MARK 16

Jisu Kethi Pen Kethur

(Mat 28.1-8; Luk 24.1-12; Jon 20.1-10)

1Sabbath arni aphi Megdala asor a-Meri lapen Jems apei Meri lapen Salomi atum Jisu abang arpum kepatipji aphan kenemprujin amar namdamlo. 2Hithi arui kecheng arni adapprang, arni kevang pen mamat halatum thiri along damlo. 3Halatum lahin lahin chepu ponlo. “Tipit amangho pen matsi etum aphan arlong epakong-longpi poma?” 4Ansi halatum aphu chingthursi arlong kepakong-longtang thek-long-lo. Halabangso a-arlong thepik-lo. 5Halatum tipit arlo lutdamlo, lapen hadak inut ariso choi kelok chingchoisi ar-e anat kangnilun halatum thek-long-lo. Lapen halatum jasemet pherelo. 6Bonta alangli halatum aphan pulo, “Phereri. Ne Chinilo, hala thengparpan athak kethi Najareth asor a-Jisu aphansi nangtum rilo. Alangli thurtang-lo. Alangli ladak avelo. Langtha halatum alangliphan kebi adim lahelo. 7Bonta damra alangli sangho atum aphan lapen Pitor aphan labangso abirta thandamnon. Alangli nanglitum aphrang dam patenosi Galili adet dampo, lapen alangli nanglitum aphan kepu asonthotsi hadak nanglitum alangliphan thek damlongpo”.#Mat 26.32; Mar 14.28

8Lasi halatum thiri pen nangbarsi kekat pen damlo, pima halatum a-ok klemhurlo, lapen manghuphrong-lo. Halatum badu aphanta thangta pupedet-lo, pima halatum phereduk-lo.#16.8 Ajehak a-Baibel hastro barim along ke la angdengso 8 ansi dochot. Bonta akaprek a-Baibel hastro barim along ke angdengso 9-20 anta ketok do

Megdala Asor A-Meri Aphan Jisu Kecheklang

(Mat 28.9-10; Jon 20.11-18)

9Jisu kethi pen thurdet aphi, hithi arui aphrangsi arni adapprang alangli Megdala asor a-Meri aphan aphrangsi cheklang-lo. Ha aphrang ahut alangli labangpi along pen hi-i bang throksi phlung-lo. 10Labangpi damsi ari asangho atum aphan thandamlo. Halabangso ahut halatum chiru chernapsi dolo. 11Bonta alangli reng-lo lapen labangpi alangliphan thek-long-lo pu labangpi kethan alam halatum kroikredet-lo.

Asangho Bang Hini Aphan Jisu Kecheklang

(Luk 24.13-35)

12Labangso aphi halatum angbong bang hini atum rong anat kedam un ahut Jisu arje prekjek pen halatum aphan cheklang-lo. 13Latum vangsi akaprek atum aphan labangso alam thanlo, bonta halatum latum kethan alam kroikredet-lo.

Asangho Bang Kre Isi Aphan Jisu Kecheklang

(Mat 28.16-20; Luk 24.36-49; Jon 20.19-23; Akam 1.6-8)

14Aphisi sangho bang kre isi atum an kecho un ahut Jisu halatum aphan cheklang-lo. Ansi halatum akekroikre lapen aning buiklui hak huk apot alangli halatum aphan ingchek-lo, pima alangli kethi pen thurdet aphi alangliphan kethek-long atum kethek-long alam halatum kroikredet-lo. 15Alangli halatum aphan pulo, “Pirthe adang damra kadokave amonit aphan birta keme thandamnon.#Akam 1.8 16Kekroira baptisom ke-en abang aling jokji, bonta kekroikre abang aling aphan ado padoji. 17Kekroi atum aphan kemanghumeme akam hei hei keklemji ajakong piji. Halatum ne men pen hi-i atum aphan phlungji, lapen halatum adet kaprek kaprek alam pen ningjeji, 18halatum pherui hei hei otji, lapen bikar alangle jun setta halatum aphan phangnonedetji, halatum kesodet atum athak ari batji lapen halatum medetji.”

Jisu Aphan Sining Angsong Kerungpon

(Luk 24.50-53; Akam 1.9-11)

19Hemphu Jisu latum aphan la pudet aphi alangliphan sining athak rungpondet-lo, lapen hadak alangli Arnam ar-e anat ingnilo.#Akam 1.9-11 20Ansi sangho atum damsi bithe bitha pachethangdamlo. Hemphu halatum pen klem rap rap-lo, lapen kemanghumeme akam hei hei klemsi halatum kepachethang alam ahok pu aporman paklang-lo.#16.20 Ajehak a-Baibel hastro barim along ke la aber ketok angdengso 9,10 alamtheta ketokdun do.

Currently Selected:

MARK 16: KARBIBSI

Highlight

Copy