MARK 10

Piso Kecheti Alam

(Mat 19.1-12; Luk 16.18)

1Ansi Jisu halabangso adim otekangsi Judia alongri damlo, lapen Jordan hapu parai kap-lo. Armu atum puthot alangli long chingrumdunpet-lo, lapen alangli kai kethan asonthotsi halatum aphan lam thanlo. 2Manene a-Pharisi atum Jisu along vangsi alangliphan adai kenepji abidi rilo. Lasi halatum alangliphan arjulo, “Inut amonit apiso chetilongma?”

3Jisu halatum aphan thakdunsi pulo, “Moses nangtum aphan kopi ahukumsi pilo?”

4Halatum thakdunsi pulo, “Kecheti aloh tok-ra pachetinang pusi Moses pulo.”#Keth 24.1-4; Mat 5.31

5Bonta Jisu halatum aphan pulo, “Nangtum aning kangtang-ong apotsi alangli nangtum aphan labangso aron tok-lo. 6Bonta Arnam pirthe kepinchongcheng ahut penta pinso-arlo pinchong-lo.#Kech 1.27; 5.2 7Labangso apotsi pinso abang api apo che-osi apiso pen dorap-rapji, 8lapen latum banghini inutpet plangji. Lasi hala pen apara latum ke banghini dojilang, lapu kali, bonta inutpetpo.#Kech 2.24 9Tangte Arnam kepachortang aling monit la pachekak nangnelo.”

10Halatum hem arlo chelutdamthudet aphi sangho atum Jisu aphan labangso alam arjuthulo. 11Alangli halatum aphan pulo, “Badutame, apiso chetira akaprek arloso enthulo tangte, alangli ke aphrang apiso abethursi beisa klemtang-lo. 12Lapen badutame, apenan chetira akaprek apinso aphan penan dothulo tangte, labangpi ke beisa klemtang-lo.”#Mat 5.32; 1 Kor 7.10-11

Bihek A-osomar Atum Aphan Jisu Ahirjume Kepi

(Mat 19.13-15; Luk 18.15-17)

13Jisu kepa-otjisi manene amonit atum alangli long osomar vanlo. Bonta Jisu asangho atum halabangso amonit atum aphan ingchek-lo. 14Jisu la thek-longsi aning thi-lo, lapen halatum aphan pulo, “Osomar atum aphan nedung pavanglongnon; latum aphan khangri. Pima Arnam a-Rat ke lapuson atum arat-lo. 15Ne nangtum aphan ahok alamsi nangpupo, badutame, oso asonthot-le Arnam a-Rat dengde tangte alangli jonghe setta labangso arlo lutdun longledetji.”#Mat 18.3 16Ansi alangli osomar atum aphan arbak-lo, lapen halatum athak ari batsi ahirjume pilo.

Inut Keplang-o Amonit Alam

(Mat 19.16-30; Luk 18.18-30)

17Ansi Jisu puthot kedamthujisi hadak pen kebar ahut inut amonit nangkatvirsi Jisu along vang-lo, lapen alangli ingno akengphu patongruisi alangliphan arjulo, “Kuru, nanglike inut mesen amonit-lo; kejut un-e achethe kelongji aphan ne kopi klem nangjima?”

18Jisu alangliphan pulo, “Nangli neliphan kopisi mesen pu puloma? Arnam inut apar ke baduta mesen kali. 19Pran enri, beisa klemri, chonghuri, chobei ahaki piri, pachereiri, nangpi nangpo anong pathenon pu hei hei ahukum an nangli chinipet-lo.”#Keba 20.12-16; Keth 5.16-20

20Ansi alangli Jisu aphan pulo, “Kuru, neli oso chedap ahut penta lahei hei kadokave ahukum kroipet-lo.”

21Bonta Jisu alangliphan langding-lo, lapen alangliphan ingjinsosi pulo, “Nangli eson keklem nangji dolang. Damra nangli mar do-an jorra atangka keduk kelak atum aphan pinon, anke sining athak nangli khi dopo, lapen vang-ra neli long nangdunnon.” 22Bonta alangli labangso alam arjulongsi amahang jang-ik-lo, lapen aning duksi damjuilo; pima alangli akhi do-olo.

23Jisu amethang asangho atum aphan talavir langsi pulo, “Akhi kedo-o atum Arnam a-Rat kelutdun ko-an akesung!”

24Sangho atum alangli lam pen apot manghuphrong-lo. Bonta Jisu halatum aphan puthot pulo, “Osomar atum! Arnam a-Rat kelutdun ko-an akesung! 25Ka-ut ingprim arme kelut akesung apar keplang-o abang Arnam a-Rat kelutdun sungmu.”

26Bonta sangho atum manghudetsi lahin lahin charjulo, “Tangte komatsi jok unjima?”

27Jisu halatum aphan langdingsi pulo, “Monit atum ke la un-e tema, bonta Arnam ke un. Arnam ke kadoka-veta klem un.”

28Ansi Pitor pulo, “Mathatha, netum kadokave che-o-etsi nang long nangdunlo.”

