MARK 15

Kangsaijisi Jisu Aphan Pilat Angno Kevan

(Mat 27.1-2,11-14; Luk 23.1-5; Jon 18.28-38)

1Adap kangthang pen mamat kurusar kethe atum hala akesar atum, aron thekser atum lapen kangsai Ameipi amonit atum aphan chetongdamsi chingvailo, lapen alam parailo. Halatum Jisu aphan kokponsi Pilat arideng hodailo. 2Pilat alangliphan arjulo, “Nangli Jihudi atum arechoma?”

Jisu thakdunsi pulo, “Nanglisi pulo.”

3Kurusar kethe atum alangliphan adai tin-olo. 4Lasi Pilat alangliphan arjuthulo, “Nangli thangta chethakdun movema? Halatum nangliphan ko-an adai tinloma, lale chemathatha!”

5Bonta Jisu thangta chethak-dun-dedet-lo. Lasi Pilatke manghuhak-lo.

Jisu Aphan Kepathiji Ahukum Kepi

(Mat 27.15-26; Luk 23.13-25; Jon 18.39—19.16)

6Kejok Achojun a-Meipi ahuttin rat atum kehang aling phatek kejang atum angbong pen inut aphan Pilat pajokbom. 7Ansi Barabbas pu inut amonit hala recho abekethur atum pen pen phatek jang-lo. Halatum recho abekethur ahut monit apran enlo. 8Armu atum vangsi Pilat kai keklembom ateng keklemji aphan choningrilo. 9Bonta Pilat thakdunsi pulo, “Neli nanglitum aphan Jihudi atum arecho nangpajokpi nangjima? Nanglitum aning kehang laheloma?” 10Pima kurusar kethe atum kelang un-e apotsi Jisu aphan alangli rideng hodailo pu alangli chinipamelo.

11Bonta Jisu alar Barabbas aphan kepalophlotji aphan Pilat aphan kepa-choningrijisi kurusar kethe atum rat atum aphan chorung-lo. 12Pilat puthot armu atum aphan pulo, “Tangte nanglitum Jihudi atum arecho pu kepu abang aphan neli kopi inghoi nangpoma?”

13Halatum puthot hangjosi pulo, “Alangliphan thengparpan athak saknon!” 14Pilat halatum aphan pulo, “Kopi apot-lo? Alangli kopi akehingnosi keklemlo?”

Bonta halatum ansose kehang ase pathethumuchotsi pulo, “Alangliphan thengparpan athak saknon!”

15Ansi Pilat armu atum aning kepangsamji aning hangsi halatum aphan Barabbas pajokpilo; lapen champre abu pen Jisu aphan pachoksi thengparpan athak kepasakji aphan hodaidet-lo.

Chedanbang Atum Jisu Aphan Kepinrem

(Mat 27.27-31; Jon 19.2-3)

16Chedanbang atum Jisu aphan govornor ahem atikup arlo ponlo, lapen chedanbang amokha isi an aphan chehangsi pangrumpet-lo. 17Halatum alangliphan hepi arje ape pindeng-lo, lapen ingsu aro pen phu avaikang selamsi alangli phu athak kup-lo. 18Lapen, “Kardom, Jihudi atum arecho!” pusi halatum alang-liphan kepalemlem pen kardom kepiji pangcheng-lo. 19Lapen halatum arpik ehong pen alangli phu athak theng-lo, lapen abang athak ingthok-lo, lapen akengphu patongruisi alangliphan palem lem pen ardomlo. 20Halatum alangliphan ingnekchoidet aphi hala hepi arje ape phlok-lo lapen ape methang pindengthulo. Anke halatum alangliphan theng parpan athak kesakji aphan ingtan ponlo.

Jisu Aphan Thengparpan Athak Kesak

(Mat 27.32-44; Luk 23.26-43; Jon 19.17-27)

21Ansi Simon pu abang havar pen kevang un ahut tovar chetongsi chedanbang atum alangliphan toi bor-isi Jisu athengparpan paponlo. Alangli ke Alekjendar lapen Raphas apolo, lapen Sairen arongsopi asorlo.#Rom 16.13 22Halatum Jisu aphan Golgotha, atheke “Phubongkok” pu adim ponlo. 23Halatum alangliphan Mirh pu araki kedo abap keho pen kepang-vuitang adrakha ahorlang pilo, bonta Jisu la junjedet-lo. 24Ansi halatum alangliphan thengparpan athak sak-lo; lapen komat abang kopi longjima, la kepatiniji aphan halatum khadot pathusi alangli pe chethak-lo. 25Halatum alangliphan thengparpan athak kesak ahut apor adap baji sirkep-lo. 26Alangliphan adai ketin alamthe kepachini ke, “JIHUDI ATUM ARECHO,” puhelo. 27Halatum Jisu along akaprek bang hini aphanta thengparpan athak sakdunlo. Inut abang aphan Jisu ar-e anat lapen akaprek inut aphan ke Jisu arvi anat sak-lo. 28Lapen hastro along ketok, “Alangliphanta hala adai kedo atum aphan pen pen lakha ponrap-pet-lo,” pu alam chekokpet-lo.#15.28 Ajehak a-Baibel hastro barim along ke labangso alam ketok ave

