MARK 14

Jisu Aphan Kepathiji Abidi Keri

(Mat 26.1-5; Luk 22.1-2; Jon 11.45-53)

1Kejok Achojun a-Meipi lapen Thap Kave a-Him Achojun Ameipi nangkeleji nini dolang. Kurusar kethe atum lapen aron thekser atum kepacherei abidi pen Jisu aphan kenepji lapen kepathiji abidi ribomlo.#Keba 12.1-27 2Halatum pulo, “Chojun Ameipi ahut ke ilitum la klem nangne, pima monit atum huriseiji tahai!”

Bethani Arongsopi Along Jisu Aphu Athak Jangthu Kedung

(Mat 26.6-13; Jon 12.1-8)

3Bethani arongsopi kedo Simon pu inut si-i akeso kelong abang ahem Jisu dodamlo. Jisu an kecho kangni un ahut inut arloso kenemprujin athengpi arong pen kesor, adorsopik ajangthu nempru Alabastar pu a-arlong kelok abong pen vansi hadak vang-lo, lapen la arlong kelok abong paphukdaksi Jisu aphu athak dungjirlo.#Luk 7.37-38 4Bonta hadak kedo amonit atum angbong manene atum aning oilaksi lahin lahin chepulo, “Kopi athesi labangso ajangthu nempru thangbakbele phalangnoloma? 5Pima rup atangka pharo kethom sose ador pen labangso ajangthu nempru jorsi, atangka keduk-kelak atum aphan pi unji apot-lo!” Lapen halatum alangliphan jasemetsi sorsarrip-lo.

6Bonta Jisu pulo, “Alangliphan thangta klemri! Nanglitum alangliphan kopi athesi pasung-loma? Alangli neliphan mesen akamsi klemtang-lo. 7Pima keduk-kelak atum nanglitum along kaiketa doverji, lapen nanglitum aning kehang aling nanglitum halatum aphan rap unji;#Keth 15.11 bonta neli ke nanglitum along dovervedetji. 8Labangpi ke un an klemtang-lo. Neli bang arpum kepipji aphansi alangli aphrang pen la neli bang jangthu nempru patiptang-lo. 9Lapen chenamsi neli nanglitum aphan nangpulang, pirthe adang birta keme kepachethang adim aling labangpi aphan kechepamathathuji aphan la alangli keklemtang akamta thanpondetji.”

Jisu Aphan Hotur Arideng Kehodaiji Aphan Judas Kekroidun

(Mat 26.14-16; Luk 22.3-6)

10Hala sangho bangkrehini atum angbong pen Judas Iskariot pu inut abang Jisu aphan kurusar kethe atum arideng kehodaijisi halatum along damlo. 11Ansi halatum la arju longsi chehok-lo, lapen alangliphan tangka kepiji chak-lo. Lasi alangli Jisu aphan halatum arideng kehodaijisi asoi keme ribomlo.

Jisu Amethang Asangho Atum Pen Kejok Achojun Ameipi A-an Kecho

(Mat 26.17-25; Luk 22.7-14,21-23; Jon 13.21-30)

12Thap Kave a-Him Achojun a-Meipi aphrangsi arni, atheke Kejok Achojun a-Meipi aphan biresak aso kethu arni Jisu asangho atum Jisu aphan arjulo, “Kejok Achojun a-Meipi a-an kechoji aphan netum konatsi sikdam nangjima? Nang ning kehang kopima?”

13Alangli asangho bang hini atum aphan toisi pulo, “Rongsopi damnon. Hadak tebuk pen lang kepon inut amonit nangtum pen chetongji. Nang-tum alangli phi phi dunra, 14alangli kelutdam ahem ahemphu aphan punon, ‘Kuru pulo, neli neli sangho atum pen Kejok a-Mei a-an kechoji aphan alohi kedo angdeng konatma?’ 15Anke alangli mamat nangtum aphan hala kesiktang lapen kenangji amar an kedo angsong akethe angdeng nangpaklangpo. Etum an kechoji aphan hadak-le sikdamnon.”

16Ansi sangho atum nangbarsi rongsopi damlo, lapen alangli halatum aphan kethan asonthotsi halatum kadokave longdamlo; lapen halatum Kejok Achojun a-Meipi a-an sikdamlo.

17Arni kangsam ahut Jisu amethang asangho bangkrehini atum pen vang-lo. 18Halatum ingnisi an kecho un ahut Jisu pulo, “Chenamsi ne nangtum aphan nangpulang, nangtum angbong inut abang, atheke ne pen an kecho rap rap abang nephan hotur arideng hodaiji.”#Lun 41.9

19Sangho atum aning aduk dolo, lapen inut pen aphi inut Jisu aphan karjuji pangcheng-lo, “Lake neli kali, kalima?”

20Jisu halatum aphan thakdunsi pulo, “Alangli ke nangtum bangkrehini angbong pen inut abang-lo; atheke ne pen kasu ehong along him kenim rap rap abang helo. 21Hastro along ketok asonthotsi Monit a-Sopo thiji; bonta pei pei! Hala Monit a-Sopo aphan hotur arideng kehodai abang ko-an akesung pho nangpoma! Halabangso abang amahang thekthedet asonte alangliphan meparji apot-lo.!”

Hemphu A-an Kecho

(Mat 26.26-30; Luk 22.14-20; 1 Kor 11.23-25)

22Halatum kecho un ahut Jisu him eplang ensi hirjume hang-lo, lapen la bengsi asangho atum aphan pilo, lapen pulo, “La entha, lake nebang arpumlo.”

23Labangso aphi alangli harlung ehong enlo, lapen Arnam aphan kero pisi halatum aphan pilo; lapen halatum la junlo. 24Jisu halatum aphan pulo, “Lake nevilo; ongdung atum aphan ajok kedung avilo; lake Arnam akechechak kepathir-i avilo.#Keba 24.8; Jer 31.31-34 25Ne chenamsi nangtum aphan nangpulang, mo Arnam a-Rat angbong drakha ahorlang kemi kejunji arni nangleletik ke ne kaiketa drakha ahorlang junjelo.”

26Ansi halatum kero alun lundetsi Oliv anglong along damlo.

Sangho Atum Katkoiji Pu Jisu Kemontri Alam

(Mat 26.31-35; Luk 22.31-34; Jon 13.36-38)

27Jisu halatum aphan pulo, “Nang-tum do-an nephan otekangsi katkoiji; pima hastro pulo, ‘Biresak kevi abang aphan Arnam pathipo, lapen biresak atum an pratseipo.’#Zeka 13.7 28Bonta nephan neparengthudet aphi ne nangtum aphrang ha Galili adet dampatenoji.”#Mat 28.16

29Pitor thakdunsi pulo, “Kadokave atumle nangphan nang-ote-kang-et setta neke nangphan kaita nang-o-e.”

30Jisu Pitor aphan pulo, “Chenamsi ne nangphan nangpulang, peningve mamat vo batai hini kuke ako nang nephan chinine pusi batai kethom puji.”

31Bonta alangli abatai batai ningje-thipsi pulo, “Ne nanglong nangthidun nangkokji setta ne lason kaita pupedetji.”

Lapen sangho kadokave atumta lasonsi pupet-lo.

Gethsemane pu Apaiberi Along Jisu Arnam Kardomdam

(Mat 26.36-46; Luk 22.39-46)

32Halatum Gethsemane pu elong adim vang-lo, lapen Jisu amethang asangho atum aphan pulo, “Ne Arnam kardomdam ahut nangtum ladak-le ingniphrongtha.” 33Alangli Pitor, Jems lapen Jon aphan ari cheponlo. Alangli aning oise lapen aning dukpik-lo. 34Ansi alangli halatum aphan pulo, “Ne ning dukpik-lo; la pen ajok ne kethithuji anbak-lo. Dak-le dora no kang-ar pen dotha.”

35Alangli asapso damchotsi longle athak domkhrup-lo, lapen unte halabangso akesung apor alangli pen kepaheloji aphan alangli Arnam cho-ardomlo. 36Alangli choningrisi pulo, “O Po, O ne-Po! Nang ke kadokaveta klem un. Labangso aharlung ne long pen pahelotha. Bonta ne ning kehang kali, nangning kehangle paplengnang.”

37Alangli vangsi halatum amek kejangklip thek-long-lo. Alangli Pitor aphan pulo, “Simon, nang nangmek kejangma? Nang porphai isi anta honding un-edetma?” 38Lapen alangli halatum aphan pulo, “Nangtum asat keklokledetjile no kang-ar pen dora Arnam ardomvernon. Chenamsi karjong ke aning hang, bonta ok ke ajakong ave.”

39Alangli damthulo, lapen aphrang alamthethot pen Arnam ardomlo. 40Alangli puthot vang-lo, lapen sangho atum aphan amek kejangklip thek-long-lo, pima halatum kemek-i saidelo, lapen halatum alangliphan thakdun-thekthe det-lo.

41Alangli batai kethom aphong vangthusi halatum aphan pulo, “Nangtum non anta nangmek jangbomsi sangbom langma? Chok-lo! Apor nangletang-lo! Langtha, Monit a-Sopo aphan papi atum arideng hodaitang-lo! 42Thurnon, ili damlonang! Langtha, nephan hotur arideng kehodaiji abang nangletang-lo!”

Jisu Aphan Kenep

(Mat 26.47-56; Luk 22.47-53; Jon 18.3-12)

43Jisu lam keningje un ahut Judas pu sangho bang krehini angbong pen inut abang hadak vang-lo. Kurusar kethe atum, aron thekser atum lapen akesar atum nangketoidun a-armu atumta alangli long nangdunlo. Halatum arideng nokjir lapen kaibong dolo. 44Ansi Jisu aphan hotur arideng kehodaiji abang halatum aphan angthek paklangsi pulo, “Ne kangjupji abang aling helo, nangtum kenangji abang-lo. Alangliphan nep-ra paton pame pen ponnon.”

