MARK 9

1Lapen alangli halatum aphan pulo, “Ne nangtum aphan ahok alamsi pupo, ladak karjapphrong atum angbong manene atum Arnam a-Rat jakong pen kevang thek-longletik ke thithedetji.”

Jisu Arje Kechepharlo

(Mat 17.1-13; Luk 9.28-36)

2Nithrok aphi Jisu hala Pitor, Jems lapen Jon aphan cheponsi baduta kavedet adim, kangtuiving anglong athak damlo. Halatum angno Jisu arje chepharlolo.#2 Pit 1.17-18 3Alangli pekelok klingsi klarbong cheplang-lo; pirthe athak baduta lapuson chok palok thekthe. 4Ansi Moses lapen Elijah halatum angno cheklang-lo; halatum Jisu pen lam chingkilo.#2 Pit 1.17-18 5Pitor Jisu aphan pulo, “Rabbi, etum ladak kedo ke mesenlo! Netum pharla humthom kimpo. Nangphan ehum, Moses aphan ehum, lapen Elijah aphan ehum kimpipo.” 6Pima alangli pisi puloma, lake chininedet-lo; atheke halatum phere-olo.

7Ansi inghun ephar thursi halatum aphan binthip-lo, lapen inghun angbong pen ase vangsi pulo, “Lake ne kechinghon a-Sopolo, alangliphan arjuphrongnon.”#Mat 3.17; Mar 1.11; Luk 3.22 8Lapen halatum tongsekot pen talavir lang-lo, bonta Jisu aphan apar ke badu aphanta thek-longledet-lo.

9Halatum inglong pen nangkehir un ahut Jisu halatum aphan hukum pisi pulo, “Monit a-Sopo kethi pen rengthusi thurthetik-ke nangtum la kethek-long alam badu aphanta thanri.”

10Halatum la alangli kepu alam asonthotsi klemlo, bonta kethi pen thurthuji pu alam athe kopima pusi halatum angbong chethanseibomlo. 11Ansi halatum alangliphan arjusi pulo, “Aron thekser atum kopi apotsi aphrangke Elijah vang nangji pu puloma?”#Mala 4.5; Mat 11.14

12Alangli halatum aphan thakdunsi pulo, “Chenamsi Elijah kadokave alam kesikjisi aphrang vangji; bonta Monit a-Sopo kesung pho-o nangji, lapen monit atum alangliphan langremriji pu hastro kopi apotsi puloma? 13Tebonta ne nangtum aphan nangpulang, Chenamsi Elijah ke vang-et-tang-lo, lapen hastro alangli lamjir kepu asonthotsi monit atum aning kehang aling alangliphan klemtang-lo.”

Jisu Inut Hi-i Kepho A-oso Aphan Kepame

(Mat 17.14-21; Luk 9.37-43a)

14Halatum sangho atum along vangsi, armu atum sangho atum aphan kekomjai, lapen aron thekser atum halatum pen lam kechedansei thek-long-lo. 15Armu atum Jisu aphan thek-longsi manghuphrong-lo, lapen alangli dung katvirsi kardom chepilo. 16Jisu amethang asangho atum aphan arjulo, “Nangtum latum pen kopi alamsi chedanseiloma?”

17Armu angbong pen inut abang thakdunsi pulo, “Kuru, neli nangli long neli sopo vanlo, pima alangli hi-i pholoksi lamta ningje un-edet-lo. 18Lapen hi-i alangliphan kenep aling hi-i alangliphan longle athak pakrepthor titilo. Anke angho angpip suphlongsi aso pachingkrit titilo, lapen abang chekenghek-titilo. Nangli sangho atum la kepaphlungji aphan neli choningrilo, bonta halatum la phlung un-edet-lo.”

19Ansi alangli halatum aphan thakdunsi pulo, “Mai, O kekroikre a-ove! Ne nangtum along kopu ansi nangdodunbom nangjilangma! Ne nangtum aphan kopu ansi ning chepadingbom nangjilangma! Halabangso a-oso aphan nelilong vannon.” 20Ansi halatum alangli long labangso a-oso vanlo.

Hi-i ke Jisu aphan kethek-long pen mamat oso aphan heveng-lo, lapen osoke longle athak krepthorlo lapen angho angpip suphlongsi chardak-lo. 21Jisu labangso a-oso apo aphan arjulo, “Komantu ahut pensi lason keplang-lo?”

Alangli thakdunsi pulo, “Bihek ahut pen. 22Hi-i labangso a-oso aphan kepavirjisi abatai batai me along lapen lang along pakrep-lo. Bonta nangli jongsi un tangte, nelitum aphan ingjinsora neraptha.”

23Bonta Jisu alangliphan pulo, “Jongsi un tangte, puha! Kekroi kedo abang ke kadokaveta unlo.”

24Hala mamat oso apo abang hangsersi pulo, “Neli kroilo. Neli akekroikre an pavetha.”

25Bonta armu atum kekat pen alanglinat kevangbom thek-longsi Jisu hala kangthirthe ahi-i aphan ingcheksi pulo, “O alam kave lapen ano kangthong ahi-i, ne nangphan hukum pilo, nang labangso a-oso pen nangbarnon lapen labangso a-oso along non pen apara lutdamthuri non.”

26Halabangso ahi-i hangsersi oso aphan jasemet heveng-lo lapen oso along pen ingtan nangbarlo. Ansi osoke kethitang ason cheplang-lo. 27Bonta Jisu labangso a-oso aphan otsi ingthurlo, lapen labangso a-oso thurlo.