29Jisu pulo, “Ne nangtum aphan ahok alamsi nangpupo, badutame, ne pen apot lapen birta keme pen apot, ahem, kalite akorte, kalite angjirmar atum aphan, kalite api-apo, kalite asomar, kalite arit hei hei keche-otekang abang ke la apar kelong ongthu muchotji. 30Alangli labangso akai angbongta aphrang apar phan pharo ahem, lapen akorte, lapen angjirmar, lapen apei, lapen asomar lapen arit longthuji, lapen alangli la hei hei pen pen kechenekta phoji; lapen mo kevangji akai ahut alangli kejut un-e achethe longji. 31Bonta non kepaphrang penang atum paphiji, lapen non kepaphi penang atum paphrangji.”#Mat 20.16; Luk 13.30

Jisu Amethang Kethiji Alam Batai Kethom Aphong Kechethan

(Mat 20.17-19; Luk 18.31-34)

32Jisu lapen asangho atum Jerusalem kedamjisi tovar dambomlo, lapen Jisu ke halatum aphrang aphrang damlo. Jisu asangho atum manghuphrong-lo, lapen aphi aphi kedun amonit atum ke pherelo. Alangli puthot asangho bangkrehini atum aphan cheponsi amethang aphan keplangji dok dok alam halatum aphan thanlo. 33Alangli halatum aphan pulo, “Ili Jerusalem arludampo, lapen Monit a-Sopo aphan kurusar kethe atum lapen aron thekser atum arideng hodaidetpo. Halatum alangliphan ado padosi kepathiji ahukum pipo, lapen alangliphan Jihudi kalidet atum arideng hodaipo. 34Halatum alangliphan pinremji, abang athak ingthokji, champre abu pen sapji lapen pathilotji; bonta nithom aphi alangli rengthusi thurji.”

Jems Lapen Jon Jisu Aphan Kechoningri Alam

(Mat 20.20-28)

35Ansi Jebedi asopo Jems lapen Jon Jisu adung vangsi pulo, “Kuru, netum nang pen kehang aling nang netum aphan nekepijisi netum ning hang-lo.”

36Alangli halatum aphan pulo, “Ne nangtum aphan kopisi nangklempi nangjima?”

37Halatum alangphan pulo, “Nang nangmethang adak-atur a-Rat angbong recho anghoi athak kangniji ahut, nang netum aphan nang ar-e anat inut lapen nang arvi anat inut nekepangnilongjisi netum ning hang-lo.”

38Bonta Jisu halatum aphan pulo, “Nangtum kopisi kehang, lake nangtum chinine. Ne kejun aharlung pen nangtum jun unjima? Kalite ne ke-en abaptisom asonthot abaptisom nangtum en-unjima?”#Luk 12.50

39Halatum pulo, “Netum un.”

Jisu halatum aphan pulo, “Ne kejun aharlung pen nangtum junji, lapen ne ke-en abaptisom asonthot abaptisom nangtum enji, 40bonta neke ne ar-e kalite ne arvi anat kepangniji aphan kangvaiji ajakong ave; kesikpitang atum aphansi Arnam labangso adim hei hei pidetji.”

41Hala akaprek sangho bangkep atum la arjulongsi Jems lapen Jon aphan aning jangjedung-dang-lo. 42Lasi Jisu halatum kadokave aphan amethang adung hangpetsi pulo, “Honghari atum aphan kepangri atum ke halatum aphuthak ajakong do, lapen keja atum hukum kepiji ajakong do pame, lake nangtum chinilo. 43Bonta nangtum angbong ke lapuson kalidet nangji. Nangtum angbong badutame hukum kepiji ajakong kedo abang keplangji aning hang-lo tangte, alangli ke nangtum aban plangvek nangji.#Luk 22.25-26 44Lapen badutame nangtum angbong aphrangsi abang keplangji aning hang-lo tangte, alangli ke kadokave atum aban plangvek nangji.#Mat 23.11; Mar 9.35; Luk 22.26 45Chenamsi, Monit a-Sopota bang arideng pen keru kethai kelongjile kevang kali, bonta keru kethaiji, lapen ake-ongpi atum aphan kepajokjisi amethang apran kechepiji aphan vang-lo.”

Bartimais Pu Inut Amek Kave Abang Aphan Kepame

(Mat 20.29-34; Luk 18.35-43)

46Ansi halatum Jeriko arongsopi nanglelo. Jisu amethang asangho atum lapen armu ake-ongpi atum pen pen Jeriko arongsopi pen nangkebar ahut Timaeus asopo Bartimais pu inut hilolo amek kave lapen kechohang chorek abang tovar akung ingnilunsi dolo. 47Alangli lake Najareth asor a-Jisulo pu arjulongsi ase kethe pen hangsi kepuji pangcheng-lo, “O David asopo, Jisu! Nephan ne-ingjinsotha!” 48Ake-ongpi atum alangliphan dojoinon pusi ingchek-lo. Bonta alangli aphrang apar kehang ase pathemuchotsi pulo, “O David asopo, Jisu! Nephan ne ingjinsotha!”

49Jisu chingtonkoksi pulo, “Alangliphan ladak vannon.”

Lasi alangliphan hangsi pulo, “Ning cheparongnon, lapen thurnon, alangli nangliphan nangkehang-lo.”

50Ansi labangso amonit achoidingpo chevar-tekangphitsi lapen thurjetsi Jisu adung vang-lo. 51Jisu labangso abang aphan arjusi pulo, “Neli nangliphan kopisi klem nangjima?”

Amek kave abang thakdunsi pulo, “Kuru, neli nelimek kechecharjisi ning hang-lo.”

52Jisu alangliphan pulo, “Damnon, nangli methang akekroisi nangliphan pametang-lo.” Lapen hala mamat alangli mek checharlo, lapen alangli Jisu along tovar dunlo.

Currently Selected:

MARK 10: KARBIBSI

Highlight

Copy