29Tovar kevang-kedam atum aphu chehejuksi lapen alangliphan ingnekchoisi pulo, “Ai! Kardomhemthepi kephrira nithom angbong kekimthuthek abang!#Lun 22.7; 109.25; Mar 14.58; Jon 2.19 30Nonke thengparpan pen nanghirra nangmethangle chepajoktha!”

31Lasonthak thaksi kurusar kethe atum lapen aron thekser atumta Jisu aphan ingnekchoisi lahin lahin chepulo, “Alangli bang aphan ke pajokthek, bonta amethang ke chepajok thekthe! 32Ilitum kethek-longra alangliphan kekroithekji aphan la Khristo, atheke Israel atum arecho nonke theng parpan pen nangpahirnang.” Lapen alangli long thengparpan athak kesak dun atumta alangliphan putot-lo.

Jisu Kethi

(Mat 27.45-46; Luk 23.44-49; Jon 19.28-30)

33Nerlo chitim ahut pen arni kangsam baji kethom ahut an det adang ingtingkuk cheplang-lo. 34Arni kangsam baji kethom apor Jisu ase ke-the pen hangsersi pulo, “Eloi, Eloi lama sabakthani?” Labangso alam atheke, “Ne Arnam, ne Arnam! Nang nephan kopisi ne-obup loma?” puhelo.#Lun 22.1

35Hadak karjapphrong manene atum la arjulongsi pulo, “Arjutha, alangli Elijah aphansi kehang.” 36Ansi halatum angbong inut abang katvirsi sponj isi drakha ahorlang kethor along nimlo lapen arpik ehong pen la krongsi la alangli ingtur along bat-lo lapen pulo, “Thaho! Alangliphan thengparpan pen kepahirji aphan Elijah vangjima, vangvema, lale langdun sinangho!”

37Ansi Jisu Jasemet hangsersi thilot-lo.

38Kardomhemthepi arlo kangthir angdeng angno anat kehing ape, athak pen aber anta chingseksorlo. 39Hadak alangli ingno karjapther, chedanbang bang pharo ahemphu abang Jisu lapuson kethi thek-longsi pulo, “Ahok-lo, labangso abang Arnam a-Sopo binong-lo!”

40Hadak achar pen kelangdun arlosomar atumta dolo. Halatum angbong Megdala asor a-Meri, Jems akebi lapen Joseph apei Meri, lapen Salomita dolo. 41Jisu Galili adet kedo ahut latum alangli long dunlo, lapen alangliphan ru-thailo. Alangli pen pen Jerusalem kedam rap rap akaprek ake-ongpi arlosomar atumta hadak dolo.

Jisu Abang Arpum Tipit Along Kebidam

(Mat 27.57-61; Luk 23.50-56; Jon 19.38-42)

42Arni ingsamlo, lapen lake Kesik Kedang arni, atheke Sabbath Arni pen aphrang arnilo apotsi, 43Arimathea asor a-Joseph angthin chepathesi Pilat along damlo, lapen Jisu abang arpum kepon longji aphan choningrilo. Alangli ke kangsai amei amonit atum angbong inut aman kedo abang-lo, lapen alangli methangta Arnam a-Rat aphan inghongding-lo.

44Bonta Jisu thitang-lo pu arjulongsi Pilatke manghuhak-lo. Lasi alangli chedanbang bang pharo ahemphu aphan hangsi Jisu thi-ettang-loma pusi arjulo. 45Lapen Chedanbang bang pharo ahemphu pen Jisu thi-ettang-lo pu chinisi alangli Joseph aphan Jisu abang arpum paponlong-lo. 46Joseph linen ape keme epak namlo, lapen abang arpum pasunsi la pen perhetsi arlong kehongtang atipit along bidamlo. Ansi alangli atipit amangho along arlong pakong-long thip-lo. 47Megdala asor a-Meri, lapen Joseph apei a-Meri atum langdun pamesi Jisu abang arpum kebidam adim thek-long pamelo.

Currently Selected:

MARK 15: KARBIBSI

Highlight

Copy