28Jisu hem arlo damdet aphi asangho atum alangliphan arjusi pulo, “Netum kopi apotsi labangso ahi-i aphan phlung un-edet-loma?”

29Jisu halatum aphan pulo, “Lason ahi-i aphan ke Arnam kardom lapen an-kehum pensi phlung unchotji.”

Jisu Amethang Kethiji Alam Batai Hini Aphong Kechethan

(Mat 17.22-23; Luk 9.43-45)

30Jisu lapen asangho atum hadak pen barsi Galili adet dongponputsi damlo, lapen baduta la kechininedetjisi Jisu aning hang-lo. Pima alangli amethang asangho atum aphan thanbomsi pulo. 31“Monit a-Sopo aphan monit arideng hodaidetji, lapen halatum alangliphan pathilotji, bonta nithom aphi alangli rengthusi thurji.”

32Bonta halatum labangso akethan alam athe chininedet-lo, lapen alangliphan karjujita phereduk-lo.

Akethenei Abang Komatma

(Mat 18.1-5; Luk 9.46-48)

33Ansi halatum Kapernaum arongsopi nanglelo. Hem arlo damdet aphi Jisu amethang asangho atum aphan pulo, “Mo tovar kevang un ahut nangtum kopi alamsi chedansailo?” 34Bonta halatum thangta thakdundesi doklip-lo. Pima matsi theneiloma pusi halatum tovar kevang un ahut lam nangchedanseilo.#Luk 22.24 35Jisu ingnisi asangho bangkrehini atum aphan amethang adung chehang-lo, lapen pulo, “Mane abang jongsi kethenei abang keplangji aning hang-lo tangte, alangli kebinei abang, lapen kadokave atum aban cheplang nangji.”#Mat 20.26-27; 23.11; Mar 10.43,44; Luk 22.26 36Ansi alangli inut a-oso ensi halatum angno parjap-lo; lapen la aphan arbaksi halatum aphan pulo, 37“Badu tame, nemen pen lasonthak thak a-oso inut aphan chak-lote, alangli ke nephan chak-lo; lapen nephan kechak abang aling ke, nephan kali, bonta nephan neketoi abang aphan chak-lo.”#Mat 10.40; Luk 10.16; Jon 13.20

Ehotur Kalidet Abang ke Ebelo Pu Alam

(Luk 9.49-50)

38Jon Jisu aphan pulo, “Inut amonit nangmen pen hi-i atum aphan kephlung netum thek-long-lo. Alangli ke netum asong amonit kalilo. Lasi netum alangliphan, ‘Nang lason klemri,’ pusi pulo.”

39Bonta Jisu pulo, “Alangliphan khangri. Pima nemen pen kemang-humeme akam keklem abang ke malomsopet aphi nephan kehingno alam puji, lapu kali. 40Pima ehotur kalidet abang ke ebelo.#Mat 12.30; Luk 11.23 41Chenamsi ne nangtum aphan nangpulang, nangtum ke nesangholo apotsi nangtum aphan lang harlung isi nangkepi abang aling ke jonghe setta anong-e longledetji, lapu kali.#Mat 10.42

Pap Kepaklemji Aphan Asat Hei Hei Kevang Alam

(Mat 18.6-9; Luk 17.1-2)

42“Badutame la nephan kekroi a-osomar angbong pen inutbak aphan pap paklemlote, alangliphan ke achethok along him kekoi-i a-arlong kethe homra talo along varchui memulo.#Ajehak a-Baibel hastro barim along ke, “Komane abang jongsi labangso a-osomar atum angbong pen inutbak aphan nephan pakroikrelote,” pusi ketok do 43Lasi nangri jongsi nangphan pap paklemlo tangte, la thanpetnon. Ri hongni pen Chom along, atheke kaita kemepmepin ame herang along kedamnang apar, ri longjong setta chethe angbong kelutdun memu.#Mat 5.30 44Hadak halatum aphan kecho angthan atum kaita thithe, lapen halatum aphan kecho ame kaita mepme.#Ajehak a-Baibel hastro barim along ke angdengso 44 ave 45Lapen nangkeng jongsi nangphan pap paklemlo tangte, la thanpetnon. Nangkeng hongni pen nangphan Chom arlo kevarchor apar, nang keng-longjong setta chethe angbong kelutdunlong memu. 46Hadak halatum aphan kecho angthan kaita thithe, lapen halatum aphan kecho ame kaita mepme.#Ajehak a-Baibel hastro barim along ke angdengso 46 ave 47Lapen nangmek jongsi nangphan pap paklemlo tangte, la hekjok-ra varchornon. Nangmek hini pen nangphan Chom arlo kevarchor apar nangmek isipet setta nang chethe angbong kelutdun memu.#Mat 5.29 48Hadak halatum aphan kecho angthan kaita thithe, lapen halatum aphan kecho ame kaita mepme.#Isa 66.24

49“Arnam aphan kethok athok ingti pen kepangthir asonthotsi abangphutin aphanta me pen pangthirji.

50“Ingti ke mesen, bonta la lamdak-lo tangte, la aphan kopusonsi padokthuthekjima? Nangtum aning arlo ingti chepadora ning kangsam penle dorap-rapnon.”#Mat 5.13; Luk 14.34-35

Currently Selected:

MARK 9: KARBIBSI

Highlight

Copy