MARK 8
8
Bang Suri Phli Amonit Aphan Jisu An Kepacho
(Mat 15.32-39)
1Halabangso ahut ake-ongpi armu atum hadak chingrumthulo. Halatum kechoji aphan thangta avedet-lo. Lasi Jisu asangho atum aphan amethang adung chehangsi pulo, 2“Ne la armu atum aphan ingjinsosi neningduk-lo, pima halatum nelong nangkedodun nithom dotang-lo, lapen nonke halatum kechoji aphan thangta avelo, 3lapen ne halatum aphan thang pachochepin pen ahem toilote, halatum tovar ebeng a-ok ainitisi klibupji tahai, atheke halatum penang atum ke heloving pensi vang-lo.”
4Asangho atum Jisu aphan thakdunsi pulo, “Komatsi ladak kejejangtang ajole la kadokave atum kechoji aphan kedorphlup a-an longthek poma?”
5Ansi Jisu halatum aphan arjulo, “Nangtum along him plang ko-an doma?”
Halatum pulo, “Plang throksi.”
6Armu atum longle athak kangniji aphan Jisu hukum pilo. Alangli him plangthroksi enlo, lapen Arnam aphan kero pisi la beng-lo; lapen armu atum aphan keparonjisi la sangho atum aphan pilo, lapen halatum la armu atum aphan ronlo. 7Halatum along oksota asapso dolo. Jisu Arnam aphan kero pisi lata rontu pusi asangho atum aphan pulo. 8Halatum la chosi ingkrangpet-lo, lapen ahim achet ahin humsi halatum ton throksi papleng-lo. 9Hadak bang suri phli anbak amonit dolo. 10Ansi Jisu hala monit atum aphan toilo. Lapen hala mamat alangli amethang asangho atum pen telong chethapsi Dalmanutha alongri damlo.
Pharisi Atum Kemanghumeme Akam Angthek Keri
(Mat 16.1-4)
11Manene a-Pharisi atum Jisu along vangsi alangli pen lam kechedanji pangcheng-lo. Halatum alangliphan asat kelangji aning hang-lo; lasi alangli jakong sining pensi vang-lo pu angthek paklangtha pusi halatum alangliphan pulo.#Mat 12.38; Luk 11.16 12Alangli aning aduk pen achethepi chetiphunsi pulo, “Kopi apotsi labangso a-oveke kemanghumeme akam angthek riverloma? Chenamsi neli nanglitum aphan nangpulang: labangso a-ove aphan thangnat akemanghumeme akam angthekta paklangkledetji.”#Mat 12.39; Luk 11.29
13Ansi alangli halatum aphan otekang-lo, lapen telong chethapsi talo hapu parai damjuilo.
Pharisi Lapen Herod Atum Athap Alam
(Mat 16.5-12)
14Jisu asangho atum him ponteng-nedet-lo. Telong arlo halatum along him kedo eplangnat-lo. 15Jisu halatum aphan pacheretoisi pulo, “Pharisi atum athap lapen Herod athap aphan langpamera cherenon.”#Luk 12.1
16Ansi halatum angbong lam chethanseisi pulo, “Ilitum along him avedet apotsi alangli la pulo.”
17Jisu halatum kepu alam chinilo. Lasi alangli halatum aphan pulo, “Nangtum kopi apotsi nangtum along him kavedet alamle chethanseiloma? Nangtum non anta thek-longle lapen chinidunde langma? 18Nangtum nangmek do setta thek-longlema? Nangtum ano do setta arjulonglema?#Jer 5.21; Eze 12.2; Mar 4.12 19Hala him plangpho bengsi la bang suri pho amonit atum aphan pidet aphi nangtum labangso ahim achet ahin humsi ton ko-an papleng-loma?”
Halatum pulo, “Ton krehini.”
20Jisu halatum aphan puthulo, “Lapen hala him plang throksi bengsi la bang suri phli amonit aphan pidet aphi nangtum ahin ahim achet humsi ton ko-an papleng-loma?”
Halatum thakdunsi pulo, “Ton throksi.”
