LUK 9

Jisu Sangho Bangkrehini Atum Aphan Ketoi

(Mat 10.5-15; Mar 6.7-13)

1Jisu hala bangkrehini atum aphan hangpetsi pangrumlo, lapen kadokave ahi-i atum aphuthak lapen keso hei hei kepameji ajakong pilo. 2Anke Arnam Arat alamjir kepachethangji lapen keso atum aphan kepameji aphan alangli halatum aphan toilo, lapen pulo, 3“Tovar aphan thangta ponri: chin tame, kechorek ajamborong tame, an tame, tangka tame lapen choita akele pon nangne.#Luk 10.4-11; Akam 13.51 4Nangtum kelut damji ahem aling, halabangso arongsopi pen barthuthetik ke hadak-le dobomnon.#Mat 16.14; Mar 8.28; Luk 9.19 5Lapen nangtum aphan kechakche arongsopi pen nangtum kebarji ahut, halatum aphan kepachere angthek ason, nangtum akeng alongle aduk cheho tekangnon!”#Luk 10.4-11; Akam 13.51

6Sangho atum nangbarlo, lapen arong arong Birta Keme pachethang-lo, lapen monit atum akeso hei heita pame ponbomlo.

Herod Aningbi

(Mat 14.1-12; Mar 6.14-29)

7Herod, atheke Galili a-Govornor, la kadokave keplangbom alam an arjulong-lo; alangli abidi jutdet-lo. Thangbakma manene atum ke Jon kethi pen rengthutang-lo pusi pulo,#Mat 16.14; Mar 8.28; Luk 9.19 8lapen manene atum ke Elijah nangcheklang tang-lo pusi pulo, lapen akaprek atum ke hako ahut amontri inut rengthutang-lo pusi pulo.#Mat 16.14; Mar 8.28; Luk 9.19 9Herod pulo, “Ne Jon angphun pangthantang-lo; bonta ne lahei hei alamjir arju longbomlang, labangso abang komatma?” Lapen alangli Jisu aphan kethek longjisi bor-ibomlo.

Jisu Bang Suri Pho Aphan An Kepacho

(Mat 14.13-21; Mar 6.30-44; Jon 6.1-14)

10Ketoitang atum nangchevoithulo, lapen halatum kopi pisi klemtang-lo, lake Jisu aphan chethanlo. Lapen alangli halatum aphan ponsi, chepapreksi Bethsaida pu arongsopi damjuilo. 11Bonta armu atum labangso alam arjulongsi Jisu aphi phi dunlo. Jisu halatum aphan aning arong pen chak-lo, lapen Arnam Arat alamjir ningjebomlo, lapen akeso kepame nangji atum aphan alangli pamethulo.

12Arni kangsam ahut sangho bangkrehini atum vangsi Jisu aphan pulo, “Latum dak adung arei arong hei hei lapen ahavar padamra kechoji amar lapen ke-iji adim kelongjile armu atum aphan toi iknon, pima dak ke kangsamri adimlo.”

13Bonta Jisu halatum aphan pulo, “Nangtum methang amat-le halatum aphan kopine kecho ahormu pinon.” Latum thak-lo, “Netum along him plangpho lapen lang a-ok jonni ansi dochot. Netum damra la kadokave armu aphan him nam damnangji putong nangli kepuma?” 14Pima hadak bang suripho an bak amonit do. Jisu asangho atum aphan pulo, “Bang phokep, phokep thak-ra, asong asongle halatum aphan papangni chom-chom non.”

15Sangho atum lapuson klemdet aphi, 16him plangpho lapen lang a-ok jonni Jisu ensi sining anat langsi Arnam aphan chorolo lapen ahirjume hangsi beng-lo, lapen armu atum aphan keparonjisi sangho atum arideng pilo. 17Halatum chosi ingkrang-lo, lapen halatum kepahin achet-abet hum etsi ton krehini papleng-lo.

