MALAKI 3
3
1Chininon, Nephrang tovar kesikji aphan Ne, Nepherangke toilo, lapen nangtum keribom a-Hemphu tongsekotsi Alangli Kardomhemthepi along vangpo; lapen nangtum nangning kedok kechejok aloh apherangke ta chininon, Alangli vangbomlo pusi muluk a-Hemphu pulo.#Mat 11.10; Mar 1.2; Luk 1.76; 7.27 2Bonta komatsi Alangli kevang arni an chechakthek jima, lapen Alangli kecheklang ahut arjapthek poma?
Pima Alangli rup aju kepavepin kethakji kepaso-i ame ason lapen pe kechok abang kekhornei asabon ason;#Jol 2.11; Kepa 6.17 3Alangli aju kepavepin kethakji lapen rup kecham abang asonsi ingnipo, lapen Alangli Levi asomar atum an aphan pangthirpo lapen halatum Hemphu aphan ahokpet adan kevanthekji aphan ser lapen rup kepangthir asonsi pangthirpo. 4Ansi hako arni lapen aphrang-phrang aningkan ason thak-thak Judah adet lapen Jerusalem adan Hemphu aning padokpo.
5Lapen Ne kangsaijisi nangtum adung patebokpo; lapen paludep atum aphan, beisa atum aphan, chobei aseme kedeng atum aphan, chongdatchot lapen heme jangreng lapen bang adet amonit atum aphuthak kechenek atum aphan, lapen Nephan kepherere atum aphan Ne prapjin pen haki chopo, pusi muluk a-Hemphu pulo.
Phankep Pen Ephan Kepi
6Pima Ne Hemphu-ke chelarle, la apotsi nangtum, O Jakob asomar atum nangtum vir-et-khangjang-lo lapu kali. 7Nangtum aphusar arni pen nangtum Ne hukum pen suilo lapen halahei kroikretang-lo. Nelong chiruinon, lapen Neta nangtum along chiruipo, pusi muluk a-Hemphu pulo. Bonta nangtum pulo, “Kopusonsi netum chiruithek poma?” 8Monit Arnam amar thisi ponpoma? Bonseta nangtum Nemar thisi pontang-lo. Bonta nangtum pulo, “Kosonsi netum Nangmar thilo?” Nangtum phankep pen ephan lapen Dan-heihei pen ajok. 9Nangtum isi ahirjuno pensi photang-lo, pima Nemar nangtum thibomlang, lapen bangso adet arat kedo-anta lo. 10Nehem kecho ahormu kedojile phankep pen ephan plenglim vannon; lapen ajok Nephan sat langnon pusi muluk a-Hemphu pulo, Ne nangtum aphan sining anghap-heihei ingpu nangjima nangnema lapen nangtum rim un-eset an ahirjume nangdung nangjima nangnema?#Levi 27.30; Kela 18.21-24; Keth 12.16; 14.22-29; Nehe 13.12 11Ne nangtum pen apot ingki ingket aphan ingchekpo, lapen la nangtum alongle thesere phangnone-detpo, lapen nangrit adrakha arikang athe pathethe pin pen dodelo pusi muluk a-Hemphu pulo. 12Lapen kadokave adet atum an nangtum rengme pusi pupetpo, pima nangtum ningkedok adet cheplangpo pusi muluk a-Hemphu pulo.
Arnam Akangjinso Kechak
13Nangtum Nebethursi lam kangtang pen ningjelo pusi Hemphu pulo. Seta nangtum pulo, “Kosonsi netum nangbethursi ningjeloma?” 14Nangtum pulo, “Arnam aphan kangduk ale ave. Alangli kepu alam kekroi mate muluk a-Hemphu angno netum chokchelo pu chiru-charnap pen chepaklang ale kopi? 15Non netum kethek-long ke ane kechepathe atumsi rengme; kehingno keklem atum thebom lapu anchot kali bonta halatum Arnam aphan asat kelang ahut seta halatum jok-lo.”
16Ansi Hemphu aphan kephere atum lahin lahin chepulo; lapen Hemphu halatum aphan anochedensi arjulo, Hemphu aphan kephere lapen Alangli men aphan kematha atum an aphan Alangli angno chekimo aloh athui along tokdet-lo. 17Ne keklemji arni halatum akenangsot akhi plangpo pusi muluk a-Hemphu pulo, lapen apo aphan kangduk asopo aphan apo kerai ason thak thaksi Ne halatum aphan raipo. 18Ansi nangtum puthot athikpet lapen kehingno atum angbong lapen inut Arnam aphan kangduk abang pen kangdukde abang atum angbong akeprek thek-longpo.
Currently Selected:
MALAKI 3: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
