Zan 15

Ansaɠɔ tɔkulugi ta ma ɓekegiti

1«Nà ɠa gè ga ansaɠɔ tɔkulu kitei, Kɛ̀ɛ ɠa é ga makɛ nui. 2Kpekegi niiti kpein ti bà, ti la waazu, toɠa naati teʋe ga, kɛlɛ kpekegi niiti kpein ti waazu, toɠa naati gaaleʋe, naa ɠa a kɛ ti waa ʋolu mɔnɔ ga gola. 3Wɔun, kalagi nii gè boga ga woye, naa wo ɲadegɛ niina. 4À ɠili bà kpaan, nà ɓalaa nà ɠili wo ʋa kpaan. Ansaɠɔ kpekegi la ɗa ga zoo é ʋa waa ɓɔɠɔ ʋɛ, ni é la yɛni ma lɔkulugi ʋa, zenɔ ɠana wa ɓalaa, wo la zooga waazu, ni wo ɠiliai la yɛni bà.

5«Nà ɠa gè ga ansaɠɔ tɔkulugi, wa ɠa wo ga ma ɓekegiti. Zɔi nɔpɛ a ɠilina bà kpaan, nà ɓalaa gè ɠili ba kpaan, naama nui ɠa gwaa mɔinmɔin bo, tɔɔzei ni gè la wo ʋa, wo la zooga faa nɔpɛ kɛɛzu. 6Zɔi giliai la yɛni bà, naa ɠa ʋili ya kamaʋoluʋɛ eɠɛ ansaɠɔ kpekegi, é vɔ. Naa ʋolu ta ɗa ma ɓekegiti gaalɛ ba, ti ti ʋili abui zu, ti ɠala. 7Ni wa ɠilina bà kpaan, dàawooiti ɓalaa ti yɛ wo-yiimaʋɛ kpaankpaan, nii nɔpɛ wo pɔ, à naa vali, tama toɠa ve wo ya. 8Ni wa gwaa mɔinmɔin bona, wo dɛɛ ga naa maaʋele ga wa ga nà-kaladopoiti, naazu ɛsɛ pɛ ka Kɛ̀ɛ ná-lɛbiyai ʋɛtɛ.

9«Eɠɛʋelei Kɛ̀ɛ nɛ̀ai la ʋɛ, zekana nà ɓalaa gè wo nɛai la ʋɛ. À yɛ nà-nɛɛbɛi zu kpe. 10Ni wa nà-deveiti sona, wa yɛ nà-nɛɛbɛi zu, eɠɛʋelei gè Kɛ̀ɛ ná-deveiti sogai la, ta zɛ̀gai la ná-nɛɛbɛi zu.

11«Gè niima vaiti bogɛ wo ma, naa ɠa a kɛ nà-koozunɛɛi ɠɛ wo-yiimaʋɛti, naazu wa-ɠoozunɛɛi laa ɠa zeeli. 12Nà-devei ɠa ga: Wo ɓɔɠɔ nɛɛ ʋɛ wo ɠilagilagi pɛ, ʋelei gè wo nɛai la ʋɛ. 13Nɛɛbɛ la leʋeni naa ʋa ga nu zɛnvui ve bɔɔlaiti ta-vaa zu. 14Wa ga bɔ̀ɔlaiti, ni wa nà-deveiti sona, wo ɗa kɛ. 15Gè la mɔ wo lolisu ga botiɠɛ nuiti, tɔɔzei botiɠɛ nui la ɗa ga naa pɛ kwɛɛga, nii maliɠii kɛɛzu. Nà wo lolisu ga bɔɔlaiti, tɔɔzei nii pɛ gè sɔlɔɔga Kɛ̀ɛ ya, gè naa pɛ dɛɛʋɛ ga woye. 16Wa lɛi wo ʋa yiimazeɠe ga ze, nà ɠa gè yiimazeɠea ga woye, gè wo leʋe keela ziɛgi ma, naa ɠa a kɛ wo li, wo waa, wo ɠaawaai ɠɛ ga nii é lɛbisu. Názu, nii nɔpɛ wa fali Kɛ̀ɛ ma ga dàaseigi, é fe wo ya. 17Nii gè wo levezu ma, naa ɠa ga: Wo ɓɔɠɔ nɛɛ ʋɛ wo ɠilagilagi pɛ.»

Eteai Yesu ta nɔnɔiti wɔinzeɠe vai

18«Ni eteai a wo wɔinzeɠena, à kwɛɛ ga nà ɠa mɔunpa, é wɔ̀inzeɠeai. 19Ni wo ɠɛni ga eteai nɔnɔ, eteai a la wo nɛɛ ʋɛ. Kɛlɛ tɛi wo la ga eteai nɔnɔ, nà ma, gè yiimazeɠea ga woye eteai zu nuiti saama, naa maaʋele ma, eteai ɠa wo wɔinzeɠezu. 20À ɠizɛ naama wooi zu, nii gè bogai wo ma ga: ‹Botiɠɛ nui la leʋeni maliɠii ʋa.› Ni ti wɔ̀inzeɠeʋɛ, ta wo wɔinzeɠe nɔ ti, ni ti gòoiti sogɛ, ta wo-wooiti so. 21Kɛlɛ màaʋele ɠa ti naama vaiti pɛ kɛɛzu la ga woye, tɔɔzei ti la naama nui ɠwɛɛ, nii é tèʋega. 22Ni gè la ɠɛni ʋaani, gè ʋa ɓɔɛ ti ʋɔ, ti la ɠɛni ɠɛa ga sɔba nu, kɛlɛ niima ziɛgi zu niina, goozuɠula nɔpɛ ge la mɔ ti ʋɛ ta-ɠotoiti faa zu. 23Zɔi nɔpɛ é wɔ̀inzeɠezu, naama nui ɠa Kɛ̀ɛ ɓalaagi wɔinzeɠezu. 24Ni laavɔ ɠɛɛwotii niiti nu ɠili nɔpɛ ge la dɛ ta ɠɛɛni, gè la ɠɛni naati kɛɛni ti zaama, ti la ɠɛni ɠɛa ga sɔba nu. Kɛlɛ anɛɛ ti naama ɠɛɛwotiiti kaa, ta ba nɔ ti ɗa gi wɔinzeɠe gá Kɛ̀ɛ. 25Kɛlɛ kɛni naama wooi a la ʋilɛsu nɔ ti, nii sɛʋɛai ta-lɔ sɛʋɛi zu ga: ‹Ta wɔ̀inzeɠezu un ge la ba.›

26«Siɛgi zu Kpɔba Nui ʋaazu la, nii gè ʋaazu teʋesu wo ma, é zeɠe Kɛ̀ɛ ʋɔ bɛ, Gaama Yɛnvui nii é zeɠezu Kɛ̀ɛ ʋɔ bɛ, toɠa zeele wooi wo nɔ̀un bɛ. 27Wa ɓalaa wa zeele wooi wo bɛ̀, tɔɔzei wa pòlu kaite, tɔɔzeizu munu.»

বর্তমানে নির্বাচিত:

Zan 15: GDZ

হাইলাইট

কপি

Want to have your highlights saved across all your devices? Sign up or sign in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

GALA Daawoo Zɛʋɛi সম্পর্কে আরও জানুন