɛzu la wo ma, nii é zèa, naa nɔ ɠa Zɛnvu Ɲadegai ta zeɠezu su, é bo wo ma.»
Gaazuɠilii valibo fai ga koozunɛɛi
16«Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu.»
17Ná-kaladopoi tanigaa ti ɠɛni ɓɔɠɔ ɠaazaɠasu ga: «Lee ɠa é pɔ é bo ade ma ga niima wooiti: ‹Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu›? Ta gooi é ɠɛɛzu ma: ‹Nà ga li Kɛ̀ɛ ʋɔ bɛ›? 18Yeeɠɛɠala goi nii ɠani é vaazu ma, naa ʋoluʋɛ ɠa ga lee? Ade la ɠite kwɛɛ, nii ɓɔɠɔɓɔɠɔgi é ɠɛɛzu é bo.»
19Yesu gaaɠaani ga ta pɔ ti gaazaɠa, é ɠɛni ti ma: «Wa ɓɔɠɔ ɠaazaɠasu naama wooi ʋoluʋɛ ma, nii gè bogai wo ma ga: ‹Yeeɠɛɠala go nɔ ʋe niina, wo la mɔ pɛ̀tɛga, naa ʋoluma yeeɠɛɠala go ɠa leʋena, wa pɛ̀tɛ mɔnɔ ʋolu›? 20Gè bo wo ma ga gaamai, wa wɔlɔ, wo ɗa ɓɔɠɔ maawɔin, naama ziɛ su, eteai ɗa ɠoozunɛ. Wa ɠɛ ziiɓɔlɔi zu, kɛlɛ wa-yiiɓɔlɔi ɠa valibo ga koozunɛɛi. 21Doun zɔlɔɔ koozuwanai ɠaana anzanui ʋa, toɠa ɗa ɠɛ bɛ ga ziiɓɔlɔi, tɔɔzei ná-yeeɠɛɠalai zeelia, kɛlɛ siɛgi zu é doin zɔlɔɔsu da, toɠa ɗa yeema ná-soolɛi ma, tɔɔzei koozunɛɛʋɛ ga nui ta ʋa eteai zu. 22Wa ɓalaagi, ziiɓɔlɔi ɠa wo su niima ziɛgi zu, kɛlɛ nà ʋaazu wo ʋɛtɛsu ʋolu, naazu wo-yiimaʋɛ laa ɠa ve ga koozunɛɛi, tama nu nɔpɛ ge la zooga wa-ɠoozunɛɛi ɠulazu wo ya. 23Naama volo ná, wo la mɔ gàazaɠaga faa nɔpɛ ma. Gè bo wo ma ga gaamai, nii nɔpɛ wa fali Kɛ̀ɛ ma ga dàaseigi, toɠa fe wo ya. 24Zaaɠaza, wo la dɛ faa nɔpɛ falini ga dàaseigi. Tama à fali, wa sɔlɔɔ, naa ɠa a kɛ wa-ɠoozunɛɛi laazeeli.»
Yesu zobo sɔlɔɔga eteai ma
25«Gè niima vaiti bogɛ wo ma ɠani faalaaliiti su, kɛlɛ yeeɠɛɠalai ta ɠa ʋaazu, gè la mɔ ɓɔɛa wo ʋɔ ɠana, nà ɓɔɛ wo ʋɔ kpezekele, é ʋilɛ Kɛ̀ɛ ʋa. 26Naama volo ná, wa wo ɓɛdɛma vaiti fali Kɛ̀ɛ ma ga dàaseigi. Gè la vɔlɔ ɠɛɛzu wo ma, nà Kɛ̀ɛ vali wo ʋɛ. 27Tɔɔzei Kɛ̀ɛ ɓɔɠɔgoi wo nɛɛʋɛ ʋɛ, mazɔlɔɔ wo nɔ̀un nɛa ʋɛ, wo ɠidaaleʋe ga sèɠeʋɛ pɔ bɛ, gè ʋa. 28Sèɠeʋɛ Kɛ̀ɛ ʋɔ bɛ, gè ʋa eteai zu, nà ma, nà ga zeɠe eteai zu, gè li Kɛ̀ɛ ʋɔ bɛ.»
29Ná-kaladopoiti ti ɠɛni ma: «Tɔun è tɔɔzeiɗa ga è ɗa ɓɔɛ kpezekele-o, è la mɔ faalaali wosu. 30Gi kwɛni niina ga è fai pɛ kwɛɛ, naa ʋoluma è ɓɛdɛ la ba ga nu nɔpɛ ge è ɠaazaɠa, naa ɠa é kɛɛzu gi laai da ga è zeɠeʋɛ GALA pɔ bɛ, è ʋa.»
31Yesu ti wooɠaaʋoteni, é ɠɛ ma: «Wo laa da niina kɛlɛ? 32Tama yeeɠɛɠalai ɠa ʋaazu, tɔun vɔlɔ é ɓega ga zeeli, siɛgi zu wo zuvazasu da, ɛsɛ ge ɗa li ga ɓoto ʋele, màaɠelesa ge leʋe nà ɠila. Kɛlɛ nà ɠila ge la ɠɛɛzu de, tɔɔzei Kɛ̀ɛ ɠa bà. 33Kɛni nà la naa wo wo ma, nii a kɛ ziilɛigi ɠɛ wo ya ada-ɠilibalai zu. Wa ʋaazu kpɔlɔ mɔinmɔin sɔlɔɔsu eteai zu, kɛlɛ à zɛbɛzeɠe, tɔɔzei gè zobo sɔlɔɔga eteai ma.»
বর্তমানে নির্বাচিত:
Zan 16: GDZ
হাইলাইট
শেয়ার
কপি
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