Jisu Ke Kebattang Abang Pusi Pitor Kepu

(Mat 16.13-19; Mar 8.27-29)

18Arni isi Jisu inutpetsi Arnam ardombomlo, lapen asangho atum alangli long vang-lo. Jisu halatum aphan arjulo, “Ne matma, lake armu atum pisi puloma?” 19Ansi halatum thak-lo, “Nanglike Jon Baptist pusi manene atum pulo, manene atum ke Elijah, manene atum ke hako ahut amontri inut rengthutang-lo pusi kepu.”#Mat 14.1-2; Mar 6.14-15; Luk 9.7-8

20“Bonta ne komatma? Nangtum pisi pujima?” Lapen Pitor thak-lo, “Nanglike Arnam kebattang Abang-lo.”#Jon 6.68-69

Jisu Amethang Akesung Lapen Kethi Alamjir Kepu

(Mat 16.20-28; Mar 8.30—9.1)

21Ansi badu aphanta thanri pusi Jisu halatum aphan sodak ahukum pilo. 22Alangli halatum aphan pulo, “Monit asopo kesung chechak-o nangji lapen sarmar atum, Kurusar atum lapen Aron thekser atum alangliphan chakchedetji lapen alangli bang arideng thiji, bonta nithom arni alangli thurji, la kadokave plangvek nangji.”

23Ansi alangli halatum do-an aphan pulo, “Mane abang jongsi nephi phi kedunji aning hang-lo tangte alangli amethang aphan chemathathedet-ra lapen arnivang amethang athengparpan cheponra nephi phi padunkrinang.#Mat 10.38; Luk 14.27 24Pima amethang apran kecheraiji aning kehang abang aling ke la pangbodetji, bonta ne pen apot amethang apran ingbodet lote alangli ke amethang apran cheraisi pajokji.#Mat 10.39; Luk 17.33; Jon 12.25 25Pima mane abang pirthe adang long-et setta amethangle ingbodette, mate asap vir-lote alangli kopi ale doma! 26Mane abang jongsi ne lapen ne kethan alam pen apot therakduk lote, alangli pen apot Monit a-Sopota mo amethang adak atur pen lapen Po lapen pherangke Kangthir atum adak-atur pen kevangji ahut therakdukji. 27Bonta ne nangtum aphan athikpetsi nangpulang, ladak karjapphrong atum angbong manene atum Arnam arat thek longletik ke thithedetji.”

Jisu Arje Kaprek Kechepharlo

(Mat 17.1-8; Mar 9.2-8)

28Jisu lahei hei alam pudet pen ni nerkep anbak aphi alangli Pitor, Jon lapen Jems aphan cheponsi Arnam kardom damji aphan inglong arludamlo.#2 Pit 1.17-18 29Alangli Arnam kardom ahut alangli mahang a-arje chepharlolo lapen alangli keche-um ape lokphlansi sining kebirlak ason thakthak turbong-lo. 30Ansi banghini amonit alangli pen chingkilo. Latum ke Moses lapen Elijahlo. 31Latum adak atur pen cheklang-lo, lapen Arnam kemang akam Jerusalem along kechekokji dokdok alam hei hei atheke, Jisu kethiji alamjir hei heisi chingkilo. 32Pitor lapen ari asangho atum amek jangklip-lo, bonta halatum amek prangdaksi alangli dak atur lapen alangli long karjapphrong banghini amonit thek long-lo. 33Halatum alangli pen kechekak ahut Pitor Jisu aphan pulo, “Hemphu, etum dak kedo ko-an akeme! Mandu humthom ili kimlonang; nangli phan ehum, Moses aphan ehum lapen ehumke Elijah aphan.” (Alangli kopisi kepuma, lake alangli chininedet-lo.)

34Bonta alangli keningje ahut inghun ethan vangsi halatum aphan binthip-lo; lapen halatum aphan inghun kebinthip ahut sangho atum pherelo. 35Inghun athan pen ase vangsi pulo, “Labangso abang ke ne-Sopolo, ne kangvaitang abang-lo, alangphan arju phrongnon.”#Luk 22.24

36Lapen ase jutdet aphi, halatum Jisu aphan inutpetsi thek long-lo, Sangho atum doklipsi halabangso ahut badu aphanta kethek long alam chethanthedet-lo.

Jisu Hi-i Kepho A-oso Aphan Kepame

(Mat 17.14-18; Mar 9.14-27)

37Puthot arni halatum inglong pen nanghirlo, lapen armu akethepi atum Jisu pen chetong-lo. 38Armu angbong pen inut amonit hangsersi pulo, “Thanbang, ne sopo aphan langtha; ne sopo po epumpet. 39Ahut pen ahut hi-i alangphan nepbom lapen hangser titi. Hi-i alangphan hevengpo, angho angpip pasupo; lapen avi pachethai longletik ke alangphan o-edet ason. 40Bangso ahi-i aphan kephlungji aphan neli nangli sangho atum aphan choningrilo, bonta alanglitum un-edet-lo.” 41Jisu thaksi pulo, “O, Nang kekroithekthe lapen kechingkino atum! Komantu an ne nangtum along do nangji langma?” Jisu halabangso amonit aphan pulo, “Nangli sopo dak-le vannon.” 42Halabangso a-oso kevang ahut hi-i alangphan hevengbupsi pacherdak-lo. Jisu hi-i langno aphan ingchek-lo, lapen oso aphan pamethusi apo arideng pithulo. 43Kadokave atum Arnam ajakong pen apot manghuhak-lo.