45Judas nangkele pen mamat Jisu adung damsi pulo, “Kuru!” Lapen alangli Jisu aphan ingjup-lo. 46Ansi halatum Jisu aphan nepsi ot-het-lo. 47Bonta hadak karjapphrong atum angbong pen inut abang anokjir chesatsi kurusar kethenei aban ano ehi chorphlak-lo. 48Lasi Jisu halatum aphan pulo, “Nanglitum neliphan kenepji aphan dokait aphan asonthak thaksi nokjir lapen kaibong vansi vang nangkok-loma? 49Neli arnivang Kardomhemthepi arlo lam kethan ahut neli nanglitum pen dorap rap-lo, lapen nanglitum neliphan nepnedet-lo. Bonta hastro alam chekokvek nangji.”#Luk 19.47; 21.37 50Ansi asangho atum an alangliphan oprupsi katkoilo.

51Jisu aphi phi inut ariso dunlo. Alangli linen ape epaknat pindeng-lo. Halatum alangliphan kenepji bor-ilo. 52Bonta alangli ape che-otekangsi areng angse kat-lo.

Jisu Aphan Meipi Along Kangsai

53Ansi halatum Jisu aphan kurusar kethenei akeng-ri ponlo. Kurusar kethe atum an, akesar atum lapen aron thekser atum hadak chingrumpet-lo. 54Pitor achar achar pen Jisu aphi aphi dunsi kurusar kethenei atikup arlo anta dunlo, lapen keton aron-aso atum pen ingni rap rapsi me chinghipdunlo. 55Ansi kurusar kethe atum lapen kangsai Ameipi amonit atum an Jisu aphan kepathi longji aphan alangliphan adai kepado ahaki ribomlo, bonta halatum long thekthedet-lo. 56Ake-ongpi atum alangli bethursi kechobei ahaki pilo setta halatum kepi ahaki chetontedet-lo.

57Ansi manene atum Jisu abethursi kechobei ahaki pisi pulo, 58“‘La monit ari pen kekim a-Kardomhemthepi parudetsi nithom angbong monit atum ari pen kekim kalidet akardom ahemthepi ne kimpo.’ pu labangso amonit kepu netum arjudun long-lo.”#Jon 2.19 59Tebonta halatum kepi ahaki chetontedet-lo.

60Lapen kurusar kethenei abang mei angbong arjapsi Jisu aphan arjulo, “Latum nangli bethursi kepu alam nangli kechethakdunji alam avema?”

61Bonta Jisu dojoisi thangta chethak-dundedet-lo. Puthot kurusar kethenei abang alangliphan arjulo, “Ahirjume atheng a-Arnam a-Sopo Khristo nangli heloma?”

62Jisu thakdunsi pulo, “Neli helo, lapen Monit a-Sopo Jakong Kethenei a-Bang ar-e kangni, lapen sining anghun athak kevang nanglitum kadokave thek-longji!”#Dan 7.13

63Kurusar Kethenei abang amethang achoi keding hei hei ching-seksi pulo, “La apar ilitum kopi ahaki nangjilangma! 64La Arnam aphan kepinrem nanglitum arjulongtang-lo. Nanglitum kopisi kemathama?”#Levi 24.16

Alangli kethi nangji a-ot do pusi halatum kadokaveta pupet-lo.

65Lapen manene atum alangliphan kangthokji pangcheng-lo, lapen amahang dipsi, alangliphan tengsi pulo, “Nangphan nangketeng abang komatma, putha!” Lapen keton aron-aso atum alangliphan tengsi pondet-lo.

Pitor Jisu Aphan Chinine Pu Kepu Alam

(Mat 26.69-75; Luk 22.56-62; Jon 18.15-18,25-27)

66Aber atikup along Pitor kedo un ahut Kurusar kethenei abanpi inut vang-lo, 67lapen Pitor aphan hadak me kechinghip thek-longsi alangliphan langdingsi pulo. “Nanglita hala Najareth asor a-Jisu along kedodun abang-lo.”

68Bonta alangli chekrongkredetsi pulo, “Neli chinine, nangli kopisi kepu-ma, lake neli chinine,” Lapen alangli thekup anghap amahang anat damlo, lapen hala mamat vo ejon kulo.#Ajehak a-Baibel hastro barim along ke, “Hala mamat vo ejon kulo,” pu alam ketok ave

69Halabangso abanpi alangliphan hadak thekthu longsi hadak karjap-phrong atum aphan pulo, “Labangso amonitta halatum angbong inut-lo!” 70Bonta Pitor puthot chekrongkredet-lo.

Malomso aphi hadak karjapphrong atum Pitor aphan pulo, “Ahok-lo, nanglita halatum angbong inut-lo. Pima nanglita Galili amonit-lo.”

71Lasi Pitor semetangsi puthulo, “Neli seme tangsi pulo, neli ahok alamsi thanlo! Jongsi kali tangte Arnam neliphan aduk nepapinang. La nanglitum kepudam amonit aphan neli chinine binong.”

72Ansi hala mamat vo ejon batai hini aphong kulo, lapen Jisu kepu, “Vo ejon batai hini aphong kuke ako nang nephan batai kethom aphong chinine pusi puji.” Pu alam Pitor chemathadamlo. Lapen alangli jasemet chirulo.

Currently Selected:

MARK 14: KARBIBSI

Highlight

Copy