MARK 13

Kardomhemthepi Virdetji Pu Jisu Kethanmek

(Mat 24.1-2; Luk 21.5-6)

1Jisu Kardomhemthepi pen nangkebar ahut asangho inut abang alangliphan pulo, “Langtha kuru! Lahei hei a-arlong lapen ahem ko-an akelangme!”

2Jisu alangliphan thakdunsi pulo, “Nang la hem hei hei thek-long-lodi? Ladak kedo a-arlong isinat aphanta non kebi adim bibedetji; kadokave aphanta var-etji.”

Kesung Lapen Kechenek Hei Hei Alam

(Mat 24.3-14; Luk 21.7-19)

3Kardomhemthepi athengno kedo, Oliv anglong athak Jisu ingnilunsi kedo ahut alangli long baduta avedetsi Pitor, Jems, Jon lapen Andriu vangsi Jisu aphan arjujoilo, 4“Lahei hei komantu plangjima, lapen lahei hei kechekokji dok dok angthek kopijima, la netum aphan nethantha.”

5Jisu halatum aphan pulo, “Baduta nangtum aphan kepamanghu longledetjile, nangtum cherehurnon. 6Ake-ongpi amonit atum nemen pen vangsi pupo, ‘Neli helo alanglilo!’ Lapen halatum ake-ongpi atum aphan pamanghuji. 7Bonta ron kechedan lapen ron kechedan dojibon pu alamjir nangtum karjulong ahut nangtum matha-it-atri. La plangvek nangji, bonta lake kejut kalilang. 8Pima det ahotur det, lapen rat ahotur rat che-thurji. Bithe bitha adim chikli vangji lapen akhim thurji. Lahei hei ke oso pirthe kepahache ahut arlosomar atum akesung kepangcheng ben asonlang.

9“Bonta nangtum methangle chere-hurnon. Pima halatum nangtum aphan panepsi nangtum aphan arong arong kangsai amei hei hei arideng hodaiji. Sinagog hei hei along nangtum aphan areng pasoji; lapen ne pen apot halatum angno haki kepijisi nangtum det kechepahemphu atum lapen recho atum angno arjapji. 10Lapen aphrangke kadokave amonit atum angno birta keme than pachethangpet nangji. 11Lapen nangtum aphan nepsi kangsai anghoi angno nangkepon ahut nangtum kopisi ningjejima, lake aphrang pen ning biri, bonta hala-bangso apor ahut nangtum aphan nangkepi alam alingle nangtum ning-jenon. Pima nangtum keningjeji alam ke nangtum methang alam kalidetji, bonta lake Karjong Kangthir pensi vangji.#Mat 10.17-20; Luk 12.11-12 12Lapen akortesi akorte aphan kepathiji aphan, lapen aposi asopo aphan kepathiji aphan hodaiji; lapen osomar atum api-apo atum ahotur cheplangsi halatum aphan pathiji. 13Lapen ne men pen apot kadokave atum nangtum aphan hijimji, bonta kejut anta kechechakthek abang jokji.”#Mat 10.22

Ahirketanjit Akepherememe Amar Alam

(Mat 24.15-28; Luk 21.20-24)

14“Bonta hala ahirketanjit, akephere-meme amar karjaptherthedet nangji adim nangkarjapther nangtum thek-long-lote, (Keporhe abang labangso alam athe pachininang), halabangso ahut Judia adet kedo atum inglong hei hei anat pakatnang.#Dan 9.27; 11.31; 12.11 15Lapen amethang ahem asarnung angsong kedo abang ke amethang amar keche-endamji aphan hem arlo kedamjile pahirhenang. 16Lapen rit angbong kedo abangta achoi keding keche-endam-ji aphan ahem pachevoivenang.#Luk 17.31 17Bonta pei pei! Halabangso ahut oso kechopathe lapen mok kechu a-oso kedo a-arloso atum ko-an sungpoma! 18Bonta lake ningkreng ahut keplangpledetjile nangtum Arnam aphan choningrinon. 19Pima halabangso ahut monit atum kesung pho-oji. Arnam kepinchong apirthe ha kecheng pen non anta lason akesung avepinlang, lapen mo aphita avedetji, lason akesung pirthe athak doji.”#Dan 12.1; Kepa 7.14 20Hemphu halabangso arni hei hei pa-ong-e-edet asonte baduta jokjedetji apot-lo. Bonta alangli kangvaitang amonit atum aphan ajok hala hei hei arni pa-ong-edet-lo.

