MALAKI 1
1
Israel Aphan Hemphu Kanghon
1Israel aphan Malaki pen ajok Hemphu kethak alam. 2#Isa 34.5-17; 63.1-6; Jer 49.7-22; Eze 25.12-14; 35.1-15; Amo 1.11-12; Oba 1-14 “Ne nangtum aphan chinghonlo,” Hemphu pulo, Bonta nangtum pulo, “Nang kosonsi nang inghonloma?” Iso lapen Jakob atum korte kalima? Hemphu-si pulo. “Ne Jakob aphan chinghonlo,#Rom 9.13 3bonta Iso aphan hijimlo: lapen anglongta ho-or pavedet-lo, lapen kejejangtang ajo asirung atum aphansi padotoilo.” 4Jongsi Edom pulo, “Netum abeng saidelo bonta kevir-rang an kimthupo,” muluk a-Hemphu-si kepulo, “Halatum kim tahai bonta Ne phri-etji, halatum kehingno alongri lo pu papulongset an, Hemphu aningkethi bangso arat aphan doverpo.” 5Nangmethang amek pen la thek-longpo, lapen nangtum pupo, “Israel ahoi apar anta Hemphu anong thepik-lo!”
Kurusar Atum Aphan Hemphu Kangchek
6Asopo apo aphan man pi, lapen ban ta ahemphu aphan man pi. Jongsi Ne inut apolo tangte Ne man konat-lo? Lapen jongsi inut ahemphu tangte Nephan kephere konat? Muluk a-Hemphu-si nangtum aphan pulo. O Nemen kelangrem akurusar atum. Nangtum pulo, “Netum kopusonsi Nangmen langrem loma?” 7Kangthirthe a-an Ne dovan athak kepi pen ajok. Lapen nangtum pulo, “Netum kopusonsi la pangthirthelo?” Hemphu adovan langrem un pu kematha pen ajok. 8Nangtum keselok api karkliji aphan kevan ahut, la kehingno kalima? Lapen nangtum ketekok mate kesodet api kevan ahut, la kehingno kalima? Lahei nangtum a-Govornor aphanle pinon; alangli la aning dok poma mate nangphan kangjinso paklang poma? Muluk a-Hemphu-si kepulo.#Keth 15.21
9Lapen non etum aphan Arnam kangjinsoji Alangli ning kepadokji aphan hangnon. Nangtum ari pen lason adan kevan, nangtum angbong mane aphan Alangli kangjinso paklangjima? Muluk a-Hemphu-si kepulo. 10Oh nangtum angbong pen inutbak nedovan athak ale kave pin pen me kekaikedet-jile (Kardomhem) anghap-heihei inghapphlup asonte me-o ji! Ne nangtum along thang ning arong ave, muluk a-Hemphu-si kepulo, lapen nangtum arideng pen kevan adan Ne dengde. 11Athe Nihang pen Nichi an, khei-heihei angbong Nemen thelo, lapen alongtinta Ne men aphan mephik thorlo, lapen kangthir adan pilo; athe khei-heihei angbong Nemen thelo, pusi muluk a-Hemphu pulo. 12Bonta Hemphu adan ke ingthirthe lapen kecho ahormu hijimlo pu kepu ahut nangtum Nemen pangthirthe-det-lo. 13“La kopi kelak-khrup nang-loma,” pusi nangtum pulo, lapen nangtum Nenat nangnokan chebilo, pusi muluk a-Hemphu pulo. Nangtum nethi bor-i pen mate ketekok mate kesodet, lapen la nangtum athok-ajir lo pusi nangtum vanlo! Lahei nangtum arideng pen Ne deng apot loma? Hemphu pulo. 14Kepacherei abang aphuthak ahirjuno padonang! Atheke alangli hur angbong alo abiresak do seta chechaksi api si Hemphu aphan karklijisi pilo; athe Ne helo kethenei arecholo, muluk a-Hemphu si kepulo, lapen khei-heihei atum angbong Ne men aphan phere.
Currently Selected:
MALAKI 1: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
