MALAKI 2
2
1Lapen non, O kurusar atum, labangso alamtoi ke nangtum aphanlo. 2Nangtum jongsi arjuje, jongsi Nemen anong kepathejile nangtum mathathe pulote, Muluk a-Hemphu-si kepulo, Ne nangtum aphan ahirjuno nangtoipo lapen kepitang ahirjume-heihei aputhak pahirjunopo; chenamsi Ne halatum aphan pahirjunotang-lo, pima nangtum nangning arlo la chebibedet-lo. 3Chininon, nangtum achili aphan Ne ingchek po, lapen nangtum karkliji aphan kevan api-heihei ahi pen nangtum amahang hi thippo, lapen Ne ingno pen nangtum aphan la along pondet po. Lapen Ne nangtum aphan bangso ahukum pilo pu nangtum chinipo. 4Lapen Ne nangtum aphan bangso ahukum pilo pu nangtum chinipo. Pima Ne Kechejok aloh Levi pen pathiktang ason doverpo, pusi muluk a-Hemphu pulo.#Kela 3.11-13 5Ne alangli pen Kechejok aloh ke chethe lapen ningkangsam lapen halatum Nephan kephere thekjisi Ne alangliphan lahei pilo; lapen alangli Ne men aphan man pipo.#Kela 25.12 6Ahok akethan alangli angho along dolo lapen alangli ingho pen ahok-he ason barbelo. Alangli ningkangsam lapen athikpetsi nelipen kengkam chejorlo, lapen ongdung atum kehingno keklem pen khang-lo. 7Pima kurusar angho kechinithek donangji, lapen monit atum alangli angho pen akethan ri nangji, pima alangli ke muluk a-Hemphu apherangke lo. 8Bonta nangtum bangso atovar pen suitang-lo; nangtum akethan pen ajok ongdung atum aphan pap paklemlo; nangtum Levi kechejok aloh ingditang-lo pusi muluk a-Hemphu pulo. 9Lasi Ne ta nangtum aphan pahijimlo lapen kadokave angno pabitang-lo, atheke nangtum Ne tovar-heihei rimredet-lo bonta nangtum akethan along kepaprek chepaklang-lo.
Rat Atum Arnam Aphan Kekroithipthe
10Ilitum apo inutnat kalima? Inutpet Arnamsi etum aphan epinchong-lo kalima? Tangte etum pi athesi lahin lahin akekroi avedet-loma, lapen etum ephusar atum kechejok aloh hijimlo! 11Judah atum akekroi avedet-lo, lapen Israel atum lapen Jerusalem asor kehijim meme akam klemtang-lo, pima Judah Hemphu kechinghon kangthir adim pahijimtang-lo, lapen bang adet a-arnam asopi aphan piso pangritang-lo. 12Bangso akam keklem abang mate muluk a-Hemphu along dan kevan abangphutin aphan Hemphu, Jakob pe ahem pen pavir nang.
13Lapen nangtum la ta klemtang-lo. Nangtum amek-kri pen kechiru lapen kar-em-heihei pensi Hemphu adovan dip-phlup-lo, pima Alangli dan-heihei langle mate jinso si nangtum arideng pen dan dengdelo. 14Nangtum pulo, “Kopi athesi alangli dengdeloma?” Athe Hemphu-si nang lapen nangriso ahut kepangri apiso angbong kechejok ahakilo; lapen bangpi aphan kechechak ateng nangli akekroi chepavedet-lo, tebonseta kechejok aloh pen ajok labangpi nangli pen dorapver lapen nangli pisolo. 15Inut pet a-Arnamle kepinchongpet lapen karjong achethe ephan epareng-lo kalima? Lapen Alangli kopisi ninghang-loma? Ahokpet Arnam asomar. Lasi nanglitum methang aphanle chematharep non, lapen baduta riso ahut pen apara kedolang apiso aphan akekroi chepavedet-rinon. 16Pima Ne piso kechiti hijim-lo, la Israel atum a-Arnam Hemphu-si kepulo, lapen kephangno akam amethang ape pen dipthip-lo pusi muluk a-Hemphu pulo. Lasi nangtum methang aphanle chematharep non lapen akekroi chepavedet-rinon.
Kangsai Arni Tebok-het-lo
17Nangtum alam pen nangtum Hemphu aphan palak-lo. Tebonseta nangtum pulo, “Netum kopusonsi Alangliphan palak-loma?” “Badutame kehingno akam keklem lake Hemphu amek angden mesen lapen Alangli lahei aning arong-lo,” pu kepu pen ajok mate “Kodaksi ahokpet a-Arnam kedolo?” pu kepu pen ajok.
Currently Selected:
MALAKI 2: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