21“Halabangso ahut mane abang jongsi nangtum aphan, ‘Langtha, ladaksi Khristo do, kalite langtha alangli hadaksi do,’ pule pu lote, nangtum alangli kepu alam kroiri. 22Pima kechobei a-Khristo atum, lapen kechobei amontri atum thurji, lapen jongsi un tangte, kangvaitang atum aphanta kepamanghuji aphan halatum akemanghumeme angthek lapen kematha abidi kejutdet akam hei hei klemji. 23Nangtum cherehurnon. Halabangso ahut nanglele ako pen ne nangtum aphan la nangthanpet-lo.”

Monit A-Sopo Kevangthuji Alam

(Mat 24.29-31; Luk 21.25-28)

24“Bonta halabangso arni hei hei ahut, atheke halabangso akesungpik ahut jutdet aphi, arni ingtingthipji, lapen chiklota khelanledetji,#Isa 13.10; Eze 32.7; Jol 2.10,31; 3.15; Kepa 6.13 25lapen chiklolongso atum sining pen ingjuipreji, lapen sining athak kedo ajakong hei hei aphan terekji.#Isa 34.4; Jol 2.10; Kepa 6.13 26Ansi halabangso ahut Monit a-Sopo aphan ajakong kethe pen lapen adak-atur pen inghun angbong kevang thek-longji.#Dan 7.13; Kepa 1.7 27Halabangso ahut alangli pherangke atum aphan toisi kangvaitang atum aphan pirthe adang pen, atheke, pirthe kejut, sining kejut pen pangrumji.”

Thebo Arong Pen Kecharli Nangji Alam

(Mat 24.32-35; Luk 21.29-33)

28“Thebo arong pen lamlir charlitha. La aro ingdukvok cheplangsi arvo kechingjok pangcheng-lote barla nanghirji dokdok-lo pu nangtum chinilo. 29Lasonthotsi nangtum lahei hei kechekokbom thek-long-lote la tebok-het-lo, inghap amahang an nangletang-lo pule chinipamenon. 30Chenamsi ne nangtum aphan nangpulang, la kadokave kechekokji ahut non kerenglang amonit atum thi-et-ejilang. 31Sining lapen pirthe avedetji, bonta nelam hei hei ke doverji.”

Baduta Halabangso A-arni Lapen Apor Chinine

(Mat 24.36-44)

32“Bonta Po apar ke, sining apherangke atum tame, kalite Sopo settame, baduta halabangso arni lapen apor chinine.#Mat 24.36 33Inghongdingnon, lapen no kang-ar penle donon, pima labangso apor komantu vangjima, lake nangtum chinine. 34Lake amethang ahem che-o tekangsi adet kaprek kedam amonit asonthak thak-lo. Atheke alangli kedamji ahut aban atum aphan alangli hem palangtoilo. Alangli aban abangphutin aphan amethang methang keklem nangji akam pektekang-lo, lapen inghongding masi pusi inghap keton abang aphan hukum pitekang-lo.#Luk 12.36-38 35Tangte nangtum inghongdingnon, pima hem ahemphu komantusi vangjine, lake nangtum chinine. Lake arni kangsam ahutta thek, jirlo ahutta thek, voku ahutta thek, kalite adapprang ahutta thek. 36Alangli tongsekot pen kevang ahut, alangli nangtum aphan mekjangklip nangthek longledet nangji. 37Tangte ne nangtum aphan nangkepu alam ke kadokave aphantalo: nangtum inghong dingnon!”

Currently Selected:

MARK 13: KARBIBSI

Highlight

Copy