Jisu Amethang Kethiji Alam Batai Hini Aphong Kepu

(Mat 17.14-18; Mar 9.14-27)

Kadokave atum Jisu keklembom akam aphan kemanghuphrong ahut alangli asangho atum aphan pulo. 44“Ne nangtum aphan nangkethanji alam arju pamenon! Pima Monit a-Sopo aphan ke monit atum arideng hodaidetji.” 45Bonta sangho atum labangso alam kopima, lake chininedet-lo. Kechini thekthedetji aphansi halatum angno pen la patu tang-lo, lapen la athe kopima pura karjuji aphanta halatum haihedet-lo.

Akethenei Abang

(Mat 18.1-5; Mar 9.33-37)

46Sangho atum angbong matsi theneima pu alam kechedansei dolo.#Luk 22.24 47Jisu halatum kematha alam chinisi, inut a-oso ensi amethang adung parjap-lo, 48lapen halatum aphan pulo, “Ne men pen labangso a-oso aphan kechak abang ke nephanta chak-lo; lapen nephan kechak abang aling ke nephan nangketoi abang aphanta chak-lo. Pima nangtum kadokave angbong akebinei abangsi aketheneilo.”#Mat 10.40; Luk 10.16; Jon 13.20

Nangtum Abethurthe Abang Ke Nangtum Abelo

(Mar 9.38-40)

49Lapen Jon pulo, “Hemphu, inut amonit nangmen pen hi-i atum aphan kephlung netum thek long-lo, lapen netum alangliphan kekhangji bor-ilo, pima alangli ke netum along nangkedun abang kalilo.” 50Jisu alangliphan lapen akaprek asangho atum aphan pulo, “Nangtum kekhangji bor-iri, pima nangtum abekethurthe abang ke nangtum abelo.”

Samaria Asor Jisu Aphan Kechakche

51Alangliphan sining keponji ahut nangleji dokdoksi Jisu Jerusalem kedamji pangcheng-lo. 52Alangli aphrang amethang apherangke atum aphan toilo, lapen halatum damsi Jisu aphan kesik pijisi Samaria arong lut damlo. 53Bonta halatum Jisu aphan chakchedet-lo, pima alangli Jerusalem kedamji pu chinilorlo. 54Lapen sangho atum, Jems lapen Jon, la thek longsi pulo, “Hemphu, latum aphan kepavirdetjile sining ame nang pahir lonang, lake nangning hangma?”#2 Rec 1.9-16 55Jisu chetevarsi halatum aphan ingchek-lo. 56Ansi Jisu lapen asangho atum arong kaprek damjuilo.

Jisu Asangho Keplangji Atum

(Mat 8.19-22)

57Alangli tovar kedambom ahut mane abang alangliphan pulo, “Nangli kedamji aling neli nangli phi phi dunkripo.” 58Jisu alangliphan thak-lo, “Sirungta angthor do, lapen vo atumta atar do, bonta Monit a-Sopo ke aphu kebira kesangji adim ave.” 59Alangli anut kaprek aphan pulo, “Nephi phi nangdun non.” Bonta alangli pulo, “Hemphu, aphrangke neli po aphan nepapip longtha,” 60Jisu alangliphan thak-lo, “Kethitang atumle amethang kethitang atum aphan pachepip nang, bonta nangke bithe bitha Arnam arat alamjir pachethang damnon.” 61Anut kaprek amonit pulo, “Ne nangphi phi dunkriji Hemphu; bonta aphrangsi neli hem chedamsi neli hem asor aphan kechepadi damji ahukum neli pitha.”#1 Rec 19.20 62Jisu alangliphan pulo, “Badutame, langnoi otdetsi aphi anat kechelang abang ke Arnam Arat aphan ale ave.”

Currently Selected:

LUK 9: KARBIBSI

Highlight

Copy