21Alangli halatum aphan pulo,
“Nangtum non anta chininelangma?”
Bethsaida Arongsopi Kedo Amek Kave Abang Aphan Kepame
22Ansi halatum Bethsaida arongsopi vang-lo. Monit atum Jisu along inut amek kave abang aphan vansi, labangso abang aphan ottha pusi choningrilo. 23Jisu la hilolo amek kave abang aphan ari otsi rong angtan ponlo; lapen amek along ingthoksi lapen ari bisi arjulo, “Nang kopine thek-long-loma?”
24Halabangso amonit aphu chingthursi lang-lo, lapen pulo, “Ne monit thek-long-lo. Halatum thengpi arong nangnak-lo, lapen dambon banlo.”
25Jisu puthot labangso amonit amek along ari bat-lo. Nonke labangso amonit langdingsi dolo; alangli mek checharlo, lapen kadokave amarta thek-long pamelo. 26Ansi Jisu labangso abang aphan ahem toisi pulo, “Rong anat lutponri.”
Jisu Ke Khristolo Pu Pitor Kepu Alam
(Mat 16.13-20; Luk 9.18-21)
27Ansi Jisu lapen asangho atum Sijeria Philipi alongri kedo arong hei hei damlo. Halatum tovar kedam un ahut Jisu amethang asangho atum aphan arjusi pulo, “Monit atum nephan komat pusi puma?”
28Halatum thakdunsi pulo, “Manene atum pulo, nanglike Jon Baptist-lo; akaprek atum pulo, nanglike Elijahlo; lapen hala akaprek atum pulo, nanglike Arnam amontri inut-lo.”#Mar 6.14-15; Luk 9.7-8
29Bonta alangli halatum aphan arjulo, “Tangte nangtum ke? Nangtum ke nephan komat pusi pujima?”#Jon 6.68-69
Pitor thakdunsi pulo, “Nang ke Khristolo.”
30Ansi Jisu halatum aphan hukum pisi pulo, “Nangtum badu aphanta la nelamjir thanri.”
Jisu Amethang Kethiji Lapen Kerengthuji Alam Kechethanmek
(Mat 16.21-28; Luk 9.22-27)
31Ansi Jisu amethang asangho atum aphan lam kethanji pangcheng-lo, “Monit a-Sopo kesung pho-o nangji; lapen akesar atum lapen kurusar kethe atum, lapen aron thekser atum alangliphan chakchedetji. Alangliphan pathilotji lapen nithom aphi alangli rengthusi thurji.” 32Alangli halatum aphan labangso alam than pachinidak-lo. Pitor alangliphan ihi anat ponsi alangliphan kangchekji pangcheng-lo. 33Bonta Jisu chetevarsi asangho atum aphan langding-lo, lapen Pitor aphan ingcheksi pulo, “Ne mek angden pen damnon, Soitan! Pima nang Arnam aning kehang akam aphan mathathesi monit aning kehang akam aphansi mathalo.”
34Ansi Jisu armu lapen amethang asangho atum aphan amethang adung chehangsi halatum aphan pulo, “Mane abang jongsi nelong kedunji aning hang-lo tangte, alangli amethang aphan chemathathedet-ra, lapen amethang athengparpan cheponra nephi phi nangpadun nang.#Mat 10.38; Luk 14.27 35Pima amethang apran kechepajokji aning kehang abang aling ke la pangbodetji, bonta ne lapen nebirta keme pen apot amethang apran kepangbodet abang aling ke la chelongji.#Mat 10.39; Luk 17.33 36Pima mane abang pirthe adang an long-et setta amethang achethe pangbodet-lote, alangli kopi ale doma? 37Pima inut amonit kopi pensi amethang achethe chenamthu unjima? 38Mane abang jongsi la kekroikre lapen papi a-ove angbong, ne lapen ne kethan alam pen apot therakduk-lo tangte, Monit a-Sopota a-Po adak atur pen lapen kangthir apherangke atum pen kevangji ahut halabangso abang pen apot therakdukji.”
Currently Selected:
MARK 